An Kinaburut-on nga Determinasyon Nagdadara han mga Tawo ha Gilead

AN Watchtower Bible School of Gilead naeksister ha pagbansay han dedikado nga kalalakin-an ngan kababayin-an para ha pagmisyonero nga pag-alagad ha langyaw nga dapit. Hin-o an kuwalipikado mag-eskwela ha Gilead? Adton may-ada kinaburut-on nga determinasyon. (Salmo 110:3) Nakita gud ito han Septyembre 8, 2001, han naggradwar an ika-111 nga klase.

An pipira nga mga estudyante hito nga klase kinaburut-on na nga binaya ha pamilya, kasangkayan, ngan nasud nga natawohan basi mag-alagad diin may-ada mas daku nga panginahanglan. Ha pagbuhat hito, ira ginsarihan an ira kalugaringon kon makakapahiuyon ba hira ha pagkinabuhi ha baga hin naiiba nga palibot. Pananglitan, ginhikay nira Richer ngan Nathalie an ira mga buruhaton basi makabalhin ngadto ha Bolivia, hira Todd ngan Michelle ngadto ha Dominican Republic, ngan hira David ngan Monique ngadto ha usa nga nasud ha Asia basi ipasamwak an maopay nga sumat han Ginhadian han Dios. An iba nga mga estudyante nag-alagad na ha Nicaragua, Ecuador, ngan Albania.

Hi Christy gindasig nga mag-aram han Espanyol nga yinaknan ha high school, nga nakabulig ha pag-andam ha iya ha paggasto hin duha ka tuig ha Ecuador antes mag-asawa. An iba inupod ha mga kongregasyon ha ira natawohan nga mga nasud nga nagamit hin langyawanon nga yinaknan. Tungod kay naatubang hin naiiba nga ayat, hira Saul ngan Priscilla nagpakita hin kinaburut-on nga determinasyon pinaagi han pangalimbasog gud basi mapauswag an ira Ingles antes hira umiskwela.

An 20 ka semana nga pagbansay ha pagmisyonero madagmit nga natapos. Inabot an adlaw han gradwasyon, ngan an mga estudyante kaupod na han ira kasangkayan ngan pamilya, namamati ha maaramon nga sagdon ngan mga pulong han pagdasig antes magburublag.

An tsirman han programa amo hi Theodore Jaracz, nga naggradwar ha ikapito nga klase han Gilead School, nga nag-aalagad yana sugad nga membro han Nagmamando nga Lawas han mga Saksi ni Jehova. An iya siyahan nga pahayag nagpabug-at han kamatuoran nga sugad nga usa nga organisasyon, nagpapadayon gud kita ha katuyoan han pagbansay ha mga estudyante ha Gilead, nga amo an pagsangyaw han maopay nga sumat han Ginhadian ha bug-os inuukyan nga tuna. (Markos 13:10) Ginsasangkapan han Gilead an kuwalipikado nga mga estudyante nga ipadayon ini nga pagsangyaw nga buruhaton ha mas darodaku nga sukol kay han ira ginhimo ha naglabay ngan ha mga lugar han kalibotan diin an binansay nga mga misyonero labi nga ginkikinahanglan. Ginsagda ni Bugto Jaracz an mga estudyante nga pahimulosan an ira pagbansay ha Gilead samtang makakaupod na hira yana han mga misyonero nga nag-aalagad ha 19 nga nasud diin igintoka an mga naggradwar.

Napapanahon nga Sagdon Para Hadton Magradwar

Sumunod an sunod-sunod nga mga pahayag. Hi William Van De Wall, membro han Komite han Sanga han Estados Unidos, nagpahayag ha tema nga “Kadasig ha Pagmisyonero—Usa nga Pangirilal-an han Totoo nga mga Kristiano.” Iya iginsentro an atensyon ha sugo nga ‘manhimo hin mga disipulo,’ nga nakarekord ha Mateo 28:19, 20, ngan gindasig niya an mga estudyante: “Subara hi Jesus, nga nagtuman han iya pagmisyonero nga toka nga may-ada kadasig ngan kalipay.” Basi mabuligan an tidaraon nga mga misyonero ha pagtipig han ira kadasig ha  pagmisyonero nga buruhaton, iya gindasig hira: “Sunda an praktikal nga eskedyol; ipadayon an maopay nga mga rutina han personal nga pag-aram, nga nagpapabilin nga nasunod ha teokratiko nga mga butang; ngan isentro pirme an hunahuna ha mga hinungdan kon kay ano nga aadto ka ha imo toka.”

