Nalimpyo Sugad nga Katawohan Para ha Mag-opay nga mga Buhat
Nalimpyo Sugad nga Katawohan Para ha Mag-opay nga mga Buhat
“[Maglimpyo] kita tikang ha ngatanan nga mga hugaw han unod ngan han espiritu, ngan paghingpiton ta an pagkaputli ha kahadlok ha Dios.”—2 KORINTO 7:1.
1. Ano an ginkikinahanglan ni Jehova hadton nagsisingba ha iya?
“HIN-O ba an masaka ngadto ha bukid ni Jehova? Ngan hin-o ba an matukdaw ha iya baraan nga kahimurutangan?” Iginpakiana ni Hadi David han kadaan nga Israel iton nakakaaghat-ha-paghunahuna nga pakiana mahitungod han pagsingba nga kinakarawat ni Jehova. Katapos, iya iginhatag an baton: “An may-ada mahamis nga mga kamot, ngan putli nga kasingkasing; an waray magbayaw ha [Akon] kalag ha pagbuwa, ngan waray manumpa hin limbong.” (Salmo 24:3, 4) Basi karawaton ni Jehova, nga amo an representasyon mismo han pagkabaraan, an usa kinahanglan magin limpyo ngan baraan. Una pa, ginpahinumdom ni Jehova an kongregasyon han Israel: “Pagbaraana an iyo kalugaringon, ngan magmabaraan kamo; kay ako baraan.”—Lebitiko 11:44, 45; 19:2.
2. Paonan-o pinabug-atan ni Pablo ngan Jakobo an pagkaimportante han kalimpyo ha totoo nga pagsingba?
2 Paglabay hin mga siglo, hi apostol Pablo nagsurat ha mga igkasi-Kristiano ha maraot an moral nga siyudad han Korinto: “Busa, nga aton ini nga mga saad, mga hinigugma, [maglimpyo] kita tikang ha ngatanan nga mga hugaw han unod ngan han espiritu, ngan paghingpiton ta an pagkaputli ha kahadlok ha Dios.” (2 Korinto 7:1) Iginpapatin-aw na liwat hini an punto nga basi magkaada relasyon ha Dios ngan makarawat an iya iginsaad nga mga bendisyon, an usa kinahanglan magin limpyo ngan waray buring ngan kahugaw ha pisikal ngan ha espirituwal. Sugad man, ha pagsurat mahitungod han pagsingba nga kinakarawat han Dios, an disipulo nga hi Jakobo nagsiring: “An relihiyon nga putli ngan waray buring ha atubangan han aton Dios ngan Amay amo ini; an paglaoy ha mga ilo ngan mga balo nga babaye ha ira mga kasakitan, ngan paglikay han buring hini nga kalibotan.”—Jakobo 1:27.
3. Basi karawaton han Dios an aton pagsingba, kinahanglan magin interesado gud kita ha ano?
3 Tungod kay importante hinduro ha totoo nga pagsingba an pagin limpyo, baraan, ngan waray buring, an bisan hin-o nga karuyag magkaada han pag-uyon han Dios sadang magin interesado gud ha pagtuman hini nga mga kinahanglanon. Kondi, tungod kay an mga tawo yana nga panahon may-ada nagkakaibaiba nga mga suruklan ngan mga ideya mahitungod han kalimpyo, kinahanglan masabtan ngan sundon naton an gintatagad ni Jehova nga limpyo ngan kinakarawat. Kinahanglan hibaroan naton kon ano an ginkikinahanglan han Dios ha iya mga magsiringba hini nga bahin ngan kon ano an iya ginbubuhat ha pagbulig ha ira nga magin limpyo ngan magpabilin nga limpyo ngan kinakarawat niya.—Salmo 119:9; Daniel 12:10.
Limpyo Para ha Totoo nga Pagsingba
4. Isaysay an ideya han kalimpyo sumala ha Biblia.
4 Ha kadam-an nga mga tawo, an pagin limpyo nangangahulogan la hin kawaray hugaw o buring. Kondi, ha Biblia, an ideya han pagin limpyo iginpapasabot han damu nga Hebreo ngan Griego nga mga pulong nga nagsasaysay han kalimpyo diri la ha pisikal kondi mas agsob ha moral ngan espirituwal nga kahulogan. Salit, an usa nga encyclopedia han Biblia nasiring: “An ‘limpyo’ ngan ‘diri-limpyo’ mga termino nga talagsahon la nga may kalabotan ha kalimpyo para ha kahimsog, kondi siyahan relihiyoso gud nga mga ideya. Sumala hini nga kahulogan, an prinsipyo han ‘kalimpyo’ nakakaapekto ha haros ngatanan nga bahin han kinabuhi.”
