Ginpapatahom ni Jehova an Iya Katawohan Pinaagi han Kalamrag
Ginpapatahom ni Jehova an Iya Katawohan Pinaagi han Kalamrag
“Bangon, [“O babaye,” NW] sanag, kay an imo kapawa inabot na, ngan an himaya ni Jehova binangon dida ha imo.”—ISAIAS 60:1.
1, 2. (a) Ano an kahimtang han katawohan? (b) Hin-o an responsable ha kasisidman han katawohan?
“GINKIKINAHANGLAN gud naton an usa nga may-ada moralidad nga pariho han kan Isaias o Pablo!” Ito an masurub-on nga mga pulong ni Presidente Harry Truman han E.U. ha dekada han 1940. Kay ano nga ginyakan niya ito nga mga pulong? Tungod kay inabat niya an panginahanglan hin mga lider nga hitaas gud an moral ha kalibotan ha iya panahon. An kalibotan nag-agi pa la ha pinakamasirom nga peryodo han ika-20 ka siglo, an ikaduha nga girra ha kalibotan. Kondi, bisan kon natapos na an girra, waray kamurayawan an kalibotan. Nagpapadayon an kasisidman. Oo, 57 ka tuig katapos hiton nga girra, an kalibotan aada pa gihapon ha kasisidman. Kon buhi yana hi Presidente Truman, sigurado nga makikita pa gihapon niya an panginahanglan hin mga lider nga hitaas gud an moral pariho kan Isaias o apostol Pablo.
2 Maaram man hito hi Presidente Truman o diri, gin-unabi ni apostol Pablo an mahitungod han kasisidman nga nagpapakuri ha katawohan, ngan nagpahamangno hiya mahitungod hito ha iya mga sinurat. Pananglitan, nagpahamangno hiya ha mga igkasi-tumuroo: “An aton pakig-away diri kontra ha unod ngan ha dugo, kondi kontra ha mga punoan, kontra ha mga pagburut-an, kontra ha mga magburuot hini nga masirom nga kalibotan, kontra ha mga espirituhanon nga kasundalohan han karaotan ha mga langitnon nga lugar.” (Efeso 6:12) Hini nga mga pulong ipinakita ni Pablo nga diri la kay maaram hiya han espirituwal nga kasisidman nga nagpuputos ha kalibotan kondi maaram liwat hiya han totoo nga surok hito—an gamhanan nga mga puwersa han mga demonyo nga iginhulagway sugad nga mga ‘magburuot han kalibotan.’ Tungod kay gamhanan nga mga espiritu an responsable ha kasisidman han kalibotan, ano an mahihimo han mga tawo la ha pagkuha hito nga kasisidman?
3. Bisan pa han masirom nga kahimtang han katawohan, ano an igintagna ni Isaias para ha mga matinumanon?
3 Hi Isaias liwat naghisgot mahitungod han kasisidman nga nagpapakuri ha katawohan. (Isaias 8:22; 59:9) Kondi, ha pagtudlok ha aton panahon, nagtagna hiya nga bisan hinin masirom nga mga panahon, palalamragon ni Jehova an panlantaw hadton nahigugma han kalamrag. Oo, bisan kon diri naton personal nga kaupod hi Pablo ngan Isaias, may-ada kita han ira inspirado nga mga sinurat nga maggigiya ha aton. Basi makita nga usa ka daku nga bendisyon ito para hadton nahigugma kan Jehova, tagdon naton an matagnaon nga mga pulong ni Isaias ha ika-60 nga kapitulo han iya libro.
An Matagnaon nga Babaye Nasanag hin Kalamrag
4, 5. (a) Ano an iginsusugo ni Jehova nga pagbuhaton han usa nga babaye, ngan ano an iya iginsasaad? (b) Ano nga makalilipay nga impormasyon an sulod han Isaias kapitulo 60?
4 An siyahan nga mga pulong han Isaias 60 iginyayakan ngada ha usa ka babaye nga makalolooy hinduro an kahimtang—nahuyang hiya ha tuna ha duro nga kasisidman. Tigda, sinidlit an kalamrag ha kasisidman, ngan hi Jehova nagtawag: “Bangon, [“O babaye,” NW] sanag, kay an imo kapawa inabot na, ngan an himaya ni Jehova binangon dida ha imo.” (Isaias 60:1) Inabot na an panahon para han simboliko nga babaye nga tumindog ngan magpasanag han kalamrag han Dios, han iya himaya. Kay ano? Makikita naton an baton ha masunod nga bersikulo: “Kitaa, an kasisidman magpuputos han tuna, ngan an madakmol nga kasisidman han mga katawohan; kondi hi Jehova mabangon dida ha imo, ngan an iya himaya makikita dida ha imo.” (Isaias 60:2) Han sinugot an babaye ha sugo ni Jehova, ginpasarig hiya han maopay nga resulta. Hi Jehova nasiring: “An mga nasud makada ha imo kapawa, ngan an kahadian ngada ha kahayag han imo pagsirang.”—Isaias 60:3.
