“Nanlusad Hira”

“An mga kahiladman nagtabon ha ira: tinugdang hira ngadto ha kahiladman sugad hin bato.”

PINAAGI hito nga mga pulong, ginsaurog ni Moises ngan han mga Israelita pinaagi han kanta an ira kaluwasan ha Dagat nga Pula ngan an pagkamatay han naglalanat ha ira nga mga Ehiptohanon nga kaaway—hi Paraon ngan an iya mga puwersa militar.—Eksodo 15:4, 5.

Para ha bisan hin-o nga nakakita hiton makatirigamnan nga hitabo, matin-aw gud an leksyon. Waray bisan hin-o nga maglalampos ha pag-ayat o pagkontra han awtoridad ni Jehova ngan mabuhi pa. Kondi, paglabay han mga pipira la ka bulan, an prominente nga mga Israelita—hi Kore, Datan, Abiram, ngan an 250 nga nasuporta—dayag nga nangayat han hatag-han-Dios nga awtoridad ni Moises ngan Aaron.—Numeros 16:1-3.

Ha sugo ni Jehova, hi Moises nagpahamangno ha mga Israelita nga bumulag ha mga tolda han mga rebelde. Hi Datan ngan Abiram, nga inupdan han mga membro han ira mga pamilya, rebelyoso nga nagdumiri ha pagbag-o han ira paggios. Katapos, iginpahibaro ni Moises nga ha Iya kalugaringon nga paagi, ipapatin-aw ni Jehova ha katawohan nga ini nga kalalakin-an ‘waray magtahod kan Jehova.’ Hito nga takna, ginbuka ni Jehova an tuna nga ira tinitindogan. “Busa hira, ngan an ngatanan nga ira, nanlusad ngadto ha Sheol nga mga buhi: ngan an tuna nagtabon ha ira.” Kumusta man hi Kore ngan an iba nga mga rebelde? “Inulyab an kalayo tikang kan Jehova, ngan [ginlamoy] an duha ka gatos kalim-an nga tawo nga naghalad hin insenso.”—Numeros 16:23-35; 26:10.

Hi Paraon ngan an iya kasundalohan, sugad man an mga rebelde ha kamingawan, nagkamatay ngatanan tungod kay napakyas hira ha pagkilala han awtoridad ni Jehova ngan ha iya interes ha mga buruhaton han iya katawohan. Importante, kon sugad, nga an ngatanan nga makakakita han panalipod ni Jehova hinin magpakalilisang nga mga panahon mahibaro ngan sumugot kan Jehova sugad nga “an Gihitaasi” ngan ‘an Usa nga Makagarahum-ha-ngatanan.’ Ha pagbuhat hito, makakasarig hira hini nga mga pulong ni Jehova: “Usa ka yukot an matutumba ha imo ligid, ngan napulo ka yukot ha imo too nga kamot; kondi diri ito mapahirani ha imo. Pagtatan-awon mo la han imo mga mata, ngan makikita nimo an balos ha mga magraot. Kay ikaw, O Jehova, amo an akon arayopan! An Gihitaasi imo iginbutang nga imo urukyan.”—Salmo 91:1, 7-9.