Usa Ka ba Hadton Hinigugma han Dios?

“An kinarawat han akon mga sugo, ngan pagtitipigan ini, amo an nahigugma ha akon: ngan an nahigugma ha akon, hihigugmaon man han akon Amay.”—JUAN 14:21.

1, 2. (a) Paonan-o ipinakita ni Jehova an iya gugma ha katawohan? (b) Ano an gintikangan ni Jesus ha gab-i han Nisan 14, 33 K.P.?

 HINIGUGMA ni Jehova an iya tawhanon nga linarang. Ha pagkamatuod, hinigugma gud niya an kalibotan han katawohan “nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Samtang nagtitikahirani an pagsaurog han Memoryal han kamatayon ni Kristo, an totoo nga mga Kristiano sadang magin mas mahunahunaon gud yana nga hi Jehova ‘naghigugma ha aton ngan iya sinugo an iya Anak nga magin halad para ha aton mga sala.’—1 Juan 4:10.

² Ha gab-i han Nisan 14, 33 K.P., hi Jesus ngan an iya 12 nga apostol nagkatirok ha iruigbaw nga kuwarto ha Jerusalem ha pagsaurog han Paskua, ha paghinumdom han kaluwasan han mga Israelita tikang ha Ehipto. (Mateo 26:17-20) Katapos han pagsaurog hini nga piyesta han mga Judio, ginpagawas ni Jesus hi Judas Iskariote ngan gintikangan an diri-hingangalimtan nga panihapon nga magigin an Kristiano nga Memoryal han kamatayon ni Kristo. a Ginagamit an waray-ipaturubo nga tinapay ngan pula nga alaksiw sugad nga mga emblema, o mga simbolo, han iya pisikal nga lawas ngan dugo, urosa nga ginpakaon ni Jesus an nahibilin nga 11 nga apostol hini nga panihapon. An mga detalye kon paonan-o hiya nagpadayon iginsasaysay han nagkakauruyon nga mga parasurat han Mga Ebanghelyo nga hi Mateo, Markos, ngan Lukas ngan ni apostol Pablo, nga nagtawag hito nga “an panihapon han Ginoo.”—1 Korinto 11:20; Mateo 26:26-28; Markos 14:22-25; Lukas 22:19, 20.

 3. Ha ano importante nga mga paagi nga an asoy ni Juan mahitungod han kataposan nga mga oras ni Jesus upod an iya mga disipulo ha iruigbaw nga kuwarto naiiba ha iba?

³ Makapainteres, waray mag-unabi hi apostol Juan mahitungod han pagpasa han tinapay ngan han alaksiw, bangin tungod kay ha panahon nga iya iginsurat an asoy han iya Ebanghelyo (mga 98 K.P.), ginbubuhat na ito han siyahan nga mga Kristiano. (1 Korinto 11:23-26) Kondi, pinaagi han giya han Dios, hi Juan la an naghatag ha aton hin pipira nga importante nga impormasyon mahitungod han ginsiring ngan ginbuhat ni Jesus antes gud ngan katapos gud Niya tikangan an Memoryal han Iya kamatayon. Inin makaruruyag nga mga detalye iginsasaysay ha lima nga kapitulo han Ebanghelyo ni Juan. Matin-aw nga ipinapakita hini an klase hin mga indibiduwal nga hinigugma han Dios. Aton usisahon an Juan kapitulo 13 tubtob 17.

Mahibaro ha Susbaranan nga Gugma ni Jesus

 4. (a) Paonan-o pinabug-atan ni Juan an nangunguna nga tema han pakigkita ni Jesus ha iya mga disipulo han gintikangan niya an Memoryal? (b) Ano an usa nga importante nga hinungdan kon kay ano nga nahigugma hi Jehova kan Jesus?

