Sumat han mga Parasamwak han Ginhadian

“Karuyag Ko Mag-alagad ha Dios”

“GAWAS kamo ngadi, mga tawo ko, tikang ha iya.” Ito an panawagan han anghel nga hinbatian ni apostol Juan ha siyahan nga siglo K.P. Ha aton panahon minilyon han tangkod-an-kasingkasing nga mga tawo an kinarawat ngan binaya ha ‘Babilonya nga Daku,’ an imperyo han buwa nga relihiyon ha kalibotan. (Pahayag 18:1-4) Usa ha ira hi Wilner nga taga-Haiti, nga nagsusumat han iya eksperyensya.

“Natawo ako han 1956 ha pamilya nga debotado nga Katoliko ha gutiay nga bungto han St. Marc, ha Haiti. Hunahunaa an kalipay han akon pamilya han mapili ako, kaupod han duha pa tikang ha amon bungto, ha pag-eskwela ha usa nga seminaryo ha St. Michel de l’Atalaye, ha Haiti. Katapos, han 1980, ginpakadto kami ha Stavelot, Belgium, para ha dugang nga pagbansay. Didto nag-eskwela liwat kami ha usa nga unibersidad han mga Katoliko.

“Ha tinikangan disidido ako nga magin padi. Usa ka adlaw ha pangaonan, an padi nga nagdudumara ha amon grupo naghangyo ha akon nga magpabilin hin pipira ka minuto kay may-ada hiya karuyag isumat ha akon. Handurawa an akon kalas han prangka nga nagsumat hiya nga naruruyag hiya ha akon! Ginbalewaray ko an iya kaagresibo kondi inabat ko nga nalimbongan gud ako. Iginsurat ko ha akon pamilya an mahitungod han nahitabo ngan binaya ha seminaryo paglabay hin pipira ka bulan, bisan pa han ira diri pag-uyon. Nakabiling ako hin mauukyan ha barangay ngan nagpadayon ha pag-eskwela ha lain nga bokasyon.

“Han bumalik ako ha St. Marc, nawad-an na ako hin bisan ano nga pagsarig ha Iglesia Katolika. Ha gihapon, karuyag ko mag-alagad ha Dios, kondi diri ako maaram han pagbubuhaton. Kinadto ako ha singbahan han mga Adbentista, ha Baptist nga singbahan, ngan ha Mormon nga singbahan. Waray ako giya ha espirituwal.

“Katapos nahinumdoman ko nga samtang naeskwela ha seminaryo ha Belgium, ginbabasa ko hadto an Crampon nga Biblia. Dida hito nadiskobrehan ko nga may ngaran an Dios. Salit samtang ginagamit an iya ngaran, sinsero nga nag-ampo ako ha Dios nga buligan ako nga mabilngan an totoo nga relihiyon.

“Waray pag-iha, nagin amyaw ko an duha han mga Saksi ni Jehova. Hira diri-maaringasa, matinalahuron, ngan may dignidad. Gindayaw ko an paagi han ira pagkinabuhi. Usa ka adlaw, gindapit ako han usa han duha nga Saksi ha pagtambong ha tinuig nga Memoryal han kamatayon ni Kristo. Naruyagan ko gud an katirok ngan ginkarawat an regular nga pag-aram ha Biblia kaupod han mga Saksi. Ha sulod hin mga unom ka bulan, kombinsido na ako nga nabilngan ko an husto nga paagi ha pag-alagad ha Dios. Igindedikar ko an akon kinabuhi ngadto kan Jehova ngan nagpabawtismo han Nobyembre 20, 1988.”

Inabot an panahon, sinulod hi Wilner ha bug-os-panahon nga pag-alagad. Yana, nag-aalagad hiya sugad nga tigurang ha kongregasyon. Hiya ngan an iya asawa, kaupod an ira duha nga anak, malipayon nga nag-aalagad dida ha kongregasyon.

[Retrato ha pahina 9]

Pinaagi han pagbasa ha Biblia, nadiskobrehan ni Wilner nga Jehova an ngaran han Dios