An sunod ha programa amo hi Guy Pierce, nga membro han Nagmamando nga Lawas. Iya iginpahayag an tema nga “Padayon nga Patuboa an ‘Imo Gahum ha Pangatadongan.’ ” (Roma 12:1) Naghatag hiya hin praktikal nga sagdon ha nagradwar nga klase, gindadasig hira nga gamiton an hatag han Dios ha ira nga abilidad ha paghunahuna ngan pangatadongan. “Padayon nga mamalandong mahitungod han ginsisiring ni Jehova ha imo pinaagi han iya Pulong. Magpapanalipod ini ha imo,” siring niya. (Proberbios 2:11) Ginsagdonan liwat ni Bugto Pierce an klase nga diri magin dogmatiko ha ira mga ideya basi diri nira mapugngan an “gahum ha pangatadongan.” Sigurado, inin napapanahon nga mga pahinumdom magigin mapulsanon samtang an mga nagradwar nag-aalagad sugad nga mga misyonero.

Sunod nga iginpakilala han tsirman an usa han mga instruktor ha Gilead, hi Lawrence Bowen, nga nagpahayag ha tema nga “Pagdesisyon nga Diri Hibaroan an Bisan Ano.” Iya iginpatin-aw nga may kalabotan ha iya pagmisyonero nga buruhaton ha Korinto, hi apostol Pablo ‘nagdesisyon nga diri mahibaro  han bisan ano gawas kan Jesu-Kristo, ngan hiya nga iginraysang.’ (1 Korinto 2:2) Maaram hi Pablo nga an gidadakui nga puwersa ha uniberso, an baraan nga espiritu, nasuporta ha mensahe nga aada ha bug-os nga Biblia: an pagbindikar han pagkasoberano ni Jehova pinaagi han iginsaad nga Binhi. (Genesis 3:15) An 48 nga magradwar nga estudyante gin-aghat nga magin pariho kan Pablo ngan Timoteo ngan magin malampuson nga mga misyonero, nga nasunod ha “surubdan han mga putli nga mga pulong.”—2 Timoteo 1:13.

“Apresyara an Imo Pribilehiyo, Usa nga Regalo Tikang ha Dios” an tema han kataposan han mga serye han siyahan nga mga pahayag. Ginbuligan ni Wallace Liverance, nga pararehistro han Gilead School, an mga naggradwar nga hisabtan nga an mga pribilehiyo ha pag-alagad mga kapahayagan han diri-takos nga kalooy han Dios, diri usa ka butang nga takos hira o nakab-ot nira. Ginagamit an ehemplo ni apostol Pablo, iginpatin-aw ni Bugto Liverance: “An pagpili ni Jehova kan Pablo nga magin iya apostol ngadto ha mga nasud diri tungod han mga buhat, nga baga hin nakab-ot ni Pablo an katungod para hito nga toka o nga takos hiya hito. Waray ito magdepende ha iya pagin maiha na o pagin eksperyensyado. Tikang ha tawhanon nga panhunahuna, baga hin hi Bernabe an angayan pilion. Waray igbasar ito ha personal nga abilidad; matin-aw nga hi Apolo mas maabtik magyakan kay ha kan Pablo. Kapahayagan ito han diri-takos nga kalooy han Dios.” (Efeso 3:7, 8) Gindasig ni Bugto Liverance an mga naggradwar nga gamiton an ira regalo, o pribilehiyo ha pag-alagad, basi mabuligan an iba nga magin mga sangkay han Dios ngan makakarawat han ‘regalo nga iginhahatag han Dios, nga waray kataposan nga kinabuhi pinaagi kan Kristo-Jesus an aton Ginoo.’—Roma 6:23.

