Mahingpit Ngan Bug-os an Pagsarig

Pagbulig ha mga Batan-on Pinaagi han Napapanahon nga Instruksyon

HI Epapras usa nga Kristiano ha siyahan nga siglo nga nagbiyahe ngadto ha Roma. Kondi, may maopay nga hinungdan, nga padayon nga ginhuhunahuna niya an Kolosas, usa nga siyudad ha Asia Minor. Iginwali niya an maopay nga sumat didto ngan waray ruhaduha nga nakabulig ha pipira nga mga taga-Kolosas nga magin mga disipulo ni Jesu-Kristo. (Kolosas 1:7) Nabaraka gud hi Epapras ha mga igkasi-tumuroo ha Kolosas, sugad han makikita ha surat tikang ha Roma nga iginsurat ni apostol Pablo ha ira: “Hi Epapras . . . nangungumusta ha iyo, nga ha gihapon naniguro gud tungod ha iyo ha iya mga pag-ampo, basi nga maghingpit kamo ngan mabug-os an iyo pagsarig ha ngatanan nga kaburut-on han Dios.”—Kolosas 4:12.

Ha pariho nga paagi, an Kristiano nga mga amay ngan mga iroy yana nga panahon sinsero nga nag-aampo para han espirituwal nga kaopayan han ira mga anak. Ini nga mga ginikanan nangangalimbasog nga ipasilsil an gugma ha Dios ha mga kasingkasing han ira mga batan-on basi hira magin marig-on ha pagtoo.

Damu Kristiano nga batan-on an nangangaro hin bulig ha pagsulbad han mga problema nga inaatubang nira ha eskwelahan ngan ha bisan diin. Usa nga 15 anyos nga babaye an nagsiring: “Nagtitikaseryoso an amon mga problema. Makaharadlok hinduro an kinabuhi. Nagkikinahanglan kami hin bulig!” Ginbaton ba an mga hangyo han sugad nga mga batan-on ngan an mga pag-ampo han diosnon nga mga ginikanan? Oo! Igintatagana an basado ha Biblia nga instruksyon pinaagi han ‘matinumanon ngan maaramon nga uripon.’ (Mateo 24:45) Ini nga artikulo nag-uunabi han pipira nga literatura nga nakabulig han ginatos ka yukot nga mga batan-on nga ‘makatindog hin bug-os ngan may marig-on nga pagtoo.’ Aton paghisgotan an pipira hini nga mga publikasyon.

“Kitaa . . . 15,000 Bag-o nga mga Saksi!”

Han Agosto 1941, an mamarati nga 115,000 nagkatirok ha St. Louis, Missouri, E.U.A., para han gidadakui nga gindumara nga kombensyon han mga Saksi ni Jehova tubtob hito nga panahon. Han kataposan nga adlaw hito—“Adlaw han Kabataan”—mga 15,000 nga kabataan nga nagkalingkod hirani ha plataporma an atentibo nga namati samtang ginhihisgotan ni Joseph F. Rutherford an ulohan nga “Kabataan han Hadi.” Han matatapos na an iya pahayag, an 71-anyos nga hi Rutherford nagsiring ha kinag-anak nga tingog:

“Kamo ngatanan . . . nga kabataan nga nauyon . . . ha pagsunod ha Dios ngan ha iya Hadi, alayon pagtindog.” An kabataan tinindog sugad nga usa nga grupo. “Kitaa,” nagsinggit hi Bugto Rutherford, “sobra 15,000 bag-o nga mga saksi ha Ginhadian!” Mayada makusog nga pagpakpak. An mamumulong nagdugang: “Kamo ngatanan nga magbubuhat han iyo mahihimo ha pagsumat ha iba mahitungod han Ginhadian han Dios . . . , alayon pagsiring hin Oo.” An kabataan makusog nga binaton hin “Oo!” Katapos iya iginpakita an bag-o nga libro nga Children, nga ginkarawat pinaagi hin maiha nga pagpakpak.

Katapos hinin makapabantad nga pahayag, an hilaba nga pila han mga batan-on sinaka ha plataporma, diin iginhatag ni Bugto Rutherford ha ira an regalo nga kopya han bag-o nga libro. Nakatangis an mga mamarati ha ira nakita. Usa nga nakakita han hitabo nagsiring: “An mayada la bato nga kasingkasing an diri mababantad ha pagkita han kabataan [nga nagpapakita] hin bug-os nga pagsarig ngan pagtoo ha ira Dios, hi Jehova.”

