Mahimo Ka Magkaada hin Totoo Nga Pagtoo

Han 19 anyos hi Sarah Jayne, hinbaroan niya nga may-ada hiya kanser ha obaryo. Katapos han operasyon, maopay an iya pag-abat ngan positibo hiya mahitungod han tidaraon. Positibo hinduro nga ha pagkamatuod, han 20 anyos na hiya, nagkaada hiya trato ngan nagtikang magplano para han iya kasal. Hiton mismo nga tuig binalik an kanser, ngan hinbaroan niya nga mabubuhi na la hiya ha pipira ka semana. Namatay hi Sarah Jayne han Hunyo 2000, antes la hiya nag-21.

GINDAYAW han mga bisita ha ligid han higdaan ni Sarah Jayne ha ospital an iya kalmado nga pagsarig mahitungod han tidaraon, ngan an iya hilarom nga pagtoo ha Dios ngan ha iya Pulong, an Biblia. Bisan pa han makuri gud nga panhitabo nga iya inaatubang, sigurado hiya ha paglaom han pagkabanhaw—nga makikita niya utro an ngatanan nga iya kasangkayan. (Juan 5:28, 29) “Makikita ko kamo ngatanan ha bag-o nga kalibotan han Dios,” hiya nagsiring.

Ginhuhunahuna han iba ito nga klase hin pagtoo nga diri basado ha kamatuoran. “Ano ba an kinabuhi katapos han kamatayon kondi usa nga gintotoohan han mga waray-pagsarig,” nagpapakiana hi Ludovic Kennedy, “nga ha ultimo nga pagbudyong magkakamay-ada mga keyk ngan alaksiw, mga bihod pa ngani ngan nagtutunog nga mga trumpeta para ha ira liwat, nga ha marampag nga Eden magkakaada hira malipayon nga mga panahon kaupod hadton namatay na antes ha ira ngan han iba nga bangin mamatay katapos ha ira?” Hito nga mga pulong, sadang kita magbangon hin pakiana ha pagpahayag hin diri-pag-uyon. Hain an mas makatadunganon—an tumoo nga “ini la an aton kinabuhi, salit aton gud pahimulosan ito,” sugad han iginsuhestyon ni Kennedy, o an tumoo ha  Dios ngan ha iya saad han pagkabanhaw? Ginpili ni Sarah Jayne an urhi. Paonan-o niya napatubo an sugad nga pagtoo?

“Mamiling han Dios . . . Ngan Hiagian Hiya”

Basi mapatubo an pagtoo ngan pagsarig ha usa, kinahanglan makilala mo hiya ngan hibaroan kon paonan-o hiya naghuhunahuna ngan nagbubuhat. Ini nga proseso nag-uupod han kasingkasing sugad man han hunahuna. Pariho gud ito may kalabotan ha pagpatubo hin totoo nga pagtoo ha Dios. Kinahanglan makilala mo hiya, hibaroan an iya mga kalidad ngan an iya personalidad, hisabtan an iya pagkamasasarigan ngan pagkamatataporan ha ngatanan han iya ginsisiring ngan ginbubuhat.—Salmo 9:10; 145:1-21.

Inaabat han iba nga imposible ini. An Dios, siring nira, hirayo hinduro, misteryoso hinduro—kon naeksister man ngani hiya. “Kon an Dios totoo ha mga Kristiano pariho kan Sarah Jayne,” nagpapakiana an maruhaduhaon, “kay ano nga diri hiya nagpapakilala ha amon?” Kondi an Dios ba hirayo hinduro ngan diri mabibilngan? Ha pahayag ha mga pilosopo ngan mga maaramon ha Atenas, hi apostol Pablo nagsiring nga “an Dios nga naghimo han kalibotan, ngan han ngatanan nga mga butang nga nahisulod hito,” nagtatagana liwat han ngatanan nga ginkikinahanglan basi “mamiling [ha iya] . . . ngan hiagian hiya.” Ha pagkamatuod, hi Pablo nagsiring: “Hiya diri hirayo ha tagsatagsa ha aton.”—Buhat 17:24-27.

Paonan-o ka, kon sugad, mahimo “mamiling han Dios . . . ngan hiagian hiya”? Ginbubuhat ini han iba pinaagi la han pag-obserba ha uniberso ha ira palibot. Para ha damu, naghahatag na ito hin igo nga ebidensya ha pagkombinse ha ira nga may-ada gud Maglalarang. a (Salmo 19:1; Isaias 40:26; Buhat 14:16, 17) Inaabat nira an pariho han inabat ni apostol Pablo, nga “an mga [kalidad han Dios] nga waray makita tikang ha kahimo han kalibotan, nakita gud hin maopay dida han iya pinanhimo nga mga bagay, bisan an iya gahum ngan pagka-Dios nga waray kataposan.”—Roma 1:20; Salmo 104:24.

