AN GINSISIRING HAN PIPIRA

An ginsisingba han mga Israelita usa nga brutal nga “dios han girra.”

AN GINSISIRING HAN BIBLIA

An mga nasud nga napirde han Israel bayolente gud ngan makangingirhat an mga binuhatan, upod na an bestialidad, insesto, ngan paghalad hin bata. Katapos hin mga siglo nga iginhatag ha ira basi magbag-o, an Dios nagsiring: “Kay ha ngatanan hini nahugawan an mga nasud nga akon ginpaiwas tikang ha iyo atubangan.”—Lebitiko 18:21-25; Jeremias 7:31.

“Tungud han pagkamaraut hini nga mga nasud, hi Jehova nagpaiwas ha ira tikang ha imo atubangan.”—Deuteronomio 9:5.

BANGIN MAOBSERBARAN MO

Ha damu nga girra, an mga lider han relihiyon han magkaaway nga grupo nasiring nga nadapig ha ira an Dios. “Pirme may bahin an relihiyon ha tanan nga girra,” siring han libro nga The Causes of War.

AN GINSISIRING HAN BIBLIA

Waray tagi hin awtorisasyon an mga Kristiano nga makiggirra ha mga nakontra ha ira. Hi apostol Pablo nagsurat ha iya mga igkasi-Kristiano: “Kon posible, buhata an iyo gimaopayi ha pakigmurayaw ha ngatanan nga tawo. . . . Ayaw kamo pagbulos.”—Roma 12:18, 19.

Imbes nga sugoon ni Jesus an iya mga sumurunod nga makiggirra, hiya nagsiring ha ira: “Padayon nga higugmaa an iyo kaaway ngan ig-ampo an nagtitimaraot ha iyo, basi mapamatud-an niyo nga mga anak kamo han iyo Amay nga aadto ha langit.” (Mateo 5:44, 45) Bisan kon nakikiggirra an nasud nga ira gin-uukyan, an mga Kristiano sadang magpabilin nga neutral, ‘diri kanan kalibotan.’ (Juan 15:19) Kon karuyag han Dios nga higugmaon han iya magsiringba ha tanan nga nasud an mga nakontra ha ira ngan magpabilin nga bulag ha kalibotan, paonan-o masisiring nga may gindadapigan an Dios ha mga girra yana?

“An akon ginhadian diri dinhi hini nga kalibotan. Kon aanhi ha kalibotan an akon ginhadian, makikig-away unta an akon mga sumurunod basi diri ako maitubyan ha mga Judio. Pero sugad han ginsiring ko, an akon ginhadian diri dinhi hini nga kalibotan.”—Juan 18:36.

AN GINSISIRING HAN PIPIRA

Diri mapupugngan an girra. “Diri mawawara an mga girra,” siring han libro nga War and Power in the 21st Century. “Imposible magkaada nagpapadayon nga kamurayawan ha bug-os nga kalibotan hini nga siglo.”

AN GINSISIRING HAN BIBLIA

Mawawaray na girra kon waray na maghihingyap nga makiggirra. Tungod hito, magios an Ginhadian han Dios nga usa nga tinuod nga gobyerno nga magmamando tikang ha langit ha pagbungkag han tanan nga armas ngan ha pagtutdo ha mga tawo nga magin mamurayawon. Ginpapasarig kita han Biblia nga an Dios “mahatag hin kahusayan [o, pagtadong] mahatungud han magkusug nga mga nasud ha kahigrayoan: ngan ira hihimoon an ira mga kampilan nga mga arado, ngan an ira mga bangkaw nga mga garab nga ipangarapon; an nasud diri mawaay hin kampilan patok ha nasud, diri na man hira magaaram han away.”—Mika 4:3.

An Biblia nagtututdo nga ha pagmando han Ginhadian han Dios waray na gobyerno nga mag-aaragway para ha ira kalugaringon nga intereses, waray na diri patas nga mga balaud nga nag-aaghat hin pagrebelde, o diskriminasyon nga nag-aaghat hin pagkabahin-bahin. Sugad nga resulta, mawawaray na girra. An Dios nagsasaad: “Diri hira magdadaut o diri maggugunaw . . . kay an tuna mapupuno han hibaro ni Jehova, sugad nga an katubigan nagpupuno han dagat.”—Isaias 11:9.

“Napaukoy niya an mga pag-away tubtub ha katapusan han tuna; Iya nababari an pana, ngan nautud niya an bankaw: Ginsusunug niya an mga karomata ha kalayo.”—Salmos 46:9.