Magkalipay ha Kahibaro Mahitungod kan Jehova

‘Malipayon adton namamati ha pulong han Dios ngan nagbubuhat hito!’—LUKAS 11:28.

 1. Kakan-o nagtikang hi Jehova ha pagkomunikar ha mga tawo?

 HI Jehova nahigugma ha mga tawo ngan interesado gud ha ira kaopayan. Salit, diri urusahon, nga nagkukomunikar hiya ha ira. Ini nga komunikasyon nagtikang ha hardin han Eden. Sumala ha Genesis 3:8, ha usa nga okasyon ha “katugnaw han adlaw,” hi Adan ngan Eva ‘nakabati han tingog ni Jehova nga Dios.’ Ginsisiring han iba nga nagpapasabot ini nga batasan ni Jehova an pagkomunikar kan Adan hini nga panahon, posible nga kada adlaw. Anoman an kahimtang, iginpapatin-aw han Biblia nga may panahon an Dios diri la ha paghatag hin mga instruksyon ha siyahan nga lalaki kondi liwat ha pagtutdo ha iya han kinahanglan hibaroan niya basi mahimo an iya mga responsabilidad.—Genesis 1:28-30.

 2. Paonan-o binulag an siyahan nga mag-asawa tikang ha giya ni Jehova, ngan ano an resulta?

² Gintagan ni Jehova hi Adan ngan Eva hin kinabuhi, gahum ha mga hayop, ngan awtoridad ha bug-os nga tuna. Usa la an igindiri—diri hira sadang kumaon tikang ha kahoy han kahibaro ha maopay ngan maraot. Tungod kay naimpluwensyahan ni Satanas, gintalapas ni Adan ngan Eva an sugo han Dios. (Genesis 2:16, 17; 3:1-6) Ginpili nira an paglugaring, nagdesisyon ha ira kalugaringon kon ano an husto ngan kon ano an sayop. Ha pagbuhat hito, may kalurongan nga binulag hira tikang ha giya han ira mahigugmaon nga Maglalarang. An mga resulta nakadaot ha ira ngan ha ira diri pa natatawo nga mga anak. Nalagas hi Adan ngan Eva ngan ha kataposan namatay nga waray paglaom han pagkabanhaw. An ira mga anak nakapanunod han sala ngan han resulta hito, kamatayon.—Roma 5:12.

 3. Kay ano nga nagkomunikar hi Jehova kan Kain, ngan paonan-o ginios hi Kain?

³ Bisan pa han pagrebelde ha Eden, nagpadayon hi Jehova ha pagkomunikar ha iya tawhanon nga mga linarang. Hi Kain, an suhag nga anak ni Adan ngan Eva, nameligro nga madaog han sala. Hi Jehova nagpahamangno ha iya nga namimeligro hiya ha kadaot ngan ginsagdonan hiya nga ‘buhaton an maopay.’ Iginsalikway ni Kain inin mahigugmaon nga sagdon ngan ginpatay niya an iya bugto. (Genesis 4:3-8) Salit, an siyahan tulo nga tawo ha tuna nagsalikway han matin-aw nga sugo nga igintagana han usa nga naghatag ha ira hin kinabuhi, an Dios nga naghahatag hin instruksyon ha iya katawohan basi hira magpahimulos ha ira kalugaringon. (Isaias 48:17) Makasurubo gud ini kan Jehova!

Iginpahayag ni Jehova an Iya Kalugaringon ha Matinumanon nga Kalalakin-an ha Kadaan nga mga Panahon

 4. Mahitungod han mga anak ni Adan, nasarig hi Jehova ha ano, ngan ano nga mensahe han paglaom an iya iginpahayag para ha ira mga anak?

⁴ Bisan kon mayada hiya han ngatanan nga katungod nga diri igpadayon an pagkomunikar ha mga tawo, waray buhata ito ni Jehova. Nasarig hiya nga an iba nga mga anak ni Adan maaramon nga masugot ha Iya sugo. Pananglitan, han iginpapadapat an sirot kan Adan ngan Eva, igintagna ni Jehova an pag-abot han usa nga ‘binhi’ nga maato ha Serpente, hi Satanas nga Yawa. Maabot an panahon, makamaratay nga sasamaron hi Satanas ha ulo. (Genesis 3:15) Ini nga tagna malipayon nga mensahe han paglaom ngada ‘hadton namamati ha pulong han Dios ngan nagbubuhat hito.’—Lukas 11:28.

