An mga Saksi ni Jehova Nagpapadayon nga Marig-on an Pagtoo!

Report han Tinuig nga Katirok

HINI nga mga panahon han kawaray-kasigurohan ngan pagruhaduha, naiiba an mga Saksi ni Jehova sugad nga mga Kristiano nga marig-on an pagtoo. Nagin matin-aw ini ha tinuig nga katirok han Watch Tower Bible and Tract Society of Pennsylvania, nga gindumara ha Jersey City, New Jersey Assembly Hall of Jehovah’s Witnesses han Sabado, Oktubre 7, 2000. a

Ha iya siyahan nga pahayag, an tsirman, hi John E. Barr, usa nga membro han Nagmamando nga Lawas han mga Saksi ni Jehova, nagsiring: “Ha kabug-osan han binilyon nga umurukoy han tuna, maaram ngan natoo kita nga an hinigugma nga Anak ni Jehova, hi Kristo-Jesus, nahitrono na yana ha langit, nagmamando ha butnga han iya mga kaaway.” Iginpahayag an ebidensya han sugad marig-on nga pagtoo ha unom makalilipay nga report tikang ha bug-os nga kalibotan.

Pagdaog han Espiritismo Pinaagi han Kamatuoran han Biblia ha Haiti

Kaylap an espiritismo ha Haiti. “Kasagaran,” siring han nagdudumara han Komite han Sanga nga hi John Norman, “ginsisingba han mga tawo an ira patay nga kaapoy-apoyan basi mapanalipdan an ira kalugaringon.” Usa nga tamyawan an nagruhaduha han mawara an iya usa nga tiil ha aksidente. ‘Paonan-o ini nahitabo ha akon kon ginpapanalipdan ako han mga espiritu?’ naghunahuna hiya. Pariho han damu nga tawo, gintutdoan ini nga lalaki han kamatuoran han mga Saksi ni Jehova ngan nabuligan nga makabulag ha espiritismo. Nakikita an posibilidad han pag-uswag ha Haiti tungod kay han Abril 19, 2000, upat ka pilo han kadamu han mga magwarali han Ginhadian hito nga nasud an tinambong ha Memoryal han kamatayon ni Kristo.

Kadasig ha Haluag nga Teritoryo han Korea

Ha Korea, 40 porsyento han mga Saksi ni Jehova an aada ha bug-os-panahon nga pag-alagad. “Tungod hinin damu nga mga parasamwak,” siring han nagdudumara han Komite han Sanga nga hi Milton Hamilton, “an amon teritoryo nga may sobra 47 ka milyon nga tawo nawawalihan makausa ha usa ka bulan.” Labi nga maoobserbahan an pag-uswag ha mga kongregasyon han sign-language. Ha usa nga sirkito han sign-language, 800 nga pag-aram ha Biblia ha balay an gindudumara. Mayada ini aberids nga usa nga pag-aram ha kada magwarali. Makasurubo, an batan-on nga kalalakin-an ginpipriso pa gihapon tungod han ira neutralidad. Kondi, gintatrato hin maopay han mga awtoridad ha prisohan inin matinumanon nga mga Kristiano, ngan agsob nga gintatagan hira hin mga trabaho nga nagkikinahanglan hin pagkamasasarigan.

 Nahimo an mga Ginkikinahanglanhan Pag-uswag ha Mexico

An pungkay nga 533,665 nga parasamwak han Ginhadian nagreport ha pag-alagad ha kanataran ha Mexico han Agusto 2000. Sobra tulo ka pilo hito nga kadamu an tinambong ha Memoryal. “An amon tumong para hini nga tuig amo an pagtukod hin 240 dugang nga Kingdom Hall,” siring han nagdudumara han Komite han Sanga nga hi Robert Tracy. “Ha gihapon,” nagdugang hiya, “nagkikinahanglan kami hin damu pa.”

Susbaranan an mga batan-on han mga Saksi ni Jehova ha Mexico. May kalabotan ha usa nga batan-on, usa nga Katoliko nga padi an nagsiring: “Karuyag ko magkaada hin bisan usa la nga pariho ha iya ha akon mga sumurunod. Gindadayaw ko ini nga mga tawo tungod han ira marig-on nga prinsipyo ngan maaramon nga paggamit han Biblia. Gindidepensahan nira an Dios, bisan kon namilegro an ira kinabuhi.”

