Paglakat ha Kinaadman Mahitungod han Kalibotan

“Padayon ha paglakat ha kinaadman ngada hadton aadto ha gawas.”​—KOLOSAS 4:​5, NW.

1. Ano an inatubang han siyahan nga mga Kristiano, ngan ano nga sagdon an iginhatag ni Pablo ha kongregasyon ha Kolosas?

AN SIYAHAN nga mga Kristiano nga nag-uukoy ha mga siyudad han Romano nga kalibotan padayon nga naatubang ha idolatriya, imoral nga kalipayan, ngan pagano nga mga rituwal ngan mga kustomre. Adton nag-ukoy ha Kolosas, usa ka siyudad ha weste-sentral nga Asia Minor, sigurado nga inatubang ha pagsingba han iroy-nga-diosa ngan espiritismo han tubo nga mga Pregyano, han pagano nga pilosopiya han Griego nga mga umurokoy, ngan han Judaismo han Judio nga nasasakopan. Hi apostol Pablo nagsagdon ha Kristiano nga kongregasyon nga “padayon ha paglakat ha kinaadman” ngada ha sugad nga mga “taga gawas.”​—Kolosas 4:​5, NW.

2. Kay ano nga an mga Saksi ni Jehova yana nga adlaw kinahanglan maglakat ha kinaadman ngada hadton aadto ha gawas?

² Yana nga adlaw, an mga Saksi ni Jehova naatubang hin pariho sayop nga mga buhat, ngan labaw pa gud. Salit, hira liwat, kinahanglan magpakita hin kinaadman ha ira relasyon hadton ha gawas han totoo Kristiano nga ­kongregasyon. Damu nga mga tawo ha relihiyoso ngan politikal nga grupo sugad man ha media an nakontra ha mga Saksi ni Jehova. An iba hini nga mga parakontra, pinaagi han dayag nga pag-atake, labaw kaagsub, pinaagi han pasambingay, nangangalimbasug ha paghugaw han reputasyon han mga Saksi ni Je­hova ngan nag-aaghat han maraut nga pagtrato ha ira. Sugad la han siyahan nga mga Kristiano nga gin-isip sugad nga mga panatiko  ngan pelig­roso pa ngani nga “sekta,” an mga Saksi ni Jehova yana nga adlaw agsub nga amo an puntirya han maraut nga pagtrato ngan sayop nga mga ideya.​—Buhat 24:​14; 1 Pedro 4:4.

Paglampos han Maraut nga Pagtrato

3, 4. (a) Kay ano nga an totoo nga mga Kristiano diri gud hihigugmaon han kalibotan, kondi ano an sadang pangalimbasugan naton nga buhaton? (b) Ano an iginsurat han usa nga awtor mahitungod han mga Saksi ni Jehova nga nabilanggo ha Nazi nga bilanggoan?

³ An totoo nga mga Kristiano diri naglalaom nga higugmaon han kalibotan, nga, sumala kan apostol Juan, “nasandig ha gahum han maraut nga usa.” (1 Juan 5:​19, NW) Kondi, an Biblia nagdadasig ha mga Kristiano nga mangalimbasug nga daugon an mga indibiduwal ngadto kan Jehova ngan ha iya putli nga pagsingba. Binubuhat naton ito pinaagi han direkta nga pagtestigo ngan pinaagi liwat han aton maopay nga paggawi. Hi apostol Pedro nagsurat: “Manggawi kamo hin maopay ha butnga han mga nasud, nga, bisan kon naglilibak hira ha iyo nga baga in magburuhat kamo hin maraut, ha pagtan-aw han iyo magopay nga mga binuhatan ira unta paghimayaon an Dios ha adlaw han iya pagduaw.”​—1 Pedro 2:12.

⁴ Ha iya libro nga Forgive​—But Do Not Forget, an awtor nga hi Sylvia Salvesen nagsiring mahitungod han kababayin-an nga mga Saksi nga iya igkasi mga bilanggo ha Nazi nga bilanggoan: “Adton duha, hi Käthe ngan Margarethe, ngan damu iba pa, daku an naibulig ha akon, diri la pinaagi han ira pagtoo kondi ha praktikal nga mga butang. Nagbiling hira para ha amon han siyahan limpyo nga mga trapo para han amon mga samad . . . Ha haliput nga istorya kaupod namon an mga tawo nga naghandum ha amon hin maopay, ngan nagpakita han ira masinangkayon nga mga pagbati pinaagi han ira mga buhat.” Pagkamaopay nga asoy tikang “hadton aadto ha gawas”!

