Paonan-o an Kamurayawan ni Kristo Naghahadi ha Aton mga Kasingkasing?

“An kamurayawan ni Kristo maghadi unta ha iyo mga kasingkasing, nga ha iya gintawag man kamo, ha usa nga lawas.”—KOLOSAS 3:15.

1, 2. Ha ano nga paagi nga “an kamurayawan ni Kristo” naghahadi ha kasingkasing han usa nga Kristiano?

 AN PULONG nga maghadi diri makaruruyag ha damu nga tawo, tungod kay nahuhunahuna an pagpirit ngan pagmaniobra. Salit, an sagdon ni Pablo ha mga igkasi-Kristiano ha Kolosas nga, “An kamurayawan ni Kristo maghadi unta ha iyo mga kasingkasing,” bangin hunahunaon han iba sugad nga diri-makatadunganon. (Kolosas 3:15) Diri ba kita mga tawo nga may-ada kagawasan ha pagbuot? Kay ano nga sadang tugotan naton an bisan ano nga butang o bisan hin-o nga maghadi ha aton mga kasingkasing?

² Hi Pablo waray magsiring ha mga taga-Kolosas nga isalikway an ira kagawasan ha pagbuot. An Griego nga termino nga iginhubad nga “maghadi” ha Kolosas 3:15 may kalabotan ha pulong para han reperi nga naghatag han premyo ha mga lupigay han mga atleta hadto nga mga panahon. An mga api ha lupigay may-ada kagawasan ha sulod han mga surundon han uyag, kondi ha kataposan, an reperi an nagdesisyon kon hin-o an nagsunod han mga surundon ngan salit nagdaog ha lupigay. Sugad man, may-ada kita kagawasan ha paghimo hin damu nga mga desisyon ha kinabuhi, kondi samtang ginbubuhat naton ito, an kamurayawan ni Kristo sadang pirme magin “reperi”—o, sugad han paghubad hito ni Edgar J. Goodspeed, “an nagmamando nga prinsipyo” ha aton mga kasingkasing.

 3. Ano “an kamurayawan ni Kristo”?

³ Ano “an kamurayawan ni Kristo”? Amo ito an kalinaw, an kamurayawan ha sulod, nga nakakarawat naton kon kita nagigin mga disipulo ni Jesus ngan nahibabaro nga hinigugma ngan inuuyonan kita ni Jehova nga Dios ngan han iya Anak. Han hirani na bayaan ni Jesus an iya mga disipulo, hiya nagsiring ha ira: “An akon kamurayawan ihahatag ko ha iyo: . . . Diri malisang an iyo mga kasingkasing, bisan kamahadlukon.” (Juan 14:27) Ha sulod hin haros 2,000 ka tuig na, iton nga kamurayawan pinahihimulsan han matinumanon nga dinihogan nga mga membro han lawas ni Kristo, ngan yana han ira mga kaupod liwat, an ‘iba nga mga karnero.’ (Juan 10:16) Iton nga kamurayawan sadang maghadi ha aton mga kasingkasing. Kon kita aada ha makuri nga pagsari, makakabulig ito ha aton nga diri manluya tungod ha kahadlok o maguol hinduro. Aton kitaon kon paonan-o totoo ini kon naatubang kita ha kawaray-hustisya, kon kita naaapektohan han pangarit, ngan kon kita naabat hin pagkadiri-takos.

Kon Naatubang Kita ha Kawaray-hustisya

 4. (a) Paonan-o hi Jesus nagin pamilyar ha kawaray-hustisya? (b) Paonan-o nagios an mga Kristiano ha pagin mga biktima han kawaray-hustisya?

⁴ Hi Hadi Salomon nakaobserba: “An usa ka tawo may gahum labaw han iba ha iya [ikakadaot].” (Eklesiastes 8:9) Maaram hi Jesus han pagkatotoo hito nga mga pulong. Samtang nakadto ha langit, nakita niya an duro nga kawaray-hustisya nga ginbuhat han mga tawo ha usa kag usa. Ha tuna, personal nga nag-antos hiya han duro nga kawaray-hustisya han hiya, nga waray sala nga tawo, gin-akusahan hin pagpasipara ha Dios ngan ginpatay sugad nga kriminal. (Mateo 26:63-66; Markos 15:27) Yana, an kawaray-hustisya kaylap pa gihapon, ngan an totoo nga mga Kristiano nag-aantos hinduro, ‘gindudumtan han ngatanan nga nasud.’ (Mateo 24:9) Kondi, bisan pa han makaharadlok nga mga eksperyensya ha Nazi nga mga kampo  nga paratayan han mga priso ngan ha Soviet Gulag, bisan pa han pagin mga biktima han kamadarahog, palso nga mga akusasyon, ngan mga pag-atake tungod han buwa nga mga sumbong, an kamurayawan ni Kristo nagtipig ha ira nga marig-on. Ira ginsusubad hi Jesus, nga mahitungod ha iya aton mababasa: “Han pagpakaalohi ha iya, waray hiya bulos hin pagpakaalo; han iya pag-antos, waray hiya magtarhog; kondi nga igintubyan niya an iya kalugaringon ngadto ha naghuhukom hin matadong.”—1 Pedro 2:23.

