An Maopay nga Sumat han Ginhadian—Ano Ito?

Han naglabay nga tuig ha 235 nga nasud ha bug-os nga kalibotan, 6,035,564 nga tawo, batan-on ngan lagas, an naggasto hin 1,171,270,425 ka oras ha pakiistorya ha iba mahitungod hito. Dugang pa ha pag-istorya mahitungod hito, nakapahamutang hira ha publiko hin sobra 700 ka milyon nga inimprinta nga barasahon basi maipasamwak ngan maisaysay ito. Nanaltag liwat hira hin yinukot nga audiocassette ngan videocassette ha pagpakilala hito. Ano “ito”?

“ITO” an maopay nga sumat han Ginhadian han Dios. Oo, waray pa gud mahitabo ha kasaysayan han tawo nga “ini nga Maopay nga Sumat han ginhadian” iginwali ha daku nga sukol sugad han aton nakikita yana nga panahon.—Mateo 24:14.

Adton nagbubuhat hinin bug-os-kalibotan nga pagwali ngan pagtutdo ngatanan mga boluntaryo. Tikang ha punto de bista nga diri-relihiyoso, baga hin diri kuwalipikado hira para han buruhaton. Ano, kon sugad, an hinungdan han ira kaisog ngan han ira paglampos? An gahum han maopay nga sumat han Ginhadian an daku gud nga hinungdan, tungod kay ito amo an sumat mahitungod han mga bendisyon nga maabot ha katawohan. Ini an mga bendisyon nga ginhihingyap han ngatanan nga mga tawo—kalipayan, katalwasan tikang ha pinansyal nga kakurian, maopay nga gobyerno, kamurayawan ngan kasigurohan, ngan usa pa nga ginhuhunahuna han kadam-an nga mga tawo nga imposible—kinabuhi nga waray kataposan! Maopay gud ini nga sumat ha mga tawo nga namimiling han kahulogan ngan katuyoan han kinabuhi. Oo, ini ngatanan nga mga bendisyon ngan damu pa maiimo kon makarawat ka ngan positibo nga magios ha pagpahayag han maopay nga sumat han Ginhadian.

Ano an Ginhadian?

Kondi, ano an Ginhadian nga iginpapahayag sugad nga maopay nga sumat? Ito an Ginhadian nga igintututdo ha minilyon nga ig-ampo pinaagi hinin pamilyar nga mga pulong: “Amay namon, nga aada ka ha langit, gindadayaw an imo ngaran; Kumanhi an imo ginhadian. Matuman an imo pagburut-an, sugad ha langit, amo man ha tuna.”—Mateo 6:9, 10.

Ito an Ginhadian nga gin-unabi han Hebreohanon nga hi propeta Daniel sobra 25 ka siglo na an naglabay han hiya nagsurat: “An Dios ha langit magpapabangon hin usa nga ginhadian, nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.”—Daniel 2:44.

Salit, an maopay nga sumat amo an mahitungod han Ginhadian, o gobyerno, han Dios nga magkukuha han ngatanan nga karaotan ngan katapos magmamando ha bug-os nga tuna ha  kamurayawan. Tutumanon hito an orihinal nga katuyoan han Maglalarang para ha katawohan ngan para ha tuna.—Genesis 1:28.

“An Ginhadian han Langit Tikahirani Na”

Haros 2,000 ka tuig na an naglabay, an maopay nga sumat han Ginhadian siyahan nga iginpahayag ha publiko han dedikado nga tawo nga an dagway ngan an paggawi takos han daku nga atensyon. Ito nga lalaki amo hi Juan nga Parabaptis, anak han Judio nga saserdote nga hi Sakarias ngan han iya asawa, hi Elisabet. An panapton ni Juan hinimo tikang ha barahibo han kamelyo, nga mayada bigkis nga anit ha iya baliatang, sugad han kan propeta Elias, nga nagrepresentar ha iya. Kondi an nakadani han atensyon han damu amo an iya mensahe. “Magbasol kamo,” hiya nagpahayag, “kay an ginhadian han langit tikahirani na.”—Mateo 3:1-6.

An mga mamarati ni Juan mga Judio, nga nag-angkon nga mga magsiringba han totoo nga Dios, hi Jehova. Sugad nga nasud, nakarawat nira an kauyonan han Balaud pinaagi kan Moises, mga 1,500 ka tuig na an naglabay. Natindog pa gihapon ha Jerusalem an makatarag-ob nga templo, diin ginhimo an mga paghalad uyon ha Balaud. Sigurado an mga Judio nga an ira pagsingba husto ha paniplatan ni Jehova.