⁴ Gugma an nangunguna nga tema ha bug-os hini nga mga kapitulo nga nagsasaysay han sagdon ni Jesus ha iya mga sumurunod antes hiya bumaya. Ha pagkamatuod, magkalainlain nga porma han pulong nga “gugma” an makikita didto hin 31 ka beses. An hilarom nga gugma ni Jesus ha iya Amay, hi Jehova, ngan ha iya mga disipulo makatirigamnan gud nga iginpapatin-aw dinhi hini nga mga kapitulo. An gugma ni Jesus kan Jehova nakikita tikang ha ngatanan nga asoy han Mga Ebanghelyo  mahitungod han iya kinabuhi, kondi hi Juan la an nagrekord nga hi Jesus matin-aw nga nagsiring: “Ako nahigugma ha Amay.” (Juan 14:31) Hi Jesus nagsiring liwat nga hi Jehova nahigugma ha iya ngan iginsaysay kon kay ano. Hiya nagsiring: “Sugad nga an Amay naghigugma gud ha akon, nahigugma man ako ha iyo; magpabilin kamo ha akon gugma. Kon iyo tipigan an akon mga sugo, kamo magpapabilin ha akon gugma; sugad gud han akon pagtipig han mga sugo han akon Amay, ngan ako napabilin ha iya gugma.” (Juan 15:9, 10) Oo, hinigugma ni Jehova an iya Anak tungod han iya bug-os nga pagsugot. Maopay gud nga leksyon para ha ngatanan nga mga sumurunod ni Jesu-Kristo!

 5. Paonan-o ipinakita ni Jesus an iya gugma ha iya mga disipulo?

⁵ An hilarom nga gugma ni Jesus ha iya mga sumurunod pinabubug-atan ha tinikangan gud han asoy ni Juan mahitungod han kataposan nga pakigkita ni Jesus ha iya mga apostol. Hi Juan nagsaysay: “Han waray pa an piyesta han pesach, hi Jesus maaram, nga an iya oras inabot na, nga hiya mabulag hini nga kalibotan ngadto ha Amay; kay ginhigugma niya an mga iya kalugaringon dinhi ha kalibotan, ginhigugma niya hira tubtob ha kataposan.” (Juan 13:1) Hiton diri-hingangalimtan nga gab-i, iya ipinakita ha ira an importante nga leksyon ha mahigugmaon nga pagserbi ha iba. Iya ginhugasan an ira mga tiil. Ini an kinaburut-on nga sadang buhaton unta han kada usa ha ira para kan Jesus ngan para ha ira kabugtoan, kondi waray nira buhata ito. Ginbuhat ni Jesus inin ubos nga buhat ngan katapos nagsiring ha iya mga disipulo: “Kon ako [bisan kon] an Ginoo, ngan an Magturutdo, nga [naghugas] han iyo mga tiil, kamo kinahanglan man, nga [maghugas] han mga tiil han usa kag usa. Kay akon kamo tinagan hin susbaranan nga sugad han akon ginbuhat, iyo man buhaton.” (Juan 13:14, 15) An totoo nga mga Kristiano sadang magin disidido ngan malipayon ha pagserbi ha ira kabugtoan.—Mateo 20:26, 27, footnote ha NW; Juan 13:17.

Sunda an Bag-o nga Sugo

6, 7. (a) Ano nga importante nga detalye an iginhatag ni Juan mahitungod han tinikangan han Memoryal? (b) Ano nga bag-o nga sugo an iginhatag ni Jesus ha iya mga disipulo, ngan ano an bag-o mahitungod hito?

⁶ An asoy ni Juan mahitungod han nahitabo ha iruigbaw nga kuwarto ha gab-i han Nisan 14 amo an usa la nga espisipiko nga nag-uunabi han paggawas ni Judas Iskariote. (Juan 13:21-30) Sumala han mga asoy han Mga Ebanghelyo iginpapasabot nga katapos la han paggawas hini nga traydor nga gintikangan ni Jesus an Memoryal han Iya kamatayon. Katapos, nakiistorya hiya hin maiha ha iya matinumanon nga mga apostol, gintagan hira hin pangataposan nga sagdon ngan mga instruksyon. Samtang nangangandam kita ha pagtambong ha Memoryal, sadang magin interesado gud kita ha ginsiring ni Jesus hiton nga okasyon, ngan labi na kay karuyag gud naton magin kaupod hadton hinigugma han Dios.

