Hi Jehova an Hadi
Usa nga Nanhibilin an ‘Magsisinggit hin Malipayon’
13, 14. (a) Ano an mga balaud ni Jehova ha pag-ani? (b) Paonan-o ginamit ni Isaias an mga balaud ha pag-ani ha pag-ilustrar nga an iba maluluwas ha paghukom ni Jehova? (c) Bisan kon maabot an makuri nga mga panahon han pagsari, makakasiguro han ano an matinumanon nga mga taga-Juda?
13 Basi makaani hin mga olibo, gin-uuy-og han mga Israelita an mga kahoy pinaagi han mga pudlos basi magkahulog an bunga hito. Sumala ha Balaud han Dios, igindidiri hira ha pagsaka ha mga sanga han mga kahoy ha pagtirok han nahibilin nga mga olibo. Diri liwat nira titirukon an nahibilin nga mga ubas katapos anihon an ira mga urubasan. An mga nahibilin han mga inani ibibilin para ha kablas—“para ha humarapit, ha ilo, ngan ha balo nga babaye”—nga mamumurot hito. (Deuteronomio 24:19-21) Tikang hinin kilala nga mga balaud, igin-iilustrar ni Isaias an nakakaliaw nga kamatuoran nga magkakaada mga matatalwas ha tiarabot nga paghukom ni Jehova: “Kay ha sugad hini maaamo ha butnga han tuna dida ha mga katawohan, sugad han pag-uy-og han kahoy nga olibo, sugad han mga panhiligad kon an panguha ha urubasan human na. Ini maalsa han ira tingog, hira maguliat; tungod han pagkaharangdon ni Jehova hira masinggit tikang ha dagat. Tungod hini paghimayaa niyo hi Jehova dida ha sinirangan, bisan han ngaran ni Jehova, an Dios ha Israel, dida ha mga poro han dagat. Tikang ha gihihirayoi nga bahin han tuna kami nakabati hin mga kanta: Himaya ha matadong.”—Isaias 24:13-16a.
14 Sugad la nga may-ada mga bunga nga nagpapabilin dida ha kahoy o balagon katapos han pag-ani, may-ada liwat mahibibilin katapos ipadapat ni Jehova an paghukom—‘an pamurot kon tapos na an pagtirok han ubas.’ Sugad han nahirekord ha Isa 24 bersikulo 6, gin-unabi na ini han propeta, nasiring nga ‘gutiay gud la nga mga tawo an nahibilin.’ Kondi, bisan kon gutiay la hira, may-ada maluluwas ha kabungkagan han Jerusalem ngan Juda, ngan ha urhi an nanhibilin mabalik tikang ha pagkabihag basi mag-ukoy utro ha tuna. (Isaias 4:2, 3; 14:1-5) Bisan kon an mga magtadong-an-kasingkasing makakaeksperyensya hin makuri nga mga panahon han pagsari, makakasiguro hira nga may-ada kaluwasan ngan kalipayan ha tidaraon. Makikita han mga maluluwas nga matutuman an matagnaon nga pulong ni Jehova ngan makakasabot hira nga hi Isaias nagin totoo nga propeta han Dios. Magmamalipayon hira samtang nakikita nira an katumanan han mga tagna han pagpahiuli. Diin man hira nagpatlaag—ha mga isla man han Mediteranyo ha Weste, ha Babilonya ha ‘rehiyon han kalamrag’ (an sinirangan, o Este), o ha bisan ano pa nga iba nga hirayo nga lugar—magdadayaw hira ha Dios tungod kay ginluwas hira, ngan hira magkakanta: “Himaya ha Matadong!”
Waray Makakapalagiw ha Paghukom ni Jehova
15, 16. Ano an inabat ni Isaias mahitungod han mahitatabo ha iya katawohan? (b) Ano an mahitatabo ha diri-matinumanon nga mga umurukoy ha tuna?