5. Ha ano nga sukol giniyahan han Mosaiko nga Balaud an kalimpyo ha kinabuhi han mga Israelita?
5 Oo, an Mosaiko nga Balaud nag-upod han mga surundon ngan mga regulasyon ha haros ngatanan nga bahin han kinabuhi han mga Israelita, nga espisipiko nga nagsasaysay kon ano an limpyo ngan kinakarawat ngan kon ano an diri. Pananglitan, ha Lebitiko kapitulo 11 tubtob 15, mababasa naton an detalyado nga mga instruksyon may kalabotan ha kalimpyo ngan kahugaw. May-ada mga hayop nga mahugaw, ngan an mga Israelita kinahanglan diri kumaon hito. An panganak makakahimo ha usa nga babaye nga mahugaw ha espisipiko nga peryodo han panahon. May-ada mga sakit ha panit, labi na an sanla, ngan mga agas ha mga organo han lalaki ngan babaye nga makakahimo liwat ha usa ka tawo nga mahugaw. Espisipiko nga iginsaysay liwat han Balaud kon ano an sadang buhaton ha mga kahimtang may kalabotan ha kahugaw. Pananglitan, ha Numeros 5:2, aton mababasa: “Sugoa an mga anak ni Israel, nga ira paiwason ha pahuwayan an ngatanan nga sanlahon, ngan an ngatanan nga may-ada nan-gugowa nga mahugaw, ngan bisan hin-o nga nahugawan tungod han minatay.”
6. Para ha ano nga katuyoan iginhatag an mga balaud may kalabotan ha kalimpyo?
6 Waray ruhaduha, ini ngan an iba pa nga mga balaud tikang kan Jehova may-ada abanse nga medikal ngan pisyolohikal nga mga punto antes pa hibaroan han mga doktor, ngan nagpahimulos an mga tawo han ira ginsunod ito. Kondi, ini nga mga balaud waray ighatag basi la magin giya ha kahimsog o ha mediko. Bahin ito han totoo nga pagsingba. An kamatuoran nga an mga balaud nag-upod han adlaw-adlaw nga kinabuhi han mga tawo—pagkaon, panganak, mga relasyon han mag-asawa, ngan iba pa—nagpabug-at gud nga sugad nga ira Dios, hi Jehova may-ada katungod ha pagbuot para ha ira kon ano an husto ngan kon ano an diri-husto ha ngatanan nga bahin han ira kinabuhi, nga esklusibo nga dedikado ngadto kan Jehova.—Deuteronomio 7:6; Salmo 135:4.
7. Pinaagi han pagsunod ha Balaud, ano nga bendisyon an makakarawat han nasud han Israel?
7 An Balaud nga kauyonan nagpanalipod liwat ha mga Israelita tikang ha mahugaw nga mga buhat han mga nasud nga nakapalibot ha ira. Pinaagi han matinumanon nga pagsunod ha Balaud, upod na an ngatanan nga mga kinahanglanon ha pagpabilin nga limpyo ha paniplatan ni Jehova, magigin takos an mga Israelita ha pag-alagad ha ira Dios ngan pagkarawat han iya bendisyon. May kalabotan hini, hi Jehova nagsiring ha nasud: “Kon masugot kamo ha akon tingog hin ungod, ngan pagbantayan niyo an akon kauyonan, dida hito maaakon kamo kalugaringon labaw ha ngatanan nga katawohan: kay akon an bug-os nga tuna. Ngan ha akon magigin ginhadian kamo han mga saserdote, ngan baraan nga nasud.”—Eksodo 19:5, 6; Deuteronomio 26:19.
