Magpadayon ha Pagpakita han Pagkamaopay
Magpadayon ha Pagpakita han Pagkamaopay
“An bunga han kalamrag aada ha ngatanan nga kaopayan ngan katadongan, ngan kamatuoran.”—EFESO 5:9.
1. Paonan-o ipinapakita yana nga panahon han minilyon nga nauyon hira ha Salmo 31:19?
AN GIMAOPAYI nga mahihimo han bisan hin-o nga tawo amo an paghimaya kan Jehova. Yana nga panahon, minilyon an nagbubuhat hini pinaagi han pagdayaw ha Dios tungod han iya pagkamaopay. Sugad nga maunungon nga mga Saksi ni Jehova, bug-os-kasingkasing nga nauyon kita ha salmista nga nagkanta: “O kadaku han imo maopay nga kaburut-on, nga imo igin-andam para hadton nga ha imo nahahadlok!”—Salmo 31:19.
2, 3. Ano an mahimo mahitabo kon an aton paghimo-disipulo nga buruhaton diri pinamamatud-an han maopay nga paggawi?
2 An matinalahuron nga kahadlok kan Jehova nagpapagios ha aton nga dayawon hiya tungod han iya pagkamaopay. Nagpapagios liwat ito ha aton nga ‘dayawon hi Jehova, bulahanon hiya, ngan isumat an mahitungod han iya kagamhanan.’ (Salmo 145:10-13) Salit madasigon nga nakikigbahin kita ha pagsangyaw-han-Ginhadian ngan paghimo-disipulo nga buruhaton. (Mateo 24:14; 28:19, 20) Siyempre, an aton pagsangyaw nga buruhaton kinahanglan pamatud-an han maopay nga paggawi. Kon diri, mapapasiparahan naton an baraan nga ngaran ni Jehova.
3 Damu nga mga tawo an nag-aangkon nga nagsisingba ha Dios, kondi an ira paggawi diri nauyon ha mga suruklan nga iginbutang ha iya inspirado nga Pulong. Mahitungod han iba nga diri nagbubuhat uyon han ira mga pag-angkon nga nagbubuhat han maopay, hi apostol Pablo nagsurat: ‘Ikaw ba nga nagtututdo ha imo igkasitawo, diri ka nagtututdo ha imo ngahaw? Ikaw ba nga nagwawali nga diri angay mangawat, nangangawat ka ba? Ikaw nga nasiring, nga diri ka manlibog, nanlilibog ka ba? An ngaran han Dios ginpapasipara han mga nasud tungod ha imo, sugad han nahisurat na.’—Roma 2:21, 22, 24.
4. An aton maopay nga paggawi may-ada ano nga epekto?
4 Imbes nga pasiparahan an ngaran ni Jehova, nangangalimbasog kita ha paghimaya hito pinaagi han aton maopay nga paggawi. Maopay an epekto hini ngada hadton ha gawas han Kristiano nga kongregasyon. Ha usa nga paagi, nabulig ito ha aton ha pagpamingaw ha aton mga parakontra. (1 Pedro 2:15) Mas importante, an aton maopay nga paggawi nagdadani ha mga tawo ngada ha organisasyon ni Jehova, nag-aabri han dalan para ha ira nga maghimaya ha iya ngan magkaada kinabuhi nga waray kataposan.—Buhat 13:48.
5. Ano nga mga pakiana an sadang paghisgotan naton yana?
5 Tungod kay kita diri-hingpit, paonan-o naton malilikyan an paggawi nga mahimo magpasipara kan Jehova ngan makapakdol ha mga nagbibiling han kamatuoran? Oo, paonan-o kita mahimo maglampos ha pagpakita han pagkamaopay?
Usa nga Bunga han Kalamrag
6. Ano an pipira han ‘waray bunga nga mga buhat han kasisidman,’ kondi ano nga mga bunga an sadang makita ha mga Kristiano?
