Hirani Na Matapos an mga Problema han Katawohan!

“LIMITADO an bili han pagbulig ha mga tawo kon diri ito bahin han mas kaylap nga plano ngan kon waray ito suporta han mga politiko nga an tumong amo an pagsulbad han gintitikangan nga mga hinungdan han araway. Pauroutro nga ipinapakita han panhitabo nga an pagbulig la ha mga tawo diri makakasulbad ha mga problema nga nakagamot ha politika.”—The State of the World’s Refugees 2000.

Bisan pa han duro nga pagbulig ha mga tawo, an mga problema han katawohan padayon nga nagdadamu nga diri napupugngan. May-ada ba posibilidad han nagpapadayon nga solusyon pinaagi han politika? Ha pagkamatuod, gutiay hinduro. Kondi diin pa kita mamimiling? Ha makatirigamnan nga mga pulong ha tinikangan han iya surat ha mga Kristiano ha Efeso, iginsasaysay ni apostol Pablo kon paonan-o tatapuson han Dios an ngatanan nga mga problema han mga tawo. Iya pa ngani iginpapahibaro kon ano nga instrumento an gagamiton han Dios ha pagbuhat hini—an instrumento nga magkukuha han gintitikangan nga mga hinungdan han ngatanan nga mga problema nga nagdadaot ha aton yana nga panahon. Kay ano nga diri tagdon kon ano an isisiring ni Pablo? An teksto makikita ha Efeso 1:3-10.

“Basi Tirukon Utro an Ngatanan nga Butang kan Kristo”

An katuyoan han Dios, siring han apostol, amo an para ha tinatawag niya nga “usa nga administrasyon [o pagdumara han mga buruhaton] ha bug-os nga tubtoban han itinanda nga mga panahon.” Ano an iginpapasabot hini? Nangangahulogan ito nga an Dios may-ada itinanda nga panahon kon san-o hiya magios ha usa nga paagi “basi tirukon utro an ngatanan nga butang kan Kristo, an mga butang ha mga langit ngan an mga butang ha tuna.” (Efeso 1:10, NW) Oo, gintikangan na paggamit han Dios an usa nga kahikayan basi ipahiuyon utro an ngatanan ha langit ngan ha tuna ilarom han iya direkta nga pagdumara. Makapainteres, may kalabotan ha termino dinhi nga iginhubad nga “basi tirukon utro,” an eskolar ha Biblia nga hi J. H. Thayer nasiring: “Pag-urusahon utro para ha iya kalugaringon . . . an ngatanan nga mga butang ngan mga tawo (nga tubtob yana nabahin tungod han sala) ngadto ha usa nga gin-urosa nga kahimtang han pakig-upod kan Kristo.”

Nagtutudlok ito ha panginahanglan para han Dios nga buhaton ini kon tatagdon kon paonan-o  siyahan nagkaada hin pagkabahin-bahin. Temprano ha kasaysayan han tawo, an aton orihinal nga mga kag-anak, hira Adan ngan Eva, sumunod kan Satanas nga Yawa ha pagrebelde kontra ha Dios. Karuyag nira nga magkaada hin kagawasan ha porma han katungod ha pagdesisyon para ha ira kalugaringon kon ano an maopay ngan maraot. (Genesis 3:1-5) Uyon ha hustisya han Dios, ginpagawas hira tikang ha pamilya han Dios ngan nautod an ira relasyon ha iya. Ira gindara an katawohan ngadto ha pagkadiri-hingpit upod an ngatanan nga makangingirhat nga mga resulta nga aton naieksperyensyahan yana nga panahon.—Roma 5:12.

