Magkaada Kalipay ha Pagkamatadong ni Jehova

“Hiya nga nasunod han katadongan ngan han pagpaid nakakaagi han kinabuhi, pagkamatadong, ngan dungog.”—PROBERBIOS 21:21.

 1. Ano nga mga paagi han mga tawo yana nga panahon an nagtutugway ngadto ha nakakadaot nga mga resulta?

 “MAY-ADA dalan nga daw matadong ha usa ka tawo, kondi an kataposan hini amo an mga dalan han kamatayon.” (Proberbios 16:25) Husto gud an pagkasaysay hini nga proberbio han Biblia ha mga dalan han kadam-an nga mga tawo yana nga panahon! Ha kabug-osan, interesado la an mga tawo ha pagbuhat han husto sumala ha ira kalugaringon nga panhunahuna, ginbabalewaray bisan an pinakaimportante nga mga panginahanglan han iba. (Proberbios 21:2) Nasiring hira nga natahod hira ha mga balaud ngan mga suruklan han nasud kondi ha tuso nga paagi nangangalimbasog hira ha paglikay ha mga igindidiri hito ha ngatanan nga higayon. An resulta amo an sosiedad nga nagkakabahinbahin, nawuwurok, ngan nagugupong.—2 Timoteo 3:1-5.

 2. Ano an apurado nga ginkikinahanglan para han kaopayan han katawohan?

² Para ha aton kalugaringon nga kaopayan—ngan para ha kamurayawan ngan seguridad han ngatanan nga tawo—apurado nga ginkikinahanglan naton an balaud o suruklan nga may-hustisya ngan matadong, balaud nga disidido an ngatanan nga mga tawo nga karawaton ngan sundon. Matin-aw, waray balaud o suruklan nga hinimo han bisan hin-o nga tawo, mationan-o man kamaaramon o sinsero hiya, an makakahatag hito nga panginahanglan. (Jeremias 10:23; Roma 3:10, 23) Kon may-ada hito nga suruklan, diin ito mabibilngan ngan ano daw la nga klase ito? Bangin an mas importante nga pakiana amo an, Kon may-ada hito nga suruklan, malilipay ka ba ha pagkarawat hito?

Pagbiling han Matadong nga Suruklan

 3. Hin-o an kuwalipikado gud ha paghatag hin suruklan nga kinakarawat ngan mapulsanon ha ngatanan nga mga tawo, ngan kay ano?

³ Basi makabiling han suruklan nga kinakarawat ngan mapulsanon ha ngatanan, kinahanglan dumaop kita ha usa nga diri napupugngan han bisan ano nga tubtoban ha rasa, kultura, ngan politika ngan diri nauulang han kawaray kahibaro han tawo mahitungod han tidaraon ngan han ira mga  kaluyahan. Waray ruhaduha, an kuwalipikado gud la nga usa amo an makagarahum-ha-ngatanan nga Maglalarang, hi Jehova nga Dios, nga nagpapahayag: “Sugad nga an mga langit hiruhitaas kay han tuna, amo man an akon mga paagi hiruhitaas kay han iyo mga paagi, ngan an akon mga hunahuna kay han iyo mga hunahuna.” (Isaias 55:9) Dugang pa, iginhuhulagway han Biblia hi Jehova sugad nga “usa nga Dios han pagkamatinumanon ngan waray karat-an, subay ngan matadong hiya.” (Deuteronomio 32:4) Ha bug-os nga Biblia, makikita naton an mga pulong nga “hi Jehova matadong.” (Eksodo 9:27; 2 Kronikas 12:6; Salmo 11:7; 129:4; Pagtangis 1:18; Pahayag 19:2) Oo, makakalaom kita kan Jehova para han gihitaasi nga suruklan tungod kay hiya matinumanon, may-hustisya, ngan matadong.

