Tubtob Diin an imo Gugma?

“Higugmaon mo an imo igkasi-tawo sugad ha imo ngahaw.”—MATEO 22:39.

 1. Kon nahigugma kita kan Jehova, kay ano nga kinahanglan higugmaon liwat naton an aton igkasi-tawo?

 HAN ginpakianhan hi Jesus kon ano an pinakaimportante nga sugo, hiya binaton: “Higugmaon mo [hi Jehova] nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna.” Ngan iya ginkotar an ikaduha nga sugo nga pariho han siyahan: “Higugmaon mo an imo igkasi-tawo sugad ha imo ngahaw.” (Mateo 22:37, 39) Oo, an gugma ha igkasi-tawo o amyaw amo an tigaman han usa nga Kristiano. Tinuod, kon nahigugma kita kan Jehova, kinahanglan higugmaon naton an aton igkasi-tawo. Kay ano? Tungod kay ipinapakita naton an aton gugma ha Dios pinaagi han pagsugot ha iya Pulong, ngan an iya Pulong nagsusugo ha aton nga higugmaon an aton igkasi-tawo. Salit, kon diri kita nahigugma ha aton kabugtoan, an aton gugma ha Dios diri magigin putli.—Roma 13:8; 1 Juan 2:5; 4:20, 21.

 2. Ano nga klase hin gugma an sadang ipakita naton ha aton igkasi-tawo?

² Han ginsiring ni Jesus nga sadang higugmaon naton an aton igkasi-tawo, gin-uunabi niya an labaw pa han pakigsangkay. Ngan gin-uunabi niya an gugma nga naiiba ha natural nga naeksister ha sulod han mga pamilya o butnga han lalaki ngan han babaye. Gin-uunabi niya an klase han gugma ni Jehova ha iya dedikado nga mga surugoon ngan han ira gugma ha iya. (Juan 17:26; 1 Juan 4:11, 19) Usa ka Judio nga eskriba—nga, ginhunahuna ni Jesus, nga nagyayakan hin maaramon—inuyon kan Jesus nga an gugma ha Dios sadang magin ha ‘bug-os nga kasingkasing ngan ha bug-os nga pagsabot ngan ha bug-os nga kusog han usa.’ (Markos 12:28-34) Husto hiya. An gugma nga ginpapatubo han usa nga Kristiano ha Dios ngan ha igkasi-tawo nag-uupod han aton mga emosyon ngan han aton kaaram. Inaabat ito ha kasingkasing ngan ginigiyahan han hunahuna.

 3. (a) Paonan-o gintutdoan ni Jesus “an usa nga makinaadmananon han Kasugoanan” nga sadang magkaada hiya haluag nga panhunahuna kon hin-o an iya amyaw? (b) Paonan-o naaplikar an ilustrasyon ni Jesus ha mga Kristiano yana nga panahon?

 ³ Sugad han iginsumat ni Lukas, han ginsiring ni Jesus nga sadang higugmaon naton an aton amyaw o igkasi-tawo, “an usa nga makinaadmananon han Kasugoanan” nagpakiana: ‘Hin-o gud an akon kaamyaw?’ Hi Jesus binaton pinaagi han usa nga parabola. Usa ka lalaki an ginkastigo, gintikasan, ngan binayaan nga haros patay na dida ha ligid han dalan. Siyahan usa nga saserdote ngan sunod usa nga Lebita an linabay. An duha nagbalewaray ha iya. Ha kataposan, usa nga Samaritano an inabot, hinkit-an an nasamad nga lalaki, ngan nagbuhat hin daku nga kalooy ha iya. Hain ha tulo an amyaw han nasamad nga lalaki? Matin-aw an baton. (Lukas 10:25-37) An tawo nga makinaadmananon ha Balaud bangin nahipausa ha pakabati kan Jesus nga nasiring nga an usa nga Samaritano mahimo magin maoroopay nga amyaw kay ha usa nga saserdote ngan usa nga Lebita. Matin-aw, binubuligan ni Jesus iton nga tawo nga higugmaon an iya amyaw ha labaw pa nga paagi. An mga Kristiano liwat nahigugma ha sugad nga paagi. Tagda an ngatanan nga sakop han ira gugma.

