“An Lurong”

12. Hin-o ‘an mga lurong’ yana nga panahon, ngan ha ano nga paagi diri hira mahinatagon?

¹² Sunod nga ipinakita han tagna ni Isaias an usa nga kabaliktaran: “An lurong diri na tatawagon nga [mahinatagon], o diri man an tuso sisidngon nga [noble]. Kay an lurong magyayakan ha linurong.” (Isaias 32:5, 6a) Hin-o “an lurong”? Baga in sugad nga pagpabug-at, hi Hadi David makaduha nga naghatag han baton: “An [lurong] siniring ha iya kasingkasing: Waray Dios. Mangil-ad hira, naghimo hira han mga maghugaw nga mga buhat; waray usa nga nagbubuhat hin maopay.” (Salmo 14:1; 53:1) Siyempre, an napamatud-an nga mga ateyista nasiring nga waray Jehova. Ha sugad man nga paagi, an “mga maaramon” ngan an iba nagios nga baga in waray Dios, natoo nga waray hira baratunon ha bisan hin-o. An kamatuoran waray ha sugad nga mga tawo. Waray pagkamahinatagon ha ira mga kasingkasing. Waray hira maopay nga sumat mahitungod han gugma. Kabaliktaran gud ha totoo nga mga Kristiano, mahinay hira ha paghatag ha mga nanginginahanglan nga aada ha kakurian o bug-os nga pakyas hira ha pagbuhat hito.

13, 14. (a) Paonan-o ginbubuhat han moderno nga mga apostata an nakakadaot? (b) An mga apostata nangangalimbasog nga diri magkaada hin ano an nagugutom ngan nauuhaw, kondi ano an magigin ultimo nga resulta?

¹³ Damu han sugad nga mga lurong an nangangalas hadton nasuporta ha kamatuoran han Dios. “An iya kasingkasing magbubuhat han karat-an, ha pagbuhat han pagpasipara, ngan pagyakan han sayop patok kan Jehova.” (Isaias 32:6b) Totoo gud ini ha moderno nga mga apostata! Ha damu nga mga nasud ha Europa ngan Asia, inupod an mga apostata ha iba nga mga kaaway han kamatuoran, nagyayakan hin dayag nga mga buwa ha mga awtoridad, basi pagdid-an o pugngan an mga Saksi ni Jehova. Ira ipinapakita an espiritu han “maraot nga uripon,” nga mahitungod ha iya igintagna ni Jesus: “Kon adton maraot nga uripon sumiring ha iya kasingkasing: An akon agaron maiha umabot; ngan magtikang hiya panhampak ha iya mga igkasi-uripon, ngan kumaon ngan uminom upod han mga parahubog; an agaron hiton nga uripon maabot ha usa ka adlaw nga diri niya pinamumulat, ngan ha usa ka oras nga diri niya hinbabaroan. Ngan paghahampakon gud hiya niya, ngan igtututdo han iya bahin upod han mga salingkapaw; didto may [mananangis] ngan mangingigot nga mga ngipon.”—Mateo 24:48-51.

¹⁴ Samtang yana, ginpapahinabo han mga apostata nga magin ‘waray sulod an kalag han ginugutom, ngan magkulang an irinmon han inuuhaw.’ (Isaias 32:6c) An mga kaaway han kamatuoran nangangalimbasog nga diri magkaada espirituwal nga pagkaon an mga tawo nga nagugutom han kamatuoran, ngan nangangalimbasog hira nga diri painumon an mga nauuhaw han nakakarepresko nga mga tubig han mensahe han Ginhadian. Kondi an ultimo nga resulta maaamo an iginpapahayag ni Jehova ha iya katawohan pinaagi han usa pa han iya mga propeta: “Hira makikiaway ha imo; kondi diri hira makakadaog ha imo: kay ako upod ha imo, nasiring hi Jehova, ha pagluwas ha imo.”—Jeremias 1:19; Isaias 54:17.

15. Yana nga panahon, hin-o an labi na nga mga “tuso,” ano nga “buwa nga mga pulong” an ira igin-aaghat, ngan ano an resulta?

