Kon Paonan-o Ka Magigin Duok ha Dios

“Pahirani kamo ha Dios, ngan mahirani man hiya ha iyo,” siring han Jakobo 4:8. Ha pagpakita han daku nga hingyap ni Jehova nga Dios nga magkaada an mga tawo duok nga relasyon ha iya, iginhatag niya an iya Anak tungod ha aton.

HA PAGGIOS tungod hito nga pagpakita hin gugma, hi apostol Juan nagsurat: “Nahigugma kita [ha Dios], kay una hiya naghigugma ha aton.” (1 Juan 4:19) Kondi basi kita magin duok ha Dios, kinahanglan buhaton naton an pipira nga mga pitad. Pariho ito ha upat nga paagi nga nagigin duok kita ha mga igkasi-tawo, sugad han iginsaysay ha nahiuna nga artikulo. Aton usisahon ini yana.

Obserbahi an Urusahon nga mga Kalidad han Dios

An Dios mayada damu urusahon nga mga kalidad, pipira han gimaopayi amo an iya gugma, kaaram, hustisya, ngan gahum. An iya kaaram ngan gahum hura nga makikita ha hirayo nga uniberso ngan ha kalibotan nga nakapalibot ha aton, tikang ha dagku nga mga galaksi tubtob ha gudti nga mga atomo. An salmista nagsurat: “An mga langit nagsusumat han kahimayaan han Dios; Ngan an kahawanhawanan nagpapahayag han mga buhat han iya mga kamot.”​—Salmo 19:1; Roma 1:20.

An mga linarang nagpapakita liwat han gugma han Dios. Pananglitan, an paagi han paglarang ha aton nagpapakita nga karuyag han Dios nga magpahimulos kita han kinabuhi. Gintagan kita niya han abilidad nga makakita hin mga kolor, makatilaw ngan makahamot, nga mag-apresyar han musika, makatawa, magpahimulos han katahom, naghahatag liwat ha aton hin damu hinduro iba nga mga abilidad ngan mga kalidad nga diri gud kinahanglanon ha kinabuhi. Oo, an Dios totoo nga mahinatagon, maloloy-on, ngan mahigugmaon​—mga kalidad nga waray ruhaduha nakakaamot ha iya pagin ‘an malipayon nga Dios.’​—1 Timoteo 1:11; Buhat 20:35.

Hi Jehova nalilipay nga an pagbuhat han iya pagkasoberano ngan an suporta hito han iya intelihente nga mga linarang iginbasar gud ha gugma. (1 Juan 4:8) Oo, hi Jehova an Soberano ha Uniberso, kondi iya ginpapakiupdan an katawohan, labi na an iya matinumanon nga mga surugoon, sugad han pakig-upod han mahigugmaon nga amay ha iya mga anak. (Mateo 5:45) Diri niya ginpupugngan an bisan ano nga para ha ira kaopayan. (Roma 8:​38, 39) Sugad han gin-unabi na, iya pa ngani iginhatag an kinabuhi han iya bugtong nga Anak tungod ha aton. Oo, an gugma han Dios amo an hinungdan nga kita naeksister ngan mayada paglaom han kinabuhi nga waray kataposan.​—Juan 3:16.

Hi Jesus naghatag ha aton hin hilarom nga pagsabot ha personalidad han Dios tungod kay hingpit nga ginsubad niya an iya Amay. (Juan 14:​9-11) Mahinatagon gud hiya, mapinairon, ngan mahunahunaon. Ha usa nga kahimtang, hi Jesus gindara ngadto ha usa nga lalaki nga bu­ngol ngan ngula. Huhunahunaon mo gud nga ito nga lalaki bangin diri komportable ha mga tawo. Makapainteres nga gindara ni Jesus ini nga lalaki ha pribado nga lugar ngan gintambal hiya didto. (Markos 7:​32-35) Inaapresyar mo ba an mga tawo nga napaid ha imo mga pagbati ngan natahod ha imo dignidad? Kon amo, sigurado nga magigin duok ka kan Jehova ngan kan Jesus samtang nahibabaroan mo an dugang pa mahitungod ha ira.