Temporaryo nga Pagtugot han Karaotan

‘Kay ano nga gintugotan hira han Dios nga buhaton ito?’ bangin magpakiana an iba. ‘Kay ano nga waray na la niya gamita an iya supremo nga gahum ngan ipadapat an iya kaburut-on, basi mapugngan an ngatanan nga kasakit ngan pag-antos nga aton naieksperyensyahan yana?’ Bangin natural nga hunahunaon ito. Kondi ano gud an pamamatud-an han sugad nga paggamit han daku nga gahum? Gindadayaw mo ba o inuuyonan an bisan hin-o nga ha siyahan nga tigaman han pagsupak ginbubungkag dayon an ngatanan nga nakontra tungod kay may-ada hiya gahum ha pagbuhat hin sugad? Sigurado nga diri.

Ha pagkamatuod waray ayata hito nga mga rebelde an gihitaasi nga gahum han Dios. Mas espisipiko nga gin-ayat nira an pagkaada legal nga katungod ngan pagkamatadong han iya paagi ha pagmando. Basi permanente nga masulbad an importante nga mga isyu nga iginbangon, gintutugotan ni Jehova an iya mga linarang nga mandoan an ira kalugaringon nga waray niya direkta nga pagdumara ha sulod hin limitado nga panahon. (Eklesiastes 3:1; Lukas 21:24) Kon matapos na ito nga panahon, maghihilabot hiya basi bug-os nga pagdumarahon utro an tuna. Hito nga panahon magigin matin-aw hinduro nga an iya paagi han pagmando an amo la nga paagi nga naggagarantiya hin nagpapadayon nga kamurayawan, kalipay, ngan kahuraan ha mga umurukoy han tuna. Katapos an ngatanan nga mga nagtatalumpigos ha kalibotan kukuhaon ha kadayonan.—Salmo 72:12-14; Daniel 2:44.

“Ha Waray Pa Paghihimoa an Kalibotan”

Maiha na nga katuyoan ni Jehova nga buhaton ini ngatanan. Hi Pablo nasiring nga “ha waray pa paghihimoa an kalibotan.” (Efeso 1:4) Diri ito antes pa ha paglarang han tuna o kan Adan ngan Eva. Ito nga kalibotan “duro hin kaopay,” ngan waray pa magtikang an pagrebelde. (Genesis 1:31) Ano nga “kalibotan” kon sugad an iginpasabot ni Pablo? An kalibotan han mga anak nira Adan ngan Eva—an makasasala, diri-hingpit nga kalibotan han katawohan nga may-ada paglaom nga malukat. Antes natawo an bisan hin-o nga kabataan, maaram na hi Jehova kon paonan-o niya pagdudumarahon an mga panhitabo basi magtagana hin katalwasan para ha malulukat nga katulinan ni Adan.—Roma 8:20.

Siyempre, diri iginpapasabot hini nga kinahanglan pagdumarahon han Soberano han uniberso an mga butang sugad han pagdumara han mga tawo. Tungod kay kinikilala nga bangin mahitabo an usa nga kasuruk-an, nagpaplano hira hin magkalainlain nga detalyado nga mga estratihiya basi malamposan an kahimtang. Diri sugad hito an Dios, an Dios nga makagarahum ha ngatanan naghihimo la han iya katuyoan ngan nagtutuman hito. Bisan pa hito, iginsasaysay ni Pablo kon paonan-o ginsiguro ni Jehova nga sulbaron an mga butang basi makagdara hin permanente nga katalwasan ha katawohan. Ano ito nga mga paagi?

Hin-o an Magdadara hin Katalwasan?

Iginsasaysay ni Pablo nga an dinihogan han espiritu nga mga disipulo ni Kristo may-ada espesyal nga bahin ha pagpara han kadaot nga nahimo han sala ni Adan. Hi Jehova ‘nagpili ha aton nga kahiusa ni Kristo,’ siring ni Pablo, basi magmando kaupod ni Jesus ha iya langitnon nga Ginhadian. Ha dugang nga pagsaysay hini, hi Pablo nasiring nga “ginpili kita [ni Jehova] nga daan nga mga inangkon nga mga anak tungod kan Jesu-Kristo ha iya kalugaringon.” (Efeso 1:4, 5) Siyempre, hi Jehova waray magpili, o magtanda nga daan, ha ira sugad nga mga indibiduwal. Kondi, iya itinanda nga daan an usa nga grupo han matinumanon ngan debotado nga katawohan nga makakaupod ni Kristo ha pagwara han kadaot nga gindara ni Satanas nga Yawa, ngan nira Adan ngan Eva, ha tawhanon nga pamilya.—Lukas 12:32; Hebreo 2:14-18.