¹⁵ Tikang ha kabutngaan nga mga tuig han ika-20 ka siglo, an imoralidad dayag nga nagigin kaylap ha mga nasud han Kakristianohan. Kay ano? Igintagna nga daan an usa nga hinungdan: “An mga paagi han tuso magraot: hiya nagmumugna hin mga magraot nga mugna ha [pagdaot] han maaghop pinaagi han buwa nga mga pulong, bisan kon an runos nagyayakan hin maopay.” (Isaias 32:7) Ha katumanan hini nga mga pulong, damu han mga klero labi na an may-ada na matinuguton nga panlantaw mahitungod ha sekso antes han kasal, pagtampo han diri mag-asawa, homoseksuwalidad—oo, ‘pornikasyon ngan ngatanan nga kahugaw.’ (Efeso 5:3) Salit, ira ‘gindadaot’ an ira mga panon pinaagi han ira buwa nga mga pulong.

16. Ano an nakakapalipay ha totoo nga mga Kristiano?

¹⁶ Ha kabaliktaran, nakakarepresko gud an katumanan han sunod nga mga pulong han propeta! “Kondi an [usa nga mahinatagon] nagmumugna han mga butang nga hamili; ngan ha mga butang nga hamili hiya magpapadayon.” (Isaias 32:8) Igin-aghat ni Jesus mismo an pagkamahinatagon han hiya nagsiring: “[Paghatag], ngan ito ihahatag ha iyo: maopay nga sukol, pit-a, uy-oga ngatanan, maawas, nga hira mahatag ngada ha iyo ngahaw. Kay bisan ano nga suruklan nga iyo igsukol, ito pagsusuklan liwat ha iyo.” (Lukas 6:38) Iginpatin-aw liwat ni apostol Pablo an mga bendisyon nga naabot ha mga mahinatagon han hiya nagsiring:  ‘Panumdoma an mga pulong han Ginoo nga hi Jesus, nga hiya ngahaw siniring: Labaw an kalipay ha paghatag kay ha pagkarawat.’ (Buhat 20:35) An totoo nga mga Kristiano nagigin malipayon, diri tungod ha pagkaada materyal nga bahandi o pagin kilala ha sosiedad, kondi tungod ha pagin mahinatagon—sugad han ira Dios, hi Jehova, nga mahinatagon. (Mateo 5:44, 45) An ira gidadakui nga kalipay aada ha pagbuhat han kaburut-on han Dios, ha paghatag han ira kalugaringon basi ipahibaro ha iba ‘an mahimayaon nga maopay nga sumat han malipayon nga Dios.’—1 Timoteo 1:11.

17. Hin-o yana nga panahon an pariho han “mga anak nga kababayin-an nga mapasibay-on” nga gin-uunabi ni Isaias?

¹⁷ An tagna ni Isaias nagpapadayon: “Bangon, kamo mga kababayin-an nga aada ha [kahimongaya], ngan pamatii an akon tingog; kamo mga anak nga kababayin-an nga mapasibay-on, hatag hin talinga ha akon pakigpulong. Kay ha mga adlaw nga unhan ha usa ka tuig kamo pagsasamukon, kamo mga kababayin-an nga mapasibay-on; kay an urubasan makakawang, an pagbari diri maabot. Kurog, kamo mga kababayin-an nga aada ha kahimongaya; kasubo, kamo mga kababayin-an nga mapasibay-on.” (Isaias 32:9-11a) An panggawi hini nga kababayin-an nagpapahinumdom ha aton han mga nag-aangkon yana nga nag-aalagad ha Dios kondi diri madasigon ha pag-alagad ha iya. Hiaagian hira ha mga relihiyon han ‘Babilonya nga Daku, an iroy han mga puta.’ (Pahayag 17:5) Pananglitan, an mga membro han mga relihiyon han Kakristianohan pariho gud han paghulagway ni Isaias hini nga “kababayin-an.” Hira “aada ha [kahimongaya],” diri nababaraka ha paghukom ngan kasamok nga hirani na umabot ha ira.

