Magigin Duok Ka ba ha Diri-nakikita nga Dios?

‘Paonan-o ako magkakaada duok nga relasyon ha usa nga diri ko nakikita?’ bangin magpakiana ka. Baga hin makatadunganon ito nga pakiana. Kondi hunahunaa:

MATIONAN-O kaimportante an pagkita ha pagpatubo hin mahigugmaon ngan nagpapadayon nga mga relasyon? Diri ba pariho, kon diri mas importante an diri-nakikita nga mga bahin? Oo! Tungod hito an iba nga mga tawo nagpapatubo hin duok nga relasyon ha iba pinaagi han regular nga pagsurat​—an ira mga surat tangkod nga nagpapahayag han mga karuyag, nadidirian, mga tumong, mga prinsipyo, mga intremes, ngan iba nga mga bahin han personalidad o mga interes.

Ginpapamatud-an liwat han mga buta nga an pagkita diri importante ha pagpatubo hin duok nga relasyon ha iba nga tawo. Tagda an ehemplo ni Edward ngan ni Gwen, mag-asawa nga mga buta. * Nakilala ni Edward hi Gwen ha eskwelahan para han mga buta, diin hiya senyor nga adulto nga kaeskwela. Iya naruyagan an mga kalidad ni Gwen, labi na an iya pagin tangkod ha pulong ngan batasan, ngan an iya maopay nga pagtagad ha trabaho. Ha baylo, hi Gwen naruyag kan Edward tungod kay, sumala ha iya, “iya iginpakita an ngatanan nga mga kalidad nga akon ginhuhunahuna nga importante.” Nagtubo an relasyon, ngan paglabay hin tulo ka tuig nagpakasal hira.

“Kon magkaupod kamo,” siring ni Edward, “an pagin buta diri gud importante ha pagkaada relasyon ha iba nga tawo. Bangin diri niyo makita an kada tagsa, kondi masayon hisabtan an mga pagbati.” Yana, paglabay hin 57 ka tuig, naghihigugmaay pa gihapon hira. Nasiring hira nga an sekreto han ira maopay nga relasyon nag-uupod han diri maminos upat nga butang: (1) paghibaro han mga kalidad han iba nga tawo, (2) paghunahuna ngan pagkarawat hito nga mga kalidad, (3) pagkaada maopay nga komunikasyon, ngan (4) pagbuhat han mga butang nga magkaupod.

Inin upat nga punto importante ha bisan ano maopay nga relasyon, ha butnga man han mga magsangkay, mag-asawa o, mas importante, butnga han mga tawo ngan han Dios. Ha masunod nga artikulo, makikita naton kon paonan-o an pag-aplikar hini nga mga punto makakabulig ha aton nga magkaada duok nga relasyon ha Dios, bisan kon diri naton nakikita hiya. *

[Mga footnote]