5, 6. Ha ano nga mga paagi nagkomunikar hi Jehova ha iya katawohan antes han siyahan nga siglo K.P., ngan paonan-o hira nagpahimulos hito?

⁵ Iginpahayag ni Jehova an iya kaburut-on ha matinumanon nga mga patriarka ha kadaan nga panahon, sugad kan Noe, Abraham, Isaak, Jakob,  ngan Job. (Genesis 6:13; Eksodo 33:1; Job 38:1-3) Ha urhi, pinaagi kan Moises iya iginhatag an bug-os nga kodego han mga balaud para ha nasud han Israel. Pinahimulsan nira an Mosaiko nga Balaud ha damu nga paagi. Pinaagi han pagsugot hito, iginbulag an Israel tikang ha ngatanan iba nga mga nasud sugad nga espesyal nga katawohan han Dios. Ginpasarig han Dios an mga Israelita nga kon ira susundon an Balaud, iya bibendisyonan hira diri la ha materyal kondi liwat ha espirituwal, hihimoon hira nga ginhadian han mga saserdote, baraan nga nasud. An Balaud nagtagana pa ngani hin mga surundon ha pagkaon ngan kalimpyo nga nagresulta hin maopay nga kahimsog. Kondi, nagpahamangno liwat hi Jehova han makasurubo nga mga resulta han pagtalapas.—Eksodo 19:5, 6; Deuteronomio 28:1-68.

⁶ Inabot an panahon, igindugang ha kanon han Biblia an iba inspirado nga mga libro. An mga asoy han kasaysayan nagsumat han mga pakig-upod ni Jehova ha mga nasud ngan mga katawohan. An mga libro han siday matahom nga nagsaysay han iya mga kalidad. An matagnaon nga mga libro nagtagna kon paonan-o matutuman an kaburut-on ni Jehova ha tidaraon. Gin-adman hin maopay ngan igin-aplikar han matinumanon nga kalalakin-an ha kadaan nga panahon inin inspirado nga mga sinurat. An usa nagsurat: “An imo pulong lawag ha akon mga tiil, ngan suga ha akon agian.” (Salmo 119:105) Hi Jehova nagtagana hin edukasyon ngan kalamrag ngada hadton disidido mamati.

An Kalamrag Nagtitikahayag

 7. Bisan kon hi Jesus nagbuhat hin mga milagro, siyahan nga nakilala hiya sugad nga ano, ngan kay ano?

⁷ Ha siyahan nga siglo, gindugangan han Judio relihiyoso nga mga grupo hin mga tradisyon han tawo an Balaud. Sayop nga inaplikar an Balaud, ngan imbes nga magin surok han kahayag, nagin mabug-at ito tungod hiton nga mga tradisyon. (Mateo 23:2-4) Kondi, han 29 K.P., inabot hi Jesus sugad nga Mesias. An iya misyon diri la kay paghatag han iya kinabuhi para ha katawohan kondi liwat basi “magtestigo han kamatuoran.” Bisan kon nagbuhat hiya hin mga milagro, kilala gud hiya siyahan sugad nga “Magturutdo.” An iya katutdoan pariho han kalamrag nga nasanag ha espirituwal nga kasisidman nga nagpadulom han mga hunahuna han mga tawo. Hi Jesus mismo husto nga nagsiring: “Ako amo an kalamrag ha kalibotan.”—Juan 8:12; 11:28; 18:37.

 8. Ano nga inspirado nga mga libro an iginsurat ha siyahan nga siglo K.P., ngan paonan-o nagpahimulos hito an siyahan nga mga Kristiano?

⁸ Ha urhi igindugang an mga Ebanghelyo, upat an iginsurat mahitungod han kinabuhi ni Jesus,  ngan an libro han Mga Buhat, amo an kasaysayan han pagsarang han Kristianidad katapos mamatay hi Jesus. Mayada liwat han inspirado nga mga surat han mga disipulo ni Jesus, sugad man han matagnaon nga libro han Pahayag. Ini nga mga sinurat, nga igintampo ha Hebreo nga Kasuratan, amo an bug-os nga kanon han Biblia. Pinaagi han bulig hinin inspirado nga librarya, an mga Kristiano “[makakasabot] upod han ngatanan nga mga baraan, kon ano an kahiluag, ngan kahilaba, ngan kahitaas, ngan kahilarom” han kamatuoran. (Efeso 3:14-18) Magkakaada hira han “hunahuna han Ginoo.” (1 Korinto 2:16) Kondi, adton siyahan nga mga Kristiano waray makasabot hin bug-os han ngatanan nga bahin han mga katuyoan ni Jehova. Hi apostol Pablo nagsurat ha mga igkasi-tumuroo: “Yana nakita kita ha masirom ha [espiho].” (1 Korinto 13:12) An sugad nga espiho magpapakita han gutiay la nga kahayag kondi diri han ngatanan nga detalye. Maabot pa an mas bug-os nga pagsabot ha Pulong han Dios.