Hunahunaa an mga Kalidad han Dios

An usa bangin mayada maopay nga mga kalidad, kondi kinahanglan naton hunahunaon ito nga tawo basi magin duok hito nga usa. An pariho naaplikar kan Jehova. An pamalandong han iya mga kalidad amo an importante ikaduha nga pitad ha pagin duok ha iya. Hi Hadi David, an lalaki nga nahigugma gud kan Jehova ngan “nauyon han [kan Jehova] kasingkasing,” nagsiring: “Hinunumduman ko an mga adlaw  nga daan; Pinamamalandong ko an ngatanan nimo nga mga buhat; Pinanginginop ko an kabuhatan han imo mga kamot.”​—Buhat 13:22; Salmo 143:5.

Kon inoobserbahan mo an mga urusahon han linarang o binabasa an Pulong han Dios, an Biblia, ikaw ba, pariho kan David, namamalandong han imo nakikita ngan nababasa? Handurawa an usa nga anak nga lalaki nga kinarawat pa la hin surat tikang ha iya amay nga hinigugma gud niya. Paonan-o niya tatagdon ito nga surat? Sigurado nga diri la niya sisip­latan an mga nakasurat hito ngan ibutang ito ha hunos. Lugod, iya aadman ito, ginpapamalandong an ngatanan nga detalye ngan bili hito. Sugad man, an Pulong han Dios sadang magin birilhon ha aton, sugad la nga presyoso ito ha salmista nga nagkanta: “O nahigugma gud ako ha imo balaud! Amo ito an akon pamalandong ha bug-os nga adlaw.”​—Salmo 119:97.

Magkaada Maopay nga Komunikasyon

An maopay nga komunikasyon amo an kinabuhi han bisan ano nga relasyon. Nag-uupod ito han pag-istorya ngan pagpamati​—ngan diri la han hunahuna kondi sugad man han kasingkasing. Nakikiistorya kita ha Maglalarang pinaagi han pag-ampo, nga amo an nagsisingba nga pakiistorya ha Dios. Hi Jehova nalilipay ha mga pag-ampo hadton nahigugma ngan nag-aalagad ha iya ngan hadton nakilala kan Jesu-Kristo sugad nga Iya nangunguna nga representante.​—Salmo 65:2; Juan 14:​6, 14.

Ha naglabay, an Dios nakiistorya ha katawohan ha magkalainlain nga mga paagi, upod na ha mga bisyon, ha mga inop, ngan pinaagi han mga anghel. Kondi, yana nga mga panahon, ginbubuhat niya ito pinaagi han iya sinurat nga Pulong, an Baraan nga Biblia. (2 Timoteo 3:16) An sinurat nga Pulong mayada damu nga mga kapulsanan. Mahimo ito usisahon ha bisan ano nga panahon. Pariho hin surat, mahimo ito basahon hin pauroutro. Ngan diri ito naaapektohan han mga pagpalsipikar nga agsob nga amo an tigaman han yinakan nga pagsaysay. Salit hunahunaa an Biblia sugad nga daku nga koleksyon han mga surat tikang ha imo hinigugma langitnon nga Amay, ngan pinaagi hini nga mga surat tuguti hiya nga makiistorya ha imo kada adlaw.​—Mateo 4:4.

Pananglitan, iginpahayag ni Jehova an iya panlantaw han husto ngan sayop. Nagsasaysay ito han iya katuyoan para ha katawohan ngan ha tuna. Ngan nagsusumat ito han iya mga pakig-upod ha damu kalain nga mga tawo ngan mga nasud, tikang ha maunungon nga mga magsiringba tubtob ha maraot nga mga kaaway. Pinaagi han pagsurat han iya mga pakig-upod ha mga tawo hini nga paagi, iginhahatag ni Jehova an detalyado gud nga hulagway han iya personalidad. Iya iginpapahayag an iya gugma, kalipay, kasubo, kapakyas, kasina, kalooy, pagpaid​—oo, an iya mga panhunahuna ngan mga pagbati, ngan an mga hinungdan hini​—ngatanan ha paagi nga masayon hisabtan han mga tawo.​—Salmo 78:​3-7.

Katapos mo basahon an usa nga bahin han Pulong han Dios, paonan-o ka makakapahimulos tikang ha imo pagbasa? Ngan, paonan-o ka espisipiko nga magigin duok ha Dios? Siyahan, hunahunaa an imo nababasa ngan nahibabaroan mahitungod han Dios sugad nga persona, gintutugotan an mga punto nga makabantad han imo kasingkasing. Ngan ha pag-ampo isumat kan Jehova an imo mga ginhuhunahuna ngan hilarom nga mga pagbati mahitungod han imo nabasa ngan kon paonan-o ka nangangalimbasog ha pagpahimulos hito. Ito an komunikasyon. Siyempre, kon mayada ka iba nga mga butang ha imo hunahuna, sigurado nga maiuupod mo ini ha imo pag-ampo.

