‘Hin-o Ako Sumala ha Ginsisiring han mga Tawo?’

PANAHON na liwat han Pasko. Pinipili han mga tawo ha bug-os nga kalibotan nga magsaurog hin kompleanyo. Kan kanay kompleanyo? Han Anak han Dios ba o han debotado la nga Judio nga may tumong nga bag-ohon an relihiyon nga kaylap ha iya lugar ha siyahan nga siglo? Kompleanyo ba ito han usa nga paradepensa han kablas, usa nga rebelde nga naghatag hin daku nga tarhog ha Romano nga Imperyo salit ginpatay hiya, o bangin han usa nga maaramon nga nagpabug-at han personal nga kahibaro ngan kinaadman ha sulod? May-ada ka makatadunganon nga hinungdan nga maghunahuna, ‘Hin-o gud ba hi Jesu-Kristo?’

Hi Jesus mismo interesado ha baton han mga tawo hito nga pakiana. ‘Hin-o ako sumala ha ginsisiring han mga tawo?’ makausa nagpakiana hiya ha iya mga disipulo. (Markos 8:27) Kay ano nga nagpakiana hiya? Damu an inundang na ha pagsunod ha iya. An iba matin-aw nga nawurok ngan inabat hin kapakyasan katapos niya magdumiri ha ira mga pangalimbasog nga himoon hiya nga hadi. Dugang pa, han gin-ayat han iya mga kaaway, waray hi Jesus magpakita hin tigaman tikang ha langit basi pamatud-an kon hin-o hiya. Salit ha pagbaton hito nga pakiana, ano an ginsiring han iya mga apostol mahitungod han iya pangirilal-an? Gin-unabi nira an pipira han mga ideya nga kaylap ha mga tawo: “An iba nasiring, hi Juan nga Parabaptis, an  iba hi Elias; ngan an iba, hi Jeremias, o usa han mga manaragna.” (Mateo 16:13, 14) Waray nira unabiha an damu nga nakakaminos nga mga pulong nga nagsasarang hito nga panahon ha Palestina mahitungod kan Jesus—parapasipara, nagpapaka-maaram, palso nga propeta, lurong pa ngani.

An Damu nga mga Bahin ni Jesus

Kon ibangon ni Jesus an pariho nga pakiana yana, bangin bag-ohon pa ngani niya ito ha: “Hin-o ako sumala ha ginsisiring han mga eskolar?” Makausa pa, an mga baton bangin magin sugad hini: May-ada damu nga magkalainlain nga opinyon. Sumala kan David Tracy han University of Chicago, an ibaiba nga mga tawo may-ada magkalainlain nga mga opinyon ngan mga interpretasyon mahitungod kan Jesus ngan han iya ginsiring ngan ginbuhat. Tikang ha naglabay nga siglo, an mga eskolar naggamit na hin damu hinduro nga mga paagi ha sosyolohiya, antropolohiya, ngan ha literarya samtang ginsasarihan nira nga maghimo hin mga baton ha pakiana kon hin-o gud hi Jesus. Sugad nga resulta, hin-o gud ha ira hunahuna hi Jesus?

An pipira nga eskolar padayon nga nasiring nga an Jesus han kasaysayan usa nga Judio nga manaragna mahitungod han kataposan han kalibotan nga nag-aaghat hin pagbasol. Kondi, inundang hira ha pagtawag ha iya nga Anak han Dios, Mesias, ngan Manunubos. Kadam-an nga mga eskolar an nagruruhaduha han asoy han Biblia mahitungod han iya langitnon nga tinikangan ngan han iya pagkabanhaw. Para ha iba, hi Jesus usa la nga tawo nga pinaagi han iya susbaranan nga pagkinabuhi ngan mga katutdoan nadasig an pipira nga mga relihiyon nga ha kataposan nagin Kristianidad. Ngan sumala han gin-unabi ha Theology Today, ginhuhunahuna han iba pa hi Jesus sugad nga “usa nga paratahap, malakat nga maaramon, o usa nga misteryoso nga kablas; usa nga paraorganisa ha komunidad, usa nga hippie nga parasiday nga nagmiminos ha sistema han sosiedad, o usa nga diri-ordinaryo ha siyudad nga prangka nga nagpapahayag han iya mga opinyon samtang nakadto hiya ha masamok, kablas, mabangis ha sosiedad nga mga barangay han nahibubulag nga mga lugar han Palestina.”

Damu liwat an mas talagsahon nga mga ideya. An hulagway han itom nga Jesus aada liwat ha rap nga musika, mga hinimo nga arte ha siyudad, bisan ha sayaw. a Ginhuhunahuna han iba nga hi Jesus ha pagkatinuod usa nga babaye. Ha katpaso han 1993, nakita han mga bisita ha Orange County Fair ha California an estatwa ni “Christie,” an hubo nga babaye nga “Kristo” dida ha krus. Haros ha pariho nga panahon ha New York, hi “Christa”—an iginraysang ha krus nga babaye nga “Jesus”—iginpakita. An duha nga estatwa nagin hinungdan han damu nga kontrobersya. Ngan temprano han 1999, an mga parapalit nakabiling hin libro “mahitungod han gugma [hiton] Bata nga Jesus ngan han iya ayam, nga hi Angel, para ha kada tagsa.” An ira relasyon iginsasaysay sugad nga usa nga “makapabantad ha espirituwal ngan nagpapakita kon paonan-o an bata ngan an ayam andam magsakripisyo han ira mga kinabuhi para ha kada usa.”

Importante Gud ba nga Hibaroan Kon Hin-o hi Jesus?

Kay ano nga sadang ka magin interesado kon hin-o hi Jesus hadto ngan yana? Ha usa nga hinungdan tungod kay, ha pagkotar kan Napoleon, “hi Jesu-Kristo nakakaimpluwensya ngan nakakamando han Iya mga sakop bisan kon diri nakikita an Iya pisikal nga presensya.” Pinaagi han iya mapuwersa nga mga katutdoan ngan pinaagi han iya pagkinabuhi, gamhanan nga naaapektohan ni Jesus an mga kinabuhi han binilyon nga mga tawo ha sulod hin haros duha ka yukot ka tuig na. Usa nga parasurat an husto nga nagsiring: “An ngatanan nga kasundalohan nga nagmartsa, ngan an ngatanan nga mga sundalo ha kadagatan nga gin-establisar, ngan an ngatanan nga mga parliamento nga ginpahamutang, an ngatanan nga kahadian nga nagmando, bisan kon tarampuhon waray makaapekto han kinabuhi han tawo dida hini nga tuna ha sugad kagamhanan nga paagi.”

Dugang pa, kinahanglan makilala mo kon hin-o hi Jesus hadto ngan yana tungod kay magkakamay-ada hiya direkta nga epekto ha imo tidaraon. May-ada ka higayon nga magin sakop han langitnon nga gobyerno nga natukod na—an Ginhadian han Dios pinaagi kan Jesus. An aton nadaot nga planeta ibabalik ha pagkaada hito hin makatirigamnan nga magkalainlain nga kinabuhi ngan pagkatimbang han mga organismo ngan han ira inuukyan ilarom han pagmando ni Jesus. An tagna han Biblia nagpapasarig ha aton nga an Ginhadian ni Jesus magpapakaon han nagugutom, mag-aataman han kablas, magtatambal han may sakit, ngan magbabanhaw han mga patay.

Sigurado nga karuyag mo hibaroan kon ano nga klase hin persona an nangunguna han sugad kinahanglanon-gud nga gobyerno. An masunod nga artikulo mabulig ha imo nga mahibaro han totoo nga Jesus.

[Footnote]