6 Sugad nga dedikado nga mga Kristiano, may-ada kita pinahihimulsan nga nabulig ha aton nga malikyan an ‘waray bunga nga mga buhat han kasisidman.’ Nag-uupod ini han nagpapasipara-ha-Dios nga mga buhat sugad han pagbuwa, pangawat, pagbusa, malaw-ay nga pag-istorya mahitungod han sekso, makaarawod nga paggawi, malaw-ay nga pagtiaw, ngan paghubog. (Efeso 4:25, 28, 31; 5:3, 4, 11, 12, 18) Imbes nga mahidabi ha sugad nga mga buhat, ‘nagpapadayon kita ha paggawi sugad nga mga anak han kalamrag.’ Hi apostol Pablo nasiring nga “an bunga han kalamrag aada ha ngatanan nga kaopayan ngan katadongan, ngan kamatuoran.” (Efeso. 5:8, 9) Salit pinaagi han paglakat ha kalamrag nga nakakagpadayon kita ha pagpakita han pagkamaopay. Kondi ano ini nga klase hin kalamrag?
7. Ano an kinahanglan naton buhaton basi padayon nga maipakita an bunga nga pagkamaopay?
7 Bisan pa han aton mga pagkadiri-hingpit, maipapakita naton an pagkamaopay kon maglakat kita ha espirituwal nga kalamrag. “An imo pulong lawag ha akon mga tiil, ngan suga ha akon agian,” nagkanta an salmista. (Salmo 119:105) Kon karuyag naton magpadayon ha pagpakita han “bunga han kalamrag” pinaagi han “ngatanan nga kaopayan,” kinahanglan pahimulsan naton pirme an espirituwal nga kalamrag nga aada ha Pulong han Dios, nga gin-uusisa hin maopay ha Kristiano nga mga publikasyon, ngan regular nga ginhihisgotan ha aton mga katirok ha pagsingba. (Lukas 12:42; Roma 15:4; Hebreo 10:24, 25) Kinahanglan hatagan liwat naton hin espesyal nga pagtagad an susbaranan ngan mga katutdoan ni Jesu-Kristo, “an kalamrag han kalibotan” ngan “an siga han [kan Jehova] himaya.”—Juan 8:12; Hebreo 1:1-3.
Usa nga Bunga han Espiritu
8. Kay ano nga maipapakita naton an pagkamaopay?
8 An espirituwal nga kalamrag sigurado nga nabulig ha aton ha pagpakita han pagkamaopay. Dugang pa, naipapakita naton ini nga kalidad tungod kay ginigiyahan kita han baraan nga espiritu han Dios, o aktibo nga puwersa. An pagkamaopay usa han “mga bunga han espiritu.” (Galasia 5:22, 23) Kon nasunod kita ha giya han baraan nga espiritu ni Jehova, maghihimo ito ha aton han urusahon nga bunga hito nga pagkamaopay.
9. Paonan-o kita magios uyon ha ginsiring ni Jesus nga nahisurat ha Lukas 11:9-13?
9 An aton sinsero nga hingyap nga lipayon hi Jehova pinaagi han pagpakita han bunga han espiritu nga pagkamaopay sadang magpagios ha aton nga magbuhat uyon han mga pulong ni Jesus: “Pangamuyo, ngan ihahatag ha iyo; pamilnga, ngan iyo hiaagian; pagtuktok, ngan aabrihan kamo. Kay an ngatanan nga nangangamuyo, nakakakarawat; ngan an namimiling, nakakaagi; ngan an natuktok, inaabrihan. Ngan hain ha iyo nga amay, nga kon an iya anak nangangaro hin tinapay, iya ba tatagan hiya hin bato? O kon isda, tatagan ba hiya han halas liwan han isda? O, kon mangaro hiya hin bonay, tatagan ba hiya hin urang-urang? Busa, kon kamo nga mga magraot, mahibabaro kamo paghatag hin mag-opay nga mga hatag ha iyo mga kabataan labi pa gud an iyo Amay nga langitnon, nga mahatag han [baraan nga espiritu] ha mga nangangaro ha iya?” (Lukas 11:9-13) Sundon naton an sagdon ni Jesus pinaagi han pag-ampo para han espiritu ni Jehova basi makagpadayon kita ha pagpakita han bunga hito nga pagkamaopay.