Nagkikinahanglan Ka hin Biblia

Kondi, basi maparig-on an totoo nga pagtoo ha Maglalarang, nagkikinahanglan ka hin usa pa nga butang nga iya igintatagana. Ano ito? An Biblia—an giniyahan nga Pulong han Dios, diin iya iginpapahayag an iya kaburut-on ngan katuyoan. (2 Timoteo 3:16, 17) “Kondi anay,” masiring an iba, “paonan-o ka posible nga makakatoo ha bisan ano nga ginsisiring han Biblia kon nakikita mo an makangingirhat nga mga butang nga ginbubuhat han mga tawo nga nag-aangkon nga nasunod han Biblia?” Oo, an Kakristianohan may-ada nakakaalarma nga rekord han pagkasalingkapaw, kabangis, ngan imoralidad. Kondi makikita han bisan hin-o nga makatadunganon nga an Kakristianohan salingkapaw la nga nasunod ha mga prinsipyo han Biblia.—Mateo 15:8.

An Biblia mismo nagpahamangno nga damu an mag-aangkon nga nagsisingba ha Dios kondi, ha pagkamatuod, “iglilirong nira bisan pa an Ginoo nga nagtubos ha ira.” “Tungod [hini],” nagsiring hi apostol Pedro, “an dalan han kamatuoran pagyayaknan hin maraot.” (2 Pedro 2:1, 2) Hi Jesu-Kristo nagsiring nga ini nga mga tawo amo an “mga magburuhat han karat-an” nga makikilala gud tungod han ira maraot nga mga buhat. (Mateo 7:15-23) An pagsalikway ha Pulong han Dios tungod han rekord han Kakristianohan pariho hin paglabog hin usa nga surat tikang ha tinaporan nga sangkay tungod la kay an tawo nga nagdul-ong hito maraot an dungog.

Kon waray han Pulong han Dios imposible nga magkaada tinuod nga pagtoo. Pinaagi la han mga pahina han Biblia nga iginpipresenta ni Jehova an iya panhunahuna han mga butang, siring pa. Iginpapahayag niya an baton ha nagpapadayon nga mga pakiana sugad ha kon kay ano nga gintutugotan niya an pag-antos ngan kasakit ngan kon ano an iya bubuhaton mahitungod han kahimtang. (Salmo 119:105; Roma 15:4) Tinoo hi Sarah Jayne nga an Biblia amo an inspirado nga Pulong han Dios. (1 Tesalonika 2:13; 2 Pedro 1:19-21) Paonan-o? Diri la tungod kay nagsiring an iya mga kag-anak nga tumoo hito, kondi tungod kay ginasto hiya hin panahon ha tangkod nga pag-usisa han ngatanan nga ebidensya nga nagpapakita nga an Biblia naiiba nga kapahayagan tikang ha Dios. (Roma 12:2) Iya naobserbahan, pananglitan, an gamhanan nga impluwensya han Biblia ha mga kinabuhi hadton nasunod han mga prinsipyo hito. Pinaagi han bulig han mga publikasyon sugad han The Bible—God’s Word or Man’s?, b gin-usisa liwat niya hin maopay an damu nga ebidensya ha sulod nga nagpapamatuod han giya han Dios.

 “An Pagtoo Tikang ha Pagpamati”

Kondi, diri igo na an pagkaada la hin Biblia o bisan an tumoo nga inspirado ito. “An pagtoo,” nagsurat hi apostol Pablo, “tikang ha pagpamati.” (Roma 10:17) An pagpamati ha Biblia, diri la pagtag-iya hin Biblia, an nagpaparig-on han pagtoo. Imo “hibabatian” an isisiring han Dios pinaagi han pagbasa ngan pag-aram ha iya Pulong. Mahihimo ini bisan han kabataan. Hi Pablo nasiring nga “tikang ha [pagkaminasus-an]” gintutdoan hi Timoteo han “Baraan nga mga Surat” han iya iroy ngan apoy nga babaye. Nagpapasabot ba ini nga nahitabo an sugad hin pinirit nga pag-impluwensya han hunahuna? Diri! Hi Timoteo waray pirita o limbongi ha bisan ano nga paagi. Hiya ‘nakombinse nga tumoo’ ha iya nabatian ngan nabasa.—2 Timoteo 1:5; 3:14, 15.

