Kapitulo Kuwatro

Ginpahitaas an Balay ni Jehova

Isaias 2:1-5

1, 2. Ano nga mga pulong an nakaukit ha pader ha plasa han Nagkakaurosa nga Nasud, ngan ano an gintikangan hito?

 “IRA pamamandayon an ira mga kampilan nga mga punta hin arado, ngan an ira mga bangkaw nga mga garab nga ipangarapon; an nasud diri na mabikyaw han kampilan patok ha nasud, diri na man nira mababatasan an away.” Ini nga mga pulong nakaukit ha pader ha plasa han Nagkakaurosa nga mga Nasud (United Nations) ha New York City. Ha sulod hin mga dekada waray isumat an gintikangan hito nga kotasyon. Tungod kay an katuyoan han UN amo an pangalimbasog para ha kamurayawan ha bug-os nga kalibotan, masayon hunahunaon nga an kotasyon nagtikang ha mga nag-organisa han UN, han 1945.

² Kondi, han 1975, an ngaran ni Isaias igin-ukit ha pader ha ubos han kotasyon. Matin-aw kon sugad nga an mga pulong diri nagtikang ha moderno nga panahon. Ito, ha pagkamatuod, iginrekord sugad nga tagna sobra 2,700 ka tuig na an naglabay ha ika-2 nga kapitulo yana ha libro ni Isaias. Mga milenyo na nga naghuhunahuna an mga mahigugmaon ha kamurayawan kon paonan-o ngan san-o mahitatabo an mga butang nga igintagna ni Isaias. Diri na kinahanglan maghunahuna hito. Nakikita naton yana an makatirigamnan nga katumanan hinin kadaan nga tagna.

 3. Ano nga mga nasud an nagpapanday han ira mga kampilan nga mga arado?

³ Hin-o an mga nasud nga nagpapanday han ira mga kampilan nga mga arado? Sigurado, diri hira an moderno politikal nga mga nasud ngan mga gobyerno. Tubtob yana ini nga mga nasud naghihimo hin mga espada, o mga armas, ha pakiggirra ngan ha pagtipig han “kamurayawan” pinaagi han kusog. Ha pagkamatuod, an hilig han mga nasud pirme nga pandayon an ira mga arado nga mga kampilan! An tagna ni Isaias natutuman ha mga representante tikang ha ngatanan nga mga nasud, an katawohan nga nagsisingba kan Jehova, “an Dios han kamurayawan.”—Filipos 4:9.

An mga Nasud nga Naawas Ngadto ha Putli nga Pagsingba

4, 5. Ano an igintatagna han siyahan nga mga bersikulo han Isaias kapitulo 2, ngan ano an nagpapabug-at han pagkamasasarigan hiton nga mga pulong?

⁴ An Isaias kapitulo 2 nagtitikang hini nga mga pulong: “An pulong nga kan Isaias an anak nga lalaki ni Amos nakita mahitungod han Juda ngan han Jerusalem. Ngan mahinanabo ha urhi nga mga adlaw, nga an bukid han balay ni Jehova pagtitindugon dida ha igbaw han kabukiran, ngan pagpapahitas-on labaw han kabungturan; ngan an ngatanan nga nasud maawas ngada hini.”—Isaias 2:1, 2.

⁵ Tigamni nga an igintagna ni Isaias diri kay banabana la. Hi Isaias ginsugo nga isurat an mga hitabo nga ‘kinahanglan mahinabo’—nga diri gud mapapakyas. Anoman nga gintutuyo ni Jehova ‘sigurado nga maglalampos.’ (Isaias 55:11) Matin-aw, basi pabug-atan an pagkamasasarigan han iya saad, gin-aghat han Dios hi propeta Mika, nga kadungandungan ni Isaias, nga isurat ha iya libro an pariho nga tagna nga iginsurat ha Isaias 2:2-4.—Mika 4:1-3.