5, 6. (a) Ano nga buruhaton an natutuman ni Kristo ha presente nga panahon, ngan ano an diri naton sadang hingalimtan? (b) Ano an sadang nga magin paggios naton ha mga tawo han kalibotan, ngan kay ano?

⁵ Daku an mahihimo naton ha pagwara han maraut nga pagtrato pinaagi han makinaadmanon nga paagi han aton paggawi ngada ha mga taga gawas. Totoo, nag-uukoy kita ha panahon nga an aton nagmamando nga Hadi, hi Kristo Jesus, nagbubulagbulag han mga tawo han mga nasud, “sugad la han pagbulagbulag han magbarantay han mga karnero tikang ha mga kanding.” (Mateo 25:32) Kondi ayaw gud hingalimti nga hi Kristo an Hukom; hiya an nagdedesisyon kon hin-o “an mga karnero” ngan kon hin-o “an mga kanding.”​—Juan 5:22.

⁶ Sadang makaimpluwensia ini han aton paggios ngada hadton diri bahin han organisasyon ni Jehova. Bangin maghunahuna kita ha ira sugad nga kalibotanon nga mga tawo, kondi bahin hira han kalibotan han katawohan nga “ginhigugma gud han Dios . . . nga iya iginhatag an iya bugtong nga Anak, basi nga an ngatanan nga nagbubuhat hin pagtoo ha iya diri unta mawara kondi magkaada kinabuhi nga waray kataposan.” (Juan 3:​16, NW) Maoroopay gud nga isipon an mga tawo nga magigin mga karnero kay han mapahitas-on nga magdesisyon nga mga kanding hira. An iba nga madarahug nga nakontra hadto han kamatuoran dedikado na nga mga Saksi yana. Ngan damu ha ira an siyahan nga nadaug pinaagi han mga buhat han kalooy, antes hira bumaton han anoman direkta nga pagtestigo. Kitaa, pananglitan, an retrato ha pahina 18.

Madasigon, Diri Agresibo

7. Ano nga pakaraut an iginpahayag han papa, kondi ano nga pakiana an bangin igpakiana naton?

⁷ Ginpakaraut ni Papa John Paul II an mga sekta ha kabug-osan, ngan labi na gud an mga Saksi ni Jehova, han magsiring hiya: “An haros agresibo nga kadasig nga an iba namimiling hin bag-o nga mga sumuronod, nakadto ha balay-balay, o nahunong ha mga lumalabay ha mga kanto han mga kalye, amo an sekta nga palsipikado ha apostoliko ngan misyonero  nga kadasig.” Bangin igpakiana ito, Kon an amon amo an “palsipikado ha apostoliko ngan misyonero nga kadasig,” diin hiaagian an totoo nga kadasig ha pag-ebanghelyo? Sigurado diri ha mga Katoliko, bisan ha mga Protestante o mga membro han Orthodox nga mga iglesia.

8. Paonan-o naton sadang buhaton an aton balay-balay nga pagtestigo, naglalaom hin ano nga resulta?

⁸ Kondi, basi pamatud-an nga buwa an anoman nga sumbong han pagkaagresibo ha aton pagtestigo, sadang kita pirme magin maloloy-on, matinalahuron, ngan buotan kon nadaraon kita ha mga tawo. An disipulo nga hi Jakobo nagsurat: “Hin-o an makinaadmananon ngan masinabuton ha iyo? Ipakita niya an iya maopay nga ginawian ha iya mga buhat ha kaaghup han kinaadman.” (Jakobo 3:​13, NW) Hi apostol Pablo nagsasagda ha aton nga “diri magin masamok.” (Tito 3:2) Pananglitan, imbes nga dayag nga kondenahon an mga tinotoohan han usa nga tawo nga aton sinasangyawan, kay ano nga diri ipakita an sinsero nga interes ha iya mga opinyon? Niyan isumat ha tawo an maopay nga sumat nga aada ha Biblia. Pinaagi ha pagkaada positibo nga pagdaraon ngan pagpakita hin angayan nga pagtahud ha mga tawo nga mayada iba nga mga toloohan, mabubuligan naton hira nga magkaada maoroopay nga panhunahuna basi mamati, ngan bangin makasabut hira han bili han mensahe han Biblia. An resulta bangin an iba “maghimaya ha Dios.”​—1 Pedro 2:12.