 9. Ano nga kahayag an nahitatabo durante han “kataposan nga mga adlaw”?

⁹ Yana, nagkikinabuhi kita ha panahon nga tinatawag nga “kataposan nga mga adlaw,” an panahon nga gintitigamnan han ‘magpakalilisang nga mga panahon nga makuri pakibagayan.’ (2 Timoteo 3:1) Hi propeta Daniel nagtagna nga durante hini nga panahon “an kahibaro magdudugang.” (Daniel 12:4) Salit, hi Jehova, an Daku nga Nagkukomunikar, nabulig ha mga tangkod-an-kasingkasing nga makasabot han kahulogan han iya Pulong. Hinsasabtan han damu nga mga tawo yana nga hi Kristo Jesus nahitrono na ha diri-nakikita nga mga langit han 1914. Maaram liwat hira nga diri na mag-iiha tatapuson niya an ngatanan nga karaotan ngan hihimoon an tuna nga magin bug-os-globo nga paraiso. Inin importante nga bahin han maopay nga sumat han Ginhadian iginwawali yana ha bug-os nga tuna.—Mateo 24:14.

10. Ha bug-os nga mga siglo, paonan-o nagios an katawohan ha sagdon ni Jehova?

¹⁰ Oo, ha bug-os nga kasaysayan iginpapahayag ni Jehova an iya kaburut-on ngan katuyoan ha mga tawo ha tuna. Iginsasaysay han rekord han Biblia nga damu an namati, nagbuhat han diosnon nga kinaadman, ngan ginbendisyonan tungod hito. Iginsusumat hito an mahitungod han iba nga nagsalikway han mahigugmaon nga sagdon han Dios, nagsunod han maraot nga buhat ni Adan ngan Eva. Igin-ilustrar ni Jesus ini nga kahimtang han iginsaysay niya an duha simboliko nga dalan. An usa nagtutugway ngadto ha kabungkagan. Tungod kay haluag ngan halapad, ginsusunod ito han damu nga nagsasalikway han Pulong han Dios. An ikaduha nga dalan tipakadto ha kinabuhi nga waray kataposan. Bisan kon haligot, ito an dalan han pipira nga nakarawat han Biblia tungod kay ito an Pulong han Dios, ngan nagkikinabuhi uyon hito.—Mateo 7:13, 14.

Mapasalamaton han Gintatag-iya Naton

11. Ebidensya han ano an aton kahibaro ngan pagtoo ha Biblia?

¹¹ Usa ka ba hadton nagpipili han dalan ngadto ha kinabuhi? Kon amo, sigurado nga karuyag mo magpabilin dida hito. Paonan-o mo mahihimo ito? Pirme mamalandong ngan magpasalamat ha mga bendisyon nga nakakarawat mo tikang ha paghibaro han mga kamatuoran han Biblia. An kamatuoran mismo nga kinarawat mo an maopay nga sumat usa nga ebidensya han bendisyon han Dios. Ipinakita ini ni Jesus han nag-ampo hiya ha iya Amay hini nga mga pulong: “Ako nagdadayaw ha imo, O Amay, Ginoo han langit ngan han tuna, kay imo gintago ini nga mga bagay ha mga makinaadmananon ngan masinabuton, ngan ipinahayag ha mga kabataan.” (Mateo 11:25) An mga mangirisda ngan mga parasukot hin buhis nakasabot han katutdoan ni Jesus, samtang an edukado nga mga lider han relihiyon waray makasabot. Hi Jesus padayon nga nagsiring: “Waray usa nga sadang makakanhi ha akon, kon diri pagdad-on han Amay nga nagpakanhi ha akon.” (Juan 6:44) Kon nag-aaram  ka han Biblia ngan natoo ka ngan nasunod ha mga katutdoan hito, ebidensya ini nga ginpapahirani ka ni Jehova. Hinungdan ito han pagkalipay.