15 Kondi, an pagrayhak yana diri pa napapanahon. Gindara ni Isaias an iya mga kadungandungan pabalik ha presente, nasiring: “Kondi ako nasiring: Ako nagtititis, ako nagtititis, kairo ko! An maglimbong nanulos ha malimbungon; oo, an malimbong nanulos ha malimbungon gud. An kahadlok, ngan an luong, ngan an bitik, aada ha imo, O umurukoy han tuna. Ngan mahinanabo, nga hiya nga pumalagiw tikang ha aringasa han kahadlok mahuhulog ngadto ha luong; ngan hiya nga magawas tikang ha butnga han luong madadakop dida ha bitik: kay an mga tamboanan ha igbaw inabrihan, ngan an mga patukuranan han tuna nangungurog. An tuna nabungkag hin tinuod, an tuna nagkabulag, an tuna gin-uy-og ha makusog. An tuna maghihiruogduog pariho han tawo nga hubog, ngan maghihilayhilay ngadto nganhi pariho hin duyan; ngan an pagtalapas dida magmamabug-at dida hini, ngan ini mapupukan, ngan diri na mabangon liwat.”—Isaias 24:16b-20.
16 Nabido gud hi Isaias tungod ha mahitatabo ha iya katawohan. An kahimtang ha iya palibot nagin hinungdan han pag-abat hin kasakit ngan kaguol. Damu an maglimbong ngan nagin hinungdan han kahadlok han mga umurukoy ha tuna. Kon kuhaon na ni Jehova an iya panalipod, an diri-matinumanon nga mga umurukoy ha Juda makakaeksperyensya hin duro nga kahadlok ha adlaw ngan gab-i. Diri hira makakasiguro han ira mga kinabuhi. Waray makakapalagiw ha kalamidad nga maabot ha ira tungod ha pagsalikway han mga sugo ni Jehova ngan pagbalewaray han diosnon nga kinaadman. (Proberbios 1:24-27) Maabot an kalamidad bisan kon an maglimbong ha tuna, ha pangalimbasog nga kombinsihon an katawohan nga magigin maopay an ngatanan, nagamit hin mga buwa ngan limbong basi tugwayan hira ha dalan ngadto ha kabungkagan. (Jeremias 27:9-15) An mga kaaway tikang ha gawas masulod ngan titikasan hira ngan dadad-on hira nga bihag. Ini ngatanan nakaguol gud kan Isaias.
17. (a) Kay ano nga imposible an pakapalagiw? (b) Kon gamiton na an gahum ha paghukom ni Jehova tikang ha mga langit, ano an mahitatabo ha tuna?
17 Kondi, kinahanglan igpahayag han propeta nga waray makakapalagiw. Diin man magsari an katawohan nga pumalagiw, madadakpan hira. An iba bangin makapalagiw ha usa nga kalamidad, kondi madadakpan hira ha iba nga kalamidad—mawawaray seguridad. Masusugad la ito han ginlalanat nga hayop nga waray mahulog ha buho kondi nadakop ha usa nga lit-ag. (Itanding an Amos 5:18, 19.) An gahum ha paghukom ni Jehova gagamiton tikang ha mga langit ngan magbabay-og han mga pundasyon mismo han tuna. Pariho han tawo nga hubog, an tuna maghihiruogduog ngan mapupukan, tungod kay nabubug-atan ha pagkasalaan ngan diri na nakakabangon utro. (Amos 5:2) An paghukom ni Jehova sigurado. An bug-os nga kabungkagan ngan kadaot maabot ngada ha tuna.
Hi Jehova Magmamando ha Himaya
18, 19. (a) Ha ano mahimo magtudlok ‘an kasundalohan han kahitas-an,’ ngan paonan-o ini hira gintirok “ha bilanggoan”? (b) Paonan-o ‘an kasundalohan han kahitas-an’ tatagan hin atensyon “katapos hin damu nga adlaw”? (c) Paonan-o tatagan ni Jehova hin atensyon “an kahadian han tuna nga aada ha tuna”?
18 An tagna ni Isaias naghaluag yana, nag-uunabi han pangataposan nga katumanan han katuyoan ni Jehova: “Mahinanabo hadto nga adlaw, nga kan Jehova sisirotan an panon han mga higtaas nga aada ha kahitas-an, ngan an kahadian han tuna nga aada ha tuna. Ngan hira pagtitirukon, sugad hin mga binilanggo nga gintitirok dida ha luong, ngan sasadhan dida ha bilanggoan; ngan ha katapos hin damu nga adlaw hira duduawon. Dida hito an bulan magugupong, ngan an adlaw mahikakaalo; kay hi Jehova han mga kasundalohan maghahadi ha bukid han Sion, ngan ha Jerusalem; ngan ha atubangan han iya katigurangan maaada an himaya.”—Isaias 24:21-23.