5 An makalilipay nga mga pulong hinin tulo nga bersikulo amo an introduksyon ngan sumaryo han nahibibilin nga sulod han Isaias kapitulo 60. Nagtatagna ito han mga eksperyensya han usa ka matagnaon nga babaye ngan nagsasaysay kon paonan-o kita makakaukoy ha kalamrag ni Jehova bisan pa han kasisidman nga nagpapakuri ha katawohan. Kondi, ano an kahulogan han mga simbolo hinin tulo nga siyahan nga bersikulo?
6. Hin-o an babaye ha Isaias kapitulo 60, ngan hin-o an nagrirepresentar ha iya dinhi ha tuna?
6 An babaye han Isaias 60:1-3 amo an Sion, an langitnon nga organisasyon han espiritu nga mga linarang ni Jehova. Yana nga panahon, an Sion ginrirepresentaran dinhi ha tuna han nanhibilin han ‘Israel han Dios,’ an internasyonal nga kongregasyon han dinihogan-han-espiritu nga mga Kristiano, nga naglalaom nga magmamando upod ni Kristo ha langit. (Galasia 6:16) Inin espirituwal nga nasud may-ada kadamu nga 144,000 nga membro, ngan an moderno nga katumanan han Isaias kapitulo 60 nakasentro dida hadton buhi dinhi ha tuna durante han “kataposan nga mga adlaw.” (2 Timoteo 3:1; Pahayag 14:1) Damu an masisiring liwat han tagna mahitungod han mga kaupod hinin dinihogan nga mga Kristiano, an “daku nga panon” han ‘iba nga mga karnero.’—Pahayag 7:9, NW; Juan 10:16.
7. Ano an kahimtang han Sion han 1918, ngan paonan-o ini igintagna?
7 May panahon ba hadto nga ‘an Israel han Dios’ nahuyang ha kasisidman, sugad han ginpadagawan hiton matagnaon nga babaye? Oo, nahitabo ini sobra 80 ka tuig na an naglabay. Durante han siyahan nga girra ha kalibotan, an dinihogan nga mga Kristiano nangalimbasog gud ha pagpadayon han pagsangyaw nga buruhaton. Kondi han 1918, ha ultimo nga tuig han girra, an organisado nga pagsangyaw nga buruhaton haros bug-os nga inundang. Hi Joseph F. Rutherford, nga nagmamangno hadto han bug-os-kalibotan nga pagsangyaw nga buruhaton, ngan an iba pa nga prominente nga mga Kristiano ginsentensyahan hin maiha nga kaprisohan tungod ha palso nga mga akusasyon. Ha libro han Pahayag, an dinihogan nga mga Kristiano dinhi ha tuna hiton nga panahon matagnaon nga iginhulagway sugad nga mga patay nga nahuyang “ha mga dalan han dagku nga bungto, nga ha espirituhanon ginngangaranan nga Sodoma ngan Ehipto.” (Pahayag 11:8) Tinuod nga masirom adto nga panahon para han Sion, nga ginrepresentaran han iya dinihogan nga mga anak dinhi ha tuna!
8. Ano nga daku nga pagbag-o an nahitabo han 1919, ngan ano an resulta?
8 Kondi, han tuig 1919 nahitabo an daku nga pagbag-o. Hi Jehova nagpasanag han kalamrag ngada ha Sion! An buhi pa nga mga membro han Israel han Dios ginios basi magpasanag han kalamrag han Dios, waray kahadlok nga iginpapasamwak na liwat an maopay nga sumat. (Mateo 5:14-16) Tungod han nahibalik nga kadasig hini nga mga Kristiano, nadani an iba ha kalamrag ni Jehova. Ha tinikangan, an mga bag-ohan gindihogan sugad nga dugang nga mga membro han Israel han Dios. Tinatawag hira nga kahadian ha Isaias 60:3, tungod kay magigin mga igkasi-manurunod hira ni Kristo ha langitnon nga Ginhadian han Dios. (Pahayag 20:6) Ha urhi, an daku nga panon han iba nga mga karnero nagtikang madani ha kalamrag ni Jehova. Ini an “mga nasud” nga gin-unabi ha tagna.
An mga Anak han Babaye Nagkakaabot ha Balay!
