An Paglakat ha mga Agianan ni Jehova Nagdadara hin Hura nga mga Balos

NAKAGBAKTAS ka na ba ha kabukiran? Kon nakagbaktas ka na, posible nga inabat mo nga baga hin aadto ka ha bawbaw han kalibotan. Makalilipay gud an pagginhawa han presko nga hangin, an pagkita ha hirayo, an pagpahimulos han natural nga kaanyag! Bangin an mga kabaraka han nakadto ka pa ha ubos baga hin diri na gud importante.

Ha kadam-an nga mga tawo an sugad nga mga eskursyon talagsahon la, kondi kon dedikado ka nga Kristiano, bangin naglilinakat-lakat ka ha kabukiran ha sulod hin pipira na ka panahon—ha espirituwal nga paagi. Pariho ha salmista han naglabay, waray ruhaduha nga nag-ampo ka: “Igtutdo ha akon an imo agianan, O Jehova: tutdui ako han imo mga dalan.” (Salmo 25:4) Nahinunumdoman mo ba an imo inabat han imo siyahan nga pagsaka ha bukid han balay ni Jehova ngan pagtikang ha paglakat ha hitaas nga mga lugar? (Mika 4:2; Habakuk 3:19) Waray ruhaduha, nasantop mo dayon nga an paglakat dida hinin hitaas nga mga agianan han putli nga pagsingba naghatag ha imo hin panalipod ngan kalipay. Nagtikang ka umabat han mga pagbati han salmista: “Bulahan an katawohan nga nasabot han malipayon nga tingog; naglalakat hira, O Jehova, ha kalamragan han imo nawong.”—Salmo 89:15.

Kondi, usahay kinahanglan pangalimbasogan han mga nagbabaktas ha kabukiran an paglakat ha higrayo, tindog nga mga bakilid. An ira mga bitiis nagtitikang mag-ul-ol, ngan nagluluya hira. Kita liwat mahimo makaeksperyensya hin mga kakurian ha aton pag-alagad ha Dios. Diri pa la maiha, an aton mga pitad bangin baga hin makuri. Paonan-o naton maibabalik an aton kadasig ngan kalipay? An siyahan nga pitad amo an pagkilala han pagkahitaas han mga paagi ni Jehova.

An Hitaas nga mga Balaud ni Jehova

An mga paagi ni Jehova ‘hiruhitaas kay han mga paagi han tawo,’ ngan an pagsingba ha iya ‘gintindog na ha bawbaw han mga bukid ngan ginpahitaas labaw han mga bungtod.’ (Isaias 55:9; Mika 4:1) An kinaadman ni Jehova amo “an kinaadman nga tikang ha kahitas-an.” (Jakobo 3:17) An iya mga balaud labaw gud ha ngatanan nga iba nga mga balaud. Pananglitan, han panahon nga ginbuhat han mga Kanaanita an madarahog nga paghalad hin bata, hi Jehova naghatag hin mga balaud ha mga Israelita nga hitaas ha moral ngan makikilala tungod han pagpaid. Hiya nagsiring ha ira: “Diri mo pagpalabilabihan an pagkatawo han kablasanon, bisan pagpasidungog han pagkatawo han makagarahum. . . . An dumuruong . . . masusugad para ha iyo hin usa nga natawo ha butnga niyo, ngan higugmaon mo hiya sugad han paghigugma mo ha imo ngahaw.”—Lebitiko 19:15, 34.

Paglabay hin kinse ka siglo, hi Jesus naghatag hin  dugang nga mga ehemplo han ‘dungganon nga balaud’ ni Jehova. (Isaias 42:21) Ha Sermon ha Bukid, hiya nagsiring ha iya mga disipulo: “Higugmaon an iyo mga kaaway; mag-ampo kamo tungod han nagpapakaraot ha iyo. Basi kamo magin anak han iyo Amay, nga adto ha langit.” (Mateo 5:44, 45) “Busa, an ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira,” hiya nagdugang. “Kay ini amo an Kasugoanan ngan an mga manaragna.”—Mateo 7:12.

Ini nga hitaas nga mga balaud may-ada epekto ha mga kasingkasing han mabinatunon nga mga tawo, nag-aaghat ha ira nga subaron an Dios nga ira ginsisingba. (Efeso 5:1; 1 Tesalonika 2:13) Hunahunaa an pagbag-o nga nahitabo kan Pablo. Han siyahan nga gin-unabi an iya ngaran ha Biblia, hiya “nauyon ha pagpataya” kan Esteban ngan iya gintatrato “hin mabangis an kongregasyon.” Paglabay la hin pipira ka tuig, maopay na an iya pagtrato ha mga Kristiano ha Tesalonika pariho hin “usa nga yaya nga nag-uugay ha iya kalugaringon nga mga anak.” An katutdoan nga iya nakarawat tikang ha Dios nakagbag-o kan Pablo tikang ha pagin parapakaraot ngadto ha pagin mapinairon nga Kristiano. (Buhat 8:1, 3, NW; 1 Tesalonika 2:7) Sigurado nga mapasalamaton hiya nga an iya personalidad naimpluwensyahan han katutdoan ni Kristo. (1 Timoteo 1:12, 13) Paonan-o an pariho nga apresasyon makakabulig ha aton nga padayon nga maglakat ha hitaas nga mga agianan han Dios?

