Kapitulo Disiotso

Mga Leksyon Mahitungod han Pagkadiri-matinumanon

Isaias 22:1-25

 1. Ano an posible magin kahimtang ha sulod han kadaan nga siyudad nga ginlilikosan?

 HANDURAWA an kahimtang kon aada ka ha kadaan nga siyudad nga ginlilikosan. Ha gawas han mga pader aadto an kaaway—makusog ngan waray-kalooy. Maaram ka nga an iba nga mga siyudad napukan na niya. Yana determinado hiya nga sakupon ngan tikasan an imo siyudad ngan panluguson ngan pamatayon an mga umurukoy hito. An kaaway nga kasundalohan gamhanan hinduro ha direkta nga pakig-away; naglalaom ka na la nga an mga pader han siyudad magpupugong ha ira ha pagsulod. Samtang nagkikita ka ha bawbaw han mga pader, nakikita mo an mga torre ha paglikos nga dara han kaaway. May-ada liwat hira mga makina nga makakahimo paglabog hin dagku nga mga bato nga magbubungkag han imo mga depensa. Nakikita mo liwat an ira dagku nga troso nga panbunggo han mga pader ngan mga hagdan, an ira mga parapamana ngan mga karomata, an ira damu hinduro nga kasundalohan. Makaharadlok gud nga kiritaon!

 2. Kakan-o nahitabo an paglikos nga iginhulagway ha Isaias kapitulo 22?

² Ha Isaias kapitulo 22, aton mababasa an mahitungod han sugad nga paglikos—an paglikos kontra han Jerusalem. Kakan-o ito nahitabo? Makuri unabihon an usa nga paglikos nga didto natuman an ngatanan nga mga hitabo nga iginhulagway. Matin-aw, an tagna masasabtan hin maopay sugad nga kabug-osan nga paghulagway ha magkalainlain nga mga paglikos nga mahitatabo ha Jerusalem, an kabug-osan nga pahamangno han mahitatabo ha tidaraon.

 3. Paonan-o nagios an mga umurukoy ha Jerusalem ha paglikos nga iginhulagway ni Isaias?

³ Ha atubangan han paglikos nga iginhulagway ni Isaias, ano an ginbubuhat han mga umurukoy ha Jerusalem? Sugad nga may-kauyonan nga katawohan han Dios, nakikimalooy ba hira kan Jehova basi luwason hira? Diri, hira nagpapakita hin diri-maaramon nga paggios, sugad han makikita yana nga panahon ha damu nga nag-aangkon nga nagsisingba ha Dios.

Usa nga Siyudad nga Ginlilikosan

 4. (a) Ano ‘an walog han bisyon,’ ngan kay ano nga may-ada ito hini nga ngaran? (b) Ano an espirituwal nga kahimtang han mga umurukoy ha Jerusalem?

⁴ Ha kapitulo 21 han Isaias, an kada usa han tulo nga mensahe han paghukom gintikangan ha mga pulong nga ‘An kapahayagan.’ (Isaias 21:1, 11, 13) An Isa kapitulo 22 nagtitikang ha pariho nga paagi: ‘An kapahayagan han walog han bisyon: Ano an nahitabo ha imo, yana, nga nahingadto ka ha kabug-osan ha mga atop han balay?’ (Isaias 22:1) ‘An walog han bisyon’ nagtutudlok ha Jerusalem. An siyudad tinatawag nga walog tungod kay bisan kon hitaas ito, ginpapalibotan ito hin mas higtaas nga kabukiran. Iginkakaw-ing ito ha “bisyon” tungod kay damu nga mga bisyon ngan mga pahayag tikang ha Dios an iginhatag didto. Tungod hini, an mga umurukoy ha siyudad sadang mamati ha mga pulong ni Jehova. Lugod, ira ginbalewaray hiya ngan sinimang ngadto ha palso nga pagsingba. An kaaway nga naglilikos ha siyudad usa nga instrumento han paghukom han Dios kontra han iya masukihon nga katawohan.—Deuteronomio 28:45, 49, 50, 52.

