Natunaw an Kasingkasing han Ehipto

25. Sugad nga katumanan han Isaias 19:1-11, ano an nahitabo ha kadaan nga Ehipto?

²⁵ An kahirani nga amyaw han Juda ha sur amo an Ehipto, nga maiha na nga kaaway han may kauyonan nga katawohan han Dios. An Isaias kapitulo 19 nagsasaysay han masamok nga mga kahimtang ha Ehipto durante han panahon ni Isaias. May-ada girra sibil ha Ehipto, “bungto patok ha bungto, ngan ginhadian patok ha ginhadian.” (Isaias 19:2, 13, 14) Nagpipresenta an mga historyador hin ebidensya nga may-ada magkaaway nga mga dinastiya nga dungan nga nagmamando ha magkalainlain nga mga bahin han nasud. An iginhahambog nga kinaadman han Ehipto, upod an iya ‘waray pulos nga mga dios ngan mga tamyawan,’ waray makagluwas ha iya tikang ha “kamot han agaron nga madarahog.” (Isaias 19:3, 4) An Ehipto sunodsunod nga ginsakop han Asirya, Babilonya, Persia, Gresya, ngan Roma. Ini ngatanan nga mga hitabo nagtuman han mga tagna han Isaias 19:1-11.

26. Ha mas daku nga katumanan, paonan-o magios an mga umurukoy han moderno nga “Ehipto” ha mga paghukom ni Jehova?

²⁶ Kondi, ha Biblia, an Ehipto agsob nga nagsisimbolo han kalibotan ni Satanas. (Esekiel 29:3; Joel 3:19; Pahayag 11:8) Salit, may-ada ba mas daku nga katumanan an ‘kapahayagan kontra han Ehipto’ ni Isaias? Oo, may-ada! An introduksyon han tagna sadang makapukaw han atensyon han ngatanan: “Kitaa, hi Jehova nasakay dida ha madagmit nga dampog, ngan inabot ha Ehipto: ngan an mga diosdios han Ehipto mangungurog ha iya atubangan; ngan an kasingkasing han Ehipto matutunaw ha butnga hini.” (Isaias 19:1) Diri na mag-iiha magios hi Jehova kontra han organisasyon ni Satanas. Hiton nga panahon, an mga dios hini nga sistema han mga butang mapapamatud-an nga waray pulos. (Salmo 96:5; 97:7) “An kasingkasing han Ehipto matutunaw” ha kahadlok. Igintagna ni Jesus iton nga panahon: “Magkakaada . . . kasakit han mga katawohan upod ha kalisang tungod han kasamok han hagubuhob han dagat ngan han mga balod. Ngan an mga tawo manluluya tungod ha kahadlok, ngan tungod ha pagtan-aw ha mga butang nga tiarabot ha kalibotan.”—Lukas 21:25, 26.

27. Ano nga mga pagkabahinbahin ha sulod an igintagna para ha “Ehipto,” ngan paonan-o natutuman ini yana nga panahon?

²⁷ Mahitungod han panahon antes han iya pagpadapat han paghukom, hi Jehova matagnaon nga nasiring: “Akon babaghuton an mga Ehiptohanon patok ha mga Ehiptohanon: ngan hira makikig-away an tagsatagsa patok ha iya bugto, ngan an tagsatagsa patok ha iya hirani; bungto patok ha bungto, ngan ginhadian patok ha ginhadian.” (Isaias 19:2) Tikang nga natukod an Ginhadian han Dios han 1914, nakita ‘an tigaman han presensya’ ni Jesus pinaagi han pagtindog han nasud kontra han nasud ngan ginhadian kontra han ginhadian. An pamatay ha mga tribo, madugo nga pamatay han damu nga mga tawo, ngan an tinatawag nga pagpoo han etniko nga minorya nagpatay han minilyon durante hinin kataposan nga mga adlaw. An sugad nga “kasakitan” magtitikaraot la samtang nagtitikahirani an kataposan.—Mateo 24:3, 7, 8.