12. Ha ano nga mga paagi naghahatag hin kahayag an Biblia?

¹² An Pulong han Dios mayada nagtatalwas nga mga kamatuoran ngan naghahatag hin kahayag. Adton nagkikinabuhi sumala ha kahibaro han Biblia natatalwas tikang ha mga patootoo, palso nga mga katutdoan, ngan kaignorante nga nakakaapekto ha kinabuhi han minilyon. Pananglitan, an paghibaro han kamatuoran mahitungod han kalag nagtatalwas ha aton tikang ha anoman nga kahadlok nga an mga patay makakadaot ha aton o nga nag-aantos an aton patay nga mga hinigugma. (Esekiel 18:4) An paghibaro han kamatuoran mahitungod han magraot nga mga anghel nabulig ha aton nga malikyan an mga peligro han espiritismo. An katutdoan han pagkabanhaw nakakaliaw hadton namatayan han ira mga hinigugma. (Juan 11:25) Ipinapakita ha aton han mga tagna han Biblia kon hain na kita ha agos han panahon ngan nagpapasarig ha aton ha mga saad han Dios ha tidaraon. Nagpaparig-on liwat ito han aton paglaom nga mabuhi ha waray kataposan.

13. Ha pagsunod ha Pulong han Dios paonan-o kita nagpapahimulos ha pisikal?

¹³ An diosnon nga mga prinsipyo ha Biblia nagtututdo ha aton nga magkinabuhi ha paagi nga maghahatag hin mga kapulsanan ha pisikal. Pananglitan, nahibabaro kita ha paglikay han mga buhat nga nakakahugaw han aton mga lawas, sugad han sayop nga paggamit han tabako ngan iba nga mga droga. Linilikyan naton an pag-abuso ha alkohol. (2 Korinto 7:1) An pagsunod ha mga balaud han Dios ha moral nagpapanalipod ha aton tikang ha mga sakit nga naitatapon tungod han pakighilawas. (1 Korinto 6:18) Pinaagi han pagsunod ha sagdon han Dios nga likyan an gugma ha salapi, diri naaapektohan an aton kamurayaw ha hunahuna, sugad han gin-aantos han damu, tungod ha pagtinguha hin mga bahandi. (1 Timoteo 6:10) Ha ano nga mga paagi nagpapahimulos ka ha pisikal tungod ha pag-aplikar han Pulong han Dios ha imo kinabuhi?

14. Ano an impluwensya han baraan nga espiritu ha aton kinabuhi?

 ¹⁴ Kon nagkikinabuhi kita uyon ha Pulong han Dios, nakakarawat naton an baraan nga espiritu ni Jehova. Napapatubo naton an personalidad sugad han kan Kristo, nga mayada makaruruyag nga mga kalidad sugad han kalooy ngan pagpaid. (Efeso 4:24, 32) An espiritu han Dios naghahatag liwat ha aton han mga bunga hito—gugma, kalipay, kamurayaw, pagkamainantuson, kalooy, pagkamaopay, pagtoo, kaaghop, ngan pagpugong-ha-kalugaringon. (Galasia 5:22, 23) Ini nga mga kalidad nagdadasig han malipayon ngan maopay nga mga relasyon ha iba, upod na an mga membro han pamilya. Nagkakaada kita kusog nga nabulig ha aton ha pag-atubang han kakurian nga may kaisog. Nasasabtan mo ba kon paonan-o an baraan nga espiritu nakakaimpluwensya ha imo kinabuhi para ha mas maopay?

15. Samtang iginpapahiuyon naton an aton kinabuhi ha kaburut-on han Dios, paonan-o kita nagpapahimulos?

¹⁵ Samtang iginpapahiuyon naton an aton kinabuhi ha kaburut-on han Dios, ginpaparig-on naton an aton relasyon kan Jehova. Nagigin mas kombinsido kita nga hinsasabtan ngan hinigugma kita niya. Nahibabaro kita pinaagi han eksperyensya nga nabulig hiya ha aton durante han makuri nga mga panahon. (Salmo 18:18) Nasasabtan naton nga namamati gud hiya ha aton mga pag-ampo. (Salmo 65:2) Natapod kita ha iya giya, nasarig nga magpapahimulos kita hito. Ngan mayada kita urusahon nga paglaom nga ha itinanda nga panahon dadad-on han Dios an iya matinumanon nga katawohan ha kahingpitan ngan ihahatag ha ira an iya regalo nga kinabuhi nga waray kataposan. (Roma 6:23) “Pahirani kamo ha Dios, ngan mahirani man hiya ha iyo,” nagsurat an disipulo nga hi Jakobo. (Jakobo 4:8) Inaabat mo ba nga napaparig-on an imo relasyon kan Jehova samtang nagpapahirani ka ha iya?

