Magin Malipayon ha Paglaom ha Ginhadian!

MALIPAYON adto nga okasyon han Marso 10, 2001 nga nagtirok an 5,784 nga mamarati, ha tulo nga katirokan ha Estado han New York nga ginagamit han daku nga pamilya han Bethel. An okasyon amo an gradwasyon han ika-110 nga klase han pagmisyonero nga eskwelahan han Gilead.

Gin-abiabi an ngatanan ngan gintikangan an programa ni Carey Barber, usa nga membro han Nagmamando nga Lawas han mga Saksi ni Jehova, nga nasiring: “Nalilipay gud kita ha paghibaro nga 110 nga klase han mga estudyante ha Gilead an nabansay na yana sugad nga mga misyonero ngan igintoka ha mga teritoryo ha bug-os nga kalibotan.”

Kon Paonan-o Magpapabilin nga Malipayon

Pagkatapos han siyahan nga pahayag ni Bugto Barber, nagpahayag hi Don Adams ha mamarati, upod na an 48 nga naggradwar nga mga estudyante, ha tema nga “An Bendisyon ni Jehova Nakakahimo ha Aton nga Bahandianon.” Iginbabasar an iya pahayag ha Proberbios 10:22, iya ginpahinumdom an mamarati nga ginsusuportahan ngan ginbibendisyonan ni Jehova an iya mga surugoon kon ira gin-uuna an mga interes han Ginhadian ha ira mga kinabuhi. Iya gindasig an mga estudyante nga karawaton an ira bag-o nga mga toka nga may disidido nga espiritu pariho kan apostol Pablo han ginhangyo hiya nga ‘kumadto ha Masedonia ngan bumulig.’ (Buhat 16:9) Bisan kon mayada mga kakurian nga kinahanglan malamposan, an pagkadisidido ni Pablo ha pagwali ha lugar nga igintoka ha iya nagresulta hin damu makalilipay nga mga bendisyon.

An mga membro han naggradwar nga klase nakatapos han ira lima-ka-bulan nga pag-aram han Biblia ngan pagbansay ha pangandam para han pagmisyonero. Ha gihapon, hi Daniel Sydlik, membro han Nagmamando nga Lawas han mga Saksi ni Jehova, nagdasig ha ira nga magpadayon ha pag-aram. Ha paghisgot ha tema nga “Magin Totoo nga mga Disipulo,” hiya nagsiring: “An pagin-disipulo nangangahulogan hin pagsunod pirme ha mga pulong ni Jesus. Nag-uupod ito han aton pagin disidido pirme ha pamati ha iya mga pulong, ha iya mensahe, ha iya katutdoan.” Iya iginpatin-aw nga an mga disipulo ni Kristo diri naghihimo hin mga desisyon nga diri namamati ha tingog han Agaron; an kinaadman han Dios aada ha kinabuhi ni Kristo. (Kolosas 2:3) Waray usa ha aton nga makakabati hin makausa han mga pulong ni Jesus ngan maghuhunahuna nga maaram na kita han ngatanan mahitungod ha iya, salit gindasig ni Bugto Sydlik an mga naggradwar nga magpadayon ha pag-aram, pag-aplikar, ngan pagtutdo han Kristiano nga kamatuoran, nga nagriresulta ha kagawasan.—Juan 8:31, 32.

Basi magpabilin nga malipayon ha pag-alagad ha Dios, kinahanglan kinaburut-on nga karawaton han usa an disiplina ngan pagtadong. “An Imo ba mga Isol Magtatadong ha Imo?” amo an pakiana nga iginbangon han instruktor han Gilead nga hi Lawrence Bowen. Iya ipinakita nga ha Biblia an simboliko nga mga isol may kalabotan ha gihilarumi nga mga panhunahuna ngan mga emosyon han usa. Mahimo ito magtadong ha usa kon an inspirado nga sagdon tikang ha Pulong han Dios nakakasulod ha gihilarumi nga mga bahin han personalidad han usa. (Salmo 16:7; Jeremias 17:10) An matinumanon nga pagkinabuhi han usa mahimo pa ngani makabantad hinduro kan Jehova. Katapos basahon an Proberbios 23:15, 16, an mamumulong nagpakiana: “An imo ba mga isol magtatadong ha imo?” Hiya nagdugang: “Nag-aampo kami nga magtatadong ito, ngan salit tatagan mo hi Jehova hin gihilarumi nga kalipay. Imo babantaron an iya gihilarumi nga mga emosyon. Oo, imo lilipayon hinduro an mga isol han Dios samtang maunungon nga nagpapabilin ka ha imo mga toka.”