Gugma ha Sulod han Pamilya

 4. Diin, siyahan, nagpapakita hin gugma an usa nga Kristiano?

⁴ An mga Kristiano nahigugma ha mga membro han ira pamilya—an mga asawa nahigugma ha mga bana, an mga bana nahigugma ha mga asawa, an mga ginikanan nahigugma ha mga anak. (Eklesiastes 9:9; Efeso 5:33; Tito 2:4) Totoo, an mga bugkos han natural nga gugma makikita ha kadam-an nga mga pamilya. Kondi, an mga sumat mahitungod han burublag nga mga pag-asawa, pag-abuso ha padis, ngan pagpasibaya o pag-abuso ha kabataan nagpapakita nga an pamilya ilarom han pag-ipit yana nga panahon, ngan bangin an natural nga mga pagbati han pamilya diri igo ha pagtipig hito nga tarampo. (2 Timoteo 3:1-3) Basi maglampos ha ira pagpamilya, an mga Kristiano kinahanglan magpakita han klase han gugma ni Jehova ngan ni Jesus.—Efeso 5:21-27.

 5. Kan kanay naglalaom an mga ginikanan para han bulig ha pagmangno ha ira mga anak, ngan ano an resulta para ha damu?

⁵ Gintatagad han Kristiano nga mga ginikanan an ira mga anak sugad nga birilhon nga butang nga igintapod ni Jehova ha ira, ngan naglalaom hira han iya bulig ha pagpadaku ha kabataan. (Salmo 127:3-5; Proberbios 22:6) Hini nga paagi ginpapatubo nira an Kristiano nga gugma, nga nabulig ha ira basi bantayan an ira mga anak tikang ha nakakadaot nga mga impluwensya nga bangin makalit-ag ha mga batan-on. Sugad nga resulta, damu nga Kristiano nga mga ginikanan an nakakaeksperyensya hin pariho nga kalipay han usa nga iroy ha Netherlands. Katapos makita an bawtismo han iya anak nga lalaki—usa han 575 nga indibiduwal nga nabawtismohan ha Netherlands ha naglabay nga tuig—hiya nagsurat: “Hini nga takna, an akon ginasto ha naglabay nga 20 ka tuig nabayaran na. An ngatanan nga panahon ngan kusog—sugad man an kasakit, pangalimbasog, ngan kasubo—hinngalimtan na yana.” Malipayon gud hiya nga an iya anak nga lalaki, ha iya kalugaringon nga kaburut-on, nagdesisyon nga mag-alagad kan Jehova. An pungkay han 31,089 nga magwarali nga nagrireport ha Netherlands ha naglabay nga tuig nag-uupod han damu nga nahibaro tikang ha ira mga ginikanan ha paghigugma kan Jehova.