An Bahandi nga Waray Kapariho

16. Ano nga mga pagbag-o an ginhimo han siyahan-siglo nga mga Kristiano?

¹⁶ Ginpahinumdom ni Pablo an dinihogan-ha-espiritu nga mga Kristiano han siyahan nga siglo nga an iba ha ira hadto mga magburuhat han pornikasyon, mga adulteryo, mga homoseksuwal, mga kawatan, mga hakog, mga parahubog, mga mapakarauton, ngan mga tikasan. (1 Korinto 6:9-11) An kamatuoran han Biblia nagpagios ha ira ha pagbuhat hin daku nga mga pagbag-o; ‘ginlimpyo’ hira. Hunahunaa kon ano unta an imo kinabuhi kon waray an nagtatalwas nga mga kamatuoran nga imo nahibabaroan tikang ha Biblia. Sigurado an kamatuoran amo an bahandi nga waray kapariho. Malipayon gud kita nga hi Jehova nagkukomunikar ha aton!

17. Paonan-o ginpapakaon ha espirituwal an mga Saksi ni Jehova ha Kristiano nga mga katirok?

¹⁷ Dugang pa, hunahunaa an bendisyon nga nakakarawat naton ha aton pagminagburugto nga may magkalainlain nga rasa! ‘An matinumanon ngan maaramon nga uripon’ naghahatag ha aton hin espirituwal nga pagkaon ha husto nga panahon, upod na an mga Biblia, mga magasin, ngan iba pa nga mga publikasyon ha damu nga yinaknan. (Mateo 24:45-47) Ha mga katirok han kongregasyon durante han tuig 2000, ginrepaso han mga Saksi ni Jehova ha damu nga nasud an importante nga mga punto tikang ha walo dagku nga libro han Hebreo nga Kasuratan. Pinamalandong nira an kinabuhi han 40 nga tawohan ha Biblia nga ginhisgotan ha Insight on the Scriptures. Ginhisgotan nira an ikaupat nga bahin han libro nga The Greatest Man Who Ever Lived ngan haros an bug-os nga libro nga Pay Attention to Daniel’s Prophecy! Trenta-y-sais nga artikulo an ginhisgotan tikang ha Barantayan nga magasin dugang pa ha 52 aradman nga artikulo. Dugang pa, nabusog an katawohan ni Jehova han 12 nga gowa han An Aton Ministeryo ha Ginhadian ngan sinemana nga mga pahayag publiko  ha magkalainlain nga mga ulohan ha Biblia. Nakakarawat naton an daku nga bahandi han espirituwal nga kahibaro!

18. Ha ano nga mga paagi binubuligan kita ha sulod han Kristiano nga kongregasyon?

¹⁸ Ha bug-os nga kalibotan, sobra 91,000 nga kongregasyon an nasuporta ngan nagdadasig ha aton pinaagi han mga katirok ngan asosasyon. Nagpapahimulos liwat kita han suporta han hamtong nga mga igkasi-Kristiano nga disidido ha pagbulig ha aton ha espirituwal. (Efeso 4:11-13) Oo, nagpapahimulos gud kita ha pagkarawat hin kahibaro han kamatuoran. Makalilipay an pakakilala ngan pag-alagad kan Jehova. Totoo gud an mga pulong han salmista nga nagsurat: “Malipayon an katawohan nga hi Jehova amo an ira Dios”!—Salmo 144:15.

Nahinunumduman Mo Ba?

• Kan kanay nagkomunikar hi Jehova ha mga panahon antes han mga Kristiano?

• Paonan-o an espirituwal nga kalamrag nagtikahayag ha siyahan nga siglo? ha moderno nga mga panahon?

• Ano an mga kapulsanan han pagkinabuhi uyon ha kahibaro mahitungod kan Jehova?

• Kay ano nga nalilipay kita ha aton kahibaro mahitungod ha Dios?

[Mga Pakiana]

[Mga Retrato ha pahina 8]

Iginpahayag ni Jehova an iya kaburut-on kan Moises, Noe, ngan Abraham

[Retrato ha pahina 9]

Ha aton panahon, ginpapasanag ni Jehova an kalamrag ha iya Pulong

[Mga Retrato ha pahina 10]

Hunahunaa an bendisyon nga nakakarawat naton ha aton pagminagburugto han magkalainlain nga rasa!