HI Soo-jeong nga usa nga guidance counselor ha hayskul ha South Korea nagamit hin mga video tikang ha website nga jw.org ha pagtutdo ha iya klase. Hiya nagsiring: “Makalilipay gud an reaksyon han mga estudyante ha Ano ang Tunay na Kaibigan? nga video! Katapos nira ito makita, hira nagsiring hin sugad hini: ‘Yana ko pa gud la mahunahuna nga sugad ngay-an hito an pakigsangkay. Ito nga paagi han pagtutdo bag-o gud ha amon!’ May mga nagsiring nga kikitaon nira an website kon kinahanglan nira hin sagdon.” Hi Soo-jeong nagdugang: “Iginrekomendar ko ini nga video ha iba nga titser, ngan nalipay gud hira ha pagkaada hiton maopay nga garamiton ha pagtutdo.”

An usa pa nga video nga nakabulig gud ha damu nga estudyante ha South Korea amo an whiteboard animation nga Talunin ang Bully Nang Hindi Nakikipag-away. Usa nga titser nga nagtatrabaho ha Juvenile Violence Prevention Foundation an nagpasalida hito ha mga estudyante. “Nakuha han video an interes han damu nga kabataan tungod han makaruruyag nga artwork hito,” siring niya. “Dugang pa, praktikal an video tungod kay diri la ito nagtututdo kon paonan-o maaatubang an kamadarahog kondi kon paonan-o liwat ito malilikyan.” An foundation nangaro hin permiso ha paggamit han video ha ira mga lektyur ha mga eskwelahan ha elementarya ngan hayskul, ngan gintugotan hira. Bisan an mga pulis nagamit han mga video ha jw.org.

Kon waray ka pa makaabri han website, alayon kitaa ito. Masayon ito gamiton, ngan libre an pag-download han mga audio, video, Biblia, ngan han iba nga publikasyon.