Pagbuhat nga Kaupod an Dios

An Biblia nag-uunabi han matinumanon nga kalalakin-an ha naglabay nga naglakat kaupod, o nagsunod, ha totoo nga Dios. (Genesis 6:9; 1 Hadi 8:25) Ano an iginpapasabot hito? Nga hira nagkikinabuhi kada adlaw nga sugad hin kaupod nira mismo an Dios. Oo, makasasala hira. Kondi, hinigugma nira an mga balaud han Dios ngan mga prinsipyo, ngan nagkikinabuhi hira uyon han katuyoan han Dios. Hi Jehova  duok ha sugad nga mga tawo, ngan napaid hiya ha ira, sugad han ipinapakita han Salmo 32:8: “Paglaladngan ko ikaw ngan igsusulsog ko ikaw han dalan nga imo kakadtoan: Sasagdonan ko ikaw ngan ha bawbaw nimo ibubutang ko an akon mata.”

Mahimo liwat hi Jehova magin duok mo nga sangkay​—usa nga naglalakat kaupod ha imo, napaid ha imo, ngan naghahatag ha imo hin kinag-anak nga sagdon. Hi propeta Isaias nagsaysay kan Jehova sugad nga “nagtututdo ha imo ha pagpahimulos, nga nagmamando ha imo han dalan nga imo paglalaktan.” (Isaias 48:17) Samtang aton naieksperyensyahan ini nga mga kapulsanan, inaabat naton an presensya ni Jehova “ha [aton] too nga kamot,” siring pa, sugad la kan David.​—Salmo 16:8.

Ngaran han Dios—Sentro han Iya mga Kalidad

Damu nga mga relihiyon ngan nagtitikadamu nga mga hubad han Biblia an napapakyas ha paggamit ngan pagpahibaro han personal nga ngaran han Dios. (Salmo 83:18) Kondi, ha orihinal Hebreo nga kasuratan, ito nga ngaran​—Jehova​—makikita hin 7,000 ka beses! (Nakakawurok gud, nga samtang ginkukuha  an baraan nga ngaran, gintipigan han kadam-an nga mga parahubad han Biblia an mga ngaran han damu palso nga mga dios nga gin-unabi ha orihinal nga kasuratan, sugad han Baal, Bel, Merodak, ngan bisan an Satanas!)

Inaabat han iba nga mga tawo nga an pagkuha han ngaran han Dios diri importante nga butang. Kondi hunahunaa: Mas makuri o mas masayon ba an pagpatubo hin duok, maopay nga relasyon ha waray ngaran nga tawo? An mga titulo sugad han Dios ngan Ginoo (nga ginagamit liwat ha palso nga mga dios) mahimo makadani hin atensyon ha gahum, awtoridad, o katungdanan ni Jehova, kondi an iya la personal nga ngaran an matin-aw nga nagpapakilala ha iya. (Eksodo 3:15; 1 Korinto 8:​5, 6) An personal nga ngaran han matuod nga Dios nagpapabug-at han iya mga kalidad ngan mga abilidad. An obispo nga hi Walter Lowrie husto nga nagsiring: “An tawo nga diri nakilala han ngaran han Dios diri gud nakilala ha iya sugad nga persona.”

Tagda an ehemplo ni Maria, usa nga sinsero nga Katoliko nga nag-uukoy ha Australia. Han siyahan nga makaistorya hiya han mga Saksi ni Jehova, gintugotan ni Maria an mga Saksi nga ipakita ha iya an ngaran han Dios ha Biblia. Paonan-o hiya ginios? “Han siyahan nga nakita ko an ngaran han Dios ha Biblia, nagtangis ako. Nabantad gud ako han kahibaro nga aktuwal nga mahibabaroan ko ngan magagamit an personal nga ngaran han Dios.” Hi Maria nagpadayon ha pag-aram ha Biblia, ngan ha siyahan nga panahon ha iya kinabuhi, nakilala niya hi Jehova sugad nga persona ngan nagkaada nag­papadayon nga relasyon ha iya.

