Usa nga Siyudad ha Bawbaw han Bukid

“KAMO amo an kalamrag han kalibotan. An bungto nga nahimutang ha bawbaw han bukid diri matatago,” siring ni Jesus ha iya mga disipulo ha iya bantogan nga Sermon ha Bukid.—Mateo 5:14.

Damu nga mga bungto han Judea ngan Galilea an nahimutang ha mga bukid imbes nga ha mga walog ha ubos. An pinakaimportante nga hinungdan ha pagpili hin lugar ha igbaw han bungtod amo an katalwasan. Gawas han nananakop nga kasundalohan, an mga panon han mga bandido inatake hadto ha mga urukyan han mga Israelita. (2 Hadi 5:2; 24:2) Mas masayon depensahan han determinado nga mga tuminungnong an magkahigrani gud nga mga balay ha bawbaw han bukid kay ha ubos nga bungto, nga nagkinahanglan hin darodaku nga kuta sugad nga panalipod.

Tungod kay an mga pader han mga balay han mga Judio agsob nga ginpalitadahan hin apog, an bug-os nga rumbay hinin ginpabusag nga kabalayan nga nagsusuruok ha igbaw han bungtod masayon makita bisan ha minilya nga kahirayo. (Buhat 23:3) Ha masilaw nga sirak han adlaw ha Palestina, ini nga mga bungto ha bungtod naranggat sugad hin parola, pariho gud ha mga bungto ha Mediteranyo ha aton panahon.

Ginamit ni Jesus inin makatirigamnan nga bahin han mga barangay han Galilea ngan Judea ha pagtutdo ha iya mga sumurunod han responsabilidad han usa ka totoo nga Kristiano. “Sugad man hini iglawag niyo an iyo mga suga ha atubangan han mga tawo,” hiya nagsiring ha ira, “basi hira kumita han iyo mga mag-opay nga buhat, ngan maghimaya hira ha iyo Amay nga aadto ha langit.” (Mateo 5:16) Bisan kon an mga Kristiano nagbubuhat hin mag-opay nga mga butang diri basi dayawon han mga tawo, naoobserbahan la gihapon an ira maopay nga batasan.—Mateo 6:1.

An sugad nga maopay nga batasan labi na nga naoobserbahan durante han distrito nga mga kombensyon han mga Saksi ni Jehova. Usa nga pahayagan ha Espanya, nga nag-uunabi ha usa nga bag-o la nga kombensyon, an nagreport: “Samtang nagtitikawara an interes ha relihiyoso nga mga topiko ha iba nga mga relihiyon, diri ini an kahimtang han mga Saksi ni Jehova. Tungod kay diri nira karuyag nga mawara an bili han Biblia, ira igin-aaplikar an Pulong han Dios.”

Hi Thomas, an nag-aataman han estadyum ha norte-weste nga bahin han Espanya nga regular nga ginagamit han mga Saksi, nalipay ha pagin kaupod ha mga tawo nga nag-aaplikar han Pulong han Dios. Iya ginlangan an iya pagretiro ha sulod hin pipira ka semana basi makatambong hiya ha usa nga distrito nga kombensyon han mga Saksi ni Jehova. Han dinaop ha iya an damu nga mga delegado, upod na an mga batan-on, katapos han kombensyon ha pagpasalamat ha iya tungod han iya kooperasyon durante han naglabay nga mga tuig ngan ha pagpahayag hin mag-opay nga mga paghandom para han iya pagretiro, nagtangis hiya. “An pagkilala ha iyo amo an usa han gimaopayi nga mga eksperyensya ha akon kinabuhi,” siring niya.

An usa nga siyudad ha bawbaw han bukid nakakakuha han atensyon han magkirita tungod kay nakikita ito ha sidsid han kawanangan ngan tungod kay an bisan ano nga busag nga kabalayan dida hito nagpapasanag han kahayag han adlaw. Ha pariho nga paagi, an totoo nga mga Kristiano nakikita nga naiiba tungod kay nangangalimbasog hira ha pagsunod han hitaas nga mga suruklan han Kasuratan ha pagkatangkod, moralidad, ngan pagpaid.

Dugang pa, iginpapasanag han mga Kristiano an kalamrag han kamatuoran pinaagi han ira pagsangyaw nga buruhaton. Hi apostol Pablo nagsiring mahitungod han siyahan-siglo nga mga Kristiano: “Tungod nga nakarawat namon ini nga pagkaministro sugad nga nakarawat namon in kalooy, diri kami manluya . . . kondi pinaagi ha pagpahayag han kamatuoran, nga gindayaw kami  ngahaw ha konsensya han tagsatagsa ka tawo ha atubangan han Dios.” (2 Korinto 4:1, 2) Bisan kon naatubang hira hin pagkontra diin man hira nagsangyaw, ginbendisyonan ni Jehova an ira ministeryo, salit han mga tuig 60 K.P., nakagsurat hi Pablo nga an maopay nga sumat iginsasangyaw na “ha ngatanan nga mga binuhat ha ilarom han langit.”—Kolosas 1:23.

Yana nga panahon, an mga Saksi ni Jehova seryoso liwat ha ira responsabilidad ha ‘pagpasanag han ira kalamrag ha atubangan han mga tawo,’ sugad han iginsugo ni Jesus. Pinaagi han pakiistorya ngan han iginpublikar nga barasahon, iginpapasarang han mga Saksi ni Jehova an maopay nga sumat han Ginhadian ha 235 nga nasud ha bug-os nga kalibotan. Basi an kalamrag han kamatuoran han Biblia makaabot ha damu nga mga tawo kon posible, ira ginhihimo an ira mga publikasyon mahitungod ha Biblia nga magagamit ha mga 370 nga yinaknan.—Mateo 24:14; Pahayag 14:6, 7.

Ha damu nga mga lugar, kinakarawat han mga Saksi an ayat ha paghibaro han mga yinaknan han mga tawo nga binalhin tikang ha mga nasud diin igindidiri o ginpugngan an pagsangyaw nga buruhaton. Pananglitan, ha pipira nga darodagku nga mga siyudad ha Amerika del Norte, damu an mga dayo tikang ha Tsina ngan Russia. An mga Saksi dida hito nga mga lugar nangalimbasog ha pag-aram han Inintsik, Ruso, ngan iba nga mga yinaknan basi maisangyaw an maopay nga sumat ha bag-o nga mga naabot. Ha pagkamatuod, gindudumara an ginpadagmit nga mga kurso ha damu nga mga yinaknan basi an maopay nga sumat maisangyaw ngadto ha iba pa samtang an kanataran ‘mabusag para ha pag-ani.’—Juan 4:35.

Hi propeta Isaias nagtagna: “Mahinanabo ha urhi nga mga adlaw, nga an bukid han balay ni Jehova pagtitindugon dida ha igbaw han kabukiran, ngan pagpapahitas-on labaw han kabungturan; ngan an ngatanan nga nasud maawas ngada hini.” Pinaagi han ira pamatasan ngan ministeryo, binubuligan han mga Saksi ni Jehova an mga tawo ha bisan diin nga kumadto ha “bukid han balay ni Jehova” basi matutdoan mahitungod han mga paagi han Dios ngan mahibaro ha paglakat ha dalan han Dios. (Isaias 2:2, 3) An makalilipay nga resulta amo nga, sugad han siring ni Jesus, urosa hira nga ‘naghihimaya ha ira langitnon nga Amay,’ hi Jehova nga Dios.—Mateo 5:16; 1 Pedro 2:12.