Integridad ha Butnga han Kasamok ha Sierra Leone

Tikang han Abril 1991, han nagkaada girra sibil ha Sierra Leone, yinukot nga tawo an namatay, nadaot, o nabaldado. “An girra ngan kakurian nagkaada daku nga epekto ha mga tawo,” siring han nagdudumara han Komite han Sanga nga hi Bill Cowan. “Damu han nadiri han aton mensahe hadto an namamati na yana. Ordinaryo na la para ha mga tawo nga tumambong ha amon mga Kingdom Hall ha siyahan nga higayon bisan kon waray hira dapita. An kabugtoan agsob nga gintatawag ha kalsada ngan ginhahangyo para hin pag-aram ha Biblia.” Bisan pa han padayon nga kasamok han nasud, an pagwali-han-Ginhadian nga buruhaton namumunga ha Sierra Leone.

Daku nga Programa ha Pagtukod ha Aprika del Sur

Yana, mayada panginahanglan hin yinukot nga mga Kingdom Hall ha teritoryo nga gindudumara han opisina han sanga ha Aprika del Sur. Ginatos nga mga katirokan an gintukod na. “Imbes nga magkatirok ha payag o ilarom han puno han kahoy, sugad han ginhimo hadto, an aton kabugtoan nagkakatirok na ha desente nga lugar nga mayada maopay nga lingkoran,” siring han membro han Komite han Sanga nga hi John Kikot. “Bisan kon an kadam-an hini nga mga Kingdom Hall mayada simple nga disenyo, agsob nga ito an gimaopayi nga mga tinukod ha ira lugar. Ha iba nga mga lugar, naobserbahan nga katapos magtukod hin Kingdom Hall, an kongregasyon nasobra pa ha doble an kadamu han natambong ha sunod nga tuig.”

Bag-o nga Henerasyon han mga Saksi ha Ukraine

Durante han 2000 nga tuig han pag-alagad, ini nga nasud mayada pungkay nga 112,720 nga magwarali. Sobra 50,000 hini an nahibaro han kamatuoran han Biblia durante han naglabay nga lima ka tuig. “Ha pagkamatuod, iginbangon ni Jehova an bag-o, batan-on nga henerasyon han mga Saksi ha pagpahayag han iya ngaran!” siring ni John Didur, nga nagdudumara han Komite han Sanga. “Ha naglabay nga duha ka tuig,” hiya nagdugang, “naipahamutang namon an sobra 50 ka milyon nga magasin, nga katugbang ha populasyon han nasud. Kada bulan, ha aberids, nakakarawat namon an usa ka yukot nga surat tikang ha interesado nga mga tawo nga naghahangyo hin dugang nga impormasyon.”

Iba pa nga Makapabantad nga mga Bahin han Programa

Hi Daniel Sydlik, usa nga membro han Nagmamando nga Lawas, naghatag hin makapainteres nga pahayag. An artikulo nga “Kon Paonan-o Naiiba an Nagmamando nga Lawas Tikang ha Legal nga Korporasyon,” nga mababasa hini nga magasin, iginbasar hiton impormatibo nga pahayag.

Hi Theodore Jaracz han Nagmamando nga Lawas an naghatag hin makapainteres nga pahayag ha ulohan nga “Mga Paramangno Ngan Ministeryal nga mga Surugoon Teokratikanhon nga Pinili.” Usa han mga artikulo nga mababasa hini nga magasin an iginbasar hito nga topiko.

An tinuig nga katirok nag-uupod liwat han makapabantad nga pahayag han membro han Nagmamando nga Lawas nga hi David Splane sumala ha tinuig nga teksto para han tuig 2001. Basado ha mga pulong ni apostol Pablo, an teksto: “Mahingpit kamo ngan mabug-os an iyo pagsarig ha ngatanan nga kaburut-on han Dios.” (Kolosas 4:12) An mga Saksi ni Jehova ha bug-os nga kalibotan determinado nga buhaton ito samtang matinumanon nga nagwawali hira han maopay nga sumat han Ginhadian han Dios ha bug-os nga tuna.—Mateo 24:14.

[Footnote]