 6. Paonan-o an Kristiano nga gugma makakabulig ha pagparig-on han bugkos han pag-asawa?

⁶ Gintawag ni Pablo an gugma nga ‘usa ka hingpit nga bugkos han pagkaurosa,’ ngan makakagtipig ito han pag-asawa bisan ha makuri nga mga panahon. (Kolosas 3:14, 18, 19; 1 Pedro 3:1-7) Han an lalaki ha Rurutu, usa ka gutiay nga isla nga 700 kilometro tikang ha Tahiti, nagtikang mag-aram ha Biblia upod han mga Saksi ni Jehova, kinontra gud an iya asawa. Ha kataposan, gindara han asawa an mga anak, binayaan an bana, ngan nag-ukoy ha Tahiti. Ha gihapon, ipinakita han bana an iya gugma pinaagi han regular nga pagpadara hin kuwarta ha iya asawa ngan pagtawag ha telepono ha panginsayod kon mayada bisan ano nga ginkikinahanglan niya o han mga anak. Ginbuhat niya an gimaopayi nga iya mahihimo ha pagtuman han iya Kristiano nga mga obligasyon. (1 Timoteo 5:8) Padayon nga nag-ampo hiya nga an iya pamilya magkatarampo utro, ngan ha kataposan bumalik unta an iya asawa. Han binalik an asawa, iya gintrato hiya ha ‘gugma, pagpailob, kaaghop.’ (1 Timoteo 6:11) Han 1998, nabawtismohan hiya ngan nalipay gud ha urhi han an iya asawa inuyon ha pag-aram ha Biblia. Ito nga pag-aram usa han 1,351 nga gindumara ha teritoryo ilarom han sanga han Tahiti ha naglabay nga tuig.

 7. Sumala ha usa nga lalaki ha Alemanya, ano an nagparig-on han iya pag-asawa?

 ⁷ Ha Alemanya usa nga lalaki an nakontra ha interes han iya asawa ha kamatuoran han Biblia ngan kombinsido nga karuyag han mga Saksi ni Jehova nga limbongan an iya asawa. Kondi, ha urhi, nagsurat hiya ha Saksi nga siyahan nga nakaistorya han iya asawa: “Salamat ha pagpakilala han akon asawa ha mga Saksi ni Jehova. Ha siyahan, nabaraka ako tungod kay hinbatian ko an damu maraot nga mga butang mahitungod ha ira. Kondi yana, tungod kay nakatambong na ako ha mga katirok upod han akon asawa, hinsabtan ko nga sayop gud ako. Maaram ako nga nababatian ko an kamatuoran, ngan nagparig-on gud ito han amon pag-asawa.” An 162,932 nga Saksi ni Jehova ha Alemanya—ngan an 1,773 ha mga isla ilarom han sanga han Tahiti—nag-uupod han damu nga mga pamilya nga nagkakaurosa ha diosnon nga gugma.

Gugma ha Aton Kristiano nga Kabugtoan

8, 9. (a) Hin-o an nagtututdo ha aton nga higugmaon an aton kabugtoan, ngan an gugma nagpapagios ha aton nga buhaton an ano? (b) Paghatag hin usa nga ehemplo kon paonan-o an gugma nakabulig ha kabugtoan nga magbinuligay ha usa kag usa.

⁸ Hi Pablo nagsiring ha mga Kristiano ha Tesalonika: “Kamo ngahaw gintutdoan han Dios ha paghigugmaay ha usa kag usa.” (1 Tesalonika 4:9) Oo, adton ‘gintututdoan ni Jehova’ nahigugma ha usa kag usa. (Isaias 54:13) An ira gugma iginpapahayag ha buhat, sugad han ipinakita ni Pablo han hiya nagsiring: “Tungod ha gugma mag-inalagaray kamo an usa kag usa.” (Galasia 5:13; 1 Juan 3:18) Ini an ira ginbubuhat, pananglitan, kon nabisita hira ha masakit nga kabugtoan, gindadasig an naguguol, ngan nasuporta ha maluya. (1 Tesalonika 5:14) An aton putli Kristiano nga gugma naamot ha pagtubo han aton espirituwal nga paraiso.

⁹ Ha Ancón nga Kongregasyon—usa han 544 nga kongregasyon ha Ecuador—an kabugtoan nagpakita han ira gugma ha praktikal nga paagi. Tungod ha krisis ha pinansyal nawad-an hira hin trabaho o kita, salit an mga magwarali nagdesisyon nga magtirok hin kuwarta pinaagi han pagbaligya hin pagkaon ha mga parapangisda ha ira lugar kon nauli hira katapos han pangisda ha gab-i. Binulig an ngatanan, upod na an kabataan. Kinahanglan magtikang hira ha 1:00 h.a. basi andam na an pagkaon ha 4:00 h.a. ha pagbalik han mga parapangisda. An kuwarta nga natirok han kabugtoan ginbahin nira sumala han ira panginahanglan. An sugad nga pagburublig ha usa kag usa nagpakita han putli Kristiano nga gugma.

