Mahingpit Ngan Bug-os an Pagsarig

“An Obramaestra han Usa nga Proyekto”

TIKANG ha siyahan nga mga adlaw han ira moderno nga kasaysayan, an mga Saksi ni Jehova interesado gud ha usa han mga tagna ni Jesu-Kristo: “Ini nga Maopay nga Sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Samtang an 1914—an tinikangan ‘han kataposan nga mga adlaw’—nagtitikahirani, ginbuhat han sinsero nga mga Estudyante han Biblia nga marig-on an pagtoo, an waray-kapariho nga kampanya ha bug-os nga kalibotan nga edukasyon nga iginbasar ha Baraan nga Kasuratan.—2 Timoteo 3:1.

Basi matuman an ira tumong ha pagpahayag han maopay nga sumat ha bug-os nga tuna, ini nga mga surugoon ni Jehova naghimo hin bag-o, dayag, ngan matin-aw nga paagi. Basi mas hibaroan an mahitungod hito, balikon naton an panahon.

Bag-o nga Paagi ha Pagpahayag han Maopay nga Sumat

Enero adto han tuig 1914. Handurawa nga nalingkod ka kaupod han 5,000 nga katawohan ha masirom nga awditoryum ha Siyudad han New York. Ha imo atubangan mayada daku nga telon para han pelikula nga nagkikiwa. An lalaki nga busag an buhok nga nakaamerikana nakikita ha telon. Nakakita ka na hin hilom nga mga sine, kondi ini nga lalaki nagyayakan, ngan nababatian mo an iya tingog. Aada ka ha tinikangan han usa nga butang nga bag-o, ngan naiiba an mensahe. An mamumulong amo hi Charles Taze Russell, an siyahan nga presidente han Watch Tower Society, ngan an pasalida amo an “Photo-Drama of Creation.”

Hinbaroan ni C. T. Russell an bili han mga sine nga nagkikiwa basi madangat an damu nga tawo. Salit, han 1912, nagtikang hiya pag-andam han “Photo-Drama of Creation.” Ha urhi, nagin walo-ka-oras ito nga pasalida ngan nagkikiwa nga pelikula, nga mayada kolor ngan tingog.

Tungod kay gindisenyo basi ipasalida ha upat nga serye, an “Photo-Drama” nagdara han magkirita tikang ha paglarang tubtob ha kasaysayan han tawo ngadto ha pungkay han katuyoan ni Jehova nga Dios para han tuna ngan katawohan ha kataposan han Milenyo nga Pagmando ni Kristo. Mga tuig an malabay antes maglampos ha komersyo an pariho nga paggamit han teknolohiya. Kondi, minilyon an nakakita han “Photo-Drama of Creation” nga waray bayad!

Igin-andam an magopay nga iginrekord nga mga musika sugad man an 96 nga iginrekord ha ponograpo nga mga pahayag para han “Photo-Drama.” An stereopticon slides ginkuha tikang ha magtahom nga retrato nga nagpapakita han kasaysayan han kalibotan. Importante liwat an paghimo hin ginatos bag-o nga mga debuho ngan mga guhit. An iba nga mga slide ngan mga pelikula nga de-kolor makuti nga personal nga gindebuho. Ngan damu ka  beses nga ginbuhat ini, tungod kay, inabot an panahon, nakahimo hin 20 nga upat-ka-bahin an kada tagsa. Nagin posible an pagpasalida han bahin han “Photo-Drama” ha 80 ibaiba nga siyudad ha bisan ano nga adlaw!

Ha Luyo han mga Hitabo

Ano an diri hinbabaroan durante han mga pagpasalida han “Photo-Drama”? “An Drama nagtikang ha usa nga pasalida ni Bugto Russell,” siring han Estudyante han Biblia nga hi Alice Hoffman. “Kon nakikita na hiya ha telon ngan an iya baba nagtikang kumiwa, patutukaron an ponograpo . . . ngan nalilipay kami pamati han iya tingog.”

