Nasusulay ka kon naruruyag ka ha pagbuhat hin usa nga butang—labi na kon sayop ito. Pananglitan, samtang namamalit ka, nakakita ka hin makaruruyag nga butang. Nahunahuna mo nga masayon la kawaton ito nga diri ka madadakpan. Kondi an imo konsensya diri natugot! Salit ginbalewaray mo ito ngan ginkalimtan. Hito nga takna, tapos na an pagsulay ngan ikaw an nagdaog.

AN GINSISIRING HAN BIBLIA

Diri masisiring nga maraot an usa ka tawo nga nasusulay. An Biblia nasiring nga kita ngatanan nakakaeksperyensya hin pagsulay. (1 Corinto 10:13) An importante amo an aton magigin reaksyon hito. Gintitipigan han iba an sayop nga mga hingyap, salit nadadara hira. Samtang ginkakalimtan dayon ito han iba ngan gintatagad nga sayop.

“An kada tagsa nasasarihan kon nadadani ngan nasusulay hiya han iya kalugaringon nga hingyap.”—Santiago 1:14.

Iginpapakita han Biblia an mga pitad nga nagtutugway ha sayop nga buhat. An Santiago 1:15 nasiring: “An [sayop nga] hingyap, kon igburod na, nanganganak hin sala.” Ha simple nga pagkayakan, kon ginhihinunahuna naton an sayop nga hingyap, an posibilidad nga makasayop pariho ha posibilidad nga an burod sigurado nga manganganak. Kondi malilikyan naton nga magin uripon ha sayop nga hingyap. Mahimo naton maatohan ito.

KON PAONAN-O MAKAKABULIG AN BIBLIA

Sugad la nga an hunahuna may kapas ha pagtipig hin sayop nga hingyap, may kapas liwat ito ha pagkuha hito nga hingyap ha hunahuna. Paonan-o? Pinaagi ha pagpokus ha iba nga butang—usa nga buruhaton, usa nga pakig-istorya hin sangkay, o usa nga makapadasig nga panhitabo. (Filipos 4:8) Dugang pa, makakabulig liwat kon papamalandungon naton an resulta kon magpapadara kita ha pagsulay, nga mahimo makadaot ha aton ha emosyonal, pisikal, ngan espirituwal. (Deuteronomio 32:29) Daku liwat nga bulig an pag-ampo. Hi Jesu-Kristo nagsiring: “Padayon kamo nga . . . mag-ampo basi diri kamo madara han pagsulay.”—Mateo 26:41.

“Ayaw kamo palimbong: An Dios diri angay tamayon. Kay anoman an iginsasabwag han usa nga tawo, ito liwat an iya aanihon.” —Galacia 6:7.

AN REYALIDAD

Tagda an pagsulay ha kon ano gud ito—usa nga paon nga mahimo magtugway ha diri naghuhunahuna, inosente, ngan diri mabinantayon nga tawo ngadto ha peligro. (Santiago 1:14) Tinuod gud ini labi na kon nasusulay ka ha pagbuhat hin seksuwal nga imoralidad, nga mahimo magtugway ha kadaot.—Proberbios 7:22, 23.

KON PAONAN-O MAKAKABULIG AN BIBLIA

Hi Jesu-Kristo nagsiring: “Kon an imo too nga mata nagigin hinungdan han imo pakasala, lukata ito ngan ilabog.” (Mateo 5:29) Syempre, diri literal an ginhihisgotan ni Jesus! Lugod, karuyag sidngon niya nga kon karuyag naton lipayon an Dios ngan magkaada kinabuhi nga dayon, kinahanglan naton ‘patayon’ an bahin han aton lawas may kalabotan ha sayop nga buhat. (Colosas 3:5) Nangangahulogan ito nga kinahanglan nga magin determinado kita nga atohan ito. “Birika an akon mga mata tikang ha pagkinita ha paglabaw [“waray pulos,” NW],” nag-ampo an usa nga matinumanon nga surugoon han Dios.—Salmos 119:37.

Oo, makuri an pagpugong ha kalugaringon. Ngani, “an lawas maluya.” (Mateo 26:41) Salit magsasayop kita. Kondi, kon tinuod nga nagbabasol kita ngan nangangalimbasog nga diri na magbuhat hin sayop, an aton Maglalarang, hi Jehova nga Dios, magigin “malolooyon ngan puno hin grasia” ha aton. (Salmos 103:8) Makaparig-on gud ito!

“Kon imo panginanoon, O Jehova, an mga karat-an, O Ginoo, hin-o pa in matindog?” —Salmos 130:3.