10, 11. Paonan-o naton maipapakita an gugma ha kabugtoan nga diri naton personal nga kakilala?

 ¹⁰ Kondi, an aton gugma diri la para ha mga Kristiano nga personal nga kakilala naton. Hi apostol Pedro nagsiring: ‘Higugmaon niyo an bug-os nga katig-uban han kabugtoan.’ (1 Pedro 2:17) Hinigugma naton an ngatanan nga aton kabugtoan tungod kay hira ngatanan mga igkasi-magsiringba kan Jehova nga Dios. An mga panahon han krisis bangin maghatag hin higayon ha pagpakita hini nga gugma. Pananglitan, durante han 2000 nga tuig han pag-alagad, an duro nga mga pagbaha nakadaot ha Mozambique, ngan an nagpapadayon nga girra sibil ha Angola nagpakuri han damu. Damu han 31,725 nga kabugtoan ha Mozambique ngan 41,222 ha Angola an naapektohan hini nga mga panhitabo. Salit, an mga Saksi ha kahirani nga Aprika del Sur nagpapadara hin damu nga mga tagana basi maibanan an kakurian han ira kabugtoan hiton nga mga nasud. An ira pagkadisidido ha pag-amot han ira ‘sobra’ ha ira kablas nga kabugtoan nagpakita han ira gugma.—2 Korinto 8:8, 13-15, 24.

¹¹ An gugma nakikita, liwat, kon an kabugtoan ha damu nga mga nasud naamot para ha pagtukod hin mga Kingdom Hall ngan mga Assembly Hall ha kablas nga mga nasud. Usa nga ehemplo amo an ha Solomon Islands. Bisan pa han duro nga kasamok, an Solomon Islands nagkaada 6-porsyento nga pag-uswag ha mga magwarali ha naglabay nga tuig, ha pungkay nga 1,697. Nagplano hira ha pagtukod hin Assembly Hall. Bisan kon damu nga mga taga-isla an nabaya ha nasud tungod han kasamok, nagkaabot an mga boluntaryo tikang ha Australia basi bumulig ha pagtukod. Ha kataposan, kinahanglan bumaya an mga boluntaryo, kondi ira anay ginbansay an lokal nga kabugtoan ha pagtapos han pundasyon. Tikang ha Australia an mga andam na nga daan nga puthaw nga materyales ha pagtukod han katirokan, ngan an pagtapos hinin maopay nga tinukod para ha pagsingba—ha panahon nga damu han mga tinukod an binayaan—magigin maopay nga pagtestigo ha ngaran ni Jehova ngan ha gugma han kabugtoan.

Pariho han Dios, Nahigugma Kita ha Kalibotan

12. Paonan-o naton ginsusubad hi Jehova ha aton paggios ngada hadton diri naton kaupod ha pagtoo?

¹² An aton ba gugma para la ha aton pamilya ngan ha aton kabugtoan? Diri, diri kon kita ‘mga magsurubad ha Dios.’ Hi Jesus nagsiring: “An Dios naghigugma gud han kalibotan nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi magkaada kinabuhi nga waray kataposan.” (Efeso 5:1; Juan 3:16) Pariho kan Jehova nga Dios, nagbubuhat kita hin mahigugmaon ha ngatanan—upod na adton diri naton kaupod ha pagtoo. (Lukas 6:35, 36; Galasia 6:10) Hini nga bahin labi na, aton iginwawali an maopay nga sumat han Ginhadian ngan iginsusumat ha iba an daku nga buhat han gugma han Dios para ha ira. Mahimo magresulta ini ha katalwasan han bisan-o hin-o nga namamati.—Markos 13:10; 1 Timoteo 4:16.