 6. San-o matutuman an tagna ni Isaias?

⁶ San-o matutuman an tagna ni Isaias? “Ha urhi nga mga adlaw.” An New International Version mababasa: “Ha kataposan nga mga adlaw.” An Kristiano Griego nga Kasuratan nagtagna han mga hitabo nga magpapakilala hini nga peryodo. Kaupod hito an mga girra, mga linog, mga peste, kakulangan hin pagkaon, ngan ‘magpakalilisang nga mga panahon nga makuri pakibagayan.’ a (2 Timoteo 3:1-5; Lukas 21:10, 11) An katumanan han sugad nga mga tagna  naghahatag hin damu nga ebidensya nga nagkikinabuhi na kita “ha urhi nga mga adlaw,” an kataposan nga mga adlaw hinin presente nga sistema han kalibotan. Makatadunganon, kon sugad, nga lalaoman naton nga makita nga matutuman ha aton panahon an mga hitabo nga igintagna ni Isaias.

An Bukid Para ha Pagsingba

 7. Ano nga matagnaon nga paghulagway an iginsasaysay ni Isaias?

⁷ Ha pipira nga mga pulong, iginsasaysay ni Isaias an matin-aw matagnaon nga paghulagway. Nakikita naton an hitaas nga bukid, nga ha pungkay hito nahimumutang an mahimayaon nga balay, an templo ni Jehova. Ini nga bukid mas hitaas kay ha nakapalibot nga kabukiran ngan kabungturan. Kondi, diri ito peligroso o makaharadlok; makaruruyag ito. An katawohan han ngatanan nga nasud naghihingyap pagsagka ngadto ha bukid han balay ni Jehova; hira naawas ngada hito. Masayon ito ihanduraw, kondi ano an kahulogan hito?

 8. (a) Ha panahon ni Isaias ginagamit an kabungturan ngan kabukiran may kalabotan han ano? (b) Ha ano naghuhulagway an pag-awas han mga nasud ngadto ha “bukid han balay ni Jehova”?

⁸ Ha panahon ni Isaias an kabungturan ngan kabukiran agsob nga ginagamit may kalabotan ha pagsingba. Pananglitan, ginagamit ito sugad nga mga lugar para ha pagsingba ha mga imahen ngan mga santuaryo han palso nga mga dios. (Deuteronomio 12:2; Jeremias 3:6) Kondi, an balay, o templo ni Jehova nag-aadurno ha pungkay han Bukid Moria ha Jerusalem. An matinumanon nga mga Israelita nagbibiyahe ngadto ha Jerusalem hin tulo ka beses ha usa ka tuig ngan nasagka ha Bukid Moria basi magsingba ha matuod nga Dios. (Deuteronomio 16:16) Salit an pag-awas han mga nasud ngadto ha “bukid han balay ni Jehova” naghuhulagway ha pagtirok han damu nga mga katawohan ngadto ha totoo nga pagsingba.

 9. Ano an ginrirepresentaran han “bukid han balay ni Jehova”?

⁹ Siyempre, yana nga panahon, an katawohan han Dios diri nagkakatirok ha literal nga bukid nga may-ada templo nga bato. An templo ni Jehova ha Jerusalem ginbungkag han Romano nga kasundalohan han 70 K.P. Gawas pa, iginpatin-aw ni apostol Pablo nga an templo ha Jerusalem ngan an tabernakulo nga nauna hito mga hulagway la. Nagrepresentar ito han darodaku, espirituwal nga katumanan, ‘an totoo nga tolda, nga gintindog ni Jehova, ngan diri han tawo.’ (Hebreo 8:2) Iton espirituwal nga tolda amo an kahikayan para ha pagdaop kan Jehova ha pagsingba nga iginbasar ha halad lukat ni Jesu-Kristo. (Hebreo 9:2-10, 23) Uyon hini, “an bukid han balay ni Jehova” nga gin-unabi ha Isaias 2:2 nagrirepresentar han ginpahitaas nga putli nga pagsingba kan Jehova ha aton panahon. Adton nakarawat han putli nga pagsingba diri nagkakatirok ha anoman partikular nga lugar; hira nagkakatirok ha nagkakaurosa nga pagsingba.