8. Kay ano nga sadang tagdon han mga Kristiano yana nga panahon an ginsisiring ha Balaud mahitungod han kalimpyo?
8 Tungod kay igin-upod ni Jehova an sugad nga mga detalye ha Balaud basi tutdoan an mga Israelita kon paonan-o magigin limpyo, baraan, ngan kinakarawat ha iya, diri ba angayan para ha mga Kristiano yana nga panahon nga hunahunaon hin maopay kon paonan-o nira gintutuman ini nga mga kinahanglanon? Bisan kon an mga Kristiano diri ilarom han Balaud, kinahanglan hinumdoman nira nga, sugad han iginsaysay ni Pablo, an ngatanan nga iginsurat ha Balaud “amo an lambong han mga tiarabot nga mga bagay; kondi an [katumanan aada] kan Kristo.” (Kolosas 2:17; Hebreo 10:1) Kon hi Jehova nga Dios, nga nasiring ‘Ako diri nagbabag-o,’ nagtatagad han pagin limpyo ngan waray-buring sugad nga importante hinduro nga bahin ha totoo nga pagsingba hadto nga panahon, kinahanglan tagdon naton yana hin seryoso an pagin limpyo ha pisikal, moral, ngan espirituwal kon karuyag naton makarawat an iya pag-uyon ngan bendisyon.—Malakias 3:6; Roma 15:4; 1 Korinto 10:11, 31.
An Pisikal nga Kalimpyo Nagrirekumenda ha Aton
9, 10. (a) Kay ano nga importante ha usa nga Kristiano an pisikal nga kalimpyo? (b) Ano an agsob nga mga komento mahitungod han mga kombensyon han mga Saksi ni Jehova?
9 Importante pa ba nga bahin han totoo nga pagsingba an pisikal nga kalimpyo? Bisan kon an pisikal nga kalimpyo la diri nakakahimo ha usa nga magin totoo nga magsiringba han Dios, angayan gud nga an totoo nga magsiringba magin limpyo ha pisikal tubtob nga igintutugot han iya mga kahimtang. Labi na yana ha aton panahon, nga damu nga mga tawo an diri nagtatagad ha pagtipig nga limpyo han ira kalugaringon, han ira pamado, o han ira mga palibot, adton nagtitipig han ira kalugaringon nga limpyo agsob nga naoobserbahan han mga tawo ha ira palibot. Mahimo ini magkaada hin maopay nga mga resulta, sugad la han ginsiring ni Pablo ha mga Kristiano ha Korinto: “Diri kami naghahatag hin katigayonan hin paghipakdol ha bisan ano nga bagay, basi nga an amon pag-alagad diri pagbutangan hin sala; kondi ha ngatanan nga mga bagay nagpapakamaopay kami ha amon mga kalugaringon, sugad nga mga ministro kami han Dios.”—2 Korinto 6:3, 4.
10 Agsob kumendasyonan han mga opisyal han gobyerno an mga Saksi ni Jehova tungod han ira limpyo, mahapsay, ngan matinalahuron nga paggawi ngan mga batasan, nga nakikita labi na ha ira dagku nga mga kombensyon. Pananglitan, mahitungod han usa nga kombensyon nga gindumara ha probinsya han Savona, Italya, an peryodiko nga La Stampa nagkomento: “An naoobserbahan dayon kon nasulod an usa ha mga pasilidad amo an kalimpyo ngan kahapsay han mga tawo nga nagamit hito.” Katapos han kombensyon han mga Saksi ha usa nga estadyum ha São Paulo, Brazil, an usa nga opisyal han estadyum nagsiring ha iya superbisor ha paglimpyo: “Tikang yana karuyag naton nga limpyohan an estadyum pariho han paglimpyo han mga Saksi ni Jehova.” Usa pa nga opisyal hito nga estadyum an nagsiring: “Kon karuyag han mga Saksi ni Jehova magplete ha estadyum, problema la namon an mga petsa. Waray na kami iba nga problema.”
11, 12. (a) Ano nga prinsipyo ha Biblia an sadang hinumdoman naton mahitungod han personal nga kalimpyo? (b) Ano nga mga pakiana an mahimo igbangon mahitungod han aton personal nga mga batasan ngan paagi han pagkinabuhi?