‘Magpadayon ha Pagbuhat han Maopay’
10. Ano nga mga bahin han pagkamaopay ni Jehova an gin-uunabi ha Eksodo 34:6, 7?
10 Pinaagi han espirituwal nga kalamrag tikang ha Pulong han Dios ngan pinaagi han bulig han baraan nga espiritu han Dios, mahimo kita ‘magpadayon ha pagbuhat han maopay.’ (Roma 13:3) Pinaagi han regular nga pag-aram ha Biblia, labaw nga nahibabaro kita kon paonan-o naton masusubad an pagkamaopay ni Jehova. Ginhisgotan ha nahiuna nga artikulo an mga bahin han pagkamaopay han Dios nga gin-unabi ha iginpahayag kan Moises nga nahisurat ha Eksodo 34:6, 7, nga aton mababasa: ‘Hi Jehova, hi Jehova, usa ka Dios nga maloloy-on ngan mapinairon, mahinay ha kasina ngan hura hin mahigugmaon-nga-kalooy ngan hin kamatuoran, matinipigon han mahigugmaon-nga-kalooy ha mga yinukot, nga nagpapasaylo han karat-an ngan han pagtalapas ngan han sala, kondi ha ano man nga paagi diri magluluwas tikang ha sirot.’ An mas duok nga pagkita hini nga mga bahin han pagkamaopay ni Jehova mabulig ha aton nga ‘magpadayon ha pagbuhat han maopay.’
11. Paonan-o kita sadang maapektohan han kahibaro nga hi Jehova maloloy-on ngan mapinairon?
11 Inin pahayag han Dios nagpapaalerto ha aton han panginahanglan nga subaron hi Jehova pinaagi han pagin maloloy-on ngan mapinairon. “Bulahan an mga maloloy-on,” siring ni Jesus, “kay hira makakakarawat hin kalooy.” (Mateo 5:7; Lukas 6:36) Tungod kay maaram nga hi Jehova mapinairon, napapagios kita nga magin mapinairon ngan maopay ha aton pagtrato ha iba, upod na adton aton ginsasangyawan. Nauyon ini ha sagdon ni Pablo: “An iyo pulong kinahanglan nga may maada grasya, nga ginparasa hin asin, basi nga iyo hibaroan an pagbatonay ha usa kag usa.”—Kolosas 4:6.
12. (a) Tungod kay an Dios mahinay ha kasina, paonan-o naton tatagdon an iba? (b) An mahigugmaon-nga-kalooy ni Jehova nagpapagios ha aton nga buhaton an ano?
12 Tungod kay an Dios mahinay ha kasina, an aton hingyap nga ‘magpadayon ha pagbuhat han maopay’ nagpapagios ha aton nga magpailob ha gudtiay nga mga sayop han mga igkasi-tumuroo ngan isentro an hunahuna ha ira maopay nga mga kalidad. (Mateo 7:5; Jakobo 1:19) An mahigugmaon-nga-kalooy ni Jehova nagpapagios ha aton nga ipakita an maunungon nga gugma, bisan ilarom han pinakamakuri nga mga kahimtang. Sigurado nga hiringyapon gud ini.—Proberbios 19:22.
13. Paonan-o kita sadang gumios ha pagpakita nga hi Jehova ‘hura hin kamatuoran’?
13 Tungod kay an aton langitnon nga Amay ‘hura hin kamatuoran,’ nangangalimbasog kita nga ‘irekomenda an aton kalugaringon sugad nga iya mga ministro pinaagi han mga pulong nga kamatuoran.’ (2 Korinto 6:3-7) Kaupod ha pito nga mangil-ad kan Jehova amo an “dila nga buwaon” ngan “an saksi nga buwaon nga nagsasaysay han mga buwa.” (Proberbios 6:16-19) Salit an aton hingyap nga lipayon an Dios nagpapagios ha aton nga ‘bayaan an buwa ngan magyakan han kamatuoran.’ (Efeso 4:25) Hinaot diri gud kita mapakyas ha pagpakita han pagkamaopay hinin importante nga paagi.
14. Kay ano nga sadang kita magin mapinasayloon?
14 An iginpahayag han Dios kan Moises sadang magpagios liwat ha aton nga magin mapinasayloon, kay hi Jehova andam ha pagpasaylo. (Mateo 6:14, 15) Siyempre, ginsisirotan ni Jehova an diri-mabinasulon nga mga magpakasasala. Salit kinahanglan sundon naton an iya mga suruklan han pagkamaopay mahitungod han pagtipig han espirituwal nga kalimpyo han kongregasyon.—Lebitiko 5:1; 1 Korinto 5:11, 12; 1 Timoteo 5:22.