An Pagpahitaas han Putli nga Pagsingba

10, 11. Ha ano nga paagi ginpapahitaas an pagsingba kan Jehova ha aton panahon?

¹⁰ An propeta nasiring nga “an bukid han balay ni Jehova,” o putli nga pagsingba, “pagtitindugon dida ha igbaw han kabukiran” ngan “pagpapahitas-on labaw han kabungturan.” Maiha pa antes han panahon ni Isaias, gindara ni Hadi David an arka han kauyonan ngadto ha Bukid  Sion ha Jerusalem, nga nahimutang hin 760 metro nga kahitaas tikang ha dagat. Didto iginbutang an arka tubtob nga iginbalhin ito ha natapos na nga templo ha Bukid Moria. (2 Samuel 5:7; 6:14-19; 2 Kronikas 3:1; 5:1-10) Salit, ha panahon ni Isaias an sagrado nga arka aktuwal nga ginpahitaas na ngan iginbutang na ha templo, ha lugar nga hiruhitaas kay ha damu nakapalibot nga kabungturan nga ginamit ha palso nga pagsingba.

¹¹ Siyempre, ha espirituwal nga paagi, an pagsingba kan Jehova nalabaw pirme kay ha relihiyoso nga mga seremonya hadton nag-aalagad ha palso nga mga dios. Kondi, ha aton panahon, ginpapahitaas ni Jehova an pagsingba ha iya nga sugad kahitaas han langit, labaw gud han ngatanan nga porma han mahugaw nga pagsingba, oo, labaw han ngatanan nga “kabungturan” ngan ha “igbaw han kabukiran.” Paonan-o? Siyahan pinaagi han pagkatirok hadton karuyag magsingba ha iya “ha espiritu ngan ha kamatuoran.”—Juan 4:23.

12. Hin-o “an mga anak han ginhadian,” ngan ano nga pagtirok an nahitatabo?

¹² Gin-unabi ni Jesu-Kristo ‘an kataposan han sistema han mga butang’ sugad nga panahon han pag-ani kon tirukon na han mga anghel “an mga anak han ginhadian”—adton naglalaom nga magmamando upod ni Jesus ha langitnon nga himaya. (Mateo 13:36-43) Tikang han 1919, gintatagan ni Jehova  hin awtoridad an ‘nahibibilin’ hini nga mga anak basi makigbahin ha pag-ani nga buruhaton kaupod han mga anghel. (Pahayag 12:17) Salit, siyahan ha ngatanan, “an mga anak han ginhadian,” an dinihogan nga kabugtoan ni Jesus, an mga gintirok. Ngan nakikigbahin hira ha dugang pa pagtirok nga buruhaton.

13. Paonan-o ginbibendisyonan ni Jehova an dinihogan nga nanhibilin?

¹³ Hini nga panahon han pag-ani, padayon nga nabulig hi Jehova ha dinihogan nga nanhibilin basi masabtan ngan iaplikar an iya Pulong, an Biblia. Ini liwat nabulig ha pagpahitaas han putli nga pagsingba. Bisan kon ‘an kasisidman nagpuputos han tuna, ngan an madakmol nga kasisidman ha katawohan han mga nasud,’ an mga dinihogan ‘naglalamrag sugad hin mga suga’ ha butnga han katawohan, tungod kay ginlimpyo ngan ginputli hira ni Jehova. (Isaias 60:2; Filipos 2:15) ‘Tungod kay puno hin husto nga kahibaro han iya kaburut-on ha ngatanan nga kinaadman ngan espirituwal nga pagsabot,’ ini nga mga dinihogan-han-espiritu “naglalamrag sugad han adlaw ha ginhadian han ira Amay.”—Kolosas 1:9; Mateo 13:43.

