Sadang Mo ba Usisahon an Iba nga mga Relihiyon?

“NAGTINAMBONG ako ha Kristiano nga mga katirok hin haros usa ka tuig, ngan nalipay ako pagsumat ha iba mahitungod han Ginhadian han Dios,” siring ni Miguel, usa yana han mga Saksi ni Jehova ha Amerika del Sur. “Katapos nagtikang ako pamati ha relihiyoso nga mga programa ha radyo ngan nagkinita han relihiyoso nga mga magwarali ha telebisyon. Ginhunahuna ko nga an sugad nga mga programa makakabulig ha akon nga hisabtan an mga tawo nga iba an mga relihiyon. Hinsabtan ko nga an ira mga katutdoan diri nauyon ha Biblia, kondi nagin mausisa ako.”

Ha pariho nga nasud, madasigon hi Jorge ha pagtutdo ha iba mahitungod han totoo nga pagsingba. Kondi, ha usa ka panahon, nagtikang liwat hiya mamati ha relihiyoso nga mga programa ha radyo ngan telebisyon. “Kinahanglan hibaroan mo kon ano an ginhuhunahuna han iba,” siring niya hadto. Kon ginpapakianhan han posible nga mga peligro han sugad nga pagpamati ha palso nga mga katutdoan, hiya nabaton, “Waray makakapaluya han pagtoo han usa nga maaram han kamatuoran han Biblia.” Ini nga mga eksperyensya nagbabangon hin importante nga pakiana, Maaramon ba nga mamati ha mga gintotoohan han iba?

Pagkilala han Totoo nga Kristianidad

Han mamatay an mga apostol, an totoo nga pagsingba nahugawan pinaagi han nagtitikadamu nga mga porma han palso nga Kristianidad. Tungod kay abanse nga maaram mahitungod hini, iginpahayag ni Jesus an usa nga paagi ha pagkilala han pagkaiba han palso nga mga porma han Kristianidad ha totoo nga Kristianidad. Siyahan, hiya nagpahamangno: “Magtagam kamo ha mga manaragna nga buwaon, nga maabot ha iyo, nga nagpapanapton sugad hin karnero; kondi ha sulod nira amo an magpintas nga mga lobo.” Katapos hiya nagdugang: “Tikang ha ira mga bunga, iyo kikilal-on hira.” (Mateo 7:​15-23) An totoo nga mga sumurunod ni Jesus nagbubuhat han iya igintutdo, ngan masayon hira makilala tungod han ira maopay nga mga bunga. Sugad la han ginbuhat mismo ni Jesus, ira binibisita an  mga tawo basi sumatan mahitungod han Ginhadian han Dios tikang ha Kasuratan. Ha pagsunod ha susbaranan ni Jesus, nalikay gud hira tikang ha mga politika han kalibotan ngan mga araway ha sosiedad. Kinakarawat nira an Biblia sugad nga Pulong han Dios ngan gintatahod ito sugad nga kamatuoran. Ira iginpapakilala an ngaran han Dios. Ngan tungod kay nangangalimbasog hira ha pag-aplikar han gugma nga igintututdo han Dios, diri hira nakikigbahin ha mga girra. Lugod, gintatagad nira an kada usa sugad nga kabugtoan.​—Lukas 4:43; 10:​1-9; Juan 13:​34, 35; 17:​16, 17, 26.

Sumala ha Kasuratan, posible nga ‘makita an kaibahan han matadong ngan han maraot, han usa nga nag-aalagad ha Dios ngan han usa nga diri nag-aalagad ha iya.’ (Malakias 3:18) An totoo nga mga magsiringba yana nagkakaurosa ha hunahuna ngan buhat, pariho han siyahan-siglo nga mga Kristiano. (Efeso 4:​4-6) Kon nakilala na niyo ito nga grupo han totoo nga mga Kristiano, kay ano nga sadang kamo mainteres o mag-usisa pa mahitungod han mga gintotoohan han iba?