 4. Ano an kahulogan han pulong nga “matadong”?

⁴ Siyempre, an pulong nga “matadong” diri gud naruruyagan yana nga panahon. Ha pagkamatuod, an kadam-an nga mga tawo may-ada negatibo, nakakaminos pa ngani nga panhunahuna hito, iginpapariho ito ha pag-abat hin pagin labaw ha moral, o salingkapaw nga pagin relihiyoso ngan debotado. Kondi, sumala ha usa nga diksyonaryo an “matadong” nangangahulogan hin pagin may hustisya, tangkod, maopay; waray-kasaypanan, waray-sala; nasunod ha mga prinsipyo han balaud han Dios o ha kinakarawat nga mga suruklan han moralidad; nagbubuhat hin husto o may hustisya. Diri ka ba malilipay ha usa nga balaud o suruklan nga may-ada han sugad mag-opay nga mga kalidad?

 5. Isaysay an kalidad nga pagkamatadong sugad han iginpapahayag ha Biblia.

⁵ Mahitungod han kalidad nga pagkamatadong, an Encyclopaedia Judaica nakaobserba: “An pagkamatadong diri usa ka teoriya kondi lugod iginbabasar ha pagbuhat han may hustisya ngan husto ha ngatanan nga mga kahimtang.” An pagkamatadong han Dios, pananglitan, diri la kay kinaiya o personal nga kalidad nga tinatag-iya niya, sugad han iya pagkabaraan ngan pagkaputli. Lugod, kapahayagan ito han iya kinaiya ha mga paagi nga husto ngan may hustisya. Mahimo sidngon nga tungod kay hi Jehova baraan ngan putli, matadong an ngatanan nga iya ginbubuhat ngan an ngatanan nga tikang ha iya. Sugad han ginsisiring han Biblia, ‘hi Jehova matadong ha ngatanan nga iya mga paagi ngan maunungon ha ngatanan nga iya mga buhat.’—Salmo 145:17.

 6. Ano an ginsiring ni Pablo mahitungod han pipira nga diri-tumuroo nga mga Judio ha iya panahon, ngan kay ano?

⁶ Pinabug-atan ni apostol Pablo ini nga punto ha iya surat ha mga Kristiano ha Roma. Mahitungod han pipira nga diri-tumuroo nga mga Judio, hiya nagsurat: “Tungod nga waray nira masayuri an katadongan han Dios, ngan gintinguha nira an pagtindog ha ira kalugaringon (nga katadongan), waray hira magpasakop ha katadongan han Dios.” (Roma 10:3) Kay ano nga gin-unabi ni Pablo nga ito nga mga tawo ‘waray masayod han pagkamatadong han Dios’? Waray ba hira tutdui han Balaud, han matadong nga mga suruklan han Dios? Gintutdoan gud hira. Kondi, an kadam-an ha ira naghunahuna nga an pagkamatadong usa la ka personal nga pagkamaopay, nga madadangat pinaagi han maopay, maduruto nga pagsunod ha relihiyoso nga mga surundon, imbes nga hunahunaon ito sugad nga suruklan ha paggiya ha ira ha pagtrato ha ira mga igkasi-tawo. Pariho han mga lider han relihiyon ha panahon ni Jesus, sayop an pagsabot nira ha hustisya ngan pagkamatadong.—Mateo 23:23-28.

 7. Paonan-o iginpapahayag an pagkamatadong ni Jehova?

⁷ Ha matin-aw nga kabaliktaran, an pagkamatadong ni Jehova iginpapahayag ngan matin-aw nga nakikita ha ngatanan nga iya mga pakig-upod. Bisan kon an iya pagkamatadong nagkikinahanglan nga diri niya basta la nga ginbabalewaray an mga sala han tinuyo nga magpakasasala, diri ito nakakahimo ha iya nga magin usa ka waray-pagbati ngan istrikto nga Dios, nga kinahanglan kahadlokan ngan diri madadaop. Ha kabaliktaran, an iya matadong nga mga buhat naghahatag hin basihanan basi makadaop ha iya an katawohan ngan maluwas tikang ha makuri nga mga resulta han sala. Salit, angayan gud nga hi Jehova iginhuhulagway sugad nga ‘matadong nga Dios ngan Manluluwas.’—Isaias 45:21.

Pagkamatadong Ngan Kaluwasan

8, 9. Ha ano nga mga paagi iginpahayag han Balaud an pagkamatadong han Dios?