⁷ An siyahan gud nga instruksyon nga iginhatag ni Jesus ha iya mga disipulo katapos tikangan an Memoryal han iya kamatayon amo an usa ka butang nga bag-o. Hiya nagpahayag: “Ako nahatag ha iyo hin usa nga bag-o nga sugo, nga kamo maghigugmaay an usa kag usa; nga sugad gud han akon paghigugma ha iyo, kamo man maghigugmaay an usa kag usa. Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.” (Juan 13:34, 35) Ano an bag-o hini nga sugo? Ha urhi hiton nga gab-i, iginpatin-aw ni Jesus an mga butang, nasiring: “Ini amo an akon sugo, nga maghigugmaay kamo an usa kag usa sugad gud han akon paghigugma ha iyo. Waray darodaku nga gugma han tawo kay hini nga gugma nga an usa ka tawo, makakaghatag han iya kinabuhi tungod han iya mga kasangkayan.” (Juan 15:12, 13) An Mosaiko nga Balaud nagsugo ha mga Israelita nga ‘higugmaon an ira igkasi-tawo sugad ha ira kalugaringon.’ (Lebitiko 19:18) Kondi an sugo ni Jesus mas labaw pa. Kinahanglan higugmaon han mga Kristiano an usa kag usa sugad han paghigugma ni Kristo ha ira, magin disidido ha  pagsakripisyo han ira mga kinabuhi mismo para ha ira kabugtoan.

 8. (a) Ano an nahiuupod han nagsasakripisyo-ha-kalugaringon nga gugma? (b) Paonan-o ipinapakita han mga Saksi ni Jehova an nagsasakripisyo-ha-kalugaringon nga gugma yana nga panahon?

⁸ An Memoryal angayan nga panahon ha pag-usisa ha aton kalugaringon, sugad nga indibiduwal ngan sugad nga kongregasyon, basi makita kon tinuod nga may-ada kita hini nga pangirilal-an han totoo nga Kristianidad—an gugma nga sugad han kan Kristo. An sugad nga nagsasakripisyo-ha-kalugaringon nga gugma mahimo mangahulogan, ngan usahay nangangahulogan, nga mahimo ibutang ha peligro han usa nga Kristiano an iya kinabuhi imbes nga magtraydor ha iya kabugtoan. Kondi, kasagaran nga nag-uupod ito han aton pagin disidido ha pagsakripisyo han aton personal nga mga kaopayan basi buligan ngan serbihan an aton kabugtoan ngan an iba. Hi apostol Pablo usa ka maopay nga susbaranan hini. (2 Korinto 12:15; Filipos 2:17) Kilala an mga Saksi ni Jehova ha bug-os nga kalibotan tungod han ira nagsasakripisyo-ha-kalugaringon nga disposisyon, binubuligan an ira kabugtoan ngan an ira mga amyaw ngan nangangalimbasog ha pagsumat han kamatuoran han Biblia ha ira mga igkasi-tawo. b—Galasia 6:10.

An mga Relasyon nga Sadang Pabilhan

 9. Basi magpadayon an aton presyoso nga relasyon ha Dios ngan ha iya Anak, malipayon nga buhaton naton an ano?

⁹ Waray mas presyoso ha aton kay ha higugmaon ni Jehova ngan han iya Anak, hi Kristo Jesus. Kondi, basi magkaada ngan abaton ini nga gugma, kinahanglan may-ada kita pagbuhaton. Hiton kataposan nga gab-i nga kaupod an iya mga disipulo, hi Jesus nagsiring: “An kinarawat han akon mga sugo, ngan pagtitipigan ini, amo an nahigugma ha akon: ngan an nahigugma ha akon, hihigugmaon man han akon Amay, ngan akon hiya hihigugmaon, ngan ako ngahaw magpapahayag ha iya.” (Juan 14:21) Tungod kay pinabibilhan naton an aton relasyon ha Dios ngan ha iya Anak, malipayon nga nasugot kita ha ira mga sugo. Kaupod hini an bag-o nga sugo nga ipakita an nagsasakripisyo-ha-kalugaringon nga gugma ngan an iginsugo liwat ni Kristo katapos hiya banhawon nga ‘magsangyaw ha mga tawo ngan magpamatuod hin maopay,’ nangangalimbasog ha ‘paghimo hin mga disipulo’ hadton nakarawat han maopay nga sumat.—Buhat 10:42; Mateo 28:19, 20.

