Ginhihimo Ko ba an Baraan nga Espiritu nga Akon Personal nga Parabulig?

AN MGA teologo, dugang ha mga tawo ha kabug-osan, mayada damu nga mga ideya mahitungod han pangirilal-an han baraan nga espiritu han Dios. Kondi, diri-kinahanglanon an sugad nga pagbanabana. An Biblia matin-aw nga nagsasaysay kon ano an baraan nga espiritu. Imbes han pagin usa nga persona, sugad han ginsisiring han iba, ito amo an makagarahum aktibo nga puwersa nga ginagamit han Dios ha pagtuman han iya kaburut-on.​—Salmo 104:30; Buhat 2:33; 4:31; 2 Pedro 1:21.

Tungod kay an baraan nga espiritu may kalabotan gud ha pagtuman han mga katuyoan han Dios, karuyag naton nga an aton mga kinabuhi magin uyon hito. Karuyag naton ito nga magin aton personal nga parabulig.

Usa nga Parabulig—Kay Ano nga Kinahanglanon?

Tungod kay hirani na an iya pagbaya ha tuna, ginpasarig-utro ni Jesus an iya mga disipulo: “Akon pangangaroon ha Amay nga hiya humatag ha iyo hin iba nga maglilipay basi hiya iyo makaupod ha gihapon.” Ngan utro: “Kondi, ako nagsusumat ha iyo han kamatuoran, Kapulsanan ini niyo nga ako mabulag. Kay kon diri ako bumulag, an maglilipay diri makanhi ha iyo; kondi kon ako lumakat, akon susugoon hiya nganhi ha iyo.”​—Juan 14:​16, 17; 16:7.

Hi Jesus naghatag ha iya mga disipulo hin seryoso nga sugo ha ira: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han [baraan nga espiritu]. Pagtutdoi hira han pagbantay han ngatanan nga mga bagay, nga akon iginsugo ha iyo; ngan kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:​19, 20) Diri ini masayon nga sugo, tungod kay bubuhaton ito ha atubangan han pagkontra.​—Mateo 10:​22, 23.

An mga pagkontra tikang ha gawas madudugangan hin mga pag-ipit tikang ha sulod han kongregasyon. “Pinanginginyupo ko ha iyo, mga kabugtoan,” nagsurat hi Pablo ha mga Kristiano ha Roma han 56 K.P., “nga iyo tigamnan an mga ginikanan ha pagkabahinbahin ngan mga katigayonan hin paghipakdol, kontra ha mga pagturon-an nga iyo ginton-an; ngan mamalagiw kamo ha ira.” (Roma 16:​17, 18) Ini nga kahimtang magtitikaraot pa gud kon mamatay na an mga apostol. Hi Pablo nagpahamangno: “Kay ako maaram nga, ha katapos han akon pagbulag, masulod ha iyo an mga lobo nga magbangis, nga diri mahatag hin kalooy han panon. Ngan tikang ha iyo la ngahaw matindog an mga tawo, nga magyayakan hin mga bagay nga mga baliko, pagdanas han mga tinon-an ha urhi nira.”​—Buhat 20:​29, 30.

Ginkikinahanglan an bulig han Dios basi malamposan ini nga mga ulang. Ginbuhat niya ito pinaagi kan Jesus. Katapos hiya banhawon, ha adlaw han Pentekostes 33 K.P., an 120 han iya mga sumurunod ‘ngatanan napuno han baraan nga espiritu.’​—Buhat 1:15; 2:4.

Maaram an mga disipulo nga an baraan nga espiritu nga iginbubo hini nga okasyon amo an bulig nga iginsaad ni Jesus. Sigurado nga hinsabtan na nira yana an pangirilal-an nga igintagana ni Jesus: “[An parabulig], an baraan nga espiritu, nga pakakanhion han Amay ha akon ngaran, pagtututdoan kamo niya ha ngatanan nga mga bagay ngan magpapahinumdom ha iyo han ngatanan nga mga bagay nga akon iginsumat ha iyo.” (Juan 14:26) Gintawag liwat niya ito nga ‘an parabulig, an espiritu han kamatuoran.’​—Juan 15:26.

