Makigbahin ha Kalipay han Paghatag!
Makigbahin ha Kalipay han Paghatag!
‘May labaw nga kalipay ha paghatag kay ha pagkarawat.’—BUHAT 20:35.
1. Paonan-o ipinapakita ni Jehova an kalipay han paghatag?
AN KALIPAY ha paghibaro han kamatuoran ngan an mga kapulsanan hito presyoso nga mga regalo tikang ha Dios. Adton nakakilala kan Jehova mayada damu nga mga hinungdan nga malipay. Kondi, samtang mayada kalipay ha pagkarawat hin regalo, mayada kalipay liwat ha paghatag hito. Hi Jehova an Humaratag han “ngatanan maopay nga hatag ngan han ngatanan hingpit nga hatag,” ngan hiya ‘an malipayon nga Dios.’ (Jakobo 1:17; 1 Timoteo 1:11) Iya iginhahatag an magopay nga mga katutdoan ha ngatanan nga namamati, ngan nalilipay hiya ha pagsugot hadton iya gintututdoan, sugad la han mga ginikanan nga nalilipay kon an ira mga anak nasugot ha mahigugmaon nga instruksyon.—Proberbios 27:11.
2. (a) Ano an ginsiring ni Jesus mahitungod han paghatag? (b) Ano nga kalipay an nakakarawat naton kon gintututdoan naton an iba han kamatuoran han Biblia?
2 Sugad man, han nakanhi ha tuna malipayon hi Jesus nga makita an mga tawo nga nagios hin positibo ha iya pagtutdo. Ginkotar ni apostol Pablo hi Jesus nga nasiring: ‘May labaw nga kalipay ha paghatag kay ha pagkarawat.’ (Buhat 20:35) An kalipay nga aton nakakarawat kon gintututdoan naton an iba han kamatuoran han Biblia diri la kay katagbaw ha pagkaada usa nga nauyon ha aton relihiyoso nga mga tinotoohan. Labaw pa gud hito, kalipay naton an paghibaro nga iginhahatag naton an usa ka butang nga mayada totoo ngan nagpapadayon nga bili. Pinaagi han paghatag ha iba han espirituwal nga butang, mabubuligan naton an mga tawo nga magpahimulos ha ira kalugaringon yana ngan ha kadayonan.—1 Timoteo 4:8.
Nagdadara hin Kalipay an Paghatag
3. (a) Paonan-o iginpahayag ni apostol Pablo ngan Juan an ira kalipay ha pagbulig ha iba ha espirituwal? (b) Kay ano nga an pagtutdo han kamatuoran han Biblia ha aton mga anak usa nga pagpahayag han gugma?
3 Oo, sugad la kan Jehova ngan kan Jesus nga nalilipay ha paghatag hin espirituwal nga mga regalo, sugad man an mga Kristiano. Nalipay hi apostol Pablo ha paghibaro nga nabuligan niya an iba nga mahibaro han kamatuoran han Pulong han Dios. Ha kongregasyon ha Tesalonika, hiya nagsurat: “Ano ba an amon paglaom, o kalipay, o pudongpudong han himaya? Diri ba hi kamo ha atubangan han aton Ginoo nga hi Jesus ha iya pag-abot? Kay kamo amo an amon himaya ngan kalipay!” (1 Tesalonika 2:19, 20) Sugad man hi apostol Juan, nga nag-uunabi han iya espirituwal nga mga anak, nagsurat: “Waray ko na kalipay nga labaw hini, ha pamati nga an akon mga anak nanggagawi ha kamatuoran.” (3 Juan 4) Hunahunaa, liwat, an kalipay ha pagbulig ha aton kalugaringon nga mga anak nga magin aton espirituwal nga mga anak! An pagpatubo han mga anak ha ‘disiplina ngan panhunahuna-nga-giya ni Jehova’ amo an kapahayagan han gugma han mga ginikanan. (Efeso 6:4) Ipinapakita hito han mga ginikanan nga interesado hira ha dayon nga kaopayan han ira mga anak. Kon nagios hira hin maopay, nalilipay gud ngan natatagbaw an mga ginikanan.