 5. Kay ano nga nasaka an mga tawo ngadto ha ira mga atop?

⁵ Tigamni nga an mga umurukoy ha Jerusalem ‘nahingadto ha kabug-osan ha mga atop’ han ira mga balay. Ha kadaan nga mga panahon, an mga atop han kabalayan han mga Israelita mga patag ngan an mga pamilya agsob nga nagkakatirok didto. Waray isumat ni Isaias kon kay ano nga ginbubuhat nira ito hini nga okasyon, kondi an iya mga pulong nagpapasabot hin diri-pag-uyon. Posible, kon sugad, nga bangin nasaka hira ha mga atop basi manginyupo ha ira palso nga mga dios. Ini an ira nabatasan ha mga katuigan antes umabot an kabungkagan han Jerusalem han 607 A.K.P.—Jeremias 19:13; Sepania 1:5.

 6. (a) Ano nga mga kahimtang an nahitatabo ha sulod han Jerusalem? (b) Kay ano nga an iba nagrarayhak, kondi ano an mahitatabo ha tidaraon?

⁶ Hi Isaias nagpapadayon: “O ikaw nga puno hin mga singgit, bungto nga marimukon, bungto nga malipayon: an imo mga patay waray pamataya han kampilan, waray man hira magkamatay ha away.” (Isaias 22:2) An damu nga mga tawo nagkatirok ha siyudad, ngan nagin masamok ito. An katawohan ha mga kalsada maaringasa ngan nagkakahadlok. Kondi, an iba nagrarayhak, bangin tungod kay inaabat nira nga talwas hira o natoo hira nga matatapos an peligro. a Kondi, kalurongan an pagrayhak hini nga panahon. Damu ha siyudad an mamamatay ha paagi nga mas mabangis kay ha tarom han kampilan. An siyudad nga ginlilikosan diri na nakakakuha hin pagkaon tikang ha gawas. Nagtitikaubos an gintirok nga pagkaon ha sulod han siyudad. An nagugutom nga mga tawo ngan an masuok nga mga kahimtang nagigin hinungdan han mga sakit. Salit damu ha Jerusalem an mamamatay  ha gutom ngan sakit. Nahitabo ini han 607 A.K.P. ngan han 70 K.P.—2 Hadi 25:3; Pagtangis 4:9, 10. b

 7. Ano an ginbuhat han mga magmarando ha Jerusalem durante han paglikos, ngan ano an nahitabo ha ira?

⁷ Hini nga krisis, ano nga klase hin pagpanguna an ginhimo han mga magmarando ha Jerusalem? Hi Isaias nabaton: “Ngatanan [han] imo mga punoan namalagiw, hira pinan-gapos han mga parapamana; an ngatanan nga hin-agian dida ha imo pinan-gapos; hira namalagiw ha hirayo.” (Isaias 22:3) An mga magmarando ngan an gamhanan nga kalalakin-an namalagiw ngan katapos gindakop! Bisan kon waray usa man nga pana nga ginbaliko kontra ha ira, nadakop hira ngan gindara nga mga priso. Nahitabo ini han 607 A.K.P. Katapos buhoan an pader han Jerusalem, pinalagiw hi Hadi Sedekia ha gab-i upod an iya gamhanan nga kalalakin-an. Hinbaroan ini han mga kaaway, ginlanat hira, ngan nadakop hira ha kapatagan han Jeriko. Nagpatlaag an gamhanan nga kalalakin-an. Gindakop hi Sedekia, ginbuta, gin-gapos hin tumbaga nga mga kadena, ngan gindara ngadto ha Babilonya. (2 Hadi 25:2-7) Makalolooy gud nga resulta tungod han iya pagkadiri-matinumanon!

Nasubo Tungod han Kalamidad

 8. (a) Paonan-o ginios hi Isaias ha igintagna nga kalamidad nga maabot ha Jerusalem? (b) Ano an magigin kahimtang ha Jerusalem?

