Kakahoyan nga Naglalampos ha Pagsari han Panahon

An pangpang bangin diri maopay nga lugar ha pagtukod han imo balay, labi na kon nahimumutang ito ha igbaw han kabukiran. kondi, bisan pa han dayag nga mga disbentaha, an iba han alpino nga kakahoyan nabubuhi hin marig-on ha sugad batoon nga mga pangpang, gin-iilob an kahagkot han sugad hin yelo nga katugnaw ngan ginlalamposan an mga huraw han katpaso.

KASAGARAN, inin marig-on nga kakahoyan diri sugad ka dagku ha kapariho hito nga mga klase han kakahoyan nga natubo ha kapatagan. An mga punò hito bangin damu an lanot ngan baliko ngan napugngan gud an pagtubo hito. An iba pariho pa ngani kitaon ha ordinaryo nga bonsay—nakortihan ngan naporma tungod han maraot nga panahon ngan gutiay la nga tuna diin nagtutubo ito.

Tungod kay natubo ito ha usa han gikukurii nga mga lugar ha kalibotan, bangin hunahunaon mo nga an sugad nga kakahoyan halipot la an kinabuhi. Kondi an totoo amo an kabaliktaran. An iba nasiring nga an Metusela, usa nga punò han pino nga buhukon nga nagtutubo ha kahitas-on nga 3,000 metros ha White Mountains han California, 4,700 na an pangidaron. Gin-unabi han The Guinness Book of Records 1997 ini nga klase sugad nga an gilalagasi nga nabubuhi nga punò han kahoy ha kalibotan. Hi Edmund Schulman, nga nag-aram hinin kadaan nga kakahoyan, nagsaysay: “An buhukon nga punò han pino . . . baga hin nakakatalwas tungod han kakurian. An ngatanan han larolagas tagsatagsa [nga kakahoyan han pino] ha White Mountains mabibilngan hirani ha 3,000 metros an kahitaas ha mamara, batoon nga kamingawan.” Nadiskobrehan liwat ni Schulman nga an gilalagasi nga mga klase han iba nga mga punò han pino nagtubo liwat ha makuri nga mga kahimtang.

Bisan kon kinahanglan lamposan hito an kakurian, inin nagpapailob nga kakahoyan nakakakuha hin daku nga kapulsanan tikang ha duha nga bentaha nga gintatag-iya hito. An nahibubulag nga hinmumutangan hito, diin talagsa la an tanom, nagpapanalipod hito tikang ha mga sunog ha kagurangan, usa han gidadakui nga mga tarhog ha hamtong na nga kakahoyan. Ngan an ira mga gamot marig-on nga nakakaw-ing ha bato nga linog la an makakabantad hito.

Ha Biblia an matinumanon nga mga surugoon han Dios iginpapariho ha kakahoyan. (Salmo 1:1-3;  Jeremias 17:7, 8) Hira liwat mahimo umatubang hin kakurian tungod han ira mga kahimtang. Masasarihan gud an ira pagtoo tungod han pagtimaraot, maluya nga kahimsog, o nakakadaot nga kakablas, labi na kon ini nga mga pagsari nagpapadayon kada tuig. Kondi, an ira Maglalarang, nga nagdisenyo han kakahoyan nga natindog hin marig-on ha kakurian, nagpapasarig han iya mga magsiringba nga iya susuportahan hira. An Biblia nagsasaad hadton nagpapabilin nga marig-on: “[Hiya] magpaparig-on, ngan magpapakusog ha iyo.”—1 Pedro 5:9, 10.

‘Pagtindog ha lugar han usa, pagpabilin nga marig-on, o pagpadayon’ amo an ideya han Griego nga berbo nga agsob ihubad nga “pag-ilob” ha Biblia. Pariho han alpino nga kakahoyan, an maopay nga sistema han mga gamot amo an yawi han pagpailob. Ha mga Kristiano, kinahanglan nga nakagamot hira hin marig-on kan Jesu-Kristo basi magin marig-on. “Tungod nga iyo kinarawat hi Kristo Jesus nga Ginoo,” nagsurat hi Pablo, “magsunod kamo ha iya, nga nanggamot ngan natukdaw kamo ha iya, ngan magrig-on ha iyo pagtoo, sugad han igintutdo ha iyo, nga punô ha pagpasalamat.”—Kolosas 2:6, 7.

Hinsabtan ni Pablo an panginahanglan hin marig-on espirituwal nga mga gamot. Hiya mismo nangalimbasog kontra han “usa nga tunok ha unod,” ngan gin-ilob niya an mapintas nga pagtimaraot ha bug-os han iya ministeryo. (2 Korinto 11:23-27; 12:7) Kondi hinsabtan niya nga ha gahum han Dios mahimo hiya makagpadayon. “Ngatanan mahihimo ko ha gahum han Nagpaparig-on ha akon,” siring niya.—Filipos 4:13.

Sugad han ipinapakita han susbaranan ni Pablo, an malampuson nga pagpailob han Kristiano diri nadepende ha maopay nga mga kahimtang. Pariho han alpino nga kakahoyan nga nakakalampos han mga bagyo ha sulod hin mga siglo, mahimo kita magpabilin nga marig-on ha pagtoo kon nakagamot kita kan Kristo ngan nadepende ha gahum nga iginhahatag han Dios. Dugang pa, kon magpailob kita tubtob ha kataposan, malalaoman naton nga makakaeksperyensya kita han katumanan han usa pa nga saad han Dios: “Masusugad han mga adlaw han usa nga kahoy an mga adlaw han akon katawohan.”—Isaias 65:22; Mateo 24:13.