An ultimo nga pahayag hini nga bahin han programa iginpahayag ni Mark Noumair, nga nag-alagad sugad nga misyonero ha Kenya antes magin instruktor han Gilead. An iya pahayag nga may tema nga “Mas Maopay an Pagkita Pinaagi han mga Mata” nagpatin-aw han bili han pagpatubo han pagkakontento. Uyon ha Eklesiastes 6:9, hi Bugto Noumair nagsagdon: “Karawata an kamatuoran. Ito an ‘pagkita pinaagi han mga mata.’ Imbes nga mag-ininop mahitungod han usa ka butang nga karuyag mo buhaton kondi diri mo ginbubuhat, isentro an imo hunahuna ha pagbuhat han imo mahihimo uyon ha imo mga kahimtang yana. An pagkinabuhi ha inop, an pagkaada diri makatadunganon nga mga ginlalaoman, o an paghunahuna han negatibo nga mga bahin han imo toka makakahimo la ha imo nga diri-tagbaw ngan diri-kontento.” Oo, hain man kita o anoman an mga kahimtang, an pagin kontento nga basado ha aton relasyon ha Dios ha aton kalugaringon nga mga kahimtang nakakahimo hin malipayon nga espiritu ha pag-alagad ha aton Daku nga Maglalarang.

Makalilipay nga mga Eksperyensya ha Pag-alagad ha Ginhadian Ngan ha Gilead

Katapos han sugad praktikal nga sagdon tikang hito nga mga pahayag, iginsumat han mga estudyante an pipira nga mga eksperyensya nga ira napahimulsan samtang nakikigbahin ha ministeryo ha publiko durante han ira lima ka bulan nga kurso. Ilarom han pagdumara ni Wallace Liverance, an pararehistro han Eskwelahan han Gilead, nagsumat an mga naggradwar nga mga estudyante kon paonan-o nira iginrekomenda an ira kalugaringon sugad nga mga ministro han Dios. (2 Korinto 4:2) Nakahimo hira ha pagdani ha hatag han Dios nga konsensya han iba. An mga eksperyensya han mga estudyante nagpakita kon paonan-o gintikangan an mga pag-aram ha Biblia ha sinsero nga mga indibiduwal nga ira nakaistorya ha kalsada, ha pagsangyaw ha kabalayan, ngan ha iba nga mga kahimtang. Ha ibaiba nga mga okasyon, nagsiring an mga interesado nga an basado-ha-Biblia nga mga publikasyon han organisasyon ni Jehova mayada han kamatuoran. Usa nga tagbalay an positibo gud nga ginios ha usa nga bersikulo han Biblia. Nag-aaram na hiya yana han Biblia kaupod han mga Saksi ni Jehova.

Katapos, gin-interbyu ni Joel Adams an mga naggradwar ha Gilead ha nauna nga mga klase. An iya tema amo an “Ayaw Gud Pag-undang ha Pag-aram, Ayaw Gud Pag-undang ha Pag-alagad kan Jehova.” Adton gin-interbyu mayada napapanahon nga sagdon para ha bag-o nga mga misyonero. Ha paghinumdom han iya panahon sugad nga membro han ika-26 nga klase han Gilead, hi Harry Johnson nagsiring: “Gintutdoan kami nga pirme gintutugwayan ni Jehova an iya katawohan ngan padayon nga magtutugway hiya ha iya katawohan. Ito nga pasarig naghahatag kadasig ha ngatanan nga panahon.” Hi William Nonkes, usa nga membro han ika-53 nga klase han Gilead, nagsagdon ha mga naggradwar: “Labaw ha ngatanan, hunahunaa pirme an mga prinsipyo ha Biblia, ngan iaplikar ito ha ngatanan nga desisyon nga imo hihimoon ha kinabuhi yana ngan ha waray kataposan. Sugad nga resulta, mahihimo mo nga magpabilin ha imo toka, ngan makakarawat mo an hura nga bendisyon ni Jehova.”