Urusahon gud ito! Ha iya orihinal nga ayat kontra ha pagkasoberano han Dios, iginpasabot ni Satanas nga may-ada depekto an tawhanon nga mga linarang han Dios—nga kon aada ha igo nga pagtimaraot o pagsulay, hira ngatanan magrirebelde kontra ha pagmando han Dios. (Job 1:7-12;  2:2-5) Ha daku nga kapahayagan han ‘iya mahimayaon nga grasya [“diri-takos nga pagkabuotan,” “NW”],’ inabot an panahon nga iginpakita ni Jehova nga Dios an iya pagsarig ha iya tunan-on nga mga linarang pinaagi han pagkuha hin pipira tikang ha makasasala nga pamilya ni Adan basi magin iya espirituwal nga mga anak. Adton aada hinin gutiay nga grupo pagdadad-on basi mag-alagad ha langit. Para ha ano nga katuyoan?—Efeso 1:3-6; Juan 14:2, 3; 1 Tesalonika 4:15-17; 1 Pedro 1:3, 4.

Ini nga mga pinakaanak han Dios, siring ni apostol Pablo, nagigin “mga manurunod upod ni Kristo” ha iya langitnon nga Ginhadian. (Roma 8:14-17) Sugad nga mga hadi ngan mga saserdote, makikigbahin hira ha paghatag hin kagawasan ha tawhanon nga pamilya tikang ha kasakit ngan pag-antos nga naieksperyensyahan hito yana. (Pahayag 5:10) Oo, “an bug-os nga binuhat naghaharoy ngan nasasakit ha pagkaanak ngada niyan.” Kondi, ha diri maiha, inin espesyal nga pinili nga mga anak han Dios masunod kan Jesu-Kristo ha pagbuhat, ngan an ngatanan nga masinugtanon nga katawohan makausa pa nga “[mahigagawas] tikang ha pagkauripon han pagkamadinunuton ngadto ha kaluwasan han paghimaya han mga anak han Dios.”—Roma 8:18-22.

“Kagawasan Pinaagi han Lukat”

Ini ngatanan nagin posible pinaagi han pinakamakatirigamnan ngan mahimayaon nga kapahayagan han diri-takos nga pagkabuotan han Dios ngada hini nga kalibotan han malulukat nga katawohan—an halad lukat ni Jesu-Kristo. Hi Pablo nagsurat: “Ha [kan Jesu-Kristo] aada an aton paglukat [“kagawasan pinaagi han lukat,” “NW”] tungod ha iya dugo, an pagpasaylo han aton mga pagtalapas, uyon ha kamanggaran han iya grasya.”—Efeso 1:7.

Hi Jesu-Kristo an importante nga persona ha katumanan han katuyoan han Dios. (Hebreo 2:10) An iya halad lukat nagigin legal nga basihanan basi kuhaon ni Jehova an pipira han mga katulinan ni Adan ngadto ha iya langitnon nga pamilya ngan basi talwason an katawohan ha mga resulta han Adaniko nga sala, nga diri ginpapaluya an pagsarig ha Iya mga balaud ngan mga prinsipyo. (Mateo 20:28; 1 Timoteo 2:6) Hi Jehova nagbubuhat ha paagi nga nagpapahitaas han iya pagkamatadong ngan nagtatagbaw ha mga ginkikinahanglan han hingpit nga hustisya.—Roma 3:22-26.

