Sumat han mga Parasamwak han Ginhadian

An Moderno nga mga Martir Nagtitestigo ha Sweden

AN Griego nga pulong para ha “testigo” amo an martyr, diin nagtitikang an Ingles nga pulong nga “martyr,” nga nangangahulogan hin “usa nga nagtitestigo pinaagi han iya kamatayon.” Damu ha siyahan-siglo nga mga Kristiano an nagtestigo mahitungod kan Jehova pinaagi han kamatay para han ira pagtoo.

Ha pariho nga paagi, han ika-20 ka siglo, yinukot han mga Saksi an namatay ha pagdumara han maunungon nga mga nasuporta kan Hitler tungod ha pagtipig han ira neutralidad ha mga isyu may kalabotan ha politika ngan ha nasyonalismo. Inin moderno nga mga martir naghahatag liwat hin gamhanan nga pagtestigo. Ini an bag-o pa la nga nahitabo ha Sweden.

May kalabotan han ika-50 nga anibersaryo han kataposan han Girra ha Kalibotan II, an gobyerno han Sweden nagdumara hin edukasyonal nga kampanya ha bug-os nga nasud mahitungod han Holocaust. An proyekto gintawag nga Buhi nga Kasaysayan. Gin-imbitar an mga Saksi ni Jehova nga makigbahin ngan magsumat han ira mga eksperyensya.

An mga Saksi ginios pinaagi han pagpakita hin usa nga eksibit nga may ulohan nga An Hinngalimtan Na nga mga Biktima han Holocaust. Gintikangan ito ha Assembly Hall of Jehovah’s Witnesses ha Strängnäs. Nakadto an mga Saksi nga nakatalwas ha Holocaust basi isumat an ira mga eksperyensya ha sobra 8,400 nga bisita nga kinadto ha siyahan nga adlaw! Ha kataposan han 1999, an kiritaon iginpasalida na ha sobra 100 nga museum ngan panpubliko nga mga librarya ha bug-os nga Sweden, ngan mga 150,000 nga tawo an nakakita hito. Kaupod ha mga bisita an damu nga mga opisyal han gobyerno, nga positibo nga nagkomento ha ira nakita.

Waray iba nga panhitabo may kalabotan ha mga buruhaton han mga Saksi ni Jehova ha Sweden an may-ada han sugad kaduro nga pagpahibaro ha publiko ngan kinarawat hin maopay hinduro nga publisidad. Damu nga mga bisita an nagpakiana: “Kay ano nga waray niyo kami sumati mahitungod han iyo mga eksperyensya ha Holocaust hadto?”

Katapos ipakita an eksibit ha ira lugar, usa nga kongregasyon an nagreport hin 30-porsyento nga pag-uswag ha mga pag-aram ha Biblia ha balay! Gindapit han usa nga Saksi an katrabaho nga magkita han eksibit. An katrabaho malipayon nga kinarawat ngan igin-upod an usa nga sangkay. Katapos, an sangkay nagsiring nga nakurian hiya pagsabot kon paonan-o an mga tawo mahimo magkaada hin sugad karig-on nga pagtoo nga mas maruruyag pa hira mamatay kay ha pagpirma hin usa nga dokumento nga nagsasalikway han ira relihiyon. Nagresulta ini ha dugang nga mga paghisgot, ngan gintikangan an pag-aram ha Biblia kaupod ha iya.

Pariho han katugbang ha ira ha siyahan nga siglo, inin ika-20 ka siglo nga maunungon nga mga martir maisugon nga nagtestigo nga hi Jehova an amo la totoo nga Dios, nga takos han aton marig-on nga pagtoo ngan pagkamaunungon.—Pahayag 4:11.

[Ginkuhaan han Retrato ha pahina 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives