An Imo Katungod nga Tumoo

Posible nga imo ginpapabilhan an imo katungod nga tumoo ha bisan ano nga karuyag mo toohan. Sugad man liwat an haros ngatanan nga nagpapahimulos hito nga katungod. Pinaagi ha paggamit hini nga katungod, an unom ka bilyon nga umurukoy ha tuna urusahon nga nakahimo hin magkalainlain nga mga gintotoohan. Sugad han magkalainlain nga kolor, porma, klase, rasa, hamot, ngan tunog nga aton mabibilngan ha mga linarang, an magkalainlain nga mga gintotoohan agsob makadugang hin interes, kaikag, ngan kalipay ha kinabuhi. Ito nga kalainan, ha pagkamatuod, nakakahimo han kinabuhi nga makapainteres ngan makalilipay.—Salmo 104:24.

KONDI kinahanglan magbantay. An iba nga mga gintotoohan diri la naiiba kondi peligroso liwat. Temprano han ika-20 ka siglo, pananglitan, an iba nga mga tawo tinoo nga an mga Judio ngan mga Freemason nagplano ha “pagsamok han Kristiano nga sibilisasyon ngan pagtukod hin estado han kalibotan ilarom han ira urosa nga pagmando.” Usa nga surok hini nga gintotoohan amo an kontra-han-Semitiko nga barasahon nga may ulohan nga Protocols of the Learned Elders of Zion. An barasahon nagsiring nga upod kuno han mga plano amo an pangaro hin sobra nga buhis, pag-aghat han panhimo hin armas, pagdasig hin mga kompanya nga magkukontrol han iba nga negosyo basi ‘an bahandi han mga Hentil mabungkag dayon.’ An mga alegasyon nag-upod liwat han pagmaniobra han sistema han edukasyon basi an ‘mga Hentil magin waray-hibaro nga mga hayop,’ ngan pagtukod pa ngani hin mga riles nga aragian ha ilarom han tuna ha pagdugtong han sentro nga mga siyudad basi an Judio nga mga tigurang ‘makakontrol ha bisan hin-o nga mga nakontra pinaagi han pagpoo ha ira.’

Siyempre, mga buwa ini—gindisenyo ha pag-aghat hin kontra-han-Semitiko nga mga sentimyento. ‘Inin maraot nga barasahon,’ siring ni Mark Jones han British Museum, ‘nagsarang ngadto ha iba nga mga nasud tikang ha Russia,’ diin siyahan nga nabasa ito ha artikulo han usa nga pahayagan han 1903. Dinangat ito ha The Times han Londres han Mayo 8, 1920. Paglabay hin sobra usa ka tuig, iginbuhayhag han The Times nga palso an dokumento. Samtang hiton nga panahon, nahimo na an kadaot. ‘An mga buwa nga sugad hini,’ siring ni Jones, ‘makuri mapara.’ Ha panahon nga karawaton ito han mga tawo, nakakahimo ito hin nakakadaot, nakakahilo, ngan peligroso nga mga gintotoohan—agsob nga may nakakadaot nga mga resulta, sugad han iginpapakita han kasaysayan han ika-20 ka siglo.—Proberbios 6:16-19.

Gintotoohan Kontra han Kamatuoran

Siyempre, diri nagkikinahanglan hin tinuyo nga mga buwa basi mahimo an sayop nga mga gintotoohan. Usahay, sayop la nga ginsasabot naton an mga butang. Mationan-o kadamu hin mga tawo an temprano nga namamatay tungod ha pagbuhat hin butang nga ira gintoohan nga husto? Ngan, agsob nga natoo liwat kita ha usa ka butang tungod la kay karuyag naton nga toohan ito. Usa nga propesor an nasiring nga bisan an mga syentista “agsob nga nagpapabili gud ha ira kalugaringon nga mga teoriya.” An  ira mga gintotoohan nagtatabon han ira maopay nga paghukom. Katapos bangin gamiton nira an bug-os nga kinabuhi ha waray pulos nga pangalimbasog nga pamatud-an an sayop nga mga gintotoohan.—Jeremias 17:9.

Pariho nga mga butang an nahitatabo may kalabotan ha relihiyoso nga mga gintotoohan—diin naeksister an dagku nga pagkasumpaki. (1 Timoteo 4:1; 2 Timoteo 4:3, 4) Usa nga lalaki an may-ada hilarom nga pagtoo ha Dios. An usa pa nasiring nga an lalaki “naghihimo [la] hin relihiyoso nga gintotoohan tikang ha mga ideya nga waray kapulsanan.” An usa nasiring nga may-ada ka diri-mamaratyon nga kalag nga naluluwas ha kamatayon. An usa pa nasiring nga kon ikaw mamatay diri ka na maeksister, ha kabug-osan. Matin-aw, an magkasumpaki nga mga gintotoohan pariho hini diri mahimo magin totoo ngatanan. Diri ba maaramon, kon sugad, nga siguruhon nga totoo an imo gintotoohan ngan diri la an karuyag mo toohan? (Proberbios 1:5) Paonan-o mo mabubuhat ito? Paghihisgotan ini nga ulohan ha masunod nga artikulo.

[Retrato ha pahina 3]

An artikulo han 1921 nga nagbubuhayhag han “Protocols of the Learned Elders of Zion”