11 Kon an kalimpyo ngan kahapsay ha aton katirokan han pagsingba mahimo magin surok han pagdayaw ha Dios nga aton ginsisingba, sigurado nga pariho kaimportante an pagpakita hini nga mga kalidad ha aton pribado nga kinabuhi. Kondi, ha aton pribado nga balay, bangin abaton naton nga may-ada kita katungod nga magpasibaya ngan buhaton an aton karuyag. Ngan kon mahitungod han pamado ngan pag-ayos, sigurado nga may-ada kita kagawasan ha pagpili han inaabat naton nga komportable ngan makaruruyag! Kondi, ha daku nga sukol, relatibo la ini nga kagawasan. Hinumdumi nga ha paghisgot han karuyag nga mga pagkaon han usa ka tawo, hi Pablo nagpahamangno ha iya mga igkasi-Kristiano: “Magmatngon kamo bangin nga ini nga iyo gahum amo an mahimo nga hipakdolan ha mga maluya.” Katapos iya iginsaysay an importante nga prinsipyo: “An ngatanan nga mga bagay tugot han balaud; kondi diri an ngatanan angay. An ngatanan tugot han balaud; kondi diri an ngatanan nakakarig-on.” (1 Korinto 8:9; 10:23) Paonan-o an sagdon ni Pablo naaplikar ha aton mahitungod han kalimpyo?
12 Makatadunganon la nga sadang laoman han mga tawo an usa nga ministro han Dios nga magin limpyo ngan mahapsay ha iya paagi han pagkinabuhi. Salit, sadang siguruhon naton nga an hitsura han aton panimalay ngan mga palibot hito diri nakakadaot han aton pag-angkon nga mga ministro kita han Pulong han Dios. Ano nga klase hin pagtestigo, o pagpamatuod, an iginhahatag han aton panimalay mahitungod ha aton ngan ha aton mga tinotoohan? Ipinapakita ba hito nga sinsero nga ginhihingyap naton an pag-ukoy ha limpyo ngan mahapsay nga bag-o nga kalibotan han katadongan, nga iginrirekomenda gud naton ha iba? (2 Pedro 3:13) Sugad man, an aton personal nga hitsura—ha panahon man han kaliawan o ha ministeryo—mahimo makadugang o makaiban han pakadani han mensahe nga aton iginsasangyaw. Pananglitan, tigamni ini nga komento han usa nga reporter han peryodiko ha Mexico: “Totoo, damu hinduro an mga batan-on ha mga Saksi ni Jehova, ngan makatirigamnan an ira mga arot, kalimpyo, ngan angayan nga pamado.” Makalilipay gud nga kaupod naton an sugad nga mga batan-on!
13. Ano an mahihimo naton ha pagsiguro nga limpyo ngan mahapsay an ngatanan nga bahin han aton adlaw-adlaw nga pagkinabuhi?
13 Siyempre, an pagsiguro nga an aton lawas, an aton mga panag-iya, ngan an aton panimalay pirme limpyo ngan mahapsay mas masayon sidngon kay ha buhaton. An ginkikinahanglan, diri an damu nga komplikado ngan mahal nga garamiton, kondi an maopay nga pagplano ngan nagpapadayon nga pangalimbasog. Kinahanglan mag-eskedyol hin panahon ha paglimpyo ha aton lawas, ha aton mga bado, ha aton balay, ha aton sarakyan, ngan ha iba pa. An pagin okupado ha ministeryo, pagtambong ha katirok, ngan personal nga pag-aram—dugang pa ha pagmangno ha iba nga mga obligasyon ha adlaw-adlaw—diri naghahatag ha aton hin hinungdan nga diri magpabilin nga limpyo ngan kinakarawat ha paniplatan han Dios ngan han mga tawo. An pamilyar nga prinsipyo nga ‘an tagsa nga butang may-ada itinanda nga panahon’ naaplikar gud liwat hini nga bahin han aton kinabuhi.—Eklesiastes 3:1.
An Kasingkasing nga Waray Buring
14. Kay ano nga masisiring nga an moral ngan espirituwal nga kalimpyo mas importante pa gud kay han pisikal nga kalimpyo?