14, 15. Dugang pa ha pagtirok ha “mga anak han ginhadian,” ano nga pagtirok an nahitatabo, ngan paonan-o ini igintagna ni Hagay?

¹⁴ Dugang pa, an iba naawas ngadto ha “bukid han balay ni Jehova.” Tinawag ni Jesus sugad nga iya ‘iba nga mga karnero,’ naglalaom hira nga mabuhi ha waray kataposan ha paraiso nga tuna. (Juan 10:16; Pahayag 21:3, 4) Tikang han dekada han 1930, inulpot hira ha yinukot, ngan ha ginatos ka yukot, ngan yana ha minilyon! Ha usa nga bisyon nga iginhatag kan apostol Juan, gintatawag hira sugad nga ‘daku nga panon, nga waray tawo nga sadang makaihap, tikang ha ngatanan nga mga nasud ngan mga tribo ngan mga katawohan ngan mga yinaknan.’—Pahayag 7:9.

¹⁵ Igintagna ni propeta Hagay an pag-ulpot hinin daku nga panon. Hiya nagsurat: “Ha sugad hini nasiring hi Jehova han mga kasundalohan: Ha makausa pa, ha haliputay nga panahon, ngan akon babay-ugon an mga langit, ngan an tuna, ngan an dagat, ngan an mamara nga tuna; Ngan akon babay-ugon an ngatanan nga nasud, ngan an birilhon nga mga butang han ngatanan nga nasud [adton naupod ha dinihogan nga mga Kristiano ha putli nga pagsingba] mahinganganhi; ngan akon pupun-on ini nga balay hin himaya, nasiring hi Jehova han mga kasundalohan.” (Hagay 2:6, 7) An pag-eksister hinin nagdadamu pa gihapon nga ‘daku nga panon’ ngan han ira dinihogan nga mga kaupod nagpapahitaas, oo naghihimaya, han putli nga pagsingba ha balay ni Jehova. Waray pa gud nahitabo ha naglabay nga nagkaada han sugad kadamu nga iginrekord nga nagkakaurosa ha pagsingba ha matuod nga Dios, ngan naghihimaya ini kan Jehova ngan ha iya nahitrono nga Hadi, hi Jesu-Kristo. Hi Hadi Salomon nagsurat: “Ha kadam-an han katawohan aada an kanan hadi himaya.”—Proberbios 14:28.

Ginpapahitaas an Pagsingba ha Kinabuhi han mga Tawo

16-18. Ano nga mga pagbag-o an ginhimo na han iba basi magsingba kan Jehova ha kinakarawat nga paagi?

¹⁶ Takos hi Jehova han ngatanan nga kadungganan tungod ha pagpahitaas han putli nga pagsingba ha aton panahon. Ha gihapon, adton nadaop ha iya may pribilehiyo nga makigbahin hini nga buruhaton. Sugad la nga nagkikinahanglan hin pangalimbasog an pagsagka ha bukid, sugad man, nagkikinahanglan hin pangalimbasog nga mahibaro ngan magkinabuhi uyon ha matadong nga mga suruklan han Dios. Pariho han mga Kristiano ha siyahan nga siglo, binayaan na han mga surugoon han Dios yana nga panahon an mga estilo han pagkinabuhi ngan mga buhat nga diri nauyon ha totoo nga pagsingba. An mga makihihilawason, masingbahon ha mga diosdios, mga adulteroso, mga kawatan, mga hakog, mga parahubog, ngan iba pa nagbabag-o han ira mga paagi ngan ‘ginlimpyo’ ha atubangan han Dios.—1 Korinto 6:9-11.