‘Padayon nga Magbantay’
15, 16. Paonan-o an sagdon ni Pablo nga nahisurat ha Efeso 5:15-19 makakabulig ha aton nga magpadayon ha pagbuhat han pagkamaopay?
15 Basi makagpadayon ha pagpakita han pagkamaopay bisan pa han maraot nga nagpapalibot ha aton, kinahanglan mapuno kita han espiritu han Dios ngan magbantay kon paonan-o kita nanggagawi. Uyon hito, hi Pablo nagsagda ha mga Kristiano ha Efeso: “Tan-awa niyo hin maopay kon mationan-o iton iyo panggawi, diri sugad ha mga diri maaram, kondi sugad ha mga maaram; Pagpahimulosan an oras, kay an mga adlaw magraot. Busa ayaw kamo pagkawaray himurulsan, kondi hibaroan niyo kon ano an kaburut-on han Ginoo. Ngan diri kamo maghubog hin alaksiw, diin titikang an kasamokan, kondi mapuno kamo han Espiritu; nga maghinimangraway kamo an usa kag usa ha mga salmos ngan mga karantahon ngan mga pagkanta nga espirituhanon, nga magkanta ngan maghimo hin musika ha iyo mga kasingkasing ha Ginoo.” (Efeso 5:15-19) Ini nga sagdon sigurado nga angayan para ha aton hinin magpakalilisang nga kataposan nga mga adlaw.—2 Timoteo 3:1.
16 Basi makagpadayon kita ha pagbuhat han pagkamaopay, kinahanglan magpadayon kita ha pagbantay nga nanggagawi kita sugad hadton nagbubuhat han kinaadman han Dios. (Jakobo 3:17) Kinahanglan likyan naton an seryoso nga mga sala ngan kinahanglan mapuno han baraan nga espiritu, tinutugotan an aton kalugaringon nga giyahan hito. (Galasia 5:19-25) Pinaagi han pag-aplikar han espirituwal nga katutdoan nga iginhahatag ha Kristiano nga mga katirok, mga asembleya, ngan mga kombensyon, makakagpadayon kita ha pagbuhat han maopay. An ginsiring ni Pablo ha mga taga-Efeso mahimo magpahinumdom liwat ha aton nga ha kadak-an han aton mga katirok ha pagsingba, nagpapahimulos kita tikang ha aton kinasingkasing nga pagkanta han ‘espirituwal nga mga karantahon’—nga an damu hito nakasentro ha espirituwal nga mga kalidad, sugad han pagkamaopay.
17. Kon an ira mga kahimtang nagpupugong ha ira nga makatambong hin regular ha mga katirok, ha ano makakasiguro an mga Kristiano nga grabe an sakit?
17 Kumusta man an aton mga igkasi-tumuroo nga diri regular nga nakakatambong ha Kristiano nga mga katirok tungod kay grabe nga masakit? Bangin manluya hira tungod kay diri hira makasingba pirme kan Jehova nga direkta nga nakikig-upod ha ira espirituwal nga kabugtoan. Kondi makakasiguro hira nga hinsasabtan ni Jehova an ira mga kahimtang, titipigan hira ha kamatuoran, tatagan hira han iya baraan nga espiritu, ngan bubuligan hira nga magpadayon ha pagbuhat han maopay.—Isaias 57:15.
18. Ano an mabulig ha aton nga magpadayon ha pagbuhat han maopay?
18 Ha pagpadayon ha pagbuhat han maopay kinahanglan mag-ikmat kita ha aton mga kaupod ngan magpahirayo tikang hadton “waray gugma ha kaopayan.” (2 Timoteo 3:2-5; 1 Korinto 15:33) An pag-aplikar han sugad nga sagdon nabulig ha aton nga malikyan an ‘pagpasubo ha baraan nga espiritu han Dios’ pinaagi han pagkontra ha mga giya hito. (Efeso 4:30) Dugang pa, nabubuligan kita ha pagbuhat han maopay kon ginpapatubo naton an duok nga relasyon upod hadton an mga kinabuhi nagpapamatuod nga hira mga mahigugmaon han pagkamaopay ngan ginigiyahan han baraan nga espiritu ni Jehova.—Amos 5:15; Roma 8:14; Galasia 5:18.