14 Kon importante an pagtagad ha pisikal nga kalimpyo, mas importante pa gud nga magin interesado ha moral ngan espirituwal nga kalimpyo. Mahuhunahuna naton ini pinaagi han paghinumdom nga iginsalikway ni Jehova an nasud han Israel, diri tungod kay mahugaw hira ha pisikal, kondi tungod kay nagin mahugaw hira ha moral ngan ha espirituwal. Pinaagi kan propeta Isaias, hi Jehova nagsumat ha ira nga tungod han ira pagin “makasasala nga nasud, katawohan nga nagpapas-an han karat-an,” an ira mga halad, an ira pagsaurog han bag-o nga bulan ngan adlaw nga iparahuway, oo, bisan an ira mga pag-ampo nagin mabug-at ha iya. Ano an sadang buhaton nira basi makarawat utro an pag-uyon han Dios? Hi Jehova nagsiring: “Panhimsaw kamo, [maglimpyo] kamo; isalikway an karaotan han iyo mga binuhatan tikang ha atubangan han akon mga mata; hunong ha pagbuhat han maraot.”—Isaias 1:4, 11-16.
15, 16. Ano an ginsiring ni Jesus nga nakakahugaw ha tawo, ngan paonan-o kita makakapahimulos tikang ha mga pulong ni Jesus?
15 Basi maapresyar pa gud an pagkaimportante han moral ngan espirituwal nga kalimpyo, tagda an ginsiring ni Jesus han an mga Pariseo ngan mga eskriba nagsiring nga an iya mga disipulo mga mahugaw tungod kay diri hira nanhuhunaw antes kumaon. Gintadong hira ni Jesus pinaagi han pagsiring: “Diri adton nasulod ha baba an nakakalamiri han tawo; kondi an nagowa ha baba amo an nakakalamiri han tawo.” Katapos, hi Jesus nagsaysay: “An mga bagay nga nagowa ha baba, nagowa [tikang] ha kasingkasing; ngan hira nakakalamiri han tawo. Kay tikang ha kasingkasing nagawas an magraot nga mga hunahuna, mga pagpatay ha igkasitawo, mga pakighilawas, mga panlibog, mga pangawat, mga buwa nga pagtestigo, mga pagpakaalo. Ini amo an mga bagay nga nakakalamiri han tawo, kondi an pagkaon nga diri maghunaw diri nakakalamiri ha tawo.”—Mateo 15:11, 18-20.
16 Ano an mahibabaroan naton tikang ha mga pulong ni Jesus? Iginpapatin-aw ni Jesus nga an maraot, imoral, ngan mahugaw nga mga binuhatan inuunahan han maraot, imoral ngan mahugaw nga mga hilig ha kasingkasing. Sugad han ginsiring han disipulo nga hi Jakobo, “an tagsatagsa ginsusulay, kon ginsisimang ngan gin-uulohan han iya kalugaringon nga kaipa.” (Jakobo 1:14, 15) Salit, kon diri naton karuyag nga makabuhat hin seryoso nga mga sala nga iginsaysay ni Jesus, kinahanglan bug-os nga kuhaon naton ngan diri tugotan an aton kasingkasing nga magkaada han bisan ano nga mga hilig ha sugad nga mga butang. Nangangahulogan ito nga kinahanglan magin mabinantayon kita mahitungod han aton ginbabasa, ginkikita, ngan pinamamatian. Yana nga panahon, tungod han kagawasan ha pagyakan ngan pagsunod ha arte, an mga industriya han kaliawan ngan pag-anunsyo hin mga produkto naghihimo hin damu hinduro nga mga tunog ngan mga kiritaon nga nag-aaghat han mga kaipa han makasasala nga unod. Sadang magin determinado kita nga diri tugotan an bisan ano hito nga mga ideya nga magpabilin ha aton kasingkasing. An importante nga punto amo nga basi magin makalilipay ngan kinakarawat han Dios, kinahanglan magbantay kita pirme basi matipigan an limpyo ngan waray buring nga kasingkasing.—Proberbios 4:23.