13, 14. Ano an pipira nga mga eksperyensya han kabugtoan nga nagpakita hin gugma ha mga diri-Saksi, bisan kon diri-kombenyente pa ha ira?

¹³ Tagda an upat nga espesyal payunir nga mga ministro ha Nepal. Igintoka hira ha usa nga siyudad ha sur-weste han nasud, ngan ha sulod hin lima ka tuig nagpakita hira hin gugma pinaagi han mapailubon nga pagwali ha siyudad ngan ha hirayo nga mga baryo. Basi malukop an ira teritoryo, agsob nga nagbibisikleta hira hin damu ka oras ha temperatura nga sobra 100 grado an kapaso. An ira gugma ngan ‘pagpailob ha pagbuhat hin maopay’ nagresulta hin maopay han naporma an usa nga grupo ha pag-aram ha libro ha usa han mga baryo. (Roma 2:7) Han Marso 2000, 32 ka tawo an inabot basi mamati ha pahayag publiko han paramangno han sirkito. An Nepal mayada pungkay han 430 nga magwarali ha naglabay nga tuig—9 porsyento nga pag-uswag. Matin-aw nga ginbibendisyonan ni Jehova an kadasig ngan gugma han kabugtoan hiton nga nasud.

¹⁴ Ha Colombia an temporaryo nga mga espesyal payunir nagwali ha Wayuu nga mga Indian. Basi mahimo ini, kinahanglan mag-aram hira hin bag-o nga yinaknan, kondi an ira mahigugmaon nga interes ginbalosan han 27 an tinambong ha pahayag publiko, bisan pa han makusog nga uran. An mahigugmaon nga kadasig sugad han ipinakita hini nga mga payunir nakaamot ha 5-porsyento nga pag-uswag ha Colombia ngan ha pungkay han 107,613 nga magwarali. Ha Denmark usa nga lagas nga bugto nga babaye an karuyag magpaangbit han maopay nga sumat ha iba, kondi baldado hiya. Tungod kay marig-on, nakaistorya niya an mga tawo pinaagi han pagsurat. Yana, 42 ka tawo an iya ginsusuratan ngan nagdudumara hin 11 nga pag-aram ha  Biblia. Usa hiya han pungkay han 14,885 nga magwarali nga nagreport ha Denmark ha naglabay nga tuig.

Higugmaa an Imo mga Kaaway

15, 16. (a) Tubtob diin an aton gugma nga ginsiring ni Jesus? (b) Paonan-o gintagad han responsable nga kabugtoan ha mahigugmaon nga paagi an indibiduwal nga naghimo hin sayop nga mga akusasyon kontra han mga Saksi ni Jehova?

¹⁵ Hi Jesus nagsiring ha tawo nga makinaadmananon ha Balaud nga an Samaritano mahimo tagdon nga usa ka amyaw. Ha iya Sermon ha Bukid, hi Jesus nagpadayon pa han hiya nagsiring: “Hinbatian niyo, nga isiniring: Higugmaon mo an imo mga igkasi-tawo, ngan pagdumti an imo kaaway. Kondi ako nasiring ha iyo: Higugmaon an iyo mga kaaway; mag-ampo kamo tungod han nagpapakaraot ha iyo. Basi kamo magin-anak han iyo Amay, nga adto ha langit.” (Mateo 5:43-45) Bisan kon an usa nakontra ha aton, nangangalimbasog kita nga ‘padayon nga daugon han maopay an maraot.’ (Roma 12:19-21) Kon mahihimo, aton ipaangbit ha iya an aton pinakapresyoso nga panag-iya, an kamatuoran.