⁸ Ini nga tagna nakapasubo gud kan Isaias. Hiya nasiring: “Tan-aw ha hirayo tikang ha akon, ako magtatangis ha mapait gud; ayaw pagkinabudlay paglipay ha akon tungod han pagkagunaw han anak nga babaye han akon katawohan.” (Isaias 22:4) Nasubo hi Isaias ha igintagna nga mahitatabo ha Moab ngan Babilonya. (Isaias 16:11; 21:3) Yana an iya kasubo ngan kabido mas duro pa gud samtang pinamamalandong niya an kalamidad nga maabot ha iya katawohan. Diri na hiya maliliaw pa. Kay ano? “Kay ini amo an adlaw ha pagkasaramok, ngan ha pagtamak, ngan ha kagupong, tikang ha Ginoo nga hi Jehova han mga kasundalohan, dida ha walog han bisyon; an pagtimpag han mga kuta, ngan an pagsinggit ha kabukiran.” (Isaias 22:5) An Jerusalem mapupuno hin daku nga kasamok. An katawohan magpapatlaag tungod han kalisang, nga diri maaram kon ano an bubuhaton. Samtang nagtitikang an kaaway ha pagbuho ha mga pader han siyudad, magkakaada hin “pagsinggit ha kabukiran.” Nangangahulogan ba ini nga an mga umurukoy ha siyudad magsisinggit ngadto ha Dios ha iya baraan nga templo ha Bukid han Moria? Bangin. Kondi, tungod han ira pagkadiri-matinumanon, posible nga nangangahulogan la ito nga an ira mga pagsinggit hin kahadlok malanog ha nakapalibot nga kabukiran.

 9. Ihulagway an kasundalohan nga nagtatarhog ha Jerusalem.

⁹ Ano nga klase hin kaaway an nagtatarhog ha Jerusalem? Hi Isaias nagsusumat ha aton: “An Elam nagdara han surudlan han mga udyong, lakip an mga karomata han mga tawo ngan an mga kakabayohan; ngan binuksan ni Kir an taming.” (Isaias 22:6) An mga kaaway bug-os nga armado. May-ada hira mga parapamana nga an mga surudlan puno hin mga udyong. Igin-aandam na han mga girriro an ira mga taming ha pakig-away. May-ada mga karomata ngan binansay-ha-pakig-away nga kakabayohan. Kaupod ha kasundalohan an mga sundalo tikang ha Elam, ha norte han tinatawag yana nga Gulpo han Persia, ngan tikang ha Kir, nga bangin hirani ha Elam. An pag-unabi hiton nga mga nasud nagpapasabot nga hirayo hinduro an gintikangan han mga mananakop. Nagpapasabot liwat ito nga an Elamita nga mga parapamana posible nga kaupod han kasundalohan nga nagtatarhog ha Jerusalem ha panahon ni Hesekia.

Mga Pangalimbasog ha Pagdepensa

10. Ano nga mga hitabo an nagpapasabot hin maraot para ha siyudad?

¹⁰ Iginhuhulagway ni Isaias an nahitatabo: “Mahinanabo, nga an imo gimamahali nga mga walog nga puno han karomata ha pakig-away, ngan an mga kakabayohan nanagrungbay dida ha ganghaan. Ngan iya kinuha an nakakatabon han Juda.” (Isaias 22:7, 8a) An kapatagan ha gawas han siyudad han Jerusalem napuno han mga karomata ngan kakabayohan ngan nakapuwesto basi atakehon an mga ganghaan han siyudad. Ano “an nakakatabon han Juda” nga ginkuha? Posible nga amo an ganghaan han siyudad, nga an kaguba hito nagpapasabot hin maraot para ha mga paradepensa. c Kon makuha na inin nagpapanalipod nga tabon, masayon na makasulod ha siyudad an mga naatake hito.

11, 12. Ano nga mga paagi han pagdepensa an ginbuhat han mga umurukoy ha Jerusalem?

¹¹ Iginsisentro ni Isaias yana an atensyon ha mga pangalimbasog han katawohan nga depensahan an ira kalugaringon. An siyahan nga ira nahunahuna—mga armas! “Ikaw nagtan-aw hadto nga adlaw ngada ha kutamaya dida ha balay han kagurangan. Ngan iyo hinkit-an an mga kaluhoan han bungto ni David, nga hira damu; ngan iyo gintirok an mga tubig han libaong ha ubos.” (Isaias 22:8b, 9) An mga armas gintirok ha tagoan han mga armas ha balay han kagurangan. Ini nga tagoan han mga armas gintukod ni Salomon. Tungod kay mga sedro han Lebanon an ginamit ha pagtukod hito, nakilala ito sugad nga an “Balay han Kagurangan han Lebanon.” (1 Hadi 7:2-5) Gin-usisa an mga buho ha pader. Gintirok an tubig—an importante nga paagi han depensa. Ginkikinahanglan han mga tawo an tubig basi mabuhi. Kon waray hito, diri makakatindog an usa nga siyudad. Kondi, tigamni nga waray ginsiring nga hira naglaom kan Jehova para han kaluwasan. Lugod, sinarig hira ha ira kalugaringon nga mga paagi. Hinaot diri gud kita magsayop hin sugad hito!—Salmo 127:1.