¹⁷ Usa nga ehemplo an eksperyensya han usa nga batan-on nga babaye nga nagsurat: “Nawad-an na ako hadto hin paglaom. Imoral ako ngan parahubog hadto. Nagkaada ako mga sakit tungod ha pakighilawas. Nagbaligya liwat ako hin droga ngan waray ako labot ha bisan ano.” Katapos mag-aram ha Biblia, naghimo hiya hin daku nga mga pagbag-o basi magpahiuyon ha mga suruklan han Dios. Yana hiya nasiring: “Nagpapahimulos ako hin kamurayawan ha hunahuna, pagtahod-ha-kalugaringon, paglaom ha tidaraon, totoo nga pamilya ngan, labaw ha ngatanan, relasyon ha aton Amay, hi Jehova.”

¹⁸ Bisan katapos magkaada inuyonan nga relasyon kan Jehova, an ngatanan kinahanglan magpadayon ha pagpahitaas han putli nga pagsingba pinaagi han  pag-una hito ha ira kinabuhi. Yinukot ka tuig na an naglabay, pinaagi kan Isaias, iginpahayag ni Jehova an iya pagsarig nga damu nga katawohan an magigin disidido yana ha paghimo han pagsingba ha iya nga pinakaimportante ha ira kinabuhi. Usa ka ba ha ira?

An Katawohan nga Gintututdoan ha Dalan ni Jehova

19, 20. Ano an igintututdo ha katawohan han Dios, ngan diin?

¹⁹ Damu pa an iginsusumat ha aton ni Isaias mahitungod hadton nakarawat han putli nga pagsingba yana. Hiya nasiring: “Damu nga katawohan an makadto ngan masiring: Tana kamo, ngan sagka kita ngadto ha bukid ni Jehova, ngadto ha balay han Dios ni Jakob; ngan hiya magtututdo ha aton han iya mga dalan, ngan kita maglalakat ha iya mga agianan; kay tikang ha Sion magawas an balaud, ngan an pulong ni Jehova matikang ha Jerusalem.”—Isaias 2:3.

²⁰ Diri tinutugotan ni Jehova an iya katawohan nga magpatlaag sugad hin nawawara nga mga karnero. Pinaagi han Biblia ngan basado-ha-Biblia nga mga publikasyon, iginhahatag niya an iya “balaud” ngan an iya “pulong” basi mahibaro hira han iya mga dalan. Ini nga kahibaro nagsasangkap ha ira basi “maglakat ha iya mga agianan.” Tungod kay napapagios han mga kasingkasing nga puno hin apresasyon ngan uyon ha giya han Dios, nag-iistorya hira ha usa kag usa mahitungod han mga dalan ni Jehova. Nagkakatirok hira ha dagku nga mga kombensyon ngan ha gudtiay nga mga grupo—ha mga Kingdom Hall ngan ha pribado nga mga balay—basi mamati ngan mahibaro ha mga dalan han Dios. (Deuteronomio 31:12, 13) Salit ginsusubad nira an paagi han siyahan nga mga Kristiano, nga nagkatirok ha pagdinasigay ngan pag-aghat ha usa kag usa basi mahura ha “gugma ngan ha mga mag-opay nga buhat.”—Hebreo 10:24, 25.

21. Ha ano nga buruhaton nakikigbahin an mga surugoon ni Jehova?

²¹ Gindadapit nira an iba nga ‘sumagka’ ngadto ha ginpahitaas nga pagsingba kan Jehova nga Dios. Nauyon gud ini ha sugo nga iginhatag ni Jesus ha iya mga disipulo antes gud hiya sumaka ha langit! Hiya nagsiring ha ira: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han [baraan nga espiritu]. Pagtutdui hira ha pagbantay han ngatanan nga mga bagay, nga akon iginsugo ha iyo.” (Mateo 28:19, 20) Pinaagi han bulig han Dios, an mga Saksi ni Jehova masinugtanon nga nalakat ha bug-os nga tuna, nagtututdo ngan naghihimo hin mga disipulo, ginbabawtismohan hira.

An mga Espada Hihimoon nga mga Arado

22, 23. Ano an igintatagna han Isaias 2:4, ngan ano an ginsiring mahitungod hito han usa nga opisyal han UN?