¹⁶ Ha Ukraine usa nga artikulo ha Kremenchuk Herald nga pahayagan an nagsaysay nga an mga Saksi ni Jehova usa nga peligroso nga sekta. Seryoso ini tungod kay ha Europa an iba nagyayakan hini mahitungod han mga Saksi ni Jehova basi makombinse an mga tawo nga an mga buruhaton han mga Saksi sadang igdiri o pugngan. Salit, gindaop an editor ngan ginhangyo nga igpublikar an usa nga pahayag ha pagtadong han sayop nga artikulo. Inuyon hiya, kondi mahitungod han pahayag, iginpublikar niya nga an orihinal nga artikulo iginbasar ha kamatuoran. Salit an responsable nga kabugtoan nga kalalakin-an dinaop utro ha iya dara an dugang nga impormasyon. Ha kataposan, hinsabtan han editor nga sayop an orihinal nga artikulo, ngan iginpublikar niya an pagtadong han sayop nga impormasyon. An prangka ngan malumo nga pakiistorya ha iya amo an mahigugmaon nga paagi ha pagdumara hini nga sitwasyon, ngan nagresulta ito hin maopay.

Paonan-o Naton Mapapatubo an Gugma?

17. Ano an nagpapakita nga bangin diri pirme masayon an magin mahigugmaon ha iba?

¹⁷ Kon natatawo an usa nga bata, an iya mga ginikanan nahigugma dayon ha iya. An mahigugmaon nga pakig-upod ha mga adulto diri pirme awtomatiko. Salit an Biblia pauroutro nga nagsusumat ha aton nga higugmaon an usa kag usa—usa ka butang ito nga kinahanglan patuboon naton. (1 Pedro 1:22; 4:8; 1 Juan 3:11) Maaram hi Jesus nga sasarihan an aton gugma han nagsiring hiya nga sadang pasayloon naton an aton bugto “tubtob ha kapitoan ka tagpito.”  (Mateo 18:21, 22) Ginsagda liwat kita ni Pablo nga ‘padayon nga mag-inilubay ha usa kag usa.’ (Kolosas 3:12, 13) Diri urusahon nga kita ginsumatan: “Sundon niyo an gugma”! (1 Korinto 14:1) Paonan-o naton mahihimo ini?

18. Ano an mabulig ha aton ha pagpatubo han gugma ha iba?

¹⁸ Siyahan, hunahunaon naton pirme an aton gugma kan Jehova nga Dios. Ini nga gugma amo an makusog nga nagpapagios nga higugmaon an aton igkasi-tawo. Kay ano? Tungod kay kon ginbubuhat naton ito, nagsusumat gud ini mahitungod han aton langitnon nga Amay ngan naghahatag hin himaya ngan kadayawan ha iya. (Juan 15:8-10; Filipos 1:9-11) Ikaduha, kitaon naton an mga butang sugad han pagkita hito ni Jehova. Kada panahon nga nakakasala kita, nakakasala kita kontra kan Jehova; kondi, pirme nga nagpapasaylo hiya ha aton ngan padayon nga nahigugma ha aton. (Salmo 86:5; 103:2, 3; 1 Juan 1:9; 4:18) Kon aton patuboon an panhunahuna ni Jehova, magigin andam kita ha paghigugma ha iba ngan pagpasaylo han ira mga sala ha aton. (Mateo 6:12) Ikatulo, makikig-upod kita ha iba sugad han karuyag naton nga makig-upod hira ha aton. (Mateo 7:12) Tungod kay kita diri-hingpit, agsob nga nagkikinahanglan kita hin pagpasaylo. Pananglitan, kon nagyayakan kita hin mga butang nga nakakabido ha iba, naglalaom kita nga hira mahinunumdom nga ha panapanahon an ngatanan nakakasala ha pagyakan. (Jakobo 3:2) Kon karuyag naton nga makig-upod hin mahigugmaon an iba ha aton, sadang kita makig-upod ha ira hin mahigugmaon.