¹² Ano an mahihimo ha mga buho ha pader han siyudad? “Iyo gin-ihap an mga balay ha Jerusalem, ngan iyo pinan-guba an mga balay ha pagparig-on han kuta.” (Isaias 22:10) Gin-uusisa an mga balay basi makita kon hain hito an mahimo gubaon basi gamiton nga materyales ha pag-ayad ha mga buho. Usa nga pangalimbasog ini basi mapugngan an kaaway ha pagkaada bug-os nga kontrol ha pader.

 An Katawohan nga Waray Pagtoo

13. Paonan-o nangalimbasog an katawohan ha pagsiguro han suplay han tubig, kondi hin-o an ira hinngalimtan?

¹³ “Iyo liwat ginhimo an tangke ha lugar nga ginbubutnga han duha nga kuta para han tubig han daan nga libaong. Kondi waray kamo magtan-aw ha iya nga nagbuhat hini, waray man kamo magtahod ha iya nga nagtinguha hini hadton maiha na nga panahon.” (Isaias 22:11) An mga pangalimbasog ha pagtirok hin tubig, nga iginsaysay dinhi ngan ha Isa 22 bersikulo 9, nagpapahinumdom ha aton han ginbuhat ni Hadi Hesekia ha pagpanalipod ha siyudad kontra han nananakop nga mga Asiryahanon. (2 Kronikas 32:2-5) Kondi an katawohan ha siyudad hini nga tagna ni Isaias bug-os nga waray pagtoo. Samtang nagbubuhat hira ha pagdepensa ha siyudad, waray hira maghunahuna ha Maglalarang, diri sugad kan Hesekia.

14. Bisan pa han nagpapahamangno nga mensahe ni Jehova, ano an diri-maaramon nga paggios han katawohan?

¹⁴ Hi Isaias nagpapadayon: “Hadto nga adlaw an Ginoo, hi Jehova han mga kasundalohan, nagtawag ha pagtangis, ngan ha pagmasurub-on, ngan ha pagkadangas, ngan ha pag-alibod hin panapton nga sako: Ngan, kitaa, an kahimongaya ngan an kalipay, an pangihaw hin mga baka nga lalaki ngan an pagpatay hin mga karnero, an pangaon han unod ngan an pag-irignom han alaksiw: pangaon kita ngan panginom, kay buwas kita mapatay.” (Isaias 22:12, 13) An mga umurukoy ha Jerusalem waray magbasol ha ira pagrebelde patok kan Jehova. Hira waray magtangis, mag-arot han ira buhok, o magsul-ot hin panapton nga sako sugad nga tigaman han pagbasol. Kon ginbuhat nira unta ito, posible nga luluwason hira ni Jehova ha inabot nga mga kagol-anan. Lugod, nagpatagbaw hira ha kalipay ha unod. Sugad liwat hito an paggios yana nga panahon han damu nga waray pagtoo ha Dios. Tungod kay waray hira paglaom—ha pagkabanhaw man tikang ha mga patay o kinabuhi ha tidaraon nga Paraiso nga tuna—nagkikinabuhi hira ha pagpatagbaw han ira kalugaringon, nasiring: “Pangaon ngan panginom kita, kay buwas kita mapatay.” (1 Korinto 15:32) Pagkahalipot nga panlantaw! Kon masarig la unta hira kan Jehova, magkakaada hira nagpapadayon nga paglaom!—Salmo 4:6-8; Proberbios 1:33.

15. (a) Ano an mensahe han paghukom ni Jehova kontra han Jerusalem, ngan hin-o an magpapadapat han iya paghukom? (b) Kay ano nga mag-aantos an Kakristianohan hin pariho han dinangat ha Jerusalem?