²² Yana iini na kita ha sunod nga bersikulo, nga an bahin hito nakaukit ha pader ha plasa han UN. Hi Isaias nagsurat: “Hiya maghuhukom han mga nasud, ngan hiya maghahatag han kahusayan mahitungod han damu nga katawohan; ngan ira pamamandayon an ira mga kampilan nga mga punta hin arado, ngan an ira mga bangkaw nga mga garab nga ipangarapon; an nasud diri na mabikyaw han kampilan patok ha nasud, diri na man nira mababatasan an away.”—Isaias 2:4.

²³ An pagbuhat hini diri masayon. Hi Federico Mayor, nga direktor-heneral han United Nations Educational, Scientific, and Cultural Organization, makausa nga nagsiring: “An ngatanan nga karaotan han girra, nga gindadara ha aton panimalay yana nga mga panahon pinaagi han mga garamiton nga nagpapakita ngan nababatian, baga in diri makakapugong han pag-uswag han dagku nga mga makinarya han girra nga ginhihimo ngan iginpapadayon ha sulod hin damu ka mga siglo. An presente nga mga henerasyon may-ada han haros imposible nga toka han Biblia nga ‘pandayon an ira mga kampilan nga mga punta hin arado’ ngan himoon an pagbag-o tikang ha natural nga hilig ha girra—nga naporma tikang ha panahon nga diri na mahinumduman—ngadto ha pag-abat hin kamurayawan. An pakadangat hini amo an gimaopayi ngan pinakadungganon nga buhat nga mahihimo han ‘mga tawo ha bug-os nga kalibotan,’ ngan gimaopayi nga panurundon ha aton mga anak.”

24, 25. Kan kanay natutuman an mga pulong ni Isaias, ngan ha ano nga paagi?

²⁴ Diri gud madadangat han mga nasud ha kabug-osan inin dungganon nga tumong. Diri gud nira mahihimo ito. An mga pulong ni Isaias gintutuman han mga indibiduwal tikang ha damu nga nasud, nga nagkakaurosa ha putli nga pagsingba. Hi Jehova ‘nagtatadong han mga butang’ ha butnga  nira. Iya gintututdoan an iya katawohan nga magkinabuhi nga mamurayawon ha usa kag usa. Tinuod, ha nagkakabahinbahin ngan puno hin kasamok nga kalibotan, simboliko nga ira ginpapanday an ira “mga kampilan nga mga punta hin arado, ngan an ira mga bangkaw nga mga garab nga ipangarapon.” Paonan-o?

²⁵ Usa hito, waray hira dinadapigan ha mga girra han mga nasud. Antes gud mamatay hi Jesus, inabot an armado nga mga lalaki ha pagdakop ha iya. Han nanigbas hi Pedro pinaagi han espada ha pagdepensa ha iya Agaron, hi Jesus nagsiring ha iya: “Itakob mo an imo kampilan, kay an ngatanan nga nagamit hin kampilan, ha kampilan man mamamatay.” (Mateo 26:52) Tikang hadto, an mga sumurunod ni Jesus nagpapanday na han ira mga espada nga mga punta hin arado ngan diri na nagamit hin mga armas ha pagpatay ha ira igkasi-tawo ngan ha pagsuporta ha mga buruhaton para ha girra ha iba nga mga paagi. Hira ‘nagpapadayon ha pakigmurayaw ha ngatanan nga mga tawo.’—Hebreo 12:14.

Pagpadayon ha mga Paagi han Kamurayawan

26, 27. Paonan-o an katawohan han Dios ‘namimiling han kamurayawan ngan nagpapadayon hito’? Paghatag hin ehemplo.