10. Ano nga presyoso nga mga relasyon an abrido para ha mga dinihogan ngan ha ‘iba nga mga karnero’?

¹⁰ Ha urhi hiton nga gab-i, ha pagbaton ha iginpakiana ha iya han matinumanon nga hi apostol Judas (Tadeo), hi Jesus nagsiring: “Bisan hin-o an nahigugma ha akon, iya pagtitipigan an akon pulong, ngan an akon Amay mahigugma ha iya, ngan kami makanhi ha iya, ngan mag-uukoy upod ha iya.” (Juan 14:22, 23) Bisan kon aanhi pa ha tuna, an dinihogan nga mga Kristiano, nga gintawag basi magmando upod ni Kristo ha langit, labi na nga may-ada duok nga relasyon kan Jehova ngan ha iya Anak. (Juan 15:15; 16:27; 17:22; Hebreo 3:1; 1 Juan 3:2, 24) Kondi an ira mga kaupod nga ‘iba nga mga karnero,’ nga an paglaom amo an mabuhi ha waray kataposan ha tuna, may-ada liwat presyoso nga relasyon ha ira “usa nga magbarantay,” hi Jesu-Kristo, ngan ha ira Dios, hi Jehova, kon pamatud-an nira nga masinugtanon hira.—Juan 10:16; Salmo 15:1-5; 25:14.

‘Diri Kamo Bahin han Kalibotan’

11. Ano nga seryoso nga pahamangno an iginhatag ni Jesus ha iya mga disipulo?

¹¹ Durante hinin kataposan nga katirok upod an  iya matinumanon nga mga disipulo antes hiya mamatay, iginhatag ni Jesus an seryoso nga pahamangno: Kon an usa ka tawo hinigugma han Dios, an kalibotan mapupungot ha iya. Hiya nagpahayag: “Kon an kalibotan nagdudumot ha iyo, maaram kamo nga hi ako gindumtan niya una pa ha iyo. Kon kamo kanan kalibotan, an kalibotan maghigugma unta han iya kalugaringon; kondi kay diri kamo kanan kalibotan, kondi ginpili ko kamo tikang ha kalibotan, tungod hini an kalibotan nagdudumot ha iyo. Panumdom kamo han pulong, nga akon iginyakan na ha iyo: An surugoon diri darodaku ha iya agaron. Kon ako ginbiling nira hin pagtimaraot amo man kamo pagbibilngon hin pagtimaraot. Kon ira gintipigan an akon pulong, pagtitipigan man an iyo.”—Juan 15:18-20.

12. (a) Kay ano nga ginpahamangnoan ni Jesus an iya mga disipulo nga an kalibotan mapupungot ha ira? (b) Ano an sadang pamalandungon han ngatanan samtang nagtitiarabot an Memoryal?

¹² Iginhatag ni Jesus ini nga pahamangno basi inin 11 nga apostol ngan an ngatanan totoo nga mga Kristiano katapos nira diri manluya ngan umundang tungod han kapungot han kalibotan. Hiya nagdugang: “Ini nga mga bagay iginyakan ko ha iyo, basi diri kamo makaagi hin katigayonan ha paghipakdol. Pagpapaguwaon kamo nira ha sinagoga; oo, an oras nagtitidaraon, nga an ngatanan nga magpatay ha iyo, maghuhunahuna, nga naghahatag hin pag-alagad ha Dios. Ngan ini nga mga bagay pagbubuhaton nira, kay hira diri nakilala ha Amay, bisan ha akon.” (Juan 16:1-3) An usa nga diksyonaryo han Biblia nagsasaysay nga an usa nga porma han berbo nga iginhubad dinhi nga ‘mahipakdol’ nangangahulogan hin “makahimo ha usa ka tawo nga magtikang ha diri-pagsarig ngan isalikway an usa nga sadang niya sarigan ngan sugton; makahimo nga bumulag.” Samtang nagtitikahirani an pagsaurog han Memoryal, sadang pamalandungon han ngatanan an kinabuhi han mga magtinumanon, ha naglabay ngan yana nga panahon, ngan subaron an ira susbaranan han karig-on ilarom han pagsari. Ayaw tuguti an pagkontra o pagtimaraot nga magin hinungdan han imo pagbulag kan Jehova ngan kan Jesus, kondi magin determinado nga sumarig ngan sumugot ha ira.