9. Paonan-o naton iaaplikar an sagdon nga iginhatag ni Pablo ha (a) Kolosas 4:​5? (b) ha Kolosas 4:​6?

⁹ Hi apostol Pablo nagsagdon: “Padayon ha paglakat ha kinaadman ngada hadton aadto ha gawas, nga pahimulosan niyo an panahon.” (Kolosas 4, 5, NW) Ha pagsaysay hinin urhi nga ekspresyon, hi J. B. Lightfoot nagsurat: “Ayaw palabya an higayon, han pagsiring ngan pagbuhat han mahimo magpauswag han katuyoan han Dios.” (Amon an italiko.) Oo, kinahanglan magin andam kita pinaagi han mga pulong ngan mga buhat ha tagsa nga higayon. An sugad nga kinaadman nag-uupod liwat han pagpili hin angayan nga panahon han adlaw ha pagbisita. Kon gindumiri an aton mensahe, tungod ba ito kay an mga tawo diri naapresyar hito, o tungod kay nabisita kita ha panahon nga diri angayan? Hi Pablo nagsurat liwat: “An iyo pulong kinahanglan nga mayada grasia, nga ginparasa hin asin, basi nga iyo hibaroan an pagbatonay ha usa kag usa.” (Kolosas 4:​6, NW) Nagkikinahanglan ini hin paghunahuna nga daan ngan totoo nga gugma ha amyaw. Ipresenta naton pirme an mensahe han Ginhadian nga mayada grasia.

Matinalahuron Ngan “Andam ha Ngatanan Magopay nga Buhat”

10. (a) Ano nga sagdon an iginhatag ni Pablo ha mga Kristiano nga nag-uukoy ha Kreta? (b) Paonan-o nga maopay nga susbaranan an mga Saksi ni Jehova ha pagsunod han sagdon ni Pablo?

¹⁰ Diri naton mahimo ikompromiso an mga prinsipyo han Biblia. Ha luyo nga bahin, diri  kita sadang makiglantugi ha mga pakiana nga diri naghihisgut han Kristiano nga integridad. Hi apostol Pablo nagsurat: “Padayon nga pahinumduma hira [mga Kristiano ha Kreta] nga magpasakop hira ha mga gobyerno ngan mga awtoridad sugad nga mga magmarando, nga magin andam hira ha ngatanan magopay nga buhat, nga diri magyakan hin maraut ha bisan hin-o, nga diri magin masamok, nga magin makatadonganon, nga nagpapakita hin bug-os nga kaaghup ha ngatanan nga mga tawo.” (Tito 3:​1, 2, NW) An eskolar han Biblia nga hi E. F. Scott nagsurat mahitungod hini nga bersikulo: “Diri la kay masugot an mga Kristiano ha awtoridad, kondi hira kinahanglan magin andam para han anoman maopay nga buhat. Ini . . . nangangahulogan nga, kon ginkikinahanglan han okasyon, an mga Kristiano sadang magin an siyahan ha pagpakita hin mabinuligon nga espiritu ha mga amyaw. Pirme nga magkakaada hin mga sunog, peste, magkalainlain nga klase hin kalamidad, nga an ngatanan magopay nga mga tuminongnong maruruyag ha pagbulig ha ira mga amyaw.” Ha bug-os nga kalibotan damu na nga mga hitabu han makabungkag nga mga kalamidad ngan an mga Saksi ni Jehova amo an siyahan nga nagbubuhat han buruhaton ha pagbulig. Binubuligan nira diri la an ira kabugtoan kondi liwat an mga taga gawas.

11, 12. (a) Paonan-o sadang gumawi an mga Kristiano ngada ha mga awtoridad? (b) Nag-uupod han ano an pagpasakop ha mga awtoridad may kalabutan han pagtukod hin mga Kingdom Hall?