⁸ Basi masabtan an kalabotan butnga han pagkamatadong han Dios ngan han iya mahigugmaon nga buhat han pagluwas, tagda an Balaud nga iya iginhatag ha nasud han Israel pinaagi kan Moises. Waray ruhaduha nga matadong an Balaud. Ha iya ultimo nga pahayag, ginpahinumdom ni Moises  an mga Israelita: “Ano nga nasud nga daku nga may-ada mga kasugoanan ngan mga lagda nga matadong sugad hini ngatanan nga balaud, nga iginbutang ha iyo atubangan hini nga adlaw?” (Deuteronomio 4:8) Paglabay hin mga siglo, hi Hadi David han Israel nagpahayag: “An mga kasugoanan ni Jehova mga matuod, ngan magtadong an ngatanan.”—Salmo 19:9.

⁹ Pinaagi han Balaud, iginpatin-aw ni Jehova an iya hingpit nga mga suruklan han husto ngan han sayop. Espisipiko nga iginsaysay hin detalyado han Balaud kon paonan-o sadang gumawi an mga Israelita diri la ha relihiyoso nga mga butang kondi liwat ha negosyo, mga relasyon han mag-asawa, mga buhat may kalabotan han pagkaon ngan kalimpyo ngan, siyempre, hudisyal nga mga desisyon. An Balaud may-ada liwat istrikto nga mga sirot kontra han mga matinalapasnon, ginparig-on pa ngani an sirot nga kamatayon ha pipira nga mga kaso. a Kondi an matadong ba nga mga kinahanglanon han Dios, sugad han iginpahayag ha Balaud, mabangis ngan mabug-at ha katawohan, nga nagwawara han ira kagawasan ngan kalipay, sugad han ginsisiring han damu nga mga tawo yana nga panahon?

10. Ano an inabat hadton naghigugma kan Jehova mahitungod han iya mga balaud?

¹⁰ Adton naghigugma kan Jehova nagkaada daku nga kalipay ha iya matadong nga mga balaud ngan mga sugo. Hi Hadi David, pananglitan, diri la kay nagkilala nga an hudisyal nga mga desisyon ni Jehova totoo ngan matadong, sugad han aton hinbabaroan, kondi may-ada liwat kinasingkasing nga gugma ngan apresasyon hito. Mahitungod han mga balaud ngan hudisyal nga mga desisyon ni Jehova, hiya nagsurat: “Angay pa ito pagtinguhaon labi han bulawan, oo, labi pa kadamu ha puraw gud nga bulawan; mamatam-is pa man kay han dugos ngan mga turo han udlan. Labot pa an imo uripon ginsagdonan tungod hiton: ngan ha pagtuman hito may daku nga [balos].”—Salmo 19:7, 10, 11.

11. Paonan-o napamatud-an nga an Balaud usa nga “magturutdo ha pagdara ha aton ngadto kan Kristo”?

¹¹ Paglabay hin mga siglo, iginpatin-aw ni Pablo an labaw pa nga bili han Balaud. Hiya nagsurat ha mga taga-Galasia: “An Kasugoanan nahimo nga aton magturutdo ha pagdara ha aton ngadto kan Kristo, basi nga kita magmatadong tungod ha pagtoo.” (Galasia 3:24) Ha panahon ni Pablo, an magturutdo (maestro, Kingdom Interlinear) usa nga surugoon o uripon ha usa ka daku nga panimalay. Obligasyon niya an pagpanalipod ha kabataan ngan pag-upod ha ira ngadto ha eskwelahan. Ha pariho nga paagi, an Balaud nagpanalipod ha mga Israelita tikang ha maraot nga moral ngan relihiyoso nga mga buhat han mga nasud nga nakapalibot ha ira. (Deuteronomio 18:9-13; Galasia 3:23) Dugang pa, iginpatin-aw han Balaud ha mga Israelita an ira makasasala nga kahimtang ngan an ira panginahanglan hin kapasayloan ngan kaluwasan. (Galasia 3:19) An mga kahikayan han paghalad nagpatin-aw han panginahanglan hin halad lukat ngan naghatag hin matagnaon nga surubdan nga pinaagi hito makikilala an totoo nga Mesias. (Hebreo 10:1, 11, 12) Salit, bisan kon iginpahayag ni Jehova an iya pagkamatadong pinaagi han Balaud, ginbuhat niya ito nga gintatagad an kaopayan ngan waray kataposan nga kaluwasan han katawohan.