An Pagkamaopay Nagdadara hin Maopay nga mga Resulta
19-21. Isaysay an mga eksperyensya nga nagpapakita han epekto han pagpakita han pagkamaopay.
19 An paglakat ha espirituwal nga kalamrag, pagsunod ha giya han espiritu han Dios, ngan pagbantay ha aton panggawi mabulig ha aton nga malikyan an maraot ngan ‘magpadayon ha pagbuhat han maopay.’ Dida hito, makakahimo ito hin maopay nga mga resulta. Tagda an eksperyensya ni Zongezile, usa han mga Saksi ni Jehova ha Aprika del Sur. Usa ka aga han tikadto hiya ha eskwelahan, gin-usisa niya an iya gutiay nga deposito ha bangko. An papel tikang ha automatic teller machine sayop nga nagpakita hin sobra nga R42,000 ($6,000, E.U.). An guwardya ha bangko ngan iba pa nagsagda ha iya nga kuhaon an kwarta ngan ideposito ito ha iya ngaran ha lain nga bangko. An mag-asawa nga Saksi la nga kaupod niya ha balay an naghatag kumendasyon ha iya tungod kay waray gud niya kuhaa an bisan pira han kwarta.
20 Kinabuwasan, iginsumat ni Zongezile ha bangko an sayop. Nadiskobrehan nga may-ada hiya numero han deposito nga pariho han kanan usa nga riko nga negosyante nga sayop nga nagdeposito hin kwarta ha sayop nga numero. Nahipausa nga waray gud gastoha ni Zongezile an bisan pira hini nga kwarta, an negosyante nagpakiana ha iya: “Ano an imo relihiyon?” Hi Zongezile nagsiring nga usa hiya han mga Saksi ni Jehova. Gindayaw gud hiya han mga opisyal han bangko, nga nagsiring: “Ginhahandom namon nga unta an ngatanan nga mga tawo sugad katangkod ha mga Saksi ni Jehova.” Oo, an tangkod ngan mag-opay nga mga buhat makakahimo ha iba nga himayaon hi Jehova.—Hebreo 13:18.
21 An mag-opay nga mga buhat diri kinahanglan magin bantogan basi magkaada maopay nga epekto. Ha pag-ilustrar: Usa ka batan-on nga lalaki nga Saksi nga bug-os-panahon nga ebanghelisador ha usa han mga isla han Samoa kinahanglan kumadto ha usa nga ospital ha iya lugar. An mga tawo naghuhulat han doktor, ngan naobserbahan han Saksi nga masakit hinduro an lagas nga babaye nga sunod ha iya. Ginhikay niya nga mauna ha iya an babaye basi matambal dayon hiya. Ha urhi nga okasyon, iginkita han Saksi ha merkado inin lagas nga babaye. Nahinumdoman niya an Saksi ngan an iya maopay nga ginbuhat ha ospital. “Yana maaram na ako nga an mga Saksi ni Jehova totoo nga nahigugma ha ira igkasi-tawo,” siring niya. Bisan kon hadto diri hiya nakarawat han mensahe han Ginhadian, an pagkamaopay nga ipinakita ha iya han Saksi nagkaada maopay nga mga resulta. Kinarawat niya an tanyag nga pag-aram ha Biblia ngan nagtikang kumuha hin kahibaro ha Pulong han Dios.
22. Ano an usa nga makatirigamnan gud nga paagi ha ‘padayon nga pagbuhat han maopay’?
22 Posible gud nga makakagsaysay ka hin mga eksperyensya nga nagpapakita han bili han pagpakita han pagkamaopay. An labi nga makatirigamnan nga paagi han ‘padayon nga pagbuhat han maopay’ amo an regular nga pakigbahin ha pagpasamwak han maopay nga sumat han Ginhadian han Dios. (Mateo 24:14) Hinaot magpadayon kita ha madasigon nga pakigbahin hinin presyoso nga buruhaton, nasasabtan nga usa nga paagi ini han pagbuhat han maopay, labi na ngada hadton nabaton hin maopay. Pinakaimportante, an aton ministeryo ngan maopay nga paggawi naghihimaya kan Jehova, an surok han pagkamaopay.—Mateo 19:16, 17.