¹¹ Ipinapakita liwat hinin pariho nga bersikulo tikang ha surat ni Pablo ngadto kan Tito an bili han pagkaada matinalahuron nga paggios ngada ha mga awtoridad. An batan-on nga mga Kristiano nga tungod han ira pagin neutral nakadto ha atubangan han mga hukom sadang magin mahunahunaon labi na ha paglakat ha kinaadman ngada hadton aadto ha gawas. Daku an mahihimo nira ha pagpauswag o pagdaut han reputasyon han katawohan ni Jehova pinaagi han ira hitsura, han ira paggawi, ngan han paagi han ira pagyakan ha sugad nga mga awtoridad. Sadang hira “maghatag . . . ha iya nga takus hin dungog han sugad nga dungog,” ngan himoon an ira depensa upod an hilarum nga pagtahud.​—Roma 13:​1-7; 1 Pedro 2:​17; 3:15.

¹² An “mga awtoridad” nag-uupod han lokal nga mga opisyal han gobyerno. Yana nga nagtitikadamu nga mga Kingdom Hall an gintutukod, diri-malilikyan an pakig-upod ha lokal nga mga awtoridad. Agsub, an mga tigurang naatubang hin maraut nga pagtrato. Kondi nakikita nga kon an mga representante han kongregasyon nagtutukod hin maopay nga relasyon ha mga awtoridad ngan nakooperar ha komisyon han pagplano han bungto, nawawara inin maraut nga pagtrato. Agsub nga iginhahatag an maopay nga pagtestigo ha mga tawo nga hadto gutiay la o waray hinbabaroan mahitungod han mga Saksi ni Jehova ngan ha ira mensahe.

‘Kon Sadang Mahimo, Makigmurayaw Kamo ha Ngatanan’

13, 14. Ano nga sagdon an iginhatag ni Pablo ha mga Kristiano ha Roma, ngan paonan-o naton iaaplikar ito ha aton mga relasyon ha mga taga gawas?

¹³ Hi Pablo naghatag han masunod nga sagdon ha mga Kristiano nga nag-uukoy ha pagano nga Roma: “Diri kamo magbayad bisan kan kanay hin maraut ha maraut. Magtinguha kamo han magopay nga mga bagay ha atubangan han ngatanan nga mga tawo. Kon sadang mahimo, sugad han nahatutungod ha iyo, makigmurayaw kamo ha ngatanan nga mga tawo. Diri kamo bumulus, mga hinigugma, kondi tagi niyo hin lugar an kasina han Dios; kay nahasurat na: ‘Akon an pagbulus; ako an mabulus, nasiring hi Jehova.’ Kondi, ‘kon gutumon an imo kaaway, pakaona hiya; kon uhawon, painma hiya; kay kon pagbuhaton mo ini magpupundok ka hin mga baga ha igbaw han iya ulo.’ Ayaw padaug han maraut, kondi padayon nga daugon mo an maraut han maopay.”​—Roma 12:​17-21, NW.

¹⁴ Ha aton relasyon ha mga taga gawas, kita sugad nga totoo nga mga Kristiano sigurado nga igkikita hin mga parakontra. Ha mga bersikulo ha igbaw, ipinapakita ni Pablo nga an dalan han kinaadman amo an pangalimbasug ha paglampos han pagkontra pinaagi han maloloy-on nga mga buhat. Pariho hin mga baga, ini nga mga buhat han kalooy bangin magwara han kapungot ngan madaug an parakontra  para han maloloy-on nga paggios ngada ha katawohan ni Jehova, bangin makapukaw pa ngani han iya interes ha maopay nga sumat. Kon nahitatabu ini nadadaug han maopay an maraut.

15. San-o labi na nga sadang mag-ikmat an mga Kristiano ha paglakat ha kinaadman ngada hadton aadto ha gawas?

¹⁵ An paglakat ha kinaadman ngada hadton aadto ha gawas importante labi na ha mga panimalay diin an usa nga padis han pag-asawa waray pa magkarawat han kamatuoran. An pagsunod han mga prinsipyo han Biblia nakakahimo hin maoroopay nga mga bana, maoroopay nga mga asawa, maoroopay nga mga amay, maoroopay nga mga iroy, ngan kabataan nga labaw nga masinugtanon ngan labaw nga nag-aaram hin mauyatom ha eskwelahan. Sadang makita han diri-matinoohon an maopay nga epekto han mga prinsipyo han Biblia ha usa nga matinoohon. Salit, an iba “mahimo daugon ha waray pulong pinaagi han batasan” han dedikado nga mga membro han pamilya.​—1 Pedro 3:​1, 2, NW.