Hiton diri hikakalimtan nga asembleya, nabawtismohan an 1,300 nga batan-on sugad nga simbolo han ira dedikasyon ngadto kan Jehova. Damu ha ira an nagpapabilin nga marig-on ha pagtoo tubtob yana. Hira nasuporta ha lokal nga mga kongregasyon, mga boluntaryo ha Bethel, o nag-aalagad sugad nga mga misyonero ha langyaw nga mga nasud. Oo, an “Adlaw han Kabataan” ngan an libro nga Children nakahimo hin nagpapadayon nga impresyon ha damu batan-on nga mga kasingkasing!

“An mga Publikasyon Baga hin Naabot ha Husto nga Panahon”

Durante han dekada han 1970, iginpublikar han mga Saksi ni Jehova an dugang tulo nga libro nga nakapagios han mga kasingkasing han ginatos ka yukot nga mga batan-on. Ini amo an Listening to the Great Teacher, Your Youth—Getting the Best out of It, ngan My Book of Bible Stories. Han 1982 an mga serye han “Young People Ask . . .” nagtikang mabasa ha Awake! nga magasin. Ini nga mga artikulo nakaaghat hin madasigon nga  paggios ha batan-on ngan lagas. “Kada gab-i ginpapasalamatan ko an Dios nga iginpublikar ito,” siring han usa nga 14 anyos. “Naruruyagan ko an mga artikulo,” siring han 13 anyos nga daragita, “an mga publikasyon baga hin naabot ha husto nga panahon.” An mga ginikanan ngan pinili Kristiano nga mga tigurang nagkakauruyon nga ini nga mga artikulo napapanahon ngan mapulsanon.

Han 1989 mga 200 nga artikulo han “Young People Ask . . .” an nabasa na ha Awake! Ha “Diosnon nga Debosyon” Distrito nga Kombensyon hito nga tuig, iginpagowa an libro nga Questions Young People Ask—Answers That Work. Nakabulig ba ito ha mga batan-on nga magpabilin nga marig-on ha pagtoo? Tulo nga batan-on an nagsurat: “Ini nga libro maopay nga panag-iya namon ha pagsabot han amon mga problema ngan ha paghibaro kon paonan-o susulbaron an sugad nga mga problema. Salamat ha iyo interes ha amon kaopayan.” Nauyon an damu batan-on nga mga magbarasa ha bug-os nga kalibotan.

“Gintagbaw Hito an Amon Kagutom”

Han 1999, an mga Saksi ni Jehova naghimo hin usa pa nga napapanahon nga porma hin instruksyon para ha mga batan-on—an video nga Young People Ask—How Can I Make Real Friends? Madasigon nga ginkarawat ito. “Ini nga video nakaapekto gud ha akon,” siring han usa nga 14 anyos nga daragita. Ini nga video magigin regular nga bahin han amon espirituwal nga pagkaon,” siring han nagsusolo nga iroy. “Makalilipay an paghibaro nga an aton gimaopayi nga Sangkay, hi Jehova, nahigugma gud ngan napaid ha mga batan-on ha iya organisasyon ha bug-os nga kalibotan,” siring han usa nga batan-on nga babaye.

Ano an nahihimo han video? An mga batan-on nasiring: “Nabuligan ako hito nga magin mabinantayon ha akon mga kaupod, nga makisangkay ha ngatanan ha kongregasyon, ngan himoon hi Jehova nga akon sangkay.” “Nabuligan ako hito ha maisugon nga pag-atubang ha akon mga kaupod.” “Nabuligan ako hito nga magin marig-on ha akon determinasyon ha pag-alagad kan Jehova ha gimaopayi nga akon mahihimo.” Ngan usa nga mag-asawa an nagsurat: “Nagpapasalamat kami ha iyo tikang ha amon kasingkasing tungod ha pagtagana ha amon hini nga ‘pagkaon.’ Gintagbaw hito an amon kagutom.”

Matinumanon ha hatag-han-Dios nga sugo, an dinihogan nga ‘matinumanon ngan maaramon nga uripon’ nagtatagana hin napapanahon espirituwal nga pagkaon para ha ngatanan nga makarawat hito. Ngan makalilipay gud nga makita kon paonan-o an sugad Kasuratanhon nga instruksyon nakakabulig ha mga batan-on yana nga panahon basi ‘makatindog hin bug-os ngan may marig-on nga pagtoo ha ngatanan nga kaburut-on han Dios’!