¹⁵ An ginlilikosan nga mga umurukoy ha Jerusalem diri magkakaada hin seguridad. Hi Isaias nasiring: “Hi Jehova han mga kasundalohan nagsamwak ha iya ngahaw dida ha akon mga talinga: Ha waray ruhaduha ini nga karat-an diri igpapasaylo ha iyo ngada nga kamo magkamatay, nasiring an Ginoo, hi Jehova han mga kasundalohan.” (Isaias 22:14) Tungod han katig-a han kasingkasing han katawohan, diri magkakaada hin pagpasaylo. Waray ruhaduha, maabot an kamatayon. Sigurado ini. An Soberano nga Ginoo, hi Jehova han mga kasundalohan, an nagsiring hito. Ha katumanan han matagnaon nga mga pulong ni Isaias, duha ka beses nga inabot an kalamidad ha diri-matinumanon nga Jerusalem. Ginbungkag ito han mga kasundalohan han Babilonya ngan ha urhi hadton han Roma. Sugad man, maabot an kalamidad ha diri-matinumanon nga Kakristianohan, nga an mga membro nag-aangkon nga nagsisingba ha Dios kondi nagsasalikway ha iya pinaagi han ira mga buhat. (Tito 1:16) An mga sala han Kakristianohan, upod na an iba nga mga relihiyon han kalibotan nga nagtatamay han matadong nga mga paagi han Dios, “inabot bisan ngadto ha langit.” Pariho han sayop han apostata nga Jerusalem, an ira sayop daku hinduro nga diri na matutubos.—Pahayag 18:5, 8, 21.

Usa nga Hakog nga Tinaporan

16, 17. (a) Hin-o yana an nakarawat hin nagpapahamangno nga mensahe tikang kan Jehova, ngan kay ano? (b) Tungod han iya hitaas nga mga ambisyon, ano an mahitatabo kan Sebna?

¹⁶ Iginbirik yana han propeta an iya atensyon tikang ha diri-matinumanon nga katawohan ngadto ha diri-matinumanon nga indibiduwal. Hi Isaias nagsurat: “Ha sugad hini nasiring an Ginoo, hi Jehova han mga kasundalohan: Lakat, kumadto ka hini nga [tinaporan], bisan ngadto kan Sebna, nga naglalarang han balay, ngan siring: Nag-aano ka dinhi? Ngan hin-o an imo dinhi, ngan ikaw nagsasapsap para ha imo hin lubnganan dinhi? Nagsinapsapon para ha iya hin lubnganan didto ha sagka, nagkinutkuton hin usa nga puroy-anan para ha iya dida ha bato!”—Isaias 22:15, 16.

¹⁷ Hi Sebna an ‘tinaporan ha balay,’ posible nga ha balay ni Hadi Hesekia. Sugad nga tinaporan, may-ada hiya maimpluwensya nga katungdanan, ikaduha gud ha hadi. Daku an ginlalaoman ha iya. (1 Korinto 4:2) Kondi, imbes nga hatagan niya hin siyahan nga atensyon an mga buruhaton han nasud, namimiling hi Sebna hin himaya para ha iya kalugaringon. Nagpahimo hiya hin magarbo nga lubnganan—nga pariho han ha hadi—nga inukit para ha iya ha hitaas nga bato. Ha pakakita hini, giniyahan ni Jehova hi Isaias nga pahamangnoan an diri-matinumanon nga tinaporan: “Kitaa, hi Jehova, pariho hin usa nga tawo nga kusgan, malantay ha imo ha makusog; oo, iya ka paglilikiran hin suot. Ha waray ruhaduha iya ka iglalambuyog, ngan ipipilak ka pariho hin usa nga bola ngadto ha usa nga daku nga tuna; didto ka kamamatay, ngan maaadto didto an mga karomata han imo himaya, ikaw nga pakaalo han kanan imo agaron balay. Ngan akon ka ititikwang tikang ha imo buruhatan; ngan tikang ha imo hinmumutangan pagbubutungon ka tipaubos.” (Isaias 22:17-19) Tungod han iya pagin makikalugaringon, hi Sebna diri magkakaada hin bisan ordinaryo nga lubnganan ha Jerusalem. Lugod, iglalabog hiya pariho hin bola, basi mamatay ha hirayo nga tuna. Dinhi may-ada pahamangno ha ngatanan hadton gintaporan hin awtoridad ha katawohan han Dios. An pag-abuso han gahum madangat ha kawad-i hito nga awtoridad ngan posible nga pagpaiwas.

18. Hin-o an masaliwan kan Sebna, ngan ano an kahulogan nga ini nga usa makarawat han opisyal nga mga panapton ni Sebna ngan han yawi han balay ni David?