Paonan-o Nagin Parabulig an Espiritu?

An espiritu nagin parabulig ha pipira nga mga paagi. Siyahan, nagsaad hi Jesus nga magpapahinumdom ito ha iya mga disipulo han mga butang nga iya iginsumat ha ira. Pinaagi hini iya iginpapasabot diri la an pagbulig ha ira nga mahinumduman an mga pulong. An espiritu mabulig ha ira nga makasabot  han hilarom nga kahulogan ngan bili han iya igintutdo. (Juan 16:​12-14) Ha laktod, an espiritu magtutugway ha iya mga disipulo ha maoroopay nga pagsabot han kamatuoran. Hi apostol Pablo ha urhi nagsurat: “Ha aton iginpahayag ito han Dios pinaagi han Espiritu: Kay an Espiritu nag-uusisa ha ngatanan nga mga bagay, Oo, bisan pa an mga higlarom nga mga bagay han Dios.” (1 Korinto 2:10) Basi maisumat han dinihogan nga mga sumurunod ni Jesus an husto nga kahibaro ngadto ha iba, an ira kalugaringon nga pagsabot kinahanglan nga may basihan gud.

Ikaduha, gintutdoan ni Jesus an iya mga disipulo nga mag-ampo ngan buhaton ito pirme. Kon usahay diri-sigurado hira kon ano an ira sadang iampo, an espiritu makakagbuhat hito o makakabulig ha ira. “Ngan sugad man an Espiritu natabang man ha aton pagkamaluya: kay diri kita maaram ha pag-ampo sugad ha aton kinahanglan; kondi an Espiritu ngahaw amo an nakikimalooy tungod ha aton, nga may pagharoy nga diri sadang iasoy.”​—Roma 8:26.

Ikatulo, an espiritu mabulig ha mga disipulo ni Jesus ha pagdepensa han kamatuoran ha publiko. Iya ginpahamangnoan hira: “Igtutubyan kamo nira ha mga hukmanan, ngan didto ha ira mga sinagoga paghahampakon kamo nira. Oo, ngan ha atubangan han mga gobernador ngan han mga hadi pagdadad-on kamo tungod ha akon, ha pagpamatuod ha ira, ngan ha mga Hentil. Kondi kon kamo ira na igtubyan, diri kamo mangarit kon oonanhon, o kon ano an igyayakan, kay ihahatag ha iyo hito ngahaw nga oras an iyo igyayakan. Kay diri kamo an magyayakan, kondi an espiritu han Amay, nga nagyayakan ha iyo.”​—Mateo 10:​17-20.

An baraan nga espiritu mabulig liwat ha pagkilala han Kristiano nga kongregasyon ngan pagioson an mga membro hito ha paghimo hin maaramon personal nga mga desisyon. Aton paghisgotan an duha nga bahin hini nga tema ha mas detalyado nga paagi ngan kitaon an ira bili para ha aton yana nga panahon.

Magigin Pangirilal-an

Mga siglo nga nag-alagad an mga Judio ilarom han Mosaiko nga Balaud sugad nga pinili nga katawohan han Dios. Tungod kay nagdumiri hira kan Jesus sugad nga Mesias, iya igintagna nga ha diri maiha hira mismo an isasalikway: “Waray ba niyo mabasa ha mga Santos nga Surat: An bato nga isinikway han mga magtirindog, ini an nagin pangulo han eskina. Ini tinikang ha Ginoo, ngan makaurosa gud ha aton mga mata? Busa ako nasiring ha iyo: An ginhadian han Dios kukuhaon ha iyo, ngan ihahatag ha usa nga nasud, nga mapabunga ha iya.” (Mateo 21:​42, 43) Han an Kristiano nga kongregasyon gintukod han Pentekostes 33 K.P., an mga sumurunod ni Kristo nagin an ‘nasud nga magbubunga.’ Tikang hadto nga panahon padayon, ini nga kongregasyon amo an ginagamit han Dios ha pagkomunikar. Basi hibaroan han mga tawo inin pagbalhin han pag-uyon han Dios, an Dios nagtagana hin sigurado nga pangirilal-an.