‘Pagbuhat hin Maopay ha Ngatanan’

16, 17. (a) Ha ano nga mga halad nalilipay an Dios? (b) Paonan-o kita sadang “magbuhat hin maopay ngada ha aton kabugtoan ngan hadton aadto liwat ha gawas?

¹⁶ An gidadakui nga maopay nga mabubuhat naton ha aton amyaw amo an pagdara ha iya han mensahe han kinabuhi ngan pagtutdo ha iya mahitungod han pagpahiuli kan Jehova pinaagi kan Jesu-Kristo. (Roma 5:​8-11) Salit hi apostol Pablo nagsusumat ha aton: “Pinaagi ha iya [Kristo] halaran ta pirme an Dios hin halad han pagdayaw, nga amo, an bunga han mga im-im, nga nagsusumat han iya ngaran.” (Hebreo 13:​15, NW) Hi Pablo nagdudugang: “Kondi, ayaw niyo hikalimti an pagbuhat hin maopay ngan pagkamahatagon ha iba, kay ha sugad nga mga halad an Dios nalilipay.” (Hebreo 13:16) Dugang pa ha aton pagtestigo ha kadaygan, diri naton sadang hingalimtan “an pagbuhat hin maopay.” Kinahanglanon nga bahin ito han mga halad nga dida hito an Dios nalilipay.

¹⁷ Siyempre, nagbubuhat kita hin maopay ha aton espirituwal nga kabugtoan, nga bangin nagkikinahanglan ha emosyon, espirituwal, pisikal, o materyal. Ipinakita ini ni Pablo han magsurat hiya: “Nga mayada ta katigayonan, magbuhat kita hin maopay ha ngatanan, kondi labi na gud ha panimalay ha pagtoo.” (Galasia 6:​10; Jakobo 2:​15, 16) Kondi, diri naton sadang hingalimtan, an mga pulong, “Magbuhat kita hin maopay ha ngatanan.” An buhat han kalooy ha usa nga paryente, usa nga amyaw, o usa nga kaupod ha trabaho makakahimo hin daku ha pagwara han maraut nga pagtagad kontra ha aton ngan himoon an kasingkasing han tawo nga magin mabinatunon ha kamatuoran.

18. (a) Ano nga mga peligro an sadang likyan naton? (b) Paonan-o naton gagamiton an aton Kristiano nga pagkamaopay sugad nga suporta para han aton pagtestigo nga buruhaton ha kadaygan?

¹⁸ Ha pagbuhat hini, diri kinahanglan magin duok nga mga sangkay kita hadton aadto ha gawas. Peligroso gud an sugad nga mga kaupod. (1 Korinto 15:33) Ngan diri naton tuyo nga magin mga sangkay ha kalibotan. (Jakobo 4:4) Kondi an aton Kristiano nga pagkamaopay makakasuporta han aton pagwali. Ha iba nga katunaan labaw nga nagigin makuri an pakiistorya ha mga tawo ha ira mga panimalay. An iba nga mga apartment protektado han mga kasangkapan ngan mga paagi nga nagpupugong  ha aton ha pakigkita ha mga umurokoy. Ha mainuswagon nga mga nasud an telepono magagamit ha pagwali. Ha kadam-an nga mga nasud mahimo buhaton an pagtestigo ha kalye. Kondi ha ngatanan nga mga nasud, an pagin makururuyag, buotan, maloloy-on, ngan mabinuligon naghahatag hin mga higayon ha pagwara han maraut nga paggios ngan naghahatag hin maopay nga pagtestigo.

Pagpahilum han mga Parakontra

19. (a) Tungod kay diri kita nagpapalipay ha mga tawo, ano an malalaoman naton? (b) Paonan-o kita sadang mangalimbasug ha pagsunod han susbaranan ni Daniel ngan iaplikar an sagdon ni Pedro?