Kondi, samtang namamati kan Juan, hinbaroan han pipira nga mga tawo nga an ira relihiyon diri sugad han ira ginhunahuna. An Griego nga kultura ngan pilosopiya nakasulod ha relihiyoso nga mga katutdoan han mga Judio. An balaud nga nakarawat tikang ha Dios pinaagi kan Moises nahugawan na yana, nagin maluya pa ngani, tungod han hinimo han tawo nga mga gintotoohan ngan mga tradisyon. (Mateo 15:6) Tungod kay sayop nga giniyahan han waray-pagbati ngan waray-kalooy nga mga lider han relihiyon, an kadam-an diri na nagsisingba ha Dios ha paagi nga kinakarawat. (Jakobo 1:27) Kinahanglan magbasol hira han ira mga sala ha Dios ngan ha kauyonan han Balaud.

Hito nga panahon, damu nga mga Judio an naglalaom nga hikit-an an iginsaad nga Mesias, o Kristo, ngan an iba naghunahuna mahitungod kan Juan: “Bangin la hiya hi Kristo”? Kondi, waray angkona ni Juan nga hiya an Kristo lugod iya giniyahan hira ha usa nga tawo, nga mahitungod ha iya hiya nagsiring: “An higot han iya sapin diri ako takos makahubad.” (Lukas 3:15, 16) Ha pagpakilala kan Jesus ha iya mga disipulo, hi Juan nagpahayag: “Kitaa, an Karnero han Dios nga nagkukuha han mga sala han kalibotan”!—Juan 1:29.

Maopay gud ito nga sumat, tungod kay hi Juan, ha pagkamatuod, naggigiya han ngatanan nga mga tawo ha dalan ngadto ha kinabuhi ngan kalipay—hi Jesus, an usa nga “nagkukuha han mga sala han kalibotan.” Sugad nga mga katulinan ni Adan ngan Eva, ipinanganak an ngatanan nga mga tawo ilarom han matalumpiguson nga gahum han sala ngan kamatayon. An Roma 5:19 nagsasaysay: “Sugad nga an paglaris han usa la ka tawo [Adan], naghatag han iba hin pagpakasala, amo man tungod han pagkamasinurundon han usa [Jesus], an kadam-an pagpapakamatadungon.” Hi Jesus, pariho hin halad nga karnero, ‘magkukuha han sala’ ngan magbabag-o han masurub-on nga kahimtang han mga tawo. “An suhol han sala amo an kamatayon,” siring han Biblia, “kondi an hatag nga waray bayad han Dios amo an kinabuhi nga waray kataposan, nga aada kan Kristo Jesus nga aton Ginoo.”—Roma 6:23.

 Sugad nga hingpit nga tawo—ha pagkamatuod, an pinakabantogan nga tawo nga nabuhi—hi Jesus nagwali han maopay nga sumat. An asoy han Biblia ha Markos 1:14, 15 nagsusumat ha aton: “Han kabilanggo na ni Juan, inabot hi Jesus ha Galilea pagwali han Maopay nga Sumat han Dios. Ngan nasiring: An panahon natuman na, ngan an ginhadian han Dios tikahirani na: Magbasol, ngan tumoo kamo ha Maopay nga Sumat.”

Adton ginios uyon ha mensahe ni Jesus ngan nagbuhat hin pagtoo ha maopay nga sumat hura nga ginbendisyonan. An Juan 1:12 nasiring: “Ha ngatanan nga kinarawat [kan Jesus], ginhatagan niya hin gahum basi nga mahimo hira nga mga anak han Dios: bisan ha ngatanan nga nagtotoo ha iya ngaran.” Tungod kay mga anak, o mga anak nga lalaki, han Dios, takos hira ha pagkarawat han balos nga kinabuhi nga waray kataposan.—1 Juan 2:25.

Kondi an pribilehiyo ha pagkarawat han mga bendisyon han Ginhadian diri limitado ha mga tawo ha siyahan nga siglo. Sugad han gin-unabi na, an maopay nga sumat han Ginhadian han Dios iginwawali ngan igintututdo ha bug-os inuukyan nga tuna yana nga panahon. Salit makakarawat pa gihapon an mga bendisyon han Ginhadian. Ano an imo kinahanglan buhaton basi makarawat an sugad nga mga bendisyon? Isasaysay ito ha masunod nga artikulo.