13. Ano an ginhangyo ni Jesus para ha iya mga sumurunod ha pag-ampo ha iya Amay?

¹³ Ha iya kataposan nga pag-ampo antes bumaya hiton iruigbaw nga kuwarto ha Jerusalem, hi Jesus nagsiring ha iya Amay: ‘Akon iginhatag ha ira an imo pulong, ngan an kalibotan nagdumot ha ira, kay hira diri kanan kalibotan, sugad gud nga ako diri man kanan kalibotan. Ako nag-aampo ha imo, nga diri mo hira kuhaon ha kalibotan, kondi nga imo hira pagtipigan tungod han maraot nga usa. Diri hira kanan kalibotan, sugad nga diri man ako kanan kalibotan.’ (Juan 17:14-16) Sigurado kita nga hi Jehova nagbabantay hadton iya hinigugma, ha pagparig-on ha ira samtang nagpapabilin hira nga bulag tikang ha kalibotan.—Isaias 40:29-31.

Magpabilin ha Gugma han Amay Ngan ha Gugma han Anak

14, 15. (a) Iginpariho ni Jesus an iya kalugaringon ha ano, kabaliktaran han ano nga ‘maraot nga puno han ubas’? (b) Hin-o an “mga sanga” han “matuod nga puno han ubas”?

¹⁴ Durante han iya duok nga pakiistorya ha iya matinumanon nga mga disipulo ha gab-i han Nisan 14, iginpariho ni Jesus an iya kalugaringon ha “matuod nga puno han ubas,” kabaliktaran ha ‘maraot nga puno han ubas’ han diri-matinumanon nga Israel. Hiya nagsiring: “Ako an matuod nga puno han ubas, ngan an akon Amay amo an parauma.” (Juan 15:1) Mga siglo antes hito, iginsurat ni propeta Jeremias ini nga mga pulong ni Jehova  ha iya diri-matinumanon nga katawohan: “Akon ka gintanom nga balagon han ubas nga hamili . . . Naonan-o man nga ikaw nahimo para ha akon nga nagtitikaraot nga mga sanga han lain nga balagon han ubas?” (Jeremias 2:21) Ngan hi propeta Hosea nagsurat: ‘An Israel amo an maraot nga puno han ubas. Hiya padayon nga nahatag han iya bunga para ha iya kalugaringon. An ira kasingkasing nagin salingkapaw.’—Hosea 10:1, 2.

¹⁵ Imbes nga mamunga han mga bunga han totoo nga pagsingba, an Israel nahulog ha apostasya ngan namunga para ha iya kalugaringon. Tulo ka adlaw antes han iya kataposan nga pakigkita ha iya matinumanon nga mga disipulo, hi Jesus nagsiring ha salingkapaw nga mga Judio nga lider: “Ako nasiring ha iyo: An ginhadian han Dios kukuhaon ha iyo, ngan ihahatag ha usa nga nasud, nga mapabunga ha iya.” (Mateo 21:43) Ito nga bag-o nga nasud amo ‘an Israel han Dios,’ nga ginkukompuwesto han 144,000 nga dinihogan nga mga Kristiano, nga iginpariho ha “mga sanga” han “matuod nga puno han ubas,” hi Kristo Jesus.—Galasia 6:16; Juan 15:5; Pahayag 14:1, 3.

16. Ano an iginsagda ni Jesus nga pagbuhaton han 11 nga matinumanon nga mga apostol, ngan ano an masisiring mahitungod han matinumanon nga nanhibilin hini nga panahon han kataposan?