Paglakat nga May-ada Apresasyon

Nalilipay an mga nagbabaktas ha mag-opay hinduro nga mga kiritaon ha higtaas nga lugar. Nahibabaro liwat hira ha pag-apresyar han gudtiay nga mga butang ha ligid han dalan, sugad han naiiba nga bato, maopay pagkit-on nga bukad, o pagsiplat ha usa ka ihalas nga hayop. Ha espirituwal nga paagi, kinahanglan kita magin alerto ha mga balos—dagku ngan gudti—nga naabot tungod ha paglakat nga kaupod han Dios. Ini nga kahibaro makakabulig ha aton nga maglakat nga may-ada bag-o nga kusog ngan makakapabag-o han nakakapakapoy nga pagbaktas ngadto ha makalilipay nga pamasyada. Mauyon kita ha mga pulong ni David: “Pabatia ako han imo mahigugmaon nga kalooy ha pagkaaga; kay ha imo nasarig ako; itutdo ako han dalan diin ako maglalakat.”—Salmo 143:8.

Hi Maria, nga damu na ka tuig nga naglalakat ha mga agianan ni Jehova, nasiring: “Kon ginkikita ko an linarang ni Jehova, nakikita ko diri la an komplikado nga disenyo kondi an mahigugmaon nga personalidad han Dios. Hayop man ito, tamsi, o insekto, an kada usa may-ada naiiba nga mga kalidad, nga makapainteres hinduro. An pariho nga kalipay makukuha tikang ha espirituwal nga mga kamatuoran nga nagtitikatin-aw ha paglabay han katuigan.”

Paonan-o naton mapapahilarom an aton apresasyon? Ha usa ka bahin, pinaagi han diri pagbalewaray han ginbubuhat ni Jehova para ha aton. ‘Mag-ampo nga waray udong-udong,’ nagsurat hi Pablo. “Magpasalamat . . . ha ngatanan nga mga bagay.”—1 Tesalonika 5:17, 18; Salmo 119:62.

An personal nga pag-aram nakakabulig ha aton nga mapatubo an mapasalamaton nga disposisyon. Ginsagda ni Pablo an mga Kristiano nga taga-Kolosas: “Padayon nga maglakat nga kahiusa [ni Kristo Jesus], . . . nagsasap-ay ha pagpasalamat nga may pagtoo.” (Kolosas 2:6, 7, NW) An pagbasa han Biblia ngan pagpamalandong han aton binabasa nagpaparig-on han aton pagtoo ngan nabulig ha aton nga magin mas duok ha Awtor han Biblia. Ha ngatanan nga mga pahina hito aada an mga bahandi nga makakaaghat ha aton nga ‘magsap-ay ha pagpasalamat.’

An pag-alagad kan Jehova upod han aton kabugtoan nagpapasayon liwat han dalan. An salmista nagsiring mahitungod han iya kalugaringon: “Kaupdanan ako hadton ngatanan nga nahahadlok ha imo.” (Salmo 119:63) An pipira han aton pinakamalipayon nga mga takna nahitatabo durante ha Kristiano nga mga asembleya o ha iba nga mga okasyon kaupod han aton kabugtoan. Kinikilala naton nga an aton birilhon nga Kristiano nga  pamilya ha bug-os nga kalibotan naeksister tungod kan Jehova ngan han iya hitaas nga mga paagi.—Salmo 144:15b.

Gawas han apresasyon, an pag-abat hin responsabilidad magpaparig-on ha aton nga padayon nga mag-uswag ha hitaas nga mga agianan ni Jehova.

Paglakat nga Naabat hin Responsabilidad

Nasasantop han mga nagbabaktas nga naabat hin responsabilidad an panginahanglan ha paghinay ha paglakat kon karuyag nira malikyan an kawara o an pagin duok hinduro ha peligroso nga mga pangpang. Sugad nga mga tawo nga may kagawasan ha pagbuot, gintatagan kita ni Jehova hin relatibo nga sukol han kagawasan ngan kalugaringon nga pagdesisyon. Kondi an sugad nga kagawasan nagkikinahanglan hin pag-abat hin responsabilidad samtang gintutuman naton an aton Kristiano nga mga obligasyon.

