Waray Dugo nga Operasyon “Daku nga Pagbag-o ha Mediko”

ILAROM han ulohan nga “‘Bloodless’ Surgery,” an Maclean’s nga magasin nagreport nga an mga doktor ha Canada “naghihimo hin bag-o nga mga paagi nga, ha naglabay nga lima ka tuig, nakahimo han tinatawag nga waray dugo nga operasyon nga daku nga pagbag-o ha mediko.” Usa ha ira hi Brian Muirhead, nga anesthesiologist ha Health Sciences Centre ha Winnipeg. Ano an nagdasig han iya pagsaliksik hin alternatibo nga pagtambal nga waray dugo?

Han 1986, ginbuhat ni Dr. Muirhead an makuri nga pag-opera ha 70-anyos nga lalaki nga mayada nagdudugo nga ulcer nga, tungod han iya basado-ha-Biblia nga tinotoohan sugad nga usa han mga Saksi ni Jehova, naghangyo hiya hin pagtambal nga diri nagkikinahanglan hin pag-abuno hin dugo. (Buhat 15:28, 29) “Ginamit [ni Dr. Muirhead] an talagsa la gamiton nga paagi han pag-abuno hin saline solution ha pasyente basi magpabilin nga hitaas an presyon han iya dugo,” nagreport an Maclean’s. “Naglampos an operasyon, ngan nagparig-on pa gud ito han nagdudugang nga pagtoo ni Muirhead nga ‘naghahatag kami hin damu gud nga pag-abuno hin dugo. Naghunahuna ako nga panahon na ha paggamit hin mga alternatibo.’ ”

An pagsaliksik para han waray dugo nga operasyon “nahimo tungod han kabaraka ha mahitatabo han tidaraon nga suplay han donasyon nga dugo—ngan han kahadlok han damu nga mga pasyente nga magkasakit tungod han pag-abuno.” Tungod han pagsaliksik han mga doktor nga mauyatom nga mamiling hin bag-o nga paagi, diri la mga Saksi ni Jehova kondi damu nga iba pa an nagpapahimulos hito. “Gawas pa han paglikay han mga pag-abuno ha damu nga mga kahimtang, an waray dugo nga operasyon nag-iiban han peligro—bisan gutiay—han impeksyon tikang ha mahugaw nga dugo,” siring han Maclean’s. Kondi bisan an “limpyo” nga dugo peligroso ha impeksyon pinaagi han temporaryo nga pagpugong han immune system han mga pasyente.

Ano an marig-on nga tinotoohan han mga Saksi ni Jehova may kalabotan han alternatibo nga pagtambal nga waray dugo? Bangin interesado ka nga basahon an brosyur nga How Can Blood Save Your Life? Malilipay an mga Saksi ni Jehova nga ipaangbit ito ha imo.