 5. Kon nakakabati kita hin baga in kawaray-hustisya ha kongregasyon, ano an siyahan nga sadang naton tagdon?

⁵ Ha mas guroguti nga sukol, bangin tumoo kita nga an usa gintatrato hin diri-makatadunganon ha sulod han Kristiano nga kongregasyon. Ha sugad nga kahimtang, bangin umabat kita sugad han inabat ni Pablo, nga nagsiring: “Hin-o ba an may katigayonan ha paghipakdol, ngan waray ako [masina]?” (2 Korinto 11:29) Ano an bubuhaton naton? Sadang pakianhan naton an aton kalugaringon, ‘Kawaray-hustisya gud ba ito?’ Agsob nga diri kita maaram han ngatanan nga nahitabo. Bangin masina dayon kita katapos mamati ha usa nga nag-aangkon nga maaram han mga hitabo. May maopay nga hinungdan nga an Biblia nasiring: “An tapang natuod han tagsatagsa nga pulong.” (Proberbios 14:15) Salit kinahanglan mag-ikmat kita.

 6. Paonan-o kita magios ha ginhunahuna nga kawaray-hustisya ha sulod han kongregasyon?

⁶ Kondi, pananglitan, ha aton paghunahuna biktima kita han kawaray-hustisya. Paonan-o magios an tawo nga may-ada han kamurayawan ni Kristo ha iya kasingkasing? Bangin kinahanglan makiistorya kita ha indibiduwal nga inaabat naton nga nakasala ha aton. Katapos hito, imbes nga isumat ito ha iba nga mamamati, kay ano nga diri itapod ito kan Jehova ha pag-ampo ngan sumarig nga iya sisiguruhon nga bubuhaton an hustisya? (Salmo 9:10; Proberbios 3:5) Katapos buhaton ito, bangin maopay nga magin kontento kita nga sulbaron an problema ha aton kasingkasing ngan ‘magpabilin nga hilom.’ (Salmo 4:4) Ha kadam-an nga mga kahimtang, an sagdon ni Pablo maaplikar: “Mag-inantusay kamo an usa kag usa, ngan magpinasayloay kamo an usa kag usa, kon may-ada usa ka tawo nga may igsusumbong kontra ha iba; sugad nga an Ginoo nagpasaylo ha iyo, sugad man buhaton ini niyo.”—Kolosas 3:13.

 7. Ano an sadang hinumdoman naton pirme ha aton mga pakig-upod ha aton kabugtoan?

⁷ Kondi, anoman an aton buhaton, kinahanglan hinumdoman naton nga bisan kon diri naton mapupugngan an nahitabo, mapupugngan naton an aton paggios. Kon gumios kita ha diri-timbang nga paagi ha ginhunahuna nga kawaray-hustisya, bangin mas makadaot ito ha aton kamurayawan kay ha kawaray-hustisya mismo. (Proberbios 18:14) Bangin mahipakdol pa ngani kita ngan diri na makig-upod ha kongregasyon tubtob nga abaton naton nga iginpadapat na an hustisya. An salmista nagsurat nga para hadton nahigugma ha mga balaud ni Jehova ‘waray hiparakdolan.’ (Salmo 119:165) Ha pagkamatuod, usahay an ngatanan nakakaeksperyensya hin kawaray-hustisya. Ayaw gud tuguti an sugad nga diri maopay nga mga eksperyensya nga makaulang ha imo pag-alagad kan Jehova. Lugod, tuguti an kamurayawan ni Kristo nga maghadi ha imo kasingkasing.