Nalimpyo Para ha Mag-opay nga mga Buhat
17. Kay ano nga gindadara ni Jehova an iya katawohan ngada ha limpyo nga kahimtang?
17 Usa nga bendisyon ngan panalipod gud nga, pinaagi han bulig ni Jehova, makakapahimulos kita han limpyo nga kahimtang ha iya atubangan. (2 Korinto 6:14-18) Kondi, inaapresyar liwat naton nga gindadara ni Jehova an iya katawohan ngada ha limpyo nga kahimtang para ha espisipiko nga katuyoan. Hi Pablo nagsiring kan Tito nga hi Kristo Jesus “naghatag han iya kalugaringon tungod ha aton, ha pagtubos ha aton tikang ha ngatanan nga magraot, ngan pagputli tungod ha iya hin usa nga katawohan nga iya kalugaringon, nga [madasigon] ha mga mag-opay nga buhat.” (Tito 2:14) Sugad nga nalimpyo nga katawohan, sadang magin madasigon kita ha ano nga mga buhat?
18. Paonan-o naton maipapakita nga madasigon kita para ha mag-opay nga mga buhat?
18 Siyahan, sadang mangalimbasog kita ha pagpahayag ha publiko han maopay nga sumat han Ginhadian han Dios. (Mateo 24:14) Ha pagbuhat hito, iginpipresentar naton ha mga tawo ha bisan diin an paglaom nga mabuhi ha waray kataposan ha tuna nga waray kahugaw han bisan ano nga klase. (2 Pedro 3:13) An aton mag-opay nga mga buhat nag-uupod liwat han pagpakita han mga bunga han espiritu han Dios ha aton adlaw-adlaw nga kinabuhi, salit naghihimaya han aton langitnon nga Amay. (Galasia 5:22, 23; 1 Pedro 2:12) Ngan diri naton hinngangalimtan adton waray ha kamatuoran nga bangin nadaot gud han natural nga mga kalamidad o mga trahedya nga buhat han mga tawo. Nahinunumdoman naton an sagdon ni Pablo: “Busa niyan, nga may-ada ta katigayonan, magbuhat kita han maopay ha ngatanan nga mga tawo, labi na gud ha panimalay han pagtoo.” (Galasia 6:10) Ito ngatanan nga mga serbisyo, nga ginbubuhat tikang ha limpyo nga kasingkasing ngan may putli nga motibo, makalilipay gud ha Dios.—1 Timoteo 1:5.
19. Ano nga mga bendisyon an naghuhulat ha aton kon padayon nga tipigan naton an hitaas nga suruklan han kalimpyo—ha pisikal, moral, ngan espirituwal?
19 Sugad nga mga surugoon han Gihitaasi, ginsusunod naton an mga pulong ni Pablo: “Mga kabugtoan, nanginginyupo ako ha iyo tungod ha kalooy han Dios, nga ighalad niyo an iyo mga lawas sugad han buhi nga halad, maputli, karuruyagon ha Dios, nga amo an iyo espirituhanon nga pag-alagad.” (Roma 12:1) Hinaot padayon nga pabilhan naton an pribilehiyo han pagin nalimpyo ni Jehova ngan buhaton an aton mahihimo ha pagtipig han hitaas nga suruklan han pisikal, moral, ngan espirituwal nga kalimpyo. An pagbuhat hito makakahatag ha aton diri la han pagtahod-ha-kalugaringon ngan katagbaw yana kondi liwat han paglaom nga makita nga waray na “an siyahan nga mga butang”—an presente nga maraot ngan mahugaw nga sistema—kon ‘himoon na han Dios an ngatanan nga butang nga bag-o.’—Pahayag 21:4, 5.
Nahinunumdoman Mo Ba?
• Kay ano nga gintagan an mga Israelita hin damu nga mga balaud ha kalimpyo?
• Paonan-o an pisikal nga kalimpyo nagdudugang han pakadani han mensahe nga aton iginsasangyaw?
• Kay ano nga an moral ngan espirituwal nga kalimpyo mas importante pa gud kay han pisikal nga kalimpyo?
• Paonan-o naton maipapakita nga kita an katawohan nga ‘madasigon para ha mag-opay nga mga buhat’?
[Mga Pakiana]
[Mga Retrato ha pahina 21]
An pisikal nga kalimpyo nagdudugang han pakadani han mensahe nga aton iginsasangyaw
[Retrato ha pahina 22]
Nagpahamangno hi Jesus nga an maraot nga mga panhunahuna nagtutugway ha maraot nga mga buhat
[Mga Retrato ha pahina 23]
Sugad nga nalimpyo nga katawohan, madasigon an mga Saksi ni Jehova para ha mag-opay nga mga buhat