Adton Ginpakamatadong han Dios

12. Ano unta an napahimulsan han mga Israelita kon ira ginsunod hin maopay an Balaud?

¹² Tungod kay matadong ha ngatanan nga paagi an Balaud nga iginhatag ni Jehova, an pagsugot hito han mga Israelita nagresulta unta hin matadong nga kahimtang ha atubangan han Dios.  Ginpahinumdom ni Moises an mga Israelita han tisulod na hira ha Tuna nga Iginsaad: “Kita pagpapakamatadungon, kon kita magbantay ha pagtuman hini ngatanan nga mga sugo ha atubangan ni Jehova nga aton Dios, sugad han iginsugo niya ha aton.” (Deuteronomio 6:25) Dugang pa, hi Jehova nagsaad: “Bantayan niyo an akon mga kasugoanan, ngan an akon mga sugo: nga kon pagbuhaton han usa ka tawo mabubuhi hiya pinaagi ha ira: Ako hi Jehova.”—Lebitiko 18:5; Roma 10:5.

13. Waray ba hustisya hi Jehova ha pagkinahanglan ha iya katawohan nga sundon an matadong nga Balaud? Isaysay.

¹³ Makasurubo, sugad nga nasud, an mga Israelita napakyas “ha pagtuman hini ngatanan nga mga sugo ha atubangan ni Jehova” ngan salit waray makakarawat han iginsaad nga mga bendisyon. Napakyas hira ha pagbuhat han ngatanan nga mga sugo han Dios tungod kay an Balaud han Dios hingpit kondi hira diri-hingpit. Nangangahulogan ba ini nga an Dios waray hustisya o diri-matadong? Diri gud. Hi Pablo nagsurat: “Ano ba an isisiring ta? Nga may-ada [pagkawaray-hustisya] ha Dios? Ipahirayo ini!” (Roma 9:14) An kamatuoran amo nga ginpakamatadong han Dios an mga indibiduwal antes ngan katapos ihatag an Balaud, bisan kon hira diri-hingpit ngan makasasala. An lista han sugad nga mahadlukon-ha-Dios nga mga tawo nag-uupod kan Noe, Abraham, Job, Rahab, ngan Daniel. (Genesis 7:1; 15:6; Job 1:1; Esekiel 14:14; Jakobo 2:25) Salit an pakiana, ini: Ha ano nga basihanan ginpakamatadong han Dios ini nga mga indibiduwal?

14. Ano an karuyag ipasabot han Biblia kon nag-uunabi ito han usa ka tawo sugad nga “matadong”?

¹⁴ Kon an Biblia nag-uunabi han usa ka tawo sugad nga “matadong,” diri ito nagpapasabot hin kawaray-sala o pagkahingpit. Lugod, nangangahulogan ito hin pagtuman han mga obligasyon han usa ha Dios ngan ha mga tawo. Pananglitan, hi Noe gintawag nga “matadong nga tawo” ngan “putli ha iya katulinan” tungod kay “ha ngatanan nga kanan Dios ginsugo ha iya, iya ginbuhat.” (Genesis 6:9, 22; Malakias 3:18) Hi Sakarias ngan Elisabet, an mga ginikanan ni Juan nga Parabaptis, “magtadong ha atubangan han Dios, ngan nagsunod ha ngatanan nga mga sugo, ngan mga surundon han Ginoo nga waray sadang ikasaway.” (Lukas 1:6) Ngan an usa nga diri-Israelita, an Italyano nga opisyal han kasundalohan nga hi Cornelio, gintawag sugad nga “matadong ngan mahadlukon ha Dios.”—Buhat 10:22.