Oo, mahimo kita ‘magin duok ha Dios,’ bisan kon diri naton nakikita hiya ha aton literal nga mga mata. Aton ‘nakikita’ an iya maopay hinduro nga personalidad ha aton mga hunahuna ngan mga kasingkasing ngan salit nagtutubo an aton gugma ha iya. An sugad nga gugma “amo an higot han pagkahingpit.”​—Kolosas 3:14.

[Kahon/Retrato ha pahina 6]

Nagios hi Jehova ha Imo Gugma ha Iya

DUHA nga bahin an mga relasyon. Samtang nagigin duok kita ha Dios, nagios hiya ha pagin duok ha aton. Tagda an iya mga pagbati para han lagas nga hi Simeon ngan hi Ana, nga pariho espesyal nga gin-unabi ha Biblia. An parasurat han Ebanghelyo nga hi Lukas nagsusumat ha aton nga hi Simeon “matadong, ngan mainampoon,” naghuhulat han Mesias. Naobserbahan ni Jehova kan Simeon inin magopay nga mga kalidad ngan nagpakita hin gugma para hinin makaruruyag lagas nga lalaki pinaagi han pagsumat ha iya nga “diri hiya mamatay, nga waray pa hiya kikita kan Kristo.” Gintuman ni Jehova an iya saad ngan giniyahan hi Simeon ngadto ha minasus-an nga hi Jesus, nga gindara han Iya mga ginikanan ngadto ha templo ha Jerusalem. Tungod han kalipay ngan duro nga apresasyon, ginkugos ni Simeon an minasus-an ngan nag-ampo: “Niyan Ginoo, pabulaga na an imo uripon ha kamurayaw; sugad han imo pulong: Kay an akon mga mata nakakita na han imo kaluwasan.”​—Lukas 2:​25-35.

“Han pag-abot hadto gud nga oras,” iginpakita liwat ni Jehova an iya gugma ha 84-anyos nga hi Ana pinaagi han paggiya ha iya ngadto liwat kan Jesus. An Biblia nagsusumat ha aton nga inin hinigugma nga balo, pirme adto ha templo “nag-aalagad” kan Jehova. Tungod han duro nga apresasyon, hiya, pariho kan Simeon, nagpasalamat kan Jehova tungod han iya daku nga kalooy, katapos hito nagsumat hiya mahitungod han bata “ha ngatanan nga naghihinulat han pagtubos han Jerusalem.”​—Lukas 2:​36-38.

Oo, naobserbahan ni Jehova an daku nga gugma ngan kahadlok ni Simeon ngan ni Ana ha iya ngan kon mationan-o gintagad nira an katumanan han iya katuyoan. Diri ba an sugad nga mga asoy han Biblia nagpapaduok ha imo ngadto kan Jehova?

Pariho han iya Amay, hinbabaroan liwat ni Jesus an totoo nga pagkatawo. Samtang nagtututdo ha templo, naobserbahan niya an usa nga “kablas nga babaye nga balo” nga naghatag la hin ‘duha ka gutiay nga sinselyo nga gutiay hinduro an kantidad.’ Ha iba nga mga nakaobserba an iya regalo waray gud bili kondi birilhon gud kan Jesus. Iya gindayaw ini nga babaye tungod kay iginhatag niya an ngatanan nga iya tinatag-iya. (Lukas 21:​1-4) Salit, makakasarig gud kita nga aapresyaron kita ni Jehova ngan ni Jesus kon ihahatag naton an aton gimaopayi ha ira, daku man o gutiay an aton regalo.

Bisan kon nalilipay an Dios hadton nahigugma ha iya, nasusubo hiya kon an katawohan nabulag ha iya ngan nasunod ha sayop nga buhat. An Genesis 6:6 nagsusumat ha aton nga hi Jehova ‘nasusubo an iya kasingkasing’ tungod han karaotan han katawohan antes han Baha ha mga adlaw ni Noe. Ha urhi, an matinalapasnon nga mga Israelita pauroutro nga ‘nagsari han Dios, ngan ira ginsakit bisan an Baraan nga Usa han Israel,’ siring han Salmo 78:41. Oo, an Dios diri hirayo nga “Siyahan nga Hinungdan” nga waray mga pagbati. Usa gud hiya nga persona, usa nga an mga pagbati diri kay diri-timbang o diri-sensitibo tungod han pagkadiri-hingpit, sugad ha aton.

[Mga Retrato ha pahina 7]

An paghunahuna han mga linarang ni Jehova amo an usa nga paagi nga magin duok ha iya