4. Ano nga eksperyensya an nagpapakita han kalipay han espirituwal nga paghatag?
4 Hi Dell usa ka bug-os-panahon payunir nga ministro ngan iroy han lima nga anak. Hiya nasiring: “Nasasabtan ko gud an mga pulong ni apostol Juan tungod kay mapasalamaton gud ako nga an akon upat nga anak ‘naglalakat ha kamatuoran.’ Maaram ako nga napapasidunggan ngan ginhihimaya hi Jehova kon an mga pamilya nagkakaurosa ha totoo nga pagsingba, salit natatagbaw gud ako ha pagkita han iya bendisyon ha akon mga pangalimbasog ha pagpasilsil han kamatuoran ha akon mga anak. An matahom nga paglaom han waray kataposan nga kinabuhi ha Paraiso upod an akon pamilya naghahatag ha akon hin paglaom ngan nagpapagios ha akon nga magpailob bisan pa han mga kakurian ngan mga ulang.” Makasurubo, usa han mga anak nga babaye ni Dell an ginpaiwas ha kongregasyon tungod ha pagpadayon ha diri-Kristiano nga pagkinabuhi. Ha gihapon, nangangalimbasog gud hi Dell basi matipigan an positibo nga paggios. “Naglalaom ako nga maabot an adlaw nga an akon anak magpapaubos ngan sinsero nga mabalik kan Jehova,” siring niya. “Kondi nagpapasalamat ako ha Dios nga an kadam-an han akon mga anak nagpapadayon ha pag-alagad ha iya nga matinumanon. An akon kalipay totoo nga nagpapakusog ha akon.”—Nehemia 8:10.
Pakigsangkay ha Kadayonan
5. Samtang nabulig kita ha buruhaton nga paghimo hin disipulo, an paghibaro han ano an maghahatag ha aton hin katagbaw?
5 Hi Jesus nagsugo ha iya mga sumurunod nga maghimo hin Kristiano nga mga disipulo ngan tutdoan hira mahitungod kan Jehova ngan han iya mga kinahanglanon. (Mateo 28:19, 20) Hi Jehova ngan hi Jesus waray-kahakog nga nabulig ha mga tawo nga mahibaro han dalan han kamatuoran. Salit kon nangangalimbasog kita ha paghimo hin mga disipulo, natatagbaw kita ha paghibaro nga ginsusubad naton an susbaranan ni Jehova ngan ni Jesus, sugad han ginbuhat han siyahan nga mga Kristiano. (1 Korinto 11:1) Salit kon nakooperar kita ha Dios nga Makagarahum-ha-ngatanan ngan ha iya hinigugma nga Anak, an aton kinabuhi mayada totoo nga kahulogan. Makalilipay gud nga magin ‘mga igkasi-magburuhat’ han Dios! (1 Korinto 3:9) Ngan diri ba makalilipay nga bisan an mga anghel nakikigbahin hini nga buruhaton nga pagwali han maopay nga sumat?—Pahayag 14:6, 7.
6. Samtang nakikigbahin kita ha espirituwal nga paghatag, hin-o an nagigin mga sangkay naton?
6 Ha pagkamatuod, pinaagi han pakigbahin hini nga buruhaton han espirituwal nga paghatag, mahimo kita magin labaw pa han mga igkasi-magburuhat han Dios—hingangada kita ha nagpapadayon nga pakigsangkay ha iya. Tungod han iya pagtoo, gintawag hi Abraham nga sangkay ni Jehova. (Jakobo 2:23) Samtang nangangalimbasog kita ha pagbuhat han kaburut-on han Dios, mahimo liwat kita magin mga sangkay han Dios. Kon aton buhaton ito, kita liwat nagigin mga sangkay ni Jesus. Nagsiring hiya ha iya mga disipulo: “Ako nagtatawag ha iyo nga mga kasangkayan; kay an ngatanan nga bagay nga akon ginpamatian tikang ha akon Amay, akon iginpakilala ha iyo.” (Juan 15:15) Damu an nalilipay nga tagdon nga mga sangkay han maimpluwensya nga mga tawo o hitaas nga mga opisyal, kondi mahimo kita tagdon nga mga sangkay han duha nga gihitaasi nga persona ha bug-os nga uniberso!