19 ‘An kasundalohan han kahitas-an’ mahimo magtudlok ha yawan-on nga ‘mga magmarando han kalibotan hini nga kasisidman, an mga puwersa han magraot nga espiritu ha langitnon nga mga lugar.’ (Efeso 6:12) May-ada ini gamhanan nga impluwensya ha mga gahum han kalibotan. (Daniel 10:13, 20; 1 Juan 5:19) An ira tumong amo an pagpahirayo han katawohan tikang kan Jehova ngan ha iya putli nga pagsingba. Naglampos gud hira ha pagsulay ha Israel nga sundon an maraot nga mga buhat han mga nasud nga nakapalibot ha ira ngan salit magin takos han baraan nga paghukom han Dios! Kondi kinahanglan bumaton hi Satanas ngan an iya mga demonyo ha Dios kon ha kataposan ihatag na niya an iya atensyon ha ira ngan ha mga magmarando ha tuna, “an kahadian han tuna nga aada ha tuna,” nga ira naimpluwensyahan ha pakig-away ha Dios ngan ha pagtalapas han iya mga balaud. (Pahayag 16:13, 14) Pinaagi han simboliko nga pagyakan, hi Isaias nasiring nga hira pagtitirukon ngan “sasadhan dida ha bilanggoan.” “Katapos hin damu nga adlaw,” bangin kon hi Satanas ngan an iya mga demonyo (kondi diri “an kahadian han tuna nga aada ha tuna”) temporaryo nga pagawson ha kataposan han Usa ka Yukot ka Tuig nga Pagmando ni Jesu-Kristo, ipapadapat han Dios ha ira an ultimo nga sirot nga takos ha ira.—Pahayag 20:3, 7-10.
20. Ha kadaan ngan ha moderno nga mga panahon, paonan-o ngan kakan-o hi Jehova ‘nagin hadi’?
20 Salit ini nga bahin han tagna ni Isaias naghatag ha mga Judio hin urusahon nga pasarig. Ha itinanda nga panahon ni Jehova, igpapahinabo niya an kapukan han kadaan nga Babilonya ngan pababalikon an mga Judio ha ira natawohan nga tuna. Han 537 A.K.P., han ipinakita niya an iya gahum ngan pagkasoberano hini nga paagi para ha iya katawohan, tinuod nga masisiring ito ha ira: “An imo Dios naghahadi!” (Isaias 52:7) Ha moderno nga mga panahon, hi Jehova ‘nagin hadi’ han 1914 han ginpalingkod niya hi Jesu-Kristo sugad nga Hadi ha Iya langitnon nga Ginhadian. (Salmo 96:10) Hiya ‘nagin hadi’ liwat han 1919 han ipinakita niya an gahum han iya pagkahadi pinaagi han pagpagawsa han espirituwal nga Israel tikang ha pagkabihag ha Babilonya nga Daku.
21. (a) Paonan-o ‘magugupong an bulan nga kadayaw ngan maaawod an masilaw nga adlaw’? (b) Ano nga malanog nga panawagan an magkakaada gidadakui nga katumanan?
21 Hi Jehova ‘magigin hadi’ na liwat kon tapuson na niya an Babilonya nga Daku ngan an bug-os hinin maraot nga sistema han mga butang. (Sakarias 14:9; Pahayag 19:1, 2, 19-21) Katapos, an pagmando han Ginhadian ni Jehova magigin mahimayaon gud salit bisan an kalamrag han bulan nga kadayaw ha gab-i o an masilaw nga adlaw ha kaudtuhon diri makakatupong ha himaya hito. (Itanding an Pahayag 22:5.) Hira maaawod, siring pa, ha pagtanding han ira kalugaringon ha mahimayaon nga hi Jehova han mga kasundalohan. Hi Jehova magmamando nga gihitaasi. An iya makagarahum-ha-ngatanan nga gahum ngan himaya ipapakita ha ngatanan. (Pahayag 4:8-11; 5:13, 14) Pagkaurusahon nga paglaom! Hito nga panahon, an panawagan han Salmo 97:1 malanog ha bug-os nga tuna ha gidadakui nga katumanan hito: “Hi Jehova naghahadi; magrarayhak an tuna; Nagkakalipay an kadam-an han mga kapurupud-an.”
[Mga Pakiana]