Mga Pakiana Tikang ha mga Magbarasa

Kinahanglanon ba an bug-os nga pagpailarom ha tubig kon karuyag han usa ka tawo nga mabawtismohan kondi may-ada grabe nga sakit o diri gud maopay an kahimsog, nga magpapakuri han pagpailarom?

An pulong nga “pagbawtismo” tikang ha Griego nga berbo nga baʹpto, nga nangangahulogan hin pagtunlob. Ha Biblia, an “pagbawtismo” pariho ha “pagpailarom.” May kalabotan ha pagbawtismo ni Felipe ha Etiopiahanon nga yunuko, an The Emphasised Bible, ni Rotherham, nasiring: “Hira kinadto ha tubig, hi Felipe ngan an yunuko,—ngan iginpailarom niya hiya.” (Buhat 8:38) Salit, an tawo nga ginbabawtismohan aktuwal nga igintutunlob ha ilarom han tubig.—Mateo 3:16; Markos 1:10.

Hi Jesus nagsugo ha iya mga disipulo: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira.” (Mateo 28:19, 20) Tungod hito, an mga Saksi ni Jehova naghihikay hin mga bawtismo ha mga swimming pool, mga danaw, mga salog, o iba pa nga mga lugar diin may-ada igo nga tubig para han bug-os nga pagpailarom. Tungod kay kinahanglanon han Kasuratan an bawtismo pinaagi han bug-os nga pagpailarom, an mga tawo waray awtoridad nga diri bawtismohan an usa. Salit, sadang bawtismohan an usa bisan kon ginkikinahanglan an naiiba nga mga paagi tungod han iya kahimtang. Pananglitan, an mga bawtismo ha dagku nga mga bathtub nakakabulig para hadton lagas na o hadton diri gud maopay an kahimsog. An bathtub mahimo butangan hin malanhod nga tubig, an kandidato ha bawtismo mahimo nga hinay-hinay nga ibutang dida hito, ngan kon nakapahiuyon na, mahimo na buhaton an aktuwal nga pagbawtismo.

Bisan an mga tawo nga may-ada grabe nga mga sakit ginbabawtismohan. Pananglitan, ginbabawtismohan an mga indibiduwal nga operado ha but-ol ngan, sugad nga resulta, may-ada permanente nga buho ha but-ol, o adton nagkikinahanglan hin mekanikal nga respirator. Siyempre, an ngatanan han sugad nga mga bawtismo nagkikinahanglan hin maopay nga pangandam. Maaramon nga magkaada propesyonal nga nars o doktor kon posible. Kondi, kon ginhihimo an espesyal nga paghirot o mga pagbantay, ha haros ngatanan nga mga kahimtang, mahihimo an mga pagbawtismo. Salit, sadang himoon an ngatanan nga makatadunganon nga pangalimbasog basi mabawtismohan ha tubig an usa ka tawo kon ini an sinsero nga hingyap han indibiduwal ngan kon karuyag niya karawaton an mga peligro nga nahidadabi.