Kon Naaapektohan Kita han Pangarit

 8. Ano an pipira nga mga butang nga hinungdan han pangarit, ngan ano an mahimo magin resulta han pangarit?

⁸ An pangarit totoo gud nga bahin han kinabuhi hinin “kataposan nga mga adlaw.” (2 Timoteo 3:1)  Totoo, hi Jesus nagsiring: “Diri kamo mangarit ha iyo kinabuhi kon ano an iyo kakaunon, bisan ha iyo lawas kon ano an iyo igpapanapton.” (Lukas 12:22) Kondi diri ngatanan nga pangarit nagtitikang ha kabaraka mahitungod ha materyal nga mga butang. Hi Lot, ‘nasakit gud’ tungod han pagkamaraot han Sodoma. (2 Pedro 2:7) Hi Pablo naapektohan han “pangarit ha ngatanan nga mga [kongregasyon].” (2 Korinto 11:28) Hi Jesus nasakit gud ha gab-i antes han iya kamatayon salit an “iya balhas nagin sugad hin dagku nga mga turo han dugo, nga nanunuro ha tuna.” (Lukas 22:44) Matin-aw, diri ngatanan nga pangarit ebidensya han maluya nga pagtoo. Kondi, anoman an mga hinungdan hito, kon duro ngan nagpapadayon an pangarit, makakagwara ito han aton kamurayawan. An iba nadaog han pangarit, naabat nga diri na hira makakagpadayon ha pagdumara han mga responsabilidad may kalabotan ha pag-alagad kan Jehova. An Biblia nasiring: “An kabug-at ha kasingkasing han tawo nakakapaduko hini.” (Proberbios 12:25) Ano, kon sugad, an bubuhaton naton kon naaapektohan kita han pangarit?

 9. Ano an pipira han praktikal nga mga paagi nga mahimo buhaton basi mawara an pangarit, kondi ano an mga hinungdan han pangarit nga diri mawawara?

⁹ Ha pipira nga mga kahimtang, mahimo naton buhaton an praktikal nga mga paagi. Kon medikal nga problema an hinungdan han aton pangarit, maaramon nga tagdon ito, bisan kon an sugad nga mga butang personal nga desisyon. a (Mateo 9:12) Kon nabubug-atan kita han damu nga mga responsabilidad, bangin an iba hini mahimo naton ihatag ha iba. (Eksodo 18:13-23) Kondi, kumusta man adton—pariho han mga ginikanan—may-ada mabug-at nga mga responsabilidad nga diri mahihimo itapod ha iba. Kumusta man an usa nga Kristiano nga nag-uukoy upod han nakontra nga padis? Kumusta man an pamilya nga makuri hinduro an pangabuhi o nag-uukoy ha lugar nga may-ada girra? Matin-aw, diri naton makukuha an ngatanan nga gintitikangan han pangarit hini nga sistema han mga butang. Kondi, matitipigan naton an kamurayawan ni Kristo ha aton mga kasingkasing. Paonan-o?

10. Ano an duha nga paagi nga mahimo buhaton han usa nga Kristiano basi mawara an pangarit?

¹⁰ Usa nga paagi an pamiling hin pagliaw ha Pulong  han Dios. Hi Hadi David nagsurat: “Ha kadam-an ha akon pamurubuot ha sulod ko, an imo mga pagliaw nakalipay ha akon kalag.” (Salmo 94:19) An “mga pagliaw” ni Jehova mabibilngan ha Biblia. An regular nga pagkonsulta dida hiton inspirado nga Libro mabulig ha pagtipig han kamurayawan ni Kristo ha aton mga kasingkasing. An Biblia nasiring: “Ibutang an imo dinara ha bawbaw ni Jehova, ngan ikaw iya bubuligan; Diri gud hiya makakailob nga pagkiwahon an matadong.” (Salmo 55:22) Sugad man, hi Pablo nagsurat: “Diri kamo mabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna [pinaagi] kan Kristo Jesus.” (Filipos 4:6, 7) An sinsero ngan regular nga pag-ampo mabulig ha aton nga matipigan an aton kamurayawan.

11. (a) Paonan-o hi Jesus nagin maopay nga susbaranan ha pag-ampo? (b) Paonan-o naton sadang tagdon an pag-ampo?