May kalabotan han proseso han pagkuha han retrato nga nagpapadayon an pagkiwa, hi Zola Hoffman nahinumdom: “Nalingkod ako didto nga nahipapausa samtang amon nakikita an pagpasalida han mga adlaw han paglarang. Nakita gud namon an mga liryo nga hinayhinay nga nabuka.”

An mahilig han musika nga hi Karl F. Klein han Nagmamando nga Lawas han mga Saksi ni Jehova nagdugang: “Samtang iginpapasalida ini, mayada naduyog nga magopay hinduro nga musika, sugad han de-kalidad nga Narcissus ngan Humoreske.”

Mayada liwat iba diri hingangalimtan nga mga hitabo. “Usahay may mga pataraw-an nga mga panhitabo,” nahinumdom hi Clayton J. Woodworth, Jr. “Makausa samtang ginpapatokar an ‘Flee as a Bird to Your Mountain,’ ngan nakita ha telon an retrato han daku nga gigantosaurus, usa nga daku hinduro nga hayop nga nabuhi antes-han-Baha”!

Gawas han regular nga “Photo-Drama of Creation,” waray pag-iha nagkaada mga serye han “Eureka Drama.” (Kitaa an kahon.) An usa ginkompuwesto han nakarekord nga mga pahayag, sugad man han nakarekord nga mga musika. An usa mayada mga rekord ngan mga slide. Bisan kon an “Eureka Drama” waray nagkikiwa nga mga pasalida, malampuson gud ito kon iginpapasalida ha diri tawuhon nga mga lugar.

Epektibo nga Garamiton ha Pagwali

Ha kataposan han 1914, an “Photo-Drama” nakita na han sobra 9,000,000 nga magkirita ha Amerika del Norte, Europa, ngan Australia. Bisan kon gutiay la, an mga Estudyante han Biblia mayada marig-on nga pagtoo nga ginkinahanglan ha pagpasamwak han maopay nga sumat nga nagamit hinin bag-o nga paagi. Malipayon nga nag-amot hira hin kuwarta nga ginkinahanglan ha pagplete hin angayan nga mga lugar para hini nga mga pasalida. Salit an “Photo-Drama of Creation” nakahimo hin daku ha pagpakilala ha mga magkirita han Pulong han Dios ngan han iya mga katuyoan.

Ha surat kan C. T. Russell, usa nga tawo an nagsurat: “Iton siyahan nga pagbisita ha iyo Drama amo an importante nga pagbag-o ha akon kinabuhi; o, an importante nga pagbag-o ha akon kahibaro ha Biblia.” An usa pa nga indibiduwal nagsiring: “Haros diri na ako natoo ha relihiyon ngan inaabat ko nga natalwas ako han ‘Photo-Drama of Creation’ nga iginpasalida dinhi ha naglabay nga katpaso. . . . Mayada na ako yana han kamurayawan nga diri maihahatag han kalibotan ngan diri ko ighahatag bisan ha baylo han ngatanan nga karikohan hito.”

Hi Demetrius Papageorge, maiha na nga membro han mga nagdudumara ha headquarters han sosiedad, nagkomento: “An ‘Photo-Drama’ an obramaestra han usa nga proyekto, kon aton tatagdon an gutiay nga mga Estudyante han Biblia ngan an gutiay nga magagamit ha pinansyal. Mayada gud ito han espiritu ni Jehova!”

[Kahon/Retrato ha pahina 8, 9]

An “Eureka Drama”

Paglabay hin walo ka bulan katapos han siyahan nga pagpasalida han “Photo-Drama,” nakita han Sosiedad an panginahanglan ha pagtagana hin iba nga bersyon hito nga gintawag nga “Eureka Drama.” Samtang an bug-os nga “Photo-Drama” padayon nga iginpasalida ha dagku nga mga siyudad, an “Eureka” nagpakita hin pariho importante nga mensahe ha mga barangay ngan mga baryo. An usa nga bersyon han “Eureka Drama” iginsaysay sugad nga naghatag “ha kabugtoan nga kababayin-an hin maopay nga higayon” ha pagwali. Kay ano? Tungod kay an bug-at han mga rekord han ponograpo naabot la hin 14 ka kilo. Siyempre, basi maipasalida, kinahanglan liwat magdara hin ponograpo.