28. Ha adlaw han paghukom, ano an mahihimo han palso nga relihiyon ha pagluwas hini nga sistema han mga butang?

²⁸ “An espiritu han Ehipto magmamaluya ha butnga hini; ngan akon gugunawon an sagdon dida: ngan hira mangingita ha mga diosdios, ngan ha mga lumayan, ngan ha ira nga may mga tamyaw, ngan ha mga mahiko.” (Isaias 19:3) Han umatubang hi Moises kan Paraon, ginpakaalohan an mga saserdote han Ehipto, tungod kay diri nira matupngan hi Jehova ha gahum. (Eksodo 8:18, 19; Buhat 13:8; 2 Timoteo 3:8) Sugad man, ha adlaw han paghukom, an palso nga relihiyon diri makakaluwas hinin maraot nga sistema. (Itanding an Isaias 47:1, 11-13.) Ha kataposan, an Ehipto nahiilarom ha ‘usa ka mabangis nga agaron,’ an Asirya. (Isaias 19:4) Iginlaladawan hini an madulom nga tidaraon nga aatubangon hini nga sistema han mga butang.

29. Kon umabot na an adlaw ni Jehova, ano an mahihimo han mga politiko?

²⁹ Kondi, kumusta man an mga lider ha politika?  Makakabulig ba hira? “An mga prinsipe han Soan mga lurong gud; an sagdon han labi nga makinaadmananon nga mga magsaragdon ni Paraon mahihimo nga [diri-makatadunganon].” (Basaha an Isaias 19:5-11.) Diri gud makatadunganon an paglaom nga may mahihimo an tawhanon nga mga magsaragdon ha adlaw han paghukom! Bisan kon may-ada hira han ngatanan nga kahibaro han kalibotan, waray hira han diosnon nga kinaadman. (1 Korinto 3:19) Ira iginsalikway hi Jehova ngan sinarig ha syensya, pilosopiya, kwarta, kalipayan, ngan iba pa nga kasaliwan nga mga dios. Sugad nga resulta, waray hira kahibaro ha mga katuyoan han Dios. Hira nalilimbongan ngan nagugupong. Kawang la an ira mga buhat. (Basaha an Isaias 19:12-15.) “An makinaadmananon nga mga tawo ginpakaalohan, hira nahulop ngan nakuha: kitaa, ira isinalikway an pulong ni Jehova; ngan ano nga kahimtang han kinaadman an aada ha ira?”—Jeremias 8:9.

Usa nga Tigaman Ngan Usa nga Saksi kan Jehova

30. Ha ano nga paagi ‘an tuna han Juda magigin makaharadlok ha Ehipto’?

³⁰ Kondi, bisan kon maluya an mga lider han “Ehipto,” ‘pariho han kababayin-an,’ may-ada pa gihapon pipira nga mga indibiduwal nga nagbibiling han diosnon nga kinaadman. An mga dinihogan ni Jehova ngan an ira mga kaupod ‘nagpapahayag han mga kamahalan han Dios ha kahigrayoan.’ (Isaias 19:16; 1 Pedro 2:9) Ginbubuhat nira an mahihimo nira ha pagpahamangno ha mga tawo han tiarabot nga kabungkagan han organisasyon ni Satanas. Sugad nga pagtagna nga daan hini nga kahimtang, hi Isaias nasiring: “An tuna han Juda magmamakaharadlok ha Ehipto; an tagsatagsa nga nangaran hini mahahadlok, tungod han tuyo ni Jehova han mga kasundalohan, nga iya gintutuyo patok hini.” (Isaias 19:17) An matinumanon nga mga mensahero ni Jehova nagawas nga nagsusumat ha mga tawo han kamatuoran—lakip na an pagpahibaro han mga kalamidad nga igintagna ni Jehova. (Pahayag 8:7-12; 16:2-12) Nakakaguol ini ha mga lider han relihiyon han kalibotan.