Hi Sarah Jayne nakombinse ha pariho nga paagi. Pariho han siyahan nga siglo nga mga taga-Berea, hiya “nagkarawat han pulong [tikang ha iya mga kag-anak ngan iba nga mga magturutdo] hin bug-os nga [kaikag ha hunahuna].” Sugad nga gutiay nga bata, sigurado nga natural nga sinarig hiya han iginsumat ha iya han iya mga kag-anak. Ha urhi, samtang hiya nagtutubo, diri kay kinakarawat la niya nga diri nagpapakiana o diri-nangangatadongan ha ngatanan nga igintutdo ha iya. Iya ‘gin-usisa hin maopay an Kasuratan kada adlaw kon totoo ba ini nga mga butang.’—Buhat 17:11.

Mapaparig-on Mo an Totoo nga Pagtoo

Mapaparig-on mo liwat an totoo nga pagtoo—an klase hin pagtoo nga iginsaysay ni apostol Pablo ha iya surat ha Hebreohanon nga mga Kristiano. An sugad nga pagtoo, siring niya, amo “an karig-onan han mga bagay nga ginlalaoman, an proyba han mga bagay nga waray pa kikitaa.” (Hebreo 11:1) Ha pagkaada hito nga pagtoo, masisiguro mo gud nga matutuman an ngatanan mo nga mga ginlalaoman ngan mga ginhahandom, upod na an saad han Dios nga pagkabanhaw. Makukombinse ka nga an sugad nga mga ginlalaoman basado ha sigurado nga mga garantiya, diri ha paghingyap nga an sugad nga mga ginlalaoman matutuman. Hibabaroan mo nga hi Jehova diri gud napapakyas ha pagtuman han iya mga saad. (Josue 21:45; 23:14; Isaias 55:10, 11; Hebreo 6:18) An iginsaad han Dios nga bag-o nga kalibotan magigin totoo ha imo nga sugad hin aanhi na ito. (2 Pedro 3:13) Ngan makikita mo hin matin-aw pinaagi han mga mata han pagtoo nga hi Jehova nga Dios, hi Jesu-Kristo, ngan an Ginhadian han Dios tinuod gud, diri mga imahinasyon la.

Diri ka ginpapabay-an nga mag-usahan ha pagparig-on han totoo nga pagtoo. Gawas ha paghimo han iya Pulong nga masayon magamit, nagtatagana liwat hi Jehova hin Kristiano nga kongregasyon  ha bug-os nga kalibotan nga debotado ha pagbulig ha tangkod an kasingkasing nga mga tawo nga magkaada pagtoo ha Dios. (Juan 17:20; Roma 10:14, 15) Karawata an ngatanan nga bulig nga iginhahatag ni Jehova pinaagi hito nga organisasyon. (Buhat 8:30, 31) Ngan tungod kay an pagtoo usa nga bunga han baraan nga espiritu han Dios, pag-ampo pirme nga buligan ka hito nga espiritu nga makapatubo hin totoo nga pagtoo.—Galasia 5:22.

Ayaw papugong ha mga maruhaduhaon nga nagtatamay ha bisan hin-o nga may-ada pagtoo ha Dios ngan ha iya Pulong. (1 Korinto 1:18-21; 2 Pedro 3:3, 4) Ha pagkamatuod, an totoo nga pagtoo may-ada daku nga bili ha pagparig-on han imo determinasyon kontra han sugad nga mga pag-atake. (Efeso 6:16) Napamatud-an ni Sarah Jayne nga totoo ito, ngan pirme niya gindasig adton nabisita ha iya ha ospital nga parig-unon an ira pagtoo. “Higugmaa an kamatuoran,” nasiring hiya. “Pag-aram han Pulong han Dios. Magpabilin nga duok ha organisasyon han Dios. Pag-ampo pirme. Magpabilin nga aktibo ha pag-alagad kan Jehova.”—Jakobo 2:17, 26.

Tungod kay naoobserbahan an iya pagtoo ha Dios ngan ha pagkabanhaw, usa han iya mga nars an nagsiring: “Natoo ka gud hini, diri ba.” Han ginpakianhan kon ano an naghatag ha iya han sugad nga positibo nga panlantaw bisan pa han iya mga kakurian, hiya binaton: “An pagkaada pagtoo kan Jehova. Hiya tinuod nga sangkay ko, ngan hinigugma ko gud hiya.”

[Mga footnote]

[Retrato ha pahina 6]

“Tikang ha [pagkaminasus-an]” gintutdoan hi Timoteo han “Baraan nga mga Surat” han iya iroy ngan apoy nga babaye

[Retrato ha pahina 6]

An mga taga-Berea gintagan hin kumendasyon tungod ha pag-usisa han Kasuratan kada adlaw

[Ginkuhaan han Retrato]

Tikang ha “Photo-Drama of Creation,” 1914

[Mga Retrato ha pahina 7]

An pagpamati ngan pagtagad han Biblia, diri la pagtag-iya hito, an nagpaparig-on han pagtoo

[Retrato ha pahina 7]

“Makikita ko kamo ngatanan ha bag-o nga kalibotan han Dios”