¹¹ Hi Jesus usa nga maopay nga susbaranan hini. Ha usa nga okasyon, nag-ampo hiya ha iya langitnon nga Amay ha sulod hin mga oras ha usa ka panahon. (Mateo 14:23; Lukas 6:12) An pag-ampo nakabulig ha iya nga makailob han gikukurii nga mga pagsari. Ha gab-i antes han iya kamatayon, nasakit hiya hinduro. Ano an iya paggios? Nag-ampo hiya “hin paniguro.” (Lukas 22:44) Oo, an hingpit nga Anak han Dios mainampoon nga tawo. Labaw pa gud, kon sugad, nga sadang magin batasan han iya diri-hingpit nga mga sumurunod an pag-ampo! Gintutdoan ni Jesus an iya mga disipulo nga ‘mag-ampo pirme ngan diri magturaw.’ (Lukas 18:1) An pag-ampo totoo ngan importante nga pakiistorya ha Usa nga mas nakilala ha aton kay ha pagkakilala naton ha aton kalugaringon. (Salmo 103:14) Basi matipigan naton an kamurayawan ni Kristo ha aton mga kasingkasing, kita ‘mag-aampo nga waray udong-udong.’—1 Tesalonika 5:17.

Pagdaog ha Aton mga Limitasyon

12. Tungod han ano nga mga hinungdan nga bangin umabat an iba nga diri igo an ira pag-alagad?

¹² Gintatagad ni Jehova nga presyoso an kada usa han iya mga surugoon. (Hagay 2:7, footnote, NW) Kondi, damu an nakukurian ha pagkarawat hini. An iba bangin nanluluya tungod han pagtikalagas, pagtikadamu han mga obligasyon ha pamilya, o pagtikaluya han kahimsog. An iba bangin naabat nga makuri an kahimtang tungod han makasurubo nga mga eksperyensya ha ira pagkabata. An iba pa bangin nakukonsensya tungod han naglabay nga mga sala, nagruruhaduha kon mapapasaylo pa ba hira ni Jehova. (Salmo 51:3) Ano an mahihimo ha sugad nga mga pagbati?

13. Ano nga pagliaw ha Kasuratan an iginhahatag para hadton naabat nga diri hira takos?

¹³ An kamurayawan ni Kristo magpapasarig ha aton han gugma ni Jehova. Maibabalik naton iton nga kamurayawan ha aton mga kasingkasing pinaagi han pamalandong han kamatuoran nga hi Jesus waray gud magsiring nga an aton bili ginsusukol pinaagi han pagtanding han aton ginbubuhat ha ginbubuhat han iba. (Mateo 25:14, 15; Markos 12:41-44) An iya pinabug-atan amo an pagkamaunungon. Hiya nagsiring ha iya mga disipulo: “An magpadayon tubtob ha kataposan, ini amo an maluluwas.” (Mateo 24:13) Hi Jesus mismo “gintamay” han mga tawo, kondi waray hiya magruhaduha nga an iya Amay naghigugma ha iya. (Isaias 53:3; Juan 10:17) Ngan ginsumatan niya an iya mga disipulo nga hira liwat hinigugma. (Juan 14:21) Ha pagpabug-at hini, hi Jesus nagsiring: “Diri ba iginbaligya an duha nga tamsihay hin usa nga guti? Ngan waray usa ha ira, nga nahuhulog ha tuna, nga waray hibarui han iyo Amay. Kondi an mga buhok han iyo ulo [naihap] na ngatanan. Busa, diri kamo mahadlok; maromahal pa kamo han damu nga mga katamsihan.” (Mateo 10:29-31) Mapinairon gud nga pasarig han gugma ni Jehova!

14. Ano an pasarig ha aton nga pinabibilhan ni Jehova an kada usa ha aton?

¹⁴ Hi Jesus nagsiring liwat: “Waray usa nga sadang makakanhi ha akon kon diri pagdad-on han Amay nga nagpakanhi ha akon.” (Juan 6:44) Tungod kay hi Jehova an nagdara ha aton basi sundon hi Jesus, sigurado nga karuyag Niya nga matalwas kita. Hi Jesus nagsiring ha iya mga disipulo: ‘Diri kaburut-on han akon Amay nga aadto ha langit, nga may mawara hini nga mga gudtiay.’ (Mateo 18:14) Salit, kon nag-aalagad ka ha bug-os nga kasingkasing, mahimo ka magmalipayon ha imo mag-opay nga mga buhat. (Galasia 6:4) Kon nakukonsensya  ka tungod han naglabay nga mga sala, laomi nga hi Jehova ‘hura’ nga magpapasaylo ha totoo nga mga mabinasulon. (Isaias 43:25; 55:7) Kon ha anoman iba nga hinungdan nanluluya ka, hinumdumi nga “hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.”—Salmo 34:18.