Han Pentekostes ginbuligan han baraan nga espiritu nga makayakan an mga disipulo hin mga yinaknan nga waray gud nira hibaroi hadto, nga tungod hito nahipausa an mga nagkikita ngan nagpakiana: “Kay ano nga pinanhihibatian ta, nga an tagsatagsa nagyayakan han aton yinaknan nga natawohan?” (Buhat 2:​7, 8) An abilidad ha pakayakan han diri-hinbabaroan nga mga yinaknan, upod han “damu nga mga katingalahan ngan mga tigaman, nga binuhat han mga apostol,” nagtugway han tulo ka yukot nga mga tawo nga makilala nga an espiritu han Dios totoo nga nagios.​—Buhat 2:​41, 43.

An pagkultibar liwat han “bunga han Espiritu”​—gugma, kalipay, pakigdait, pagkamailob, pagkamaloloy-on, pagkamaopay, pagkamatinoohon, pagkaaghop, pagpugong ha kalugaringon​—an mga disipulo ni Kristo matin-aw nga ginkilala sugad nga mga surugoon han Dios. (Galasia 5:​22, 23) An gugma, ha pagkamatuod, nagpapakilala gud han totoo Kristiano nga kongregasyon. Hi Jesus nagtagna: “Tungod hini an ngatanan makilala nga kamo akon mga tinon-an, kon kamo maghigugmaay an usa kag usa.”​—Juan 13:​34, 35.

An mga membro han siyahan Kristiano nga kongregasyon kinarawat han pagtugway han baraan nga espiritu han Dios ngan nagpahimulos han bulig nga igintanyag hito. Bisan kon maaram an mga Kristiano nga an Dios yana nga panahon diri magbabanhaw han mga patay ngan magbubuhat hin mga milagro sugad han siyahan nga siglo, gintutugotan nira an bunga han espiritu han Dios nga makilala hira sugad nga totoo nga mga disipulo ni Jesu-Kristo.​— 1 Korinto 13:8.

Parabulig ha Paghimo hin Personal nga mga Desisyon

An Biblia produkto han baraan nga espiritu. Salit, kon gintutugotan naton an aton kalugaringon nga  mapagios han Biblia, sugad ito hin ginigiyahan kita han baraan nga espiritu. (2 Timoteo 3:​16, 17) Makakabulig ito ha aton nga maghimo hin maaramon nga mga desisyon. Kondi tinutugotan ba naton ito?

Kumusta man an aton pinili nga buruhaton o trabaho? An baraan nga espiritu mabulig ha aton nga usisahon an posible nga trabaho tikang ha panlantaw ni Jehova. An aton trabaho kinahanglan nauyon ha mga prinsipyo han Biblia, ngan nakakabulig ha aton nga makapadayon ha teokratiko nga mga tumong kon posible. An suweldo o an kabantogan ngan dungog han trabaho diri importante. Mas importante kon nagtatagana ito ha aton han mga kinahanglanon ha kinabuhi ngan nagtutugot ha aton hin igo nga panahon ngan higayon nga tumanon an aton mga obligasyon sugad nga Kristiano.