Padayon nga “Magbuhat Kita han Maopay”
23. Kay ano nga maopay nga buhat an Kristiano nga ministeryo?
23 An aton ministeryo sigurado nga maopay nga buhat. Mahimo ito magresulta hin kaluwasan para ha aton ngan para hadton namamati ha mensahe han Biblia ngan salit hingangada ha dalan nga nagtutugway ngadto ha kinabuhi nga waray kataposan. (Mateo 7:13, 14; 1 Timoteo 4:16) Salit, kon naatubang kita ha paghimo hin mga desisyon, an hingyap ha pagbuhat han maopay posible nga makakahimo ha aton nga magpakiana ha aton kalugaringon: ‘Paonan-o ini nga desisyon makakaapekto ha akon buruhaton nga pagsangyaw han Ginhadian? Mapulsanon gud ba an akon pagbubuhaton? Mabulig ba ito ha akon nga mabuligan an iba nga karawaton an “waray kataposan nga maopay nga sumat” ngan magkaada duok nga relasyon kan Jehova nga Dios?’ (Pahayag 14:6) Daku nga kalipay an magigin resulta han desisyon nga nagtutugot ha aton nga magbuhat hin labaw pa para ha Ginhadian.—Mateo 6:33; Buhat 20:35.
24, 25. Ano an pipira nga mga paagi han pagbuhat hin maopay ha kongregasyon, ngan makakasiguro kita han ano kon nagpapadayon kita ha pagpakita han pagkamaopay?
24 Diri gud naton minuson an mapulsanon nga mga epekto han pagkamaopay. Makakagpadayon kita ha pagpakita hini nga kalidad pinaagi han pagsuporta ha Kristiano nga kongregasyon ngan pagbuhat han mahihimo naton ha pagmangno ha kaopayan hito. Sigurado nga ginbubuhat naton an maopay kon regular nga natambong ngan nakikigbahin kita ha Kristiano nga mga katirok. An aton pagtambong mismo nagdadasig ha mga igkasi-magsiringba, ngan an aton inandam-hin-maopay nga mga komento nagpaparig-on ha ira ha espirituwal. Nagbubuhat liwat kita han maopay kon ginagamit naton an aton mga panag-iya ha pagtipig han Kingdom Hall ngan kon nabulig kita ha husto nga pag-ataman hito. (2 Hadi 22:3-7; 2 Korinto 9:6, 7) Oo, ‘tubtob nga may-ada maopay nga panahon para hito, magbuhat kita han maopay ha ngatanan nga mga tawo, labi na gud ha panimalay han pagtoo.’—Galasia 6:10.
25 Diri naton malalaoman an tagsa nga kahimtang nga magkikinahanglan hin pagpakita han pagkamaopay. Salit, samtang inaatubang naton an bag-o nga mga ayat, pamilngon naton an kalamrag tikang ha Kasuratan, mag-ampo para han baraan nga espiritu ni Jehova, ngan buhaton an gimaopayi nga aton mahihimo ha pagbuhat han iya maopay ngan hingpit nga kaburut-on. (Roma 2:9, 10; 12:2) Makakasarig kita nga hura nga bibendisyonan kita ni Jehova samtang nagpapadayon kita ha pagpakita han pagkamaopay.
Paonan-o Mo Babatunon?
• Paonan-o naton mahihimo an gimaopayi?
• Kay ano nga an pagkamaopay tinatawag nga “bunga han kalamrag”?
• Kay ano nga an pagkamaopay tinatawag nga “bunga han espiritu”?
• Ano an epekto han aton maopay nga paggawi?
[Mga Pakiana]
[Retrato ha pahina 17]
An Pulong han Dios ngan an iya baraan nga espiritu nabulig ha aton ha pagpakita han pagkamaopay
[Mga Retrato ha pahina 18]
An pagpakita han pagkamaopay nagriresulta hin maopay