18. Hin-o an ginsusugo nga “mag-alimon hin panapton nga sako ha [ira] mga baliatang,” ngan kay ano?

¹⁸ Salit, may-ada panawagan ngada ha palso nga relihiyon: “Panhugkas kamo, ngan panhubo kamo, ngan mag-alimon hin panapton nga sako ha iyo mga baliatang. Hira mahampak dida ha mga dughan para han makaruruyag nga mga uma, para han mabungahon nga balagon nga ubas. Ngada ha tuna han akon katawohan maabot an mga tunok ngan an kabaknitan; oo, ngada ha ngatanan nga balay ha kalipay dida ha malipayon nga bungto.” (Isaias 32:11b-13) An mga pulong nga “Panhugkas kamo, ngan panhubo kamo” diri nangangahulogan hin bug-os nga paghukas han panapton. An kadaan nga kustomre amo an pagsul-ot hin panggawas nga panapton bawbaw han pan-ilarom nga panapton. An panggawas nga panapton agsob nga usa nga pangirilal-an. (2 Hadi 10:22, 23; Pahayag 7:13, 14) Salit an tagna nagsusugo ha mga membro han palso nga mga relihiyon nga hukason an ira panggawas nga mga panapton—an ira salingkapaw nga pangirilal-an sugad nga mga surugoon han Dios—ngan isul-ot lugod an mga panapton nga sako, nga nagsisimbolo han kasubo tungod han tiarabot nga paghukom ha ira. (Pahayag 17:16) Waray diosnon nga pagkamabungahon nga hiaagian ha relihiyoso nga mga organisasyon han Kakristianohan, nga nag-aangkon nga “malipayon nga bungto” han Dios, o ha iba pa nga mga membro han imperyo han palso nga relihiyon ha kalibotan. An nasasakopan han ira pagmando nagbubunga la hin “mga tunok, ngan [hin] kabaknitan” han pagpasibaya ngan pagkabinayaan.

19. Ano nga kahimtang han apostata nga “Jerusalem” an iginbubuhayhag ni Isaias?

¹⁹ Ini nga hulagway han kasisidman naabot ha ngatanan nga bahin han apostata nga “Jerusalem”: ‘An palasyo babayaan; an bungto nga damu an umurukoy pag-iiwasan; an Opel ngan an balwarte nga barantayan magigin waray tanom nga kapatagan ha kadayonan, usa nga kalipayan han mga sebra, usa nga panabsaban han mga kapangon nga kakarnerohan.’ (Isaias 32:14) Oo, bisan an Opel kaupod. An Opel usa ka hitaas nga bahin han Jerusalem nga naghahatag hin marig-on nga depensa. An pagsiring nga an Opel nagigin usa ka waray tanom nga kapatagan nagpapasabot hin bug-os nga pagin binayaan han siyudad. Ipinapakita han mga pulong ni Isaias nga an apostata nga “Jerusalem”—an Kakristianohan—diri mabinantayon ha pagbuhat han kaburut-on han Dios. Baw-as ito ha espirituwal, waray gud bisan ano nga kamatuoran ngan hustisya—ura-ura an pagin sugad hin mananap.

Usa ka Matin-aw nga Kabaliktaran!

20. Ano an epekto han espiritu han Dios nga iginbububo ngada ha iya katawohan?

²⁰ Sunod nga iginpipresentar ni Isaias an makalilipay nga paglaom para hadton nagbubuhat han kaburut-on ni Jehova. Anoman nga kasub-anan han katawohan han Dios magpapadayon la “[tubtob] nga an espiritu igbubo ngada ha aton tikang ha kahitas-an, ngan an kamingawan mahimo nga mabungahon nga [taranman hin prutas], ngan an mabungahon nga uma pagmahalon sugad hin usa nga kagurangan.” (Isaias 32:15) Makalilipay, tikang han 1919, an espiritu ni Jehova hura nga iginbububo ngada ha iya katawohan, iginpapahiuli, siring pa, an mabungahon nga taranman hin prutas han dinihogan nga mga Saksi, nga susundan han nagtitikahaluag nga kagurangan han iba nga mga karnero. Makatirigamnan an kahuraan ngan pagtubo han iya organisasyon ha tuna yana nga panahon. Ha nahibalik nga espirituwal nga paraiso, “[an] himaya ni Jehova, an kamahalan han aton Dios,” ipinapakita han iya katawohan samtang iginpapasamwak nira an iya tiarabot nga Ginhadian ha bug-os nga kalibotan.—Isaias 35:1, 2.