An hingyap nga magpahimulos han kinabuhi normal ngan angayan. (Eklesiastes 2:24; 11:9) Salit an timbang nga Kristiano mahimo magliaw basi marepreskohan ngan malipay. Kondi sadang niya pilion an kaliawan nga nagpapakita han bunga han espiritu, diri an klase nga nagpapakita han “mga buhat han unod.” Hi Pablo nagsaysay: “Niyan madayag an mga buhat han unod nga amo ini: pakighilawas, kahugawan, kalaw-ayan, Pagsingba ha mga diosdios, diwata, mga pagkaaway, pagsuhay, mga pangabugho, mga kasina, mga paglaris, mga pagbulag, mga pagkakabig, Mga kaawa, mga paghubog, mga aringasa, ngan mga bagay nga mga sugadsugad hini.” An pagin ‘hambog, pagpalabawlabaw ha usa kag usa, kaawa ha usa kag usa’ kinahanglan liwat likyan.​—Galasia 5:​16-26.

Pariho ito ha pagpili hin mga sangkay. Maaramon nga pilion hira sumala ha espirituwalidad, diri sumala ha pangawas nga dagway o mga panag-iya. An lalaki nga hi David matin-aw nga sangkay han Dios, tungod kay iginsaysay hiya han Dios sugad nga “tawo nga nauyon han [iya] kasingkasing.” (Buhat 13:22) Ha pagbalewaray han pangawas nga dagway, ginpili han Dios hi David nga magin hadi han Israel, sumala ha prinsipyo: “Hi Jehova nakita diri sugad han pagkita han tawo; kay an tawo nagtatan-aw han kinikita ha gawas, kondi hi Jehova nagtatan-aw han kasingkasing.”​—1 Samuel 16:7.

Yinukot nga mga pagkamagsangkay an nabubungkag tungod kay iginbasar ito ha pangawas nga dagway o ha mga tinatag-iya. An mga pagkamagsangkay nga iginbasar ha diri-nagpapabilin nga mga bahandi nabubungkag dayon. (Proberbios 14:20) An giniyahan han espiritu nga Pulong han Dios nagsasagdon ha aton nga ha pagpili hin kasangkayan, sadang pilion naton adton makakabulig ha aton nga mag-alagad kan Jehova. Nagsusumat ito ha aton nga isentro an panhunahuna ha paghatag kay ha pagkarawat tungod kay an paghatag nagdadara hin darodaku nga kalipay. (Buhat 20:35) An panahon ngan gugma kaupod han pinakabirilhon nga mga butang nga aton maihahatag ha aton kasangkayan.

Ha Kristiano nga namimiling hin maarasawa, an Biblia nagtatagana hin giniyahan-han-espiritu nga sagdon. Ha usa nga punto, ito nasiring: ‘Kitaa lahos pa han nawong ngan han postura. Kitaa an mga tiil.’ An mga tiil? Oo, hini nga punto: Ginagamit ba ito ha pagpadayon han buruhaton ni Jehova ha pagwali han maopay nga sumat, ngan salit makaruruyag ito, siring pa, ha iya paniplatan? Ginsul-otan ba ito han mensahe han kamatuoran ngan han maopay nga sumat han kamurayawan? Aton mababasa: “Pagkamaanyag dida ha kabukiran han mga tiil niya nga nagdadara han magopay nga mga sumat, nga nagpapasangyaw han pagdait, nga nagdadara han magopay nga mga sumat han kaopayan, nga nagpapasangyaw han kaluwasan, nga nasiring ngadto kan Sion: An imo Dios naghahadi!”​—Isaias 52:7; Efeso 6:15.

Ha aton pagkinabuhi ha ‘magpakalilisang nga mga panahon nga makuri pakibagayan,’ nagkikinahanglan kita hin bulig ha pagbuhat han kaburut-on han Dios. (2 Timoteo 3:1) An parabulig, an baraan nga espiritu han Dios, naghahatag hin gamhanan nga suporta ha buruhaton han mga Kristiano ha siyahan nga siglo, upod na an pagin personal nga parabulig nira. An maduruto nga pag-aram ha Pulong han Dios, nga bunga han baraan nga espiritu, amo an importante nga paagi nga aton liwat magigin personal nga parabulig an baraan nga espiritu. Ginhihimo ba naton ito?

 [Bug-os-pahina nga retrato ha pahina 23]