Mag-ikmat han Palso nga mga Magturutdo

Nasiring an Biblia nga bisan katapos hibaroan an kamatuoran han Biblia, mayada peligro ha espirituwal nga kahugawi tikang ha palso nga mga katutdoan. Hi apostol Pablo nagpahamangno: “Magtagam kamo bangin nga bisan hin-o nga magdara ha iyo ngadto ha kauripon tungod ha iya pilosopiya ngan paglimbong nga waray pulos, sugad ha mga surumatanon han mga tawo, sugad ha binata nga pagturun-an han kalibotan, ngan diri sugad kan Kristo.” (Kolosas 2:8) Matin-aw gud an paghulagway hini nga teksto! Pariho hin mga mananap nga naruruyag pagsibad ngan paglamoy ha imo, an palso nga mga magturutdo peligroso gud.

Oo, gintigamnan ni Pablo an gintotoohan han iba. Makausa gintikangan niya an diskurso pinaagi ha pagsiring: “Mga tawo nga Ateniahanon, gintatan-aw ko kamo, nga ha ngatanan nga mga bagay magtutubyan gud kamo ha pagsingba ha mga diosdios. Kay han akon pag-agi, ngan pagkita han mga butang, nga ginsisingba, akon hin-agian man in usa nga halaran, nga ginsuratan hini: HA DIOS NGA DIRI KINILALA.” (Buhat 17:​22, 23) Kondi, diri regular nga ginbubutang ni Pablo ha iya hunahuna an mga pilosopiya han Griego nga mga mamumulong.

Usa nga bahin an paghibaro han mga gintikangan ngan mga gintotoohan han palso nga mga relihiyon kondi iba an pagtoon hito. * Ginpili ni Jehova ‘an matinumanon ngan maaramon nga uripon’ ha pagtagana hin katutdoan nga basado ha iya Pulong. (Mateo 4:4; 24:45) Hi Pablo nagsurat: “Diri kamo sadang makiangbit ha lamesa han Dios, ngan ha lamesa han mga yawa. O gin-aaghat ta ba an Ginoo ha pangabugho?”​—1 Korinto 10:​20-22.

An iba palso nga mga magturutdo bangin totoo nga mga Kristiano hadto, kondi ha usa ka panahon binirik hira tikang ha kamatuoran ngadto ha sayop. (Judas 4, 11) Diri kita sadang mahipausa hini. Katapos paghisgotan ‘an matinumanon ngan maaramon nga uripon’ nga nagrirepresentar han lawas han dinihogan nga mga Kristiano, naghisgot hi Jesus mahitungod han “maraot nga uripon,” an grupo nga nagreklamo, “an akon agaron maiha umabot,” ngan nagtikang pagkastigo ha mga igkasi-uripon. (Mateo 24:​48, 49) Agsob, nga ini nga mga indibiduwal ngan an ira mga sumurunod waray totoo nga mga katutdoan ha ira kalugaringon; interesado la hira ha pagbungkag han pagtoo han iba. May kalabotan ha ira, hi apostol Juan nagsurat: “Kon may umabot ha iyo, ngan diri magdadara hini nga pagturun-an, ayaw niyo hiya karawata ha iyo balay, ngan ayaw hiya pangumustaha.”​—2 Juan 10; 2 Korinto 11:​3, 4, 13-15.

Mapulsanon nga tagdon hin maopay han sinsero nga mga tawo nga namimiling han kamatuoran an ira hinbabatian ha iba nga mga relihiyon. Maabot an panahon, bibendisyonan han Dios an tangkod an kasingkasing nga mga indibiduwal nga namimiling han kamatuoran. Mahitungod han kinaadman han Dios, an Biblia nasiring: “Kon mamiling ka ha iya sugad hin salapi, ngan magsusi para ha iya sugad hin para ha tinago nga mga bahandi: Dida hito . . . makakaagi ka han paghibaro han Dios.” (Proberbios 2:​4, 5) Tungod kay nakabiling hini nga kahibaro han Dios pinaagi han Biblia ngan han Kristiano nga kongregasyon ngan tungod kay nakikita kon paonan-o ginbibendisyonan ni Jehova adton ginigiyahan hito nga kahibaro, an totoo nga mga Kristiano diri nagpapadayon ha pagpamati ha palso relihiyoso nga mga katutdoan.​— 2 Timoteo 3:14.

[Footnote]