¹⁸ Kondi, paonan-o kukuhaon hi Sebna tikang ha iya katungdanan? Pinaagi kan Isaias, hi Jehova nagsasaysay: “Mahinanabo hadto nga adlaw, nga akon tatawagon an akon surugoon nga hi Eliakim an anak nga lalaki ni Hilkia: Ngan akon hiya pagpapanaptonan han imo bisti nga hilaba, ngan pagpapakusgon hiya pinaagi han imo bakos, ngan  akon ihahatag an imo kagamhanan ngadto ha iya kamot; ngan hiya maaamo an amay han mga umurukoy ha Jerusalem, ngan ha balay ni Juda. Ngan an yawi han balay ni David akon ibubutang dida ha iya sugbong; ngan hiya maabri ngan waray bisan hin-o nga masada; ngan hiya masada, ngan waray bisan hin-o nga maabri.” (Isaias 22:20-22) Sugad nga kasaliwan ni Sebna, ihahatag kan Eliakim an opisyal nga mga panapton han tinaporan upod na an yawi han balay ni David. Ginagamit han Biblia an termino nga “yawi” sugad nga simbolo han awtoridad, gobyerno, o gahum. (Itanding an Mateo 16:19.) Ha kadaan nga mga panahon, an magsaragdon han usa nga hadi, nga gintaporan han mga yawi, bangin may-ada kabug-osan nga pagmangno ha mga kuwarto han hadi, nagpipili pa ngani han mga kandidato para ha pagserbi ha hadi. (Itanding an Pahayag 3:7, 8.) Salit, importante an katungdanan han pagin tinaporan, ngan daku an ginlalaoman ha bisan hin-o nga nag-aalagad dida hito. (Lukas 12:48) Bangin may kapas hi Sebna, kondi tungod kay hiya diri-matinumanon, sasaliwnan hiya ni Jehova.

Duha nga Simboliko nga Raysang

19, 20. (a) Paonan-o pamamatud-an ni Eliakim nga bendisyon hiya ha iya katawohan? (b) Ano an mahitatabo hadton padayon nga nasarig kan Sebna?

¹⁹ Ha kataposan, ginamit ni Jehova an simboliko nga mga pulong basi ihulagway an pagbalhin han gahum tikang kan Sebna ngadto kan Eliakim. Hiya nasiring: “Akon hiya [hi Eliakim] itataruktok sugad hin usa nga raysang ha usa nga lugar nga marig-on; ngan hiya maaamo an para han trono han himaya han balay han iya amay. Ngan ira isasab-ong dida ha iya an ngatanan nga himaya han balay han iya amay, an saha ngan an tumos, an tagsa nga gudtiay nga surudlan, tikang ha mga tasa bisan ngadto ha ngatanan nga harra. Hadto nga adlaw, nasiring hi Jehova han mga kasundalohan, an raysang [hi Sebna] nga iginraysang ha lugar nga seguro mabawod; ngan ini pag-uutdon ngan mahuhulog; ngan an luran nga nakada hini paglalaglagon; kay hi Jehova nagyakan hini.”—Isaias 22:23-25.

²⁰ Hini nga mga bersikulo an siyahan nga raysang amo hi Eliakim. Hiya magigin “trono han himaya” han balay han iya amay, hi Hilkia. Diri sugad kan Sebna, diri niya papasiparahan an balay o reputasyon han iya amay. Hi Eliakim magigin nagpapadayon nga karig-onan ha mga surudlan han balay, nga amo an iba nga nagsiserbisyo ha hadi. (2 Timoteo 2:20, 21) Ha kabaliktaran, an ikaduha nga raysang amo hi Sebna. Bisan kon baga in marig-on hiya, kukuhaon hiya. Bisan hin-o nga padayon nga nasarig ha iya mahuhulog.