15. (a) Paonan-o nangangalimbasog hi Satanas nga kuhaon ha aton an aton kamurayawan? (b) Ano nga pasarig an malalaoman naton kan Jehova?

¹⁵ Karuyag gud ni Satanas nga kuhaon ha imo an imo kamurayawan. Hiya an tinikangan han napanunod nga sala nga pinangangalimbasogan naton ngatanan nga malamposan. (Roma 7:21-24) Karuyag gud niya nga abaton mo nga tungod han imo pagkadiri-hingpit an imo pag-alagad diri kinakarawat han Dios. Ayaw gud tuguti an Yawa nga magpaluya ha imo! Magin maaram ha iya mga taktika, ngan hinaot ito nga kaaram makahimo ha imo nga determinado ha pag-ilob. (2 Korinto 2:11; Efeso 6:11-13) Hinumdumi, “an Dios daku pa ha aton kasingkasing, ngan maaram ha ngatanan nga mga bagay.” (1 Juan 3:20) Diri la mga kapakyasan naton an nakikita ni Jehova. Nakikita liwat niya an aton mga motibo ngan mga hingyap. Maliaw, kon sugad, ha mga pulong han salmista: “Diri ni Jehova isisikway an iya katawohan, bisan ngani diri niya babayaan an iya panurundon.”—Salmo 94:14.

Nagkakaurosa ha Kamurayawan ni Kristo

16. Ha ano nga paagi nga diri kita nag-uusahan samtang nangangalimbasog kita ha pag-ilob?

¹⁶ Hi Pablo nagsurat nga sadang tugotan naton an kamurayawan ni Kristo nga maghadi ha aton mga kasingkasing tungod kay kita ‘gintawag ngada hito ha usa nga lawas.’ An dinihogan nga mga Kristiano nga ginsuratan ni Pablo gintawag basi magin bahin han lawas ni Kristo, sugad han mga nahibibilin pa han dinihogan yana. An ira ‘iba nga mga karnero’ nga mga kaupod kaurosa nira sugad nga ‘usa nga panon’ ilarom han ‘usa nga magbarantay,’ hi Jesu-Kristo. (Juan 10:16) An ngatanan, an bug-os-kalibotan nga “panon” han minilyon nagtutugot han kamurayawan ni Kristo nga maghadi ha ira mga kasingkasing. An pakahibaro nga diri kita nag-uusahan, nabulig ha aton nga magpailob. Hi Pedro nagsurat: “Ato kamo [kan Satanas], nga marig-on an iyo pagtoo, nga hinbaroan niyo nga ini nga mga pag-antos natutuman man ha iyo mga kabugtoan nga aada ha kalibotan.”—1 Pedro 5:9.

17. Ano an makakarawat naton kon tugotan naton an kamurayawan ni Kristo nga maghadi ha aton mga kasingkasing?

¹⁷ Salit, hinaot magpadayon an ngatanan ha pagpatubo han kamurayawan, iton importante nga bunga han baraan nga espiritu han Dios. (Galasia 5:22, 23) Adton hiaagian ni Jehova nga waray buring, waray kasaypanan, ngan aada ha kamurayawan ha kataposan bibendisyonan hin kinabuhi nga waray kataposan ha paraiso nga tuna, diin mag-uukoy an katadongan. (2 Pedro 3:13, 14) May-ada kita han ngatanan nga hinungdan nga tugotan an kamurayawan ni Kristo nga maghadi ha aton mga kasingkasing.

[Footnote]

Nahinunumdoman Mo Ba?

• Ano an kamurayawan ni Kristo?

• Paonan-o an kamurayawan ni Kristo naghahadi ha aton mga kasingkasing kon naatubang kita ha kawaray-hustisya?

• Paonan-o an kamurayawan ni Kristo nabulig ha aton ha pagsulbad han pangarit?

• Paonan-o an kamurayawan ni Kristo nagliliaw ha aton kon inaabat naton nga kita diri-takos?

[Mga Pakiana]

[Retrato ha pahina 15]

Ha atubangan han mga nag-aakusar ha iya, igintapod ni Jesus an iya kalugaringon ngadto kan Jehova

[Retrato ha pahina 16]

Pariho han mapaso nga hangkop han mahigugmaon nga amay, an mga pagliaw ni Jehova makakakuha han aton mga pangarit

[Retrato ha pahina 18]

Importante gud ha Dios an pagpailob