Mahimo Ka ba Magin Totoo nga Malipayon?

GINKUKUMUSTA ni George an ngatanan nga may pahiyom. Para ha iya, an kinabuhi usa nga presyoso nga regalo nga angay pahimulosan. An iya pagin malipayon ngan pagin positibo amo an iya pangirilal-an—bisan pa han magtikang hiya pag-antos han mga kasakitan han kalagas. Tubtob han adlaw nga hiya namatay, kilala hi George nga malipayon nga tawo. Malipayon ka ba pariho kan George? Ginhuhunahuna mo ba an tagsa bag-o nga adlaw sugad nga regalo nga angay pahimulosan? O nasusubo ka ba o nahahadlok pa ngani ha mahitatabo ha pag-abot han bag-o nga adlaw? Mayada ba nagkukuha han imo kalipay?

An kalipay ginhatagan hin kahulogan sugad nga kahimtang han kaopayan nga baga hin permanente. Iginhuhulagway ito han mga emosyon tikang ha pagkakontento tubtob ha hilarom ngan duro nga pagrayhak ngan han natural nga hingyap nga magpadayon an kaopayan. Naeksister gud ba an kalipay nga sugad hito?

Yana nga panahon, igin-aaghat han sosiedad an ideya nga magigin malipayon la an mga tawo kon hira may igo nga karikohan. An minilyon nga mga tawo okupado an panahon tungod han ira duro nga pangalimbasog nga magriko. Ha pagbuhat hito, iginsasakripisyo han damu an ira mga relasyon ha iba ngan an iba importante nga mga butang ha kinabuhi. Pariho hin mga tubak ha ira urukyan, pirme hira nagdadagmit, ngan gutiay na la an ira panahon ha pamalandong han ira ginbubuhat o para ha iba. Salit, “nag-uuswag an kadamu han mga tawo nga mayada depresyon,” siring han report ha Los Angeles Times, “ngan nagtitikang [an depresyon] ha nagtitikabata nga pangidaron. . . . Masurong an mga medisina nga kontra-depresyon ha mga parmasya.” Minilyon an nagtutumar han igindidiri nga mga droga o nangangalimbasog ha pagpara han ira mga problema pinaagi han alkohol. An iba  namamalit kon naabat hin depresyon. Ha usa nga surbey, “ipinapakita nga an kababayin-an amo an masayon magpatagbaw hin pamalit basi malibang,” siring han pahayagan ha Britanya nga The Guardian. “Tulo ka beses nga mas nahihilig hira ha pamalit kontra han kalalakin-an kon mayada depresyon.”

Kondi, an totoo nga kalipay diri mabibilngan ha tindahan, ha irinmon nga nakakahubog, ha medisina, ha droga, o ha kuwarta ha bangko. Diri iginbabaligya an kalipay; libre ito. Diin naton mabibilngan an sugad presyoso nga regalo? Paghihisgotan naton ito ha sunod nga artikulo.