31. Paonan-o nahitatabo nga an “yinaknan han Kanaan” ginyayakan ha mga siyudad han Ehipto (a) ha kadaan nga mga panahon? (b) ha moderno nga mga panahon?

³¹ Ano an makapakalas nga resulta hinin pagpasamwak nga buruhaton? “Hadto nga adlaw mamamay-ada lima nga bungto dida ha tuna ha Ehipto nga magyayakan han yinaknan ha Kanaan, ngan magsusumpa kan Jehova han mga kasundalohan; an usa tatawagon nga bungto ha kagunawan.” (Isaias 19:18) Ha kadaan nga mga panahon ini nga tagna matin-aw nga natuman han an Hebreo nga yinaknan an ginagamit han mga Judio nga pinalagiw ngadto ha mga siyudad han Ehipto. (Jeremias 24:1, 8-10; 41:1-3; 42:9–43:7; 44:1) Yana nga panahon, may-ada mga tawo ha teritoryo han moderno nga “Ehipto” nga maaram magyakan han “uray nga yinaknan” han kamatuoran han Biblia. (Sepania 3:9) Usa han lima nga simboliko nga mga siyudad an tinatawag nga ‘An Siyudad han Kagunawan,’ nagpapasabot nga bahin han “uray nga yinaknan” an may kalabotan han pagbuhayhag ngan “kagunawan” han organisasyon ni Satanas.

32. (a) Ano nga “halaran” an aada ha butnga han tuna han Ehipto? (b) Paonan-o an dinihogan pariho han “usa nga harigi” ha ligid han tubtoban han Ehipto?

³² Pinaagi han bulig han pagpasamwak nga buruhaton han katawohan ni Jehova, an iya bantogan nga ngaran sigurado nga makikilala hini nga sistema han mga butang. “Hadto nga adlaw mamamay-ada halaran kan Jehova ha butnga han tuna ha Ehipto, ngan usa nga harigi kan Jehova dida ha ligid hini.” (Isaias 19:19) Ini nga mga pulong nag-uunabi han kahimtang han dinihogan nga mga Kristiano, nga may kauyonan ha Dios. (Salmo 50:5) Sugad nga “halaran” naghahalad hira han ira mga halad; sugad nga ‘harigi ngan karig-onan han kamatuoran,’ nagpapamatuod hira mahitungod kan Jehova. (1 Timoteo 3:15; Roma 12:1; Hebreo 13:15, 16) Aada hira “ha butnga han tuna,” nga makikita—upod han ira mga kaupod nga ‘iba nga mga karnero’—ha 235 nga mga nasud ngan mga isla han dagat. Kondi hira ‘diri bahin han kalibotan.’ (Juan 10:16; 17:15, 16) Hira, ha simboliko nga pagkayakan, natindog ha tubtoban ha butnga hini nga kalibotan ngan han Ginhadian han Dios, andam ha pagtabok hiton nga tubtoban ngan karawaton an ira langitnon nga balos.