Katapos hini, hi Mark Noumair, usa pa nga instruktor ha Gilead, an nagdumara hin marisyo nga paghisgot kaupod an pipira nga mga estudyante ha tema nga “An Pangandam Nagtutugway Ngadto ha Maopay nga mga Resulta.” (Proberbios 21:5) Iginpakita han mga eksperyensya nga kon an usa nga parasamwak nag-aandam hin maopay para ha ministeryo, labi na pinaagi han pag-andam han iya kasingkasing, magkakaada hiya totoo nga interes ha mga tawo. Diri gud hiya mag-aalang ha kon ano an iyayakan. Lugod, hiya magyayakan ngan magbubuhat hin mga butang nga makakabulig ha ira ha espirituwal. “Ini an yawi ha pagin malampuson nga misyonero,” iginpatin-aw ni Bugto Noumair, sumala ha iya kalugaringon nga eksperyensya sugad nga misyonero ha Aprika.

Pagmisyonero nga Pag-alagad—Usa nga Makapatagbaw nga Karera

Hi Ralph Walls ngan Charles Woody nag-interbyu hin pipira nga eksperyensyado nga mga misyonero, nga nakadto liwat ha Patterson Educational Center para han espesyal nga pagbansay. Ginpabug-atan han mga interbyu nga an gugma ha mga tawo an nagdadara hin kalipay ha pagmisyonero nga pag-alagad. Makaparig-on para ha mga estudyante ngan para hadton ira mga pamilya ngan kasangkayan nga tinambong nga hibatian inin eksperyensyado nga mga misyonero samtang ira personal nga iginsasaysay kon kay ano nga makapatagbaw nga karera an pagmisyonero nga pag-alagad.

Hi John E. Barr, nga nag-aalagad sugad nga membro han Nagmamando nga Lawas, naghatag han importante nga pahayag hito nga adlaw, nga may ulohan nga “Pagkanta kan Jehova hin Bag-o nga Kanta.” (Isaias 42:10) Iginpatin-aw ni Bugto Barr nga an ekspresyon nga ‘bag-o nga kanta’ makikita ha Biblia hin siyam ka beses. Hiya nagpakiana, “Mahitungod han ano inin bag-o nga kanta?” Katapos hiya binaton: “An konteksto nagpapakita nga ginkakanta an bag-o nga kanta tungod han bag-o nga mga panhitabo ha pagbuhat han pagkasoberano ni Jehova.” Iya ginsagda an mga estudyante nga padayon nga ig-urosa an ira mga tingog ha pagkanta han mga pagdayaw ha madaugon nga Ginhadian han Dios ha pagmando han Mesianiko nga Hadi, hi Kristo Jesus. Gin-unabi ni Bugto Barr nga an pagbansay nga ira nakarawat ha Gilead nakabulig ha ira nga hisabtan pa gud yana an magkalainlain nga mga bahin hinin ‘bag-o nga kanta.’ “An eskwelahan nagpatin-aw han panginahanglan nga iyo ‘kantahon’ an mga pagdayaw kan Jehova kaupod han iyo kabugtoan diin man kamo kumadto; pirme patuboa an pakig-urosa ha iba ha iyo mga toka.”

Katapos ihatag ha mga estudyante an ira mga diploma, an tagapagyakan han klase nagbasa hin usa nga surat han sinsero nga apresasyon para han pagbansay nga ira nakarawat ha Gilead.

Mapapahaluag mo ba an imo pag-alagad ha Dios ngan himoon ito nga mas mabungahon? Kon amo, pangalimbasog sugad hini nga mga naggradwar nga mga estudyante. Ini an nakabulig ha ira basi magin kuwalipikado para ha misyonero nga kanataran. Nabibilngan an daku nga kalipay samtang kinaburut-on nga iginhahatag han usa an iya kalugaringon ha pag-alagad ha Dios.—Isaias 6:8.

 [Kahon ha pahina 21]

ESTADISTIKA HAN KLASE

Kadamu han nasud nga ginrepresentaran: 10

Kadamu han nasud nga gintokahan: 19

Kadamu han estudyante: 48

Aberids han edad: 33.2

Aberids han mga tuig ha kamatuoran: 16.8

Aberids han mga tuig ha bug-os-panahon nga ministeryo: 12.6

 [Retrato ha pahina 26]

Ika-111 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.