¹⁶ Hi Jesus nagsiring ha 11 nga apostol nga kaupod niya ha iruigbaw nga kuwarto: “An ngatanan nga akon mga sanga, nga diri nabunga, iya kinuha; ngan an ngatanan nga nabunga, iya ginhahawanan, basi mamunga hin darodamu. Pabilin kamo ha akon, ngan hi ako ha iyo. Sugad han sanga nga diri nakakabunga ha iya la ngahaw, kon diri pumungot ha puno, sugad man kamo, kon diri magpabilin kamo ha akon.” (Juan 15:2, 4) Ipinapakita han moderno nga kasaysayan han katawohan ni Jehova nga an matinumanon nga nanhibilin han dinihogan nga mga Kristiano nagpapabilin nga kahiusa han ira Ulo, hi Kristo Jesus. (Efeso 5:23) Kinarawat nira an paglimpyo ngan pag-utod han mga sanga. (Malakias 3:2, 3) Tikang han 1919, namunga hira hin damu nga mga bunga han Ginhadian, siyahan an iba nga dinihogan nga mga Kristiano ngan, tikang han 1935, an nagtitikadamu nga ‘daku nga panon’ han mga kaupod.—Pahayag 7:9; Isaias 60:4, 8-11.

17, 18. (a) Ano nga mga pulong ni Jesus an nabulig ha mga dinihogan ngan ha iba nga mga karnero nga magpabilin ha gugma ni Jehova? (b) Paonan-o mabulig ha aton an pagtambong ha Memoryal?

¹⁷ Ha ngatanan nga dinihogan nga mga Kristiano ngan ha ira mga kaupod, an dugang nga mga pulong ni Jesus naaplikar: “Dida hini an akon Amay paghimayaon, nga kamo namumunga hin damu nga mga bunga; busa mahimo kamo nga akon mga tinon-an. Sugad nga an Amay naghigugma gud ha akon, nahigugma man ako ha iyo; magpabilin kamo ha akon gugma. Kon iyo tipigan an akon mga sugo, kamo magpapabilin ha akon gugma; sugad gud han akon pagtipig han mga sugo han akon Amay, ngan ako napabilin ha iya gugma.”—Juan 15:8-10.

¹⁸ Karuyag naton ngatanan nga magpabilin ha gugma han Dios, ngan nagpapagios ini ha aton nga magin mabungahon nga mga Kristiano. Ginbubuhat naton ini pinaagi han pagsalingabot han tagsa nga higayon nga isangyaw an “maopay nga sumat han ginhadian.” (Mateo 24:14) Nangangalimbasog liwat kita nga ipakita “an [mga] bunga han espiritu” ha aton personal nga kinabuhi. (Galasia 5:22, 23) An pagtambong ha Memoryal han kamatayon ni Kristo magpaparig-on han aton determinasyon nga buhaton ini, kay mapapahinumdom kita han daku nga gugma ha aton han Dios ngan ni Kristo.—2 Korinto 5:14, 15.

19. Ano nga dugang nga bulig an paghihisgotan ha masunod nga artikulo?

¹⁹ Katapos tikangan an Memoryal, nagsaad hi Jesus nga an iya Amay magpapadara ha iya matinumanon nga mga sumurunod hin usa nga ‘parabulig, an baraan nga espiritu.’ (Juan 14:26) Paghihisgotan ha masunod nga artikulo kon paonan-o nabulig ini nga espiritu ha mga dinihogan ngan ha iba nga mga karnero nga magpabilin ha gugma ni Jehova.

[Mga footnote]

Mga Pakiana ha Repaso

• Ano nga praktikal nga leksyon ha mahigugmaon nga pagserbi ha iba an iginpakita ni Jesus ha iya mga disipulo?

• May kalabotan han ano nga an Memoryal angayan nga panahon para ha pag-usisa-ha-kalugaringon?

• Kay ano nga diri kita sadang mahipakdol ha pahamangno ni Jesus mahitungod han kapungot ngan pagtimaraot han kalibotan?

• Hin-o “an matuod nga puno han ubas”? Hin-o “an mga sanga,” ngan ano an ginlalaoman ha ira?

[Mga Pakiana]

[Retrato ha pahina 15]

Iginhatag ni Jesus ha iya mga apostol an diri-hingangalimtan nga leksyon ha mahigugmaon nga pagserbi ha iba

[Mga Retrato ha pahina 16, 17]

An mga disipulo ni Kristo nasugot ha iya sugo nga ipakita an nagsasakripisyo-ha-kalugaringon nga gugma