33. Ha ano nga mga paagi nga an mga dinihogan nagigin “pangirilal-an” ngan “usa nga saksi” ha “Ehipto”?

³³ Hi Isaias nagpapadayon: “Ini maaamo an para ha pangirilal-an ngan para ha usa nga saksi kan Jehova han mga kasundalohan dida ha tuna ha Ehipto; kay hira magsasangpit kan Jehova tungod han mga magtalumpigos, ngan hiya magpapadara ha ira hin usa nga manluluwas ngan usa nga manlalaban, ngan hiya magluluwas ha ira.” (Isaias 19:20) Sugad nga “pangirilal-an” ngan “usa nga saksi,” an dinihogan nangunguna ha pagsangyaw nga buruhaton ngan nagpapahitaas han ngaran ni Jehova hini nga sistema han mga butang. (Isaias 8:18; Hebreo 2:13) Ha bug-os nga kalibotan nababatian an mga singgit han tinalumpigos nga mga tawo, kondi ha kabug-osan, an mga gobyerno han tawo diri nakakabulig ha ira. Kondi, ipapadara ni Jehova an usa nga Manluluwas, an Hadi nga hi Jesu-Kristo, ha pagtalwas ha ngatanan nga mga maaghop. Kon inin kataposan nga mga adlaw dumangat na ha pungkay hito ha girra han Armagedon, magdadara hiya hin katalwasan ngan waray kataposan nga mga bendisyon ha mga tawo nga nahahadlok ha Dios.—Salmo 72:2, 4, 7, 12-14.

34. (a) Paonan-o makikilala hi Jehova han “mga Ehiptohanon,” ngan ano nga halad ngan regalo an ira ihahatag ha iya? (b) San-o hahampakon ni Jehova an “Ehipto,” ngan ano nga pagtambal an masunod?

³⁴ Samtang yana, kaburut-on han Dios nga an ngatanan nga klase han mga tawo magkaada husto nga kahibaro ngan maluwas. (1 Timoteo 2:4) Salit, hi Isaias nagsurat: “Hi Jehova makikilala han Ehipto, ngan an mga Ehiptohanon makilala kan Jehova hadto nga adlaw, oo, hira magsisingba nga may-ada halad ngan hatag, ngan magsasaad hin usa nga saad kan Jehova, ngan pagtutumanon ini. Ngan hahampakon ni Jehova an Ehipto, ha paghampak ngan ha pagtambal; ngan hira mabalik kan Jehova, ngan hiya pakikimalooyan nira, ngan magtatambal ha ira.” (Isaias 19:21, 22) An mga tawo tikang ha ngatanan nga nasud han kalibotan ni Satanas, an indibiduwal nga “mga Ehiptohanon,” nakilala kan Jehova ngan naghahatag ha iya hin halad, “an bunga han mga im-im nga nagsusumat han iya ngaran.” (Hebreo 13:15) Nagsasaad hira kan Jehova pinaagi han pagdedikar han ira kalugaringon ngadto ha iya, ngan gintutuman nira an ira saad pinaagi han pagkinabuhi ha maunungon nga pag-alagad. Katapos han “paghampak”  ni Jehova hini nga sistema han mga butang ha Armagedon, gagamiton niya an iya Ginhadian ha pagtambal ha katawohan. Durante han Milenyo nga Pagmando ni Jesus, an katawohan pagpapahitas-on ha espirituwal, mental, moral, ngan pisikal nga kahingpitan—tinuod gud nga pagtambal!—Pahayag 22:1, 2.

‘Mabulahan an Akon Katawohan’

35, 36. Ha katumanan han Isaias 19:23-25, nagkaada ano nga mga relasyon butnga han Ehipto, Asirya, ngan Israel ha kadaan nga mga panahon?

³⁵ Katapos nakita nga daan han propeta an makatirigamnan nga pagbag-o: “Hadto nga adlaw mamamay-ada dalan tikang ha Ehipto ngadto ha Asirya, ngan an mga Asiryahanon makadto ha Ehipto, ngan an mga Ehiptohanon ngadto ha Asirya; ngan an mga Ehiptohanon magsisingba kaupod han mga Asiryahanon. Hadto nga adlaw an Israel magigin ikatulo han Ehipto ngan han Asirya, usa nga bendisyon ha butnga han tuna. Kay hi Jehova han mga kasundalohan nagbendisyon ha ira, ha pagsiring: Mabulahan an Ehipto nga akon katawohan, ngan an Asirya an buhat han akon mga kamot, ngan an Israel an akon manurunod.” (Isaias 19:23-25) Oo, maabot an adlaw nga magigin magsangkay an Ehipto ngan an Asirya. Paonan-o?