21. Diin hiaagian yana nga panahon an pagkamatadong, kamurayawan, ngan seguridad?

²¹ Pamati, yana, ha mahimayaon nga saad ni Jehova: “An kasubayan maukoy dida ha kamingawan, ngan an pagkamatadong mapuyo ha mabungahon nga uma. Ngan an buhat han pagkamatadong maaamo an pagdait; ngan an bunga han pagkamatadong maaamo an kahilom ngan an pagsarig ha kadayonan.” (Isaias 32:16, 17) Iginhuhulagway gud hin maopay hini an espirituwal nga kahimtang han katawohan ni Jehova yana nga panahon! Kabaliktaran gud ha kadam-an han katawohan, nga nababahin tungod han kapungot, kamadarahog, ngan duro nga kakablas ha espirituwal, an totoo nga mga Kristiano ha bug-os nga kalibotan nagkakaurosa, bisan kon hira “tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan.” Hira nagkikinabuhi, nagtatrabaho, ngan nag-aalagad uyon ha pagkamatadong han Dios, ginbubuhat ito nga may pagsarig ha pagpahimulos, ha kataposan, han totoo nga kamurayawan ngan seguridad ha kadayonan.—Pahayag 7:9, 17.

22. Ano an kaibahan han kahimtang han katawohan han Dios ngan hadton aada ha palso nga relihiyon?

²² Ha espirituwal nga paraiso, natutuman na an Isaias 32:18. Ito nasiring: “An akon katawohan mag-uukoy dida ha malinaw nga puroy-anan, ngan ha marig-on nga mga urukyan.” Kondi para ha palso nga mga Kristiano, “mabagyo hin yelo ha pagkahulog han kagurangan; ngan an bungto pagpapaubson ha tinuod.” (Isaias 32:19) Oo, pariho han makusog nga bagyo han yelo, an paghukom ni Jehova mahampak ha palsipikado nga siyudad han palso nga relihiyon, pauubson an “kagurangan” han mga nasuporta hito, bubungkagon hira ha kadayonan!

23. Ano nga buruhaton ha bug-os nga kalibotan an hirani na matapos, ngan paonan-o gintatagad an mga nakikigbahin hito?

²³ Ini nga bahin han tagna nagtatapos: “Bulahan kamo nga nagsabwag ha ligid han ngatanan nga katubigan, nga nagpapagawas han mga tiil han baka nga lalaki ngan han asno.” (Isaias 32:20) An baka ngan an asno mga hayop nga pantrabaho nga ginamit han kadaan nga katawohan han Dios ha pag-arado han mga uma ngan pagsabwag han liso. Yana nga panahon, ginagamit han katawohan ni Jehova an mga makina ha pag-imprinta, elektroniko nga mga garamiton, moderno nga mga tinukod ngan mga sarakyan ngan, labaw ha ngatanan, an nagkakaurosa, teokratiko nga organisasyon ha pag-imprinta ngan panaltag hin binilyon nga mga publikasyon han Biblia. Ginagamit ini nga mga garamiton han disidido nga mga nagtatrabaho ha pagsabwag han mga liso han kamatuoran han Ginhadian ha bug-os nga tuna, ha literal “ha ligid han ngatanan nga katubigan.” Minilyon han mahadlukon-ha-Dios nga kalalakin-an ngan kababayin-an an gin-ani na, ngan an iba nga damu nga mga tawo naupod ha ira. (Pahayag 14:15, 16) Hira ngatanan tinuod nga gintatagad nga “maglipayon”!

[Mga Pakiana]