7. (a) Paonan-o an usa nga babaye nagkaada totoo nga sangkay? (b) Mayada ka ba pariho nga eksperyensya?
7 Dugang pa, kon binubuligan naton an mga tawo nga makilala an Dios, hira liwat nagigin mga sangkay naton, nga nagdadara ha aton hin espesyal nga kalipay. Hi Joan, nga nag-uukoy ha Estados Unidos, nagtikang pagdumara hin pag-aram ha Biblia ha usa nga babaye nga hi Thelma. Bisan kon ginkontra hi Thelma han iya pamilya ha iya pag-aram, nagpadayon hiya ngan nabawtismohan paglabay hin usa ka tuig. Hi Joan nagsurat: “Waray matapos hito an amon pag-updanay; lugod, nagtubo ito ha pakigsangkay nga nagpapadayon hin mga 35 ka tuig na yana. Agsob nga magkaupod kami ha pagsangyaw ngan ha mga kombensyon. Ha urhi, binalhin ako ha bag-o nga balay nga 800 kilometro an kahirayo. Kondi, padayon nga nagpapadara ha akon hi Thelma han mahigugmaon gud ngan makalilipay ha kasingkasing nga mga surat, nagsusumat ha akon nga mahigugmaon nga nahuhunahuna niya ako ngan nagpapasalamat ha akon tungod han pagin iya sangkay ngan susbaranan ngan tungod han pagtutdo ha iya han kamatuoran tikang ha Biblia. An pagkaada hin sugad duok ngan hinigugma nga sangkay usa ka makalilipay nga balos tungod han akon pangalimbasog nga buligan hiya nga mahibaro mahitungod kan Jehova.”
8. Ano nga positibo nga paggios an mabulig ha aton ha ministeryo?
8 An paghingyap nga makabiling hin usa nga karuyag mahibaro han kamatuoran nabulig ha aton nga magpailob bisan kon damu han mga tawo nga aton iginkikita gutiay la an interes o diri interesado ha Pulong ni Jehova. An sugad nga kawaray-interes nakakapakuri han aton pagtoo ngan pagpailob. Kondi, an positibo nga paggios mabulig ha aton. Hi Fausto, nga taga-Guatemala, nagsiring: “Kon nagsasangyaw ako ha iba, ginhuhunahuna ko nga makalilipay gud kon an tawo nga akon kaistorya magin espirituwal nga bugto. Nasiring ako nga bisan usa la nga tawo an akon igkita bangin ha kataposan kumarawat han kamatuoran han Pulong han Dios. Ito nga panhunahuna nabulig ha akon nga magpadayon ha pagsangyaw ngan naghahatag ha akon hin totoo nga kalipay.”
Pagtirok hin mga Bahandi ha Langit
9. Ano an ginsiring ni Jesus mahitungod han mga bahandi ha langit, ngan ano an mahibabaroan naton tikang hini?
9 An paghimo hin mga disipulo, ha aton mga anak man o ha iba nga mga tawo, diri pirme masayon. Bangin magkinahanglan ito hin panahon, pagpailob, ngan pagkamapinadayonon. Kondi, hinumdumi, nga damu an disidido mangalimbasog ha pagtirok hin damu materyal nga mga butang, mga butang nga kasagaran diri naghahatag ha ira hin kalipay ngan diri nagpapabilin ha kadayonan. Hi Jesus nagsumat ha iya mga mamarati nga maoroopay an pagbuhat para han espirituwal nga mga bahandi. Hiya nagsiring: “Diri kamo magtirok hin mga bahandi ha tuna, nga ginpapapas hira han bukbok ngan tai, ngan aadto an mga kawatan nagbubungkag ngan nangangawat. Kondi magtirok kamo hin bahandi ha langit, nga didto waray bukbok bisan tai nga magpapapas, ngan an mga kawatan diri makakabungkag bisan pangawat.” (Mateo 6:19, 20) Pinaagi han pagpadayon han espirituwal nga mga tumong—nga nag-uupod han pakigbahin ha importante nga buruhaton nga paghimo hin disipulo—matatagbaw kita ha paghibaro nga ginbubuhat naton an kaburut-on han Dios ngan magbabalos hiya ha aton. Hi apostol Pablo nagsurat: “An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.”—Hebreo 6:10.