19. Paonan-o naton makakarawat an bulig han baraan nga espiritu ha pagpatubo han gugma?

¹⁹ Ikaupat, makakalaom kita han bulig han baraan nga espiritu tungod kay an gugma bahin han mga bunga han espiritu. (Galasia 5:22, 23) An pakigsangkay, mga pagbati han pamilya, ngan romantiko nga gugma agsob nga natural nga kinaiya. Kondi ginkikinahanglan naton an bulig han espiritu ni Jehova basi mapatubo an gugma ni Jehova, an gugma nga amo an hingpit nga bugkos han pagkaurosa. Mabibilngan naton an bulig han baraan nga espiritu pinaagi han pagbasa han inspirado nga Biblia. Pananglitan, kon pag-aadman naton an kinabuhi ni Jesus, makikita naton kon paonan-o hiya nakig-upod ha mga tawo, ngan mahibabaro kita ha pagsubad ha iya. (Juan 13:34, 35; 15:12) Dugang pa, makakahangyo kita kan Jehova para han baraan nga espiritu, labi na ha mga sitwasyon nga makuri para ha aton an pagbuhat ha mahigugmaon nga paagi. (Lukas 11:13) Ha kataposan, mahimo naton igpadayon an gugma pinaagi han aton pagpabilin nga duok ha Kristiano nga kongregasyon. An pagin kaupod han mahigugmaon nga kabugtoan nabulig ha aton ha pagpatubo han gugma.—Proberbios 13:20.

20, 21. Ano nga bantogan nga pagpakita hin gugma an ginbuhat han mga Saksi ni Jehova durante han 2000 nga tuig han pag-alagad?

²⁰ Ha naglabay nga tuig, mayada pungkay han 6,035,564 nga magwarali han maopay nga sumat ha bug-os nga kalibotan. An mga Saksi ni Jehova naggasto hin 1,171,270,425 ka oras ha pamiling hin mga indibiduwal basi isumat ha ira an mahitungod han maopay nga sumat. Gugma an nakahimo ha ira nga ilubon an kapaso, an uran, ngan an katugnaw samtang nagpapadayon hira hini nga buruhaton. Gugma an nagpagios ha ira nga makiistorya ha mga kaeskwela ngan mga katrabaho ngan ha pagdaop ha mga estranghero ha mga kalye ngan ha iba nga mga lugar. Damu han ginbisita han mga Saksi an diri interesado, an iba nakontra. Kondi, an iba nagpakita hin interes, salit 433,454,049 an ginhimo nga mga pagbalik bisita ngan 4,766,631 nga pag-aram ha Biblia an gindumara. a

²¹ Ini ngatanan nagpapakita gud han daku nga gugma han mga Saksi ni Jehova ha ira Dios ngan ha ira amyaw! Ito nga gugma diri gud magtutugnaw. Nasarig kita nga an 2001 nga tuig han pag-alagad magkakaada darodaku nga pagtestigo ha katawohan. Hinaot magpadayon an bendisyon ni Jehova ha iya maunungon ngan madasigon nga mga magsiringba samtang ‘ginbubuhat nira an ngatanan ha gugma’!—1 Korinto 16:14.

[Footnote]

Maisasaysay Mo Ba?

• Hin-o an ginsusubad naton kon nahigugma kita ha aton igkasi-tawo?

• Tubtob diin an sakop han aton gugma?

• Ano an pipira nga mga eksperyensya nga nagpapakita han Kristiano nga gugma?

• Paonan-o naton mapapatubo an Kristiano nga gugma?

[Mga Pakiana]

 [Tsart ha pahina 18-21]

2000 TUIG HAN PAG-ALAGAD NGA REPORT HAN MGA SAKSI NI JEHOVA HA BUG-OS NGA KALIBOTAN

 (Kitaan an bound volume)

[Mga Retrato ha pahina 15]

An Kristiano nga gugma nagtitipig han pamilya nga tarampo

[Mga Retrato ha pahina 17]

An gugma nagpapagios ha aton nga ipaangbit an aton paglaom ha iba