³⁶ Han gintalwas ni Jehova an iya katawohan tikang ha mga nasud ha naglabay nga mga panahon, naghimo hiya para ha ira hin mga dalan ngadto ha kagawasan, siring pa. (Isaias 11:16; 35:8-10; 49:11-13; Jeremias 31:21) An limitado nga katumanan hini nga tagna nahitabo katapos mapirde an Babilonya han an mga bihag tikang ha Asirya ngan Ehipto, sugad man tikang ha Babilonya, ginpabalik ngadto ha Tuna nga Iginsaad. (Isaias 11:11) Kondi kumusta man ha moderno nga mga panahon?

37. Paonan-o an minilyon yana nga panahon nagkikinabuhi nga sugad hin may-ada dalan ha butnga han “Asirya” ngan “Ehipto”?

³⁷ Yana nga panahon, an nanhibilin han dinihogan nga espirituwal nga mga Israelita “usa nga bendisyon ha butnga han tuna.” Hira nag-aaghat han totoo nga pagsingba ngan nagsusumat han mensahe han Ginhadian ha mga tawo ha ngatanan nga mga nasud. An pipira hini nga mga nasud pariho han Asirya, militaristiko hinduro. An iba nga mga nasud mas liberal, bangin pariho han Ehipto—nga hadto amo “an hadi ha salatanan” ha tagna ni Daniel. (Daniel 11:5, 8) Minilyon nga mga indibiduwal tikang ha militaristiko nga mga nasud ngan ha mas liberal nga mga nasud an naglalakat dida ha dalan han totoo nga pagsingba. Salit, an mga tawo tikang ha ngatanan nga mga nasud nagkakaurosa ha ‘pag-alagad.’ Waray mga pagkabahinbahin ha nasud ha butnga nira. Hira naghihigugmaay ha usa kag usa, ngan tinuod nga masisiring nga ‘an Asirya nasulod ha Ehipto ngan an Ehipto ha Asirya.’ Sugad ito hin may-ada dalan tikang ha usa ngadto ha luyo.—1 Pedro 2:17.

38. (a) Paonan-o an Israel “magigin ikatulo han Ehipto ngan han Asirya”? (b) Kay ano nga nasiring hi Jehova nga ‘Mabulahan an akon katawohan’?

³⁸ Kondi, paonan-o an Israel “magigin ikatulo han Ehipto ngan han Asirya”? Ha tinikangan han “panahon han kataposan,” an kadam-an hadton nag-aalagad kan Jehova ha tuna mga membro han ‘Israel han Dios.’ (Daniel 12:9; Galasia 6:16) Tikang  han dekada han 1930, inulpot an daku nga panon han ‘iba nga mga karnero,’ nga may-ada tunan-on nga paglaom. (Juan 10:16a; Pahayag 7:9) Ha paggawas ha mga nasud—nga ginpadagawan han Ehipto ngan Asirya—hira napakadto ha balay ni Jehova ha pagsingba ngan nagdadapit ha iba nga mga tawo nga umupod ha ira. (Isaias 2:2-4) Ginbubuhat nira an pariho nga pagsangyaw nga buruhaton sugad han ira dinihogan nga kabugtoan, nag-iilob hin pariho nga mga pagsari, nagpapakita hin pariho nga pagkamatinumanon ngan integridad, ngan nakaon ha pariho nga espirituwal nga lamesa. Oo, an dinihogan ngan an ‘iba nga mga karnero’ “usa nga panon, usa nga magbarantay.” (Juan 10:16b) Magruruhaduha pa ba an bisan hin-o nga hi Jehova, ha pakakita ha ira kadasig ngan pagpailob, nalilipay ha ira buruhaton? Diri urusahon nga hiya nagpapahayag hin bendisyon ha ira, nasiring: ‘Mabulahan an akon katawohan’!

[Mga Pakiana]