²⁶ An kamurayawan han katawohan han Dios nalahos pa gud ha pagdumiri ha pakigbahin ha girra. Bisan kon mabibilngan hira ha sobra 230 nga nasud ngan nagrirepresentar han diri-maihap nga mga yinaknan ngan mga kultura, nagpapahimulos hira han kamurayawan ha usa kag usa. Nakikita ha ira an moderno nga katumanan han mga pulong ni Jesus, nga nagsiring ha iya mga disipulo ha siyahan nga siglo: “Tungod hini an ngatanan makilala nga kamo akon mga tinon-an, kon kamo maghigugmaay an usa kag usa.” (Juan 13:35) An mga Kristiano yana mga “mamurayawon.” (Mateo 5:9, footnote, NW) Hira ‘namimiling han kamurayawan ngan nagpapadayon hito.’ (1 Pedro 3:11) An nabulig ha ira amo hi Jehova, ‘an Dios nga naghahatag hin kamurayawan.’—Roma 15:33.

²⁷ May-ada makatirigamnan nga mga ehemplo hadton nahibabaro nga magin mga mamurayawon. Usa ka batan-on nga lalaki an nagsurat mahitungod han iya kinabuhi hadto: “An makuri nga eksperyensya nagtutdo ha akon nga depensahan an akon kalugaringon. Nagtutdo ito ha akon nga magin madarahog ngan masina ha kinabuhi. Pirme ako nakikig-away. Kada adlaw, nakikig-away ako ha ibaiba nga kabataan ha komunidad, usahay ginagamit an kamao, usahay mga bato o mga botilya. Nagdaku ako nga madarahog hinduro.” Kondi, ha urhi, kinarawat niya an pagdapit nga kumadto ha “bukid han balay ni Jehova.” Nahibaro hiya han mga dalan han Dios ngan nagin mamurayawon nga surugoon han Dios.

28. Ano an mahihimo han mga Kristiano basi igpadayon an kamurayawan?

²⁸ Kadam-an han mga surugoon ni Jehova waray magtikang ha sugad madarahog nga gintikangan. Ha gihapon, bisan ha gudtiay nga mga butang—mga buhat han pagkabuotan, pagpasaylo, ngan empatiya—nangangalimbasog hira ha pag-aghat han kamurayawan ha iba. Bisan kon diri-hingpit, nangangalimbasog hira nga iaplikar an sagdon han Biblia nga “mag-inantusay kamo an usa kag usa, ngan magpinasayloay kamo an usa kag usa, kon may-ada usa ka tawo nga may igsusumbong kontra ha iba.”—Kolosas 3:13.

Mamurayawon nga Tidaraon

29, 30. Ano an paglaom para ha tuna?

²⁹ Hi Jehova nagbubuhat hin urusahon nga butang hinin “urhi nga mga adlaw.” Iya gintitirok tikang ha ngatanan nga nasud an mga tawo nga karuyag mag-alagad ha iya. Iya gintututdoan hira nga maglakat ha iya mga dalan, mga dalan han kamurayawan. Hira an makakatalwas ha tiarabot “daku nga kagol-anan” ngan masulod ha mamurayawon bag-o nga kalibotan diin an girra pagwawad-on ha kadayonan.—Pahayag 7:14.

³⁰ An mga espada—mga armas—mawawaray na. An salmista nagsurat mahitungod hiton nga panahon: “Kadi, pagkita han mga buhat ni Jehova, kon ano nga mga kamingawan an iya ginbuhat dinhi ha tuna. Nga napaukoy niya an mga pag-away tubtob ha kataposan han tuna; Iya nababari an pana, ngan nauutod niya an bangkaw: Ginsusunog niya an mga karomata ha kalayo.” (Salmo 46:8, 9) Tungod hito nga paglaom, an masunod nga sagdon ni Isaias angayan gud yana nga panahon sugad han iginsurat niya ito hadto: “O balay ni Jakob, tana kamo, ngan paglakat kita ha kahayag ni Jehova.” (Isaias 2:5) Oo, tuguti an kalamrag ni Jehova nga maglamrag ha aton agianan yana, ngan kita maglalakat ha iya mga dalan ha kadayonan.—Mika 4:5.

[Footnote]

[Mga Pakiana]