Pananglitan, nasarig hi Jehova nga tutumanon han iya mga surugoon an ira mga obligasyon ha responsable nga paagi. Waray hiya sumiring kon mationan-o kadamu nga kusog ngan panahon an aton sadang gamiton ha Kristiano nga mga buruhaton o kon pira an sadang naton ihatag ha pinansyal o ha iba nga mga paagi. Ha kabaliktaran, an mga pulong ni Pablo ha mga taga-Korinto naaplikar ha aton ngatanan: “An tagsatagsa humatag sugad han uyon han iya kasingkasing.”—2 Korinto 9:7; Hebreo 13:15, 16.

An responsable nga Kristiano nga paghatag nag-uupod hin pagpahibaro han maopay nga sumat ha iba. Iginpapakita liwat naton nga responsable kita pinaagi ha paghatag hin pinansyal nga mga donasyon para ha buruhaton han Ginhadian ha bug-os nga kalibotan. Hi Gerhardt, usa nga tigurang, nagsaysay nga gindugangan gud nira nga mag-asawa an ira mga kontribusyon katapos tumambong ha usa nga asembleya ha Este nga Europa. “Nakita namon nga an aton kabugtoan didto kablas gud ha pinansyal; kondi inaapresyar hinduro nira an aton literatura ha Biblia,” siring niya, “salit nagdesisyon kami nga humatag han suporta nga amon maaakos ha aton kablas nga kabugtoan ha iba nga mga nasud.”

Pagpauswag han Aton Pagpailob

An paglakat ha higtaas nga mga lugar nagkikinahanglan hin kusog. An mga nagbabaktas nag-iehersisyo ha kada panahon nga makakahimo hira, ngan damu an naglalakat hin hiraniay basi iandam an ira kalugaringon para ha hirayo nga mga pagbaktas. Ha pariho nga paagi, iginrekomenda ni Pablo nga magin okupado kita pirme ha teokratiko nga mga buruhaton basi matipigan an aton espirituwal nga kahimsog. Adton naghihingyap ‘nga manggawi nga takos ha Ginoo’ ngan magin ‘marig-on,’ hi Pablo nagsiring, sadang ‘mamunga ha ngatanan nga maopay nga buhat.’—Kolosas 1:10, 11.

An motibo nakakaapekto han pagpailob han nagbabaktas. Paonan-o? An pagpabilin nga nakasentro ha matin-aw nga tumong, sugad han usa ka hirayo nga bukid, may-ada nakakaaghat nga epekto. Ngan kon an nagbabaktas naabot ha pamilyar nga mga lugar ha dalan, masusukol niya an iya pag-uswag may kalabotan ha iya ultimo nga tumong. Samtang iya gindudumdom an distansya nga nabiyahe na, natatagbaw hiya.

Ha pariho nga paagi, an aton paglaom han kinabuhi nga waray kataposan nagpapakusog ngan nagpapagios ha aton. (Roma 12:12) Samtang naglalakat kita ha mga dalan ni Jehova, nakakabiling kita hin kalamposan ha paghimo ngan katapos pagdangat ha Kristiano nga mga tumong. Ngan nalilipay gud kita kon gindudumdom naton an damu nga mga tuig han matinumanon nga pag-alagad o inoobserbahan an mga pagbag-o nga aton nahimo ha aton personalidad!—Salmo 16:11.

Basi matapos an higrayo nga mga distansya ngan matipigan an enerhiya, an mga naglalakat nagios ha permanente nga kalaksi. Ha pariho nga paagi, an maopay nga rutina nga nag-uupod han regular nga mga katirok ngan pag-alagad ha kanataran mabulig ha aton nga determinado nga magpadayon ngadto ha aton tumong. Salit, gindasig ni Pablo an mga igkasi-Kristiano: “Magpadayon kita ha paglakat nga mahapsay ha pariho nga rutina.”—Filipos 3:16, NW.

Siyempre, diri kita la an naglalakat ha mga agianan ni Jehova. “Aton tagdon kon paonan-o naton maaaghat an usa kag usa ha gugma ngan maopay nga mga buhat,” nagsurat hi Pablo. (Hebreo 10:24, New International Version) An maopay nga espirituwal nga pakig-upod magpapasayon ha pagtipig han kalaksi samtang naglalakat kita kaupod han mga igkasi-tumuroo.—Proberbios 13:20.

Ha kataposan, ngan pinakaimportante, kinahanglan diri gud naton hingalimtan an gahum nga iginhahatag ni Jehova. Adton an kusog aada kan Jehova ‘makadto tikang ha usa nga kusog ngadto liwat ha usa.’ (Salmo 84:5, 7) Bisan kon usahay kinahanglan kita umagi ha makuri nga mga lugar, pinaagi han bulig ni Jehova mahihimo naton ito.