10. (a) Kay ano nga hi Jesus mayada espirituwal nga mga bahandi? (b) Paonan-o iginhatag ni Jesus an iya kalugaringon, ngan ano an daku nga kapulsanan ha iba?
10 Kon magbuhat kita hin mauyatom ha paghimo hin mga disipulo, nagtitirok kita para ha aton kalugaringon hin “[mga] bahandi ha langit,” uyon ha ginsiring ni Jesus. Naghahatag ini ha aton hin kalipay ha pagkarawat. Kon waray-kahakog nga naghahatag kita, nagigin bahandianon kita. Hi Jesus mismo matinumanon nga nag-alagad kan Jehova ha diri-maihap nga mga katuigan. Hunahunaa an mga bahandi nga iya natirok ha langit! Kondi, hi Jesus waray mamiling han iya kalugaringon nga kaopayan. Hi apostol Pablo nagsurat: “[Hi Jesus] nagtubyan han iya kalugaringon tungod ha aton mga sala, basi nga maluwas kita niya tikang hini yana nga maraot nga kalibotan, uyon ha kaburut-on han aton Dios nga Amay.” (Galasia 1:4) Diri la kay waray-kahakog nga igintubyan ni Jesus an iya kalugaringon ha iya ministeryo kondi iginhatag niya an iya kinabuhi mismo sugad nga lukat basi an iba magkaada unta higayon ha pagtirok hin mga bahandi ha langit.
11. Kay ano nga maoroopay an espirituwal nga mga regalo kay han materyal nga mga regalo?
11 Pinaagi han pagtutdo ha mga tawo mahitungod han Dios, binubuligan naton hira nga makasabot kon paonan-o hira liwat makakatirok hin diri-nadudunot espirituwal nga mga bahandi. Ano nga maoroopay nga regalo an imo maihahatag? Kon tatagan mo an usa nga sangkay hin marahalon nga relo, kotse, o balay pa ngani, sigurado nga magpapasalamat ngan malilipay iton nga sangkay, ngan malilipay ka tungod ha paghatag. Kondi ano an magigin kahimtang hiton nga regalo paglabay hin 20 ka tuig? Hin 200 ka tuig? Hin 2,000 ka tuig? Ha luyo nga bahin, kon ihatag mo an imo kalugaringon ha pagbulig ha usa ka tawo nga mag-alagad kan Jehova, makakapahimulos hiya hiton nga regalo ha kadayonan.
Pamilnga Adton Naruruyag han Kamatuoran
12. Paonan-o iginhahatag han damu an ira kalugaringon ha pagbulig ha iba ha espirituwal?
12 Basi makigbahin ha kalipay han espirituwal nga paghatag, an katawohan ni Jehova naabot na ha mga sidsid han tuna. Yinukot an binaya ha balay ngan pamilya basi mag-alagad sugad nga misyonero ha mga nasud diin kinahanglan makiangay hira ha bag-o nga mga yinaknan ngan mga kultura. An iba nabalhin ha mga lugar ha ira mga nasud diin mayada darodaku nga panginahanglan hin mga parasamwak han Ginhadian. An iba pa nag-aaram hin iba nga yinaknan, nag-aabri hin bag-o nga mga higayon ha pagwali ha mga dayo ha ira kalugaringon nga mga lugar. Pananglitan, katapos patuboon an duha nga anak nga lalaki nga nag-aalagad na yana ha headquarters han mga Saksi ni Jehova, usa nga mag-asawa ha New Jersey, E.U.A., an nagtikang magpayunir ngan nag-aram han Inintsik. Ha sulod hin tulo ka tuig, nagdumara hira hin mga pag-aram ha Biblia ha 74 ka tawo nga Inintsik an yinaknan nga naeskwela ha kahirani nga kolehiyo. Madudugangan mo daw an imo ministeryo ha pipira nga paagi basi magkaada dugang nga kalipay ha paghimo-disipulo nga buruhaton?