21. Ha moderno nga mga panahon, hin-o, pariho kan Sebna, an ginsaliwnan, kay ano, ngan hin-o an sinaliwan?

²¹ An eksperyensya ni Sebna nagpapahinumdom ha aton nga ha butnga hadton nag-aangkon nga nagsisingba ha Dios, adton nakarawat hin mga pribilehiyo han pag-alagad sadang gumamit hito ha pagserbi ha iba ngan ha paghatag hin kadayawan ngadto kan Jehova. Diri nira sadang abusuhon an ira katungdanan basi magpariko ha ira kalugaringon o magkaada personal nga kabantogan. Pananglitan, maiha na nga ginpapahitaas han Kakristianohan an iya kalugaringon sugad nga pinili nga tinaporan, an tunan-on nga representante ni Jesu-Kristo. Kondi, sugad la kan Sebna nga nagpasipara ha iya amay pinaagi han pamiling han iya kalugaringon nga himaya, an mga lider han Kakristianohan nagpapasipara ha Maglalarang pinaagi han pamiling hin mga bahandi ngan gahum para ha ira kalugaringon. Salit, han inabot an panahon han paghukom nga ‘gintikangan ha balay han Dios’ han 1918, ginkuha ni Jehova an Kakristianohan. Usa pa nga tinaporan an nakilala—‘an matinumanon nga tinaporan, an maaramon’—ngan pinili ha pagmangno han tunan-on nga panimalay ni Jesus. (1 Pedro 4:17; Lukas 12:42-44) Ipinapakita hinin grupo nga klase nga takos hira taporan han hadianon nga “yawi” han balay ni David. Pariho han masasarigan nga “raysang,” napamatud-an ito sugad nga masasarigan nga karig-onan para ha ngatanan magkalainlain nga mga “surudlan,” an dinihogan nga mga Kristiano nga may-ada magkalainlain nga mga responsabilidad nga naglalaom hito para han espirituwal nga pagkaon. An ‘iba nga mga karnero’ liwat, pariho han ‘dumuruong ha sulod han mga ganghaan’ han kadaan nga Jerusalem, nasarig hini nga “raysang,” an moderno nga Eliakim.—Juan 10:16; Deuteronomio 5:14.

22. (a) Kay ano nga napapanahon an pagsaliwani kan Sebna sugad nga tinaporan? (b) Ha moderno nga mga panahon, kay ano nga napapanahon an pagpili ha ‘matinumanon nga tinaporan, nga maaramon’?

²² Hi Eliakim an sinaliwan kan Sebna han gintatarhog ni Senakerib ngan han iya kasundalohan an Jerusalem. Ha pariho nga paagi, ‘an matinumanon nga tinaporan, nga maaramon,’ ginpili basi mag-alagad durante han panahon han kataposan, nga matatapos kon buhaton na ni Satanas ngan han iya mga puwersa an ultimo nga pag-atake ha ‘Israel han Dios’ ngan ha ira mga kaupod nga iba nga mga karnero. (Galasia 6:16) Sugad ha panahon ni Hesekia, iton nga pag-atake matatapos ha kabungkag han mga kaaway han pagkamatadong. Adton nasarig ha “raysang ha usa nga lugar nga marig-on,” an matinumanon nga tinaporan, maluluwas, sugad la han matinumanon nga mga umurukoy ha Jerusalem nga naluwas ha pag-atake han mga Asiryahanon ha Juda. Maaramon, kon sugad, nga diri sumarig ha palso nga “raysang” han Kakristianohan!

23. Ano ha kataposan an nahitabo kan Sebna, ngan ano an mahibabaroan naton tikang hini?

²³ Ano an nahitabo kan Sebna? Waray kita rekord mahitungod ha kon paonan-o natuman an tagna mahitungod ha iya, nga nahisurat ha Isaias 22:18. Han ginpahitaas niya an iya kalugaringon ngan katapos naalohan, nakapariho hiya ha Kakristianohan, kondi bangin nahibaro hiya tikang ha disiplina. Hini nga paagi, naiiba gud hiya ha Kakristianohan. Han iginsugo han Asiryahanon nga hi Rabsake nga magpasakop an Jerusalem, an bag-o nga tinaporan ni Hesekia, hi Eliakim, nanguna ha grupo nga ginawas ha pagtapo ha iya. Kondi, hi Sebna nakada ha iya sapit sugad nga sekretaryo han hadi. Matin-aw, hi Sebna nagsiserbi pa gihapon ha hadi. (Isaias 36:2, 22) Maopay gud nga leksyon para hadton nawad-an hin mga katungdanan ha pag-alagad ha organisasyon han Dios! Imbes nga mabido ngan masina, maaramon nga magpadayon hira ha pag-alagad kan Jehova ha anoman nga kapasidad nga igintutugot niya. (Hebreo 12:6) Ha pagbuhat hito, malilikyan nira an kalamidad nga mahitatabo ha Kakristianohan. Magpapahimulos hira han pag-uyon ngan bendisyon han Dios ha kadayonan.

[Mga footnote]

[Mga Pakiana]