¹⁹ An mga Saksi ni Jehova diri nagpapalipay ha mga tawo diri man nahahadluk ha mga tawo. (Proberbios 29:​25; Efeso 6:6) Bug-os nga hinsasabtan nira nga bisan pa han ngatanan nira nga mga pangalimbasug nga magin susbaranan nga mga parabayad-hin-buhis ngan magopay nga mga tuminongnong, an mga parakontra magpapasarang hin maraut nga mga buwa ngan magyayakan hin pagtamay ha ira. (1 Pedro 3:16) Nga maaram hini, nangangalimbasug hira ha pagsubad kan Daniel, nga mahitungod ha iya an iya mga kaaway nagsiring: “Diri kita makakaagi hin bisan ano nga higayon patok hini nga Daniel, gawas la kon mangita kita hini patok ha iya mahitungod han balaud han iya Dios.” (Daniel 6:5) Diri gud naton ikokompromiso an mga prinsipyo han Biblia basi lipayon an mga tawo. Ha luyo nga bahin, diri kita nangangalimbasug nga magin martir. Nangangalimbasug kita nga mag-ukoy nga mamurayawon ngan sundon an apostoliko nga sagdon: “Kay amo ini an kaburut-on han Dios, nga tungod han maopay nga buhat iyo pamimingawon an katapangan han mga tawo nga waray sarabutan.”​—1 Pedro 2:15.

20. (a) Kombinsido kita han ano, ngan ano nga pagparig-on an iginhatag ha aton ni Jesus? (b) Paonan-o kita padayon nga maglalakat ha kinaadman ngada hadton aadto ha gawas?

²⁰ Kombinsido kita nga an aton posisyon han pagbulag ha kalibotan bug-os nga nauyon ha Biblia. Sinusuportahan ito han kasaysayan han siyahan-siglo nga mga Kristiano. Napaparig-on kita han mga pulong ni Jesus: “Ha kalibotan mayada kamo kagol-anan, kondi magrig-on kamo! Akon gindaug an kalibotan.” (Juan 16:​33, NW) Diri kita nahahadluk. “Tinuod, hin-o an tawo nga sadang makahibang ha iyo kon magin madasigon kamo ha maopay? Kondi bisan pa kon mag-antus kamo tungod han katadongan, malipayon kamo. Kondi, diri kamo mahadluk ha ira kahadluk, bisan kalisang. Kondi pagbaraanon niyo ha iyo mga kasingkasing hi Kristo nga Ginoo, nga andam kamo pirme ha pagbaton ha atubangan han ngatanan nga mga tawo nga mapakiana ha iyo kon ano an hinungdan han paglaom nga aada ha iyo, kondi binubuhat ito ha kaaghup ngan hilarum nga pagtahud.” (1 Pedro 3:​13-15, NW) Samtang nagbubuhat hini nga paagi, magpapadayon kita ha paglakat ha kinaadman ngada hadton aadto ha gawas.

Sugad nga Repaso

◻ Kay ano nga an mga Saksi ni Jehova kinahanglan maglakat ha kinaadman ngada hadton aadto ha gawas?

◻ Kay ano nga an totoo nga mga Kristiano diri gud naglalaom nga hihigugmaon han kalibotan, kondi ano an sadang nga pangalimbasugan nira nga buhaton?

◻ Ano an sadang nga paggios naton ngada ha mga tawo han kalibotan, ngan kay ano?

◻ Kay ano nga sadang kita “magbuhat hin maopay” diri la ngada ha aton kabugtoan kondi liwat hadton aadto ha gawas?

◻ Paonan-o an aton paglakat ha kinaadman ngada hadton aadto ha gawas nabulig ha aton ha pagtestigo nga buruhaton ha kadaygan?

[Mga Pakiana]

[Retrato ha pahina 18]

Ha wala: An totoo nga mga Kristiano ha Fransia nabulig ha ira mga amyaw katapos han baha

[Retrato ha pahina 20]

An Kristiano nga mga buhat han kalooy makakahimo hin daku ha pagwara han maraut nga paggios

[Retrato ha pahina 23]

An mga Kristiano sadang “magin andam para han ngatanan maopay nga buhat”