13. Ano an mahimo mo buhaton kon karuyag mo magkaada mas mabungahon nga ministeryo?
13 Bangin naghihingyap ka nga magdumara hin pag-aram ha Biblia kondi diri mo pa nahihimo. Ha iba nga mga nasud makuri makabiling hin mga interesado. Bangin an mga tawo nga imo iginkikita diri interesado ha Biblia. Kon amo, bangin mahimo mo unabihon hin mas agsob ha pag-ampo an imo hingyap, maaram nga hi Jehova ngan Jesu-Kristo interesado gud ha buruhaton ngan magtutugway ha imo ngadto ha sugad-karnero nga tawo. Paghangyo hin mga suhestyon tikang hadton mas eksperyensyado o mas mabungahon ha ministeryo ha iyo kongregasyon. Pahimulosi an pagbansay ngan mga suhestyon nga iginhahatag ha Kristiano nga mga katirok. Magpahimulos tikang ha sagdon han nagbibiyahe nga mga paramangno ngan han ira mga asawa. Labaw ha ngatanan, ayaw gud pag-undang. An maaramon nga tawo nagsurat: “Ha aga pagsabwag han imo liso, ngan ha kulop ayaw hawiri an imo kamot; kay diri ka maaram kon hain an mauswag, kon ini ba o adto, o kon hira ba nga duha magpapariho kamaopay.” (Eklesiastes 11:6) Samtang yana, hinumdumi an matinumanon nga kalalakin-an sugad kan Noe ngan Jeremias. Bisan kon gutiay gud la an positibo nga ginios ha ira pagwali, nagmalampuson an ira ministeryo. Labaw ha ngatanan, nakapalipay ito kan Jehova.
Buhata an Gimaopayi nga Imo Mahihimo
14. Paonan-o gintatagad ni Jehova adton nalalagas na ha pag-alagad ha iya?
14 Bangin an imo mga kahimtang diri nagtutugot ha imo nga magbuhat hin daku sugad han karuyag mo ha ministeryo. Pananglitan, tungod ha kalagas bangin gutiay la an imo mahihimo ha pag-alagad kan Jehova. Kondi, hinumdumi an iginsurat han maaramon nga tawo: “An ubanon nga ulo amo an pudongpudong han himaya; Ini hiaagian dida ha dalan han pagkamatadong.” (Proberbios 16:31) Para kan Jehova, an kinabuhi nga ginamit ha pag-alagad ha iya nakakapalipay ha iya. Dugang pa, an Kasuratan nasiring: “Bisan ngada ha tigurang na nga panuigon ako [Jehova] amo hiya, ngan bisan ngada ha pagkaubanon han mga buhok ako magdadara ha iyo: akon ginhimo ngan akon pagpapas-anon; oo, akon pagdadad-on, ngan ihahatag.” (Isaias 46:4) An aton mahigugmaon langitnon nga Amay nagsasaad nga bubuligan ngan susuportahan niya an iya mga maunungon.
15. Natoo ka ba nga nasasabtan ni Jehova an imo mga kahimtang? Kay ano?
15 Bangin nag-aantos ka hin sakit, pagkontra tikang ha diri-tumuroo nga padis, mabug-at nga mga responsabilidad ha pamilya, o iba makuri nga problema. Maaram hi Jehova han aton mga limitasyon ngan mga kahimtang, ngan hinigugma kita niya tungod han aton sinsero nga mga pangalimbasog ha pag-alagad ha iya. Totoo ito bisan kon an aton ginbubuhat bangin mas gutiay kay ha ginbubuhat han iba. (Galasia 6:4) Maaram hi Jehova nga kita diri-hingpit, ngan diri hiya naglalaom han diri naton mahihimo. (Salmo 147:11) Kon buhaton naton an aton gimaopayi, makakasarig kita nga presyoso kita ha atubangan han Dios ngan diri niya hikakalimtan an aton mga buhat han pagtoo.—Lukas 21:1-4.
