“Maopay Gud hi Jehova ha Akon!”

HA USA ka marisyo hinduro nga gab-i han Marso 1985, naeksperyensyahan han kalalakin-an ngan kababayin-an ha Writing Department ha headquarters han mga Saksi ni Jehova ha New York, E.U.A. an usa ka importante nga hitabo. Hito nga panahon 60 ka tuig na hi Karl F. Klein ha bug-os-panahon nga ministeryo. Malipayon hi Bugto Klein nga nagsiring: “Maopay gud hi Jehova ha akon!” Nagsumat hiya nga paborito niya nga teksto ha Biblia an Salmo 37:4. Katapos, iya ginlipay an ngatanan pinaagi han pagtokar han iya byolin de baho.

Han sunod nga 15 ka tuig, padayon nga nagtrabaho hi Bugto Klein sugad nga membro han grupo han mga parasurat ngan nag-alagad ha Nagmamando nga Lawas han mga Saksi ni Jehova. Ngan, han Enero 3, 2001, ha edad nga 95, matinumanon nga nakatapos hi Karl Klein han iya tunan-on nga kinabuhi.

Natawo hi Karl ha Alemanya. An iya pamilya binalhin ngadto ha Estados Unidos, ngan nagdaku hi Karl ha usa nga barangay han Chicago, Illinois. Samtang batan-on pa nagin interesado gud ha Biblia hi Karl ngan an iya manghod nga lalaki nga hi Ted. Nabawtismohan hi Karl han 1918, ngan an makalilipay nga mga butang nga iya hinbatian ha usa nga kombensyon han mga Estudyante ha Biblia han 1922 nakaaghat han iya bug-os-kinabuhi nga gugma para ha ministeryo ha kanataran. Diri niya karuyag nga lumabay an usa ka semana nga diri nakikigbahin ha pagwali nga buruhaton, ginbubuhat ito bisan ha ultimo nga mga semana han iya kinabuhi.

Nagin membro hi Karl han headquarters staff han 1925, nagtatrabaho siyahan ha imprintahan. Mayada hiya totoo nga hilig ha musika, ngan ha sulod hin pipira ka mga tuig nagtokar hiya han byolin de baho ha orkestra nga mababatian ha Kristiano nga estasyon han radyo. Katapos hito, nagtrabaho hiya ha Service Department, labi nga nalipay ha iya pakig-upod ha nagdumara hito, hi T. J. Sullivan. Samtang hito nga panahon, nakaasawa hi Ted ngan kaupod an iya asawa, hi Doris, nag-alagad sugad nga misyonero ha Puerto Rico.

Ha sulod hin tunga ka siglo, nagtrabaho hi Karl Klein ha Writing Department, diin nakabulig gud hiya tungod kay karuyag niya magsaliksik ngan mayada hiya hilarom nga kahibaro ha Biblia. Han 1963, nakaasawa hi Karl kan Margareta, usa nga Aleman nga misyonera nga nag-aalagad ha Bolivia. Pinaagi han mahigugmaon nga suporta ni Margareta, labi na han nakaeksperyensya hiya hin mga problema ha kahimsog, nagin aktibo hiya bisan pa lahos na gud han edad nga an kadam-an nagretiro na. An pagin sinsero ni Karl, ngan an kadasig ha pagin musikero, nagresulta hin diri-mahikakalimtan nga mga pahayag ha mga kongregasyon ngan ha mga kombensyon. Diri na la maiha antes hiya mamatay, nanguna hiya ha paghisgot han teksto ha aga ha daku nga pamilya han Bethel ha New York, nga ikinalipay ngan napahimulsan han ngatanan.

Damu han regular nga mga parabasa han The Watchtower an mahinunumdom han istorya han kinabuhi ni Bugto Klein, an makaruruyag nga asoy han iya mga eksperyensya nga iginpublikar ha gowa han Oktubre 1, 1984. Malilipay ka ha pagbasa o pagbasa-utro hito nga asoy, samtang ginhuhunahuna nga an nagsurat hito naggasto hin usa ngan tunga pa ka dekada sugad nga matinumanon ngan debotado nga Kristiano.

Sugad nga usa han mga dinihogan han Ginoo, bug-os kasingkasing nga hingyap ni Bugto Klein nga magmando kaupod ni Kristo ha langit. Mayada kita han ngatanan nga hinungdan nga tumoo nga gintuman na yana ni Jehova ito nga hingyap.—Lukas 22:28-30.

[Retrato ha pahina 31]

Hi Karl han 1943 kaupod hi T. J. Sullivan ngan Ted ngan Doris

[Retrato ha pahina 31]

Hi Karl ngan hi Margareta, han Oktubre 2000