15. Ha ano may duok nga kalabotan an pagkamatadong?

¹⁵ Dugang pa, an pagkamatadong ha mga tawo may kalabotan gud ha kon ano an aada ha kasingkasing han usa—pagtoo ngan apresasyon ngan gugma han usa kan Jehova ngan ha iya mga saad—ngan diri la ha pagbuhat han usa han ginkikinahanglan han Dios. An Kasuratan nasiring nga hi Abraham “nagtoo kan Jehova; ngan ini gin-ihap ha iya nga katadongan.” (Genesis 15:6) Hi Abraham may-ada pagtoo diri la ha pag-eksister han Dios kondi liwat ha iya saad mahitungod han ‘binhi.’ (Genesis 3:15; 12:2; 15:5; 22:18) Tungod han sugad nga pagtoo  ngan mga buhat uyon ha pagtoo, hi Jehova mahimo magkaada relasyon ngan magbendisyon kan Abraham ngan ha iba nga mga matinumanon bisan kon hira diri-hingpit.—Salmo 36:10; Roma 4:20-22.

16. Ano an nagin resulta han pagtoo ha lukat?

¹⁶ Ha kataposan, an pagkamatadong ha mga tawo nadepende ha pagtoo ha halad lukat ni Jesu-Kristo. Mahitungod han mga Kristiano ha siyahan nga siglo, hi Pablo nagsurat: ‘Waray bayad ito nga regalo nga hira ginpakamatadong tungod han diri-takos nga pagkabuotan han Dios pinaagi han kagawasan tungod ha pagtubos nga iginbayad ni Kristo Jesus.’ (Roma 3:24) Ginhihisgotan didto ni Pablo an mahitungod hadton ginpili nga magin kaupod nga mga manurunod ni Kristo ha langitnon nga Ginhadian. Kondi an halad lukat ni Jesus naghatag liwat ha minilyon nga iba pa hin higayon nga magkaada matadong nga reputasyon ha atubangan han Dios. Hi apostol Juan nakakita ha bisyon hin “kadam-an nga mga tawo, nga waray tawo nga sadang makaihap, . . . nga nagkakatukdaw ha atubangan han hadianon nga lingkoran, ngan han Kordero, ngan nanmamanapton hin mga magbusag nga panapton nga higlawig.” An busag nga higlawig nga panapton nagsisimbolo han ira pagin limpyo ngan matadong ha atubangan han Dios tungod kay “ira pinanmunakan an ira mga higlawig nga panapton, ngan ito ginpabusag ha dugo han Kordero.”—Pahayag 7:9, 14.

Kalipay ha Pagkamatadong ni Jehova

17. Ano nga mga pitad an kinahanglan himoon ha pagbuhat han pagkamatadong?

¹⁷ Bisan kon mahigugmaon nga iginhatag ni Jehova an iya Anak, hi Jesu-Kristo, sugad nga paagi basi an katawohan magkaada matadong nga reputasyon ha iya atubangan, an resulta diri gud awtomatiko. An usa kinahanglan magpakita hin pagtoo ha lukat, magpahiuyon han iya kinabuhi ha kaburut-on han Dios, magdedikar ngadto kan Jehova, ngan simbolohan ito pinaagi han bawtismo ha tubig. Katapos, an usa kinahanglan padayon nga magbuhat han pagkamatadong, sugad man han iba nga espirituwal nga mga kalidad. Hi Timoteo, usa nga bawtismado nga Kristiano nga may-ada langitnon nga pagkatinawag, ginsagdonan ni Pablo: “Sunda an katadongan, an pagtahod ha Dios, an pagtoo, an paghigugma, an pag-ilob, an kaaghop.” (1 Timoteo 6:11; 2 Timoteo 2:22) Pinabug-atan liwat ni Jesus an panginahanglan han padayon nga pangalimbasog han hiya nagsiring: “Kondi [padayon nga] pamilnga niyo siyahan an ginhadian han Dios, ngan an iya katadongan.” Bangin mangalimbasog gud kita ha pamiling han mga bendisyon han Ginhadian han Dios, kondi nangangalimbasog gud ba liwat kita ha pagbuhat han matadong nga mga paagi ni Jehova?—Mateo 6:33.