16. Ha ano nga mga paagi nakikigbahin an bug-os nga kongregasyon ha paghimo hin disipulo?
16 Hinumdumi, liwat, nga an paghimo-disipulo nga buruhaton usa nga pangalimbasog han grupo. Waray usa nga indibiduwal nga naghihimo hin disipulo, sugad la nga an usa ka turo han uran diri makakapatubo han tanom. Totoo, an usa nga Saksi bangin nakabiling hin interesado nga tawo ngan nagdudumara hin pag-aram ha Biblia. Kondi ha panahon nga an bag-ohan naabot ha Kingdom Hall, an bug-os nga kongregasyon nabulig ha iya nga mahibaro han kamatuoran. An mapaso nga pagminagburugto nagpapakita han paggios han espiritu han Dios. (1 Korinto 14:24, 25) An kabataan ngan mga tinedyer naghahatag hin makapadasig nga mga komento, ipinapakita ha bag-ohan nga an aton mga batan-on naiiba ha mga batan-on han kalibotan. An masakit, an maluyahon ha pisikal, ngan an mga lagas ha kongregasyon nagtututdo ha mga bag-ohan kon ano an nahiuupod han pagpailob. Anoman an aton edad o mga limitasyon, kita ngatanan mayada importante nga bahin ha pagbulig ha mga bag-ohan samtang naghihilarom an ira gugma ha kamatuoran han Biblia ngan nag-uuswag hira para ha bawtismo. An kada oras nga ginagasto naton ha ministeryo, an kada pagbalik bisita, an kada pakiistorya ha interesado nga tawo ha Kingdom Hall, bangin tagdon nga diri importante, kondi bahin ito han gamhanan nga buruhaton nga ginbubuhat ni Jehova.
17, 18. (a) Dugang pa ha pakigbahin ha paghimo-disipulo nga buruhaton, paonan-o kita makikigbahin ha kalipay han paghatag? (b) Pinaagi han pakigbahin ha kalipay han paghatag, hin-o an ginsusubad naton?
17 Siyempre, gawas pa han pakigbahin ha importante nga buruhaton nga paghimo hin disipulo, kita sugad nga mga Kristiano nakikigbahin liwat ha kalipay han paghatag ha iba nga mga paagi. Makakaamot kita ha pinansyal ha pagsuporta ha putli nga pagsingba ngan ha pagbulig hadton nagkikinahanglan. (Lukas 16:9; 1 Korinto 16:1, 2) Makakabiling kita hin mga higayon ha pagpakita hin pagkamaabiabihon ha iba. (Roma 12:13) Mahimo kita mangalimbasog ha ‘pagbuhat hin maopay ha ngatanan nga mga tawo, kondi labi na gud ha mga kaupod naton ha pagtoo.’ (Galasia 6:10) Ngan ha simple kondi importante nga mga paagi, makakahatag kita ha iba—hin surat, pagtawag ha telepono, regalo, bulig, nakakadasig nga pulong.
18 Pinaagi han paghatag, ipinapakita naton nga ginsusubad naton an aton langitnon nga Amay. Ipinapakita liwat naton an aton minagburugto nga gugma, an pangirilal-an han totoo nga mga Kristiano. (Juan 13:35) An paghinumdom hini nga mga butang makakabulig ha aton nga makigbahin ha kalipay han paghatag.
Maisasaysay Mo Ba?
• Paonan-o ipinapakita ni Jehova ngan ni Jesus an susbaranan han paghatag ha espirituwal?
• Paonan-o kita magkakaada nagpapadayon nga mga sangkay?
• Ano nga mga pitad an mahimo naton buhaton basi magin mas malampuson an aton ministeryo?
• Paonan-o an ngatanan ha kongregasyon makikigbahin ha kalipay han paghatag?
[Mga Pakiana]
[Mga Retrato ha pahina 13]
Kon an mga anak nasunod ha pagbansay ha ira, an mga ginikanan nagkakaada daku nga kalipay ngan katagbaw
[Retrato ha pahina 15]
Ha paghimo hin mga disipulo, magkakaada kita totoo nga mga sangkay
[Retrato ha pahina 16]
Hi Jehova diri nabaya ha aton ha kalagas
[Mga Retrato ha pahina 17]
Ha simple kondi importante nga mga paagi, nagkakaada kita kalipay ha paghatag