An ‘Sagrado nga Tinago’ han Dios

Ha sulod hin yinukot ka tuig, waray ipahayag hin eksakto han Dios kon paonan-o niya tutumanon an iya katuyoan para ha tuna. Ha siyahan nga siglo K.P., “iginpakilala niya ha [mga Kristiano] an sagrado nga tinago han iya kaburut-on.” (Efeso 1:9, NW) Hi Pablo ngan an iya igkasi-dinihogan nga mga Kristiano matin-aw nga nakasabot han makatarag-ob nga bahin nga igintoka kan Jesu-Kristo ha katumanan han katuyoan han Dios. Nagtikang liwat hira makasabot han ira espesyal nga bahin sugad nga kaupod nga mga manurunod ni Kristo ha iya langitnon nga Ginhadian. (Efeso 3:5, 6, 8-11) Oo, an gobyerno han Ginhadian ha pagdumara ni Jesu-Kristo ngan han iya kaupod nga mga magmarando amo an instrumento nga gagamiton han Dios ha pagdara han nagpapadayon nga kamurayawan diri la ha kalangitan kondi ha tuna liwat. (Mateo 6:9, 10) Pinaagi hito, ibabalik ni Jehova ini nga tuna ngadto ha kahimtang nga iya katuyoan ha tinikangan.—Isaias 45:18; 65:21-23; Buhat 3:21.

An iya itinanda nga panahon para han direkta nga pagwara han ngatanan nga panalumpigos ngan kawaray-hustisya ha tuna hirani na mahitabo. Kondi hi Jehova tinuod nga nagtikang han proseso ha pagpahiuli han Pentekostes 33 K.P. Paonan-o? Pinaagi ha pagtikang hito nga panahon ha pagtirok han “mga bagay nga aadto ha langit,” adton magmamando upod kan Kristo ha kalangitan. Nag-uupod ini han taga-Efeso nga mga Kristiano. (Efeso 2:4-7) Mas bag-o pa la, ha aton panahon, hi Jehova  nagtitirok “han mga butang ha tuna.” (Efeso 1:10, NW) Pinaagi han bug-os-kalibotan nga kampanya ha pagsangyaw, iya iginpapahibaro ngadto ha ngatanan nga mga nasud an maopay nga sumat mahitungod han gobyerno han iya Ginhadian ha pagdumara ni Jesu-Kristo. Adton nakarawat gintitirok na bisan yana ngadto ha usa ka lugar han espirituwal nga pagpanalipod ngan pagtambal. (Juan 10:16) Diri na maiha, ha nalimpyo nga paraiso nga tuna, makakaeksperyensya hira hin bug-os nga kagawasan tikang ha ngatanan nga kawaray-hustisya ngan pag-antos.—2 Pedro 3:13; Pahayag 11:18.

“Damu nga urusahon nga mga pag-uswag” an nahimo na ha mga pangalimbasog nga buligan an gintatalumpigos nga katawohan. (The State of the World’s Children 2000) Kondi, an pinakaurusahon nga pitad amo an tiarabot nga panhilabot ni Kristo-Jesus ngan han iya kaupod nga mga magmarando ha langitnon nga gobyerno han Ginhadian. Bug-os nga kukuhaon nira an ngatanan nga gintitikangan nga mga hinungdan han kasamok ngan an ngatanan iba nga mga karaotan nga nakakadaot ha aton. Ira tatapuson an ngatanan nga problema han katawohan.—Pahayag 21:1-4.

[Mga Retrato ha pahina 4]

An mga buhat ha pagbulig ha mga tawo diri nakakasulbad han mga problema han katawohan

[Retrato ha pahina 6]

An halad lukat ni Kristo nagtagana ha katawohan hin katalwasan tikang ha Adaniko nga sala

[Retrato ha pahina 7]

Posible nga makabiling hin espirituwal nga panalipod ngan pagtambal yana

[Mga Retrato ha pahina 7]

Diri na maiha, pinaagi han Mesianiko nga Ginhadian, maabot an bug-os nga katalwasan tikang ha mga problema