18. (a) Kay ano nga diri masayon an pagbuhat han pagkamatadong? (b) Ano an mahibabaroan naton tikang ha susbaranan ni Lot?

¹⁸ Siyempre, diri masayon an pagbuhat han pagkamatadong. Tungod ini kay kita ngatanan diri-hingpit ngan natural nga nahihilig kita ngada ha diri-pagkamatadong. (Isaias 64:6) Dugang pa, ginpapalibotan kita han mga tawo nga gutiay la an pagtagad ha matadong nga mga paagi ni Jehova. An aton mga kahimtang pariho gud ha kahimtang ni Lot, nga nag-ukoy ha maraot gud nga siyudad han Sodoma. Hi apostol Pedro nagsaysay kon kay ano nga ginhunahuna ni Jehova nga angayan nga luwason hi Lot tikang ha tiarabot nga kabungkagan. Hi Pedro nagsiring: “Adto nga tawo matadong nga nag-ukoy ha butnga nira, nasakit ha adlaw-adlaw an iya matadong nga kalag, ha pagtan-aw ngan ha pamati ha ira mga binuhatan nga magngil-ad.” (2 Pedro 2:7, 8) Salit, an kada usa ha aton angay magpakiana: ‘Inuuyonan ko ba ha akon kasingkasing an imoral nga mga buhat nga aton nakikita ha aton palibot? An popular kondi madarahog nga kaliawan o isport diri la makapainteres para ha akon? O ginsasakit ba ako sugad kan Lot tungod hiton diri-magtadong nga mga buhat?’

19. Ano nga mga bendisyon an makakarawat naton kon nagkakaada kita kalipay ha pagkamatadong han Dios?

¹⁹ Hinin peligroso ngan waray-seguridad nga mga panahon, usa ka surok han seguridad ngan panalipod an pagkaada kalipay ha pagkamatadong ni  Jehova. Ha pakiana nga: “Jehova, hin-o ba an magpupuyo dida ha imo tabernakulo? Hin-o ba an magpupuyo dida ha imo baraan nga [bukid]?” hi Hadi David binaton: “An naglalakat hin hingpit, ngan nagbubuhat han katadongan.” (Salmo 15:1, 2) Pinaagi han pagbuhat han pagkamatadong han Dios ngan pagkaada kalipay dida hito, mahimo naton matipigan an maopay nga relasyon ha iya ngan padayon nga magpahimulos han iya pag-uyon ngan bendisyon. Salit, an aton kinabuhi amo an kinabuhi nga may kakontento, pagtahod-ha-kalugaringon, ngan kamurayawan ha hunahuna. “Hiya nga nasunod han katadongan ngan han pagpaid nakakaagi han kinabuhi, pagkamatadong, ngan dungog,” siring han Pulong han Dios. (Proberbios 21:21) Dugang pa, an pangalimbasog han aton gimaopayi ha pagbuhat han husto ngan matadong ha ngatanan nga aton buruhaton nangangahulogan hin malipayon nga personal nga mga relasyon ngan napauswag nga kalidad han kinabuhi—ha moral ngan espirituwal. An salmista nagpahayag: ‘Malipayon adton nagbubuhat han hustisya, nga nagbubuhat han pagkamatadong ha ngatanan nga takna.’—Salmo 106:3.

[Footnote]

Maisasaysay Mo Ba?

• Ano an pagkamatadong?

• Paonan-o an kaluwasan may kalabotan ha pagkamatadong han Dios?

• Tungod ha ano nga basihanan ginpapakamatadong han Dios an mga tawo?

• Paonan-o kita magkakaada kalipay ha pagkamatadong ni Jehova?

[Mga Pakiana]

[Mga Retrato ha pahina 15]

Iginpahayag ni Hadi David an kinasingkasing nga gugma ha mga balaud han Dios

[Mga Retrato ha pahina 16]

Ginpakamatadong han Dios hi Noe, Abraham, Sakarias ngan Elisabet, ngan hi Cornelio. Maaram ka ba kon kay ano?