“Ginparig-on ha Pagbuhat han Kaburut-on ni Jehova” an tema nga ginpili ni Richard Rian para ha iya bahin ha programa. Usa han iya gin-interbyu amo hi John Kurtz, nga naggradwar han ika-30 nga klase, nga nagmisyonero hin sobra 41 ka tuig ha Espanya. Han ginpakianhan mahitungod han kurikulum han Gilead, hi Bugto Kurtz nagsaysay: “An nangunguna nga aradman nga libro amo an Biblia. Ngan mayada kami mga garamiton ha pag-aram ha Biblia basi mabuligan kami nga hisabtan an Biblia. Mayada hini an ngatanan. Waray sekreto nga impormasyon nga igintatagana ha Gilead. Diri gud ako naundang ha pagpabug-at hini tungod kay an impormasyon nga igintatagana ha Gilead nakakarawat han ngatanan.”

Hi Bugto Gerrit Lösch, usa nga membro han Nagmamando nga Lawas han mga Saksi ni Jehova, an nagtapos han espirituwal nga programa pinaagi han tema nga “Ha Igbaw Ngan ha Ilarom han mga Pako ni Jehova.” Iya iginsaysay kon paonan-o an panalipod ngan suporta han Dios ha iya matinumanon nga mga surugoon igin-ilustrar ha Biblia pinaagi han mga pako han agila. (Deuteronomio 32:11, 12; Salmo 91:4) Usahay ginbubuklad han daku nga agila an mga pako hito ha sulod hin mga oras basi panalipdan an mga anak hito. Usahay, iginlilikos pa ngani han iroy nga agila an iya mga pako ha palibot han iya mga anak basi panalipdan hira tikang ha mahagkot nga hangin. Ha pariho nga paagi ngan uyon ha iya katuyoan, hi Jehova nabulig ha iya matinumanon nga mga surugoon, labi na kon naatubang hira ha espirituwal nga mga pagsari. Diri gintutugotan ni Jehova an iya mga surugoon nga masulay lahos han ira maaakos kondi ginbubuligan hira nga mailob ito. (1 Korinto 10:13) Hi Bugto Lösch nagtapos ha pagsiring: “Basi magpabilin nga napapanalipdan ha espirituwal, kinahanglan magpabilin kita ilarom han mga pako ni Jehova. Nangangahulogan ini nga kinahanglan diri kita magpatubo han espiritu han pag-independente. Pirme kita magin duok kan Jehova ngan ha iya sugad-iroy nga organisasyon, diri kita bumulag tikang ha ira giya ngan mahigugmaon nga sagdon.”

Ginbasa han tsirman an mga telegrama ngan mga surat han pangumusta tikang ha mga naghahandom hin maopay para ha ira ha bug-os nga kalibotan. Ngan inabot an oras ha panhatag han mga diploma. Han matukod an Eskwelahan han Gilead, ginhunahuna an pagkaada limitado la nga kadamu han mga klase ha sobra lima ka tuig nga peryodo. Kondi ha sulod hin 58 ka tuig na iginpapadayon ni Jehova an eskwelahan. Sugad han ginsiring ni Bugto Barber ha iya pagtikang nga pahayag: “Maopay gud nga rekord an nahimo han mga naggradwar ha Gilead tikang han 1943, han magtikang an Gilead! An ira urosa nga mga pangalimbasog nagresulta ha pagdugang hin literal nga ginatos ka yinukot nga mga maaghop ha tuna ngada ha mahimayaon nga organisasyon ni Jehova.” Oo, ini nga eskwelahan ha pagmisyonero nakabulig ha mga minilyon nga magin malipayon ha paglaom ha Ginhadian.

[Kahon ha pahina 24]

ESTADISTIKA HAN KLASE

Kadamu han nasud nga ginrepresentaran: 8

Kadamu han nasud nga gintokahan: 18

Kadamu han estudyante: 48

Aberids han edad: 34

Aberids han mga tuig ha kamatuoran: 18

Aberids han mga tuig ha bug-os-panahon nga ministeryo: 13

 [Retrato ha pahina 25]

Ika-110 nga Nakagradwar nga Klase han Watchtower Bible School of Gilead

Ha listahan ha ubos, ginnumerohan an mga rumbay tikang ha atubangan ngadto ha luyo, ngan iginlista an mga ngaran tikang ha wala tipatoo ha tagsa nga rumbay.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.