9, 10. (a) Ano nga makatirigamnan nga kiritaon an nakita han babaye, ngan ano an ginpadagawan hini? (b) Ano an hinungdan han kalipay han Sion?
9 Yana, hi Jehova nagtitikang ha paghatag hin dugang nga mga detalye ha impormasyon nga iginsaysay ha Isaias 60:1-3. Hiya nagsusugo pa ha babaye. Pamati ha iya ginsisiring: “Itan-aw an imo mga mata ha palibot, ngan kitaa!” An babaye sinugot, ngan makalilipay gud an iya nakikita! An iya mga anak nagkakaabot ha balay. An teksto padayon nga nasiring: “Hira ngatanan nagtitirok, hira makada ha imo; an imo mga anak nga kalalakin-an maabot tikang ha kahigrayoan, ngan an imo mga anak nga kababayin-an pananad-on ha mga butkon.” (Isaias 60:4) An bug-os-kalibotan nga pagpasamwak han Ginhadian nga nagtikang han 1919 nakatirok hin yinukot nga mga bag-ohan ngadto ha pag-alagad kan Jehova. Ini liwat nagin “mga anak nga kalalakin-an” ngan “mga anak nga kababayin-an” han Sion, nga dinihogan nga mga membro han Israel han Dios. Salit, ginpapatahom ni Jehova an Sion pinaagi han pagtirok han ultimo nga mga membro han 144,000 ngada ha kalamrag.
10 Mahahanduraw mo ba an kalipay han Sion ha pagtirok han iya mga anak ngada ha iya? Kondi, hi Jehova naghahatag ha Sion hin dugang nga mga hinungdan han kalipay. Aton mababasa: “Dida hito ikaw makita ngan magmamasilaw, ngan an imo kasingkasing mangingibigkibig ngan madaku; tungod kay an kahuraan han dagat pakakadaon ha imo, an manggad han mga nasud makada ha imo.” (Isaias 60:5) Uyon hiton matagnaon nga mga pulong, tikang han mga dekada han 1930, damu hinduro nga mga Kristiano nga may paglaom nga mabuhi dinhi ha tuna ha kadayonan an nagpakadto na ha Sion. Ginawas hira tikang ha “dagat” han katawohan nga binulag ha Dios ngan nagrirepresentar hira han manggad han mga nasud. Hira “an birilhon nga mga butang han ngatanan nga nasud.” (Hagay 2:7; Isaias 57:20) Tigamni, liwat, nga inin “birilhon nga mga butang” diri nag-aalagad kan Jehova nga an kada tagsa ha iya kalugaringon nga paagi. Diri, gindudugangan nira an katahom han Sion pinaagi han pagkadto ha pagsingba upod han ira dinihogan nga kabugtoan, nagigin “usa nga panon” ilarom han panguna han “usa nga magbarantay.”—Juan 10:16, NW.
An mga Magbaraligya, mga Magbarantay han Kakarnerohan, Ngan mga Negosyante Naabot ha Sion
11, 12. Ihulagway an damu nga mga tawo nga nakikita nga tipakadto ha Sion.
11 An resulta hinin igintagna nga pagtirok amo an makatirigamnan nga pagdamu han mga magdarayaw ni Jehova. Igintagna ini ha masunod nga mga pulong han tagna. Handurawa nga natindog ka upod han matagnaon nga babaye ha Bukid nga Sion. Kitaa an este, ngan ano an imo nakikita? “An kadam-an han mga kamelyo magpuputos ha imo, an mga mananap nga dagku ha Midian ngan ha Epa; ngatanan hira tikang ha Seba makanhi; hira magdadara hin bulawan ngan hin insenso, ngan magsasangyaw han pagdayaw kan Jehova.” (Isaias 60:6) Ginigiyahan han damu nga mga magbaraligya an ira mga grupo han mga kamelyo ha mga dalan pakadto ha Jerusalem. Aw, an mga kamelyo pariho han baha nga nagtatabon han tuna! An mga magbaraligya nagdadara hin birilhon nga mga regalo, “hin bulawan ngan hin insenso.” Ngan ini nga mga magbaraligya napakadto ha kalamrag han Dios basi magdayaw ha iya ha kadaygan, ‘ha pagsangyaw han pagdayaw kan Jehova.’
12 Diri la mga magbaraligya an nagbibiyahe. An mga magbarantay han kakarnerohan napakadto liwat ha Sion. An tagna nagpapadayon ha pagsiring: “An ngatanan nga kapangon han kakarnerohan ha Kedar pagtitirukon ngada ha imo, an mga karnero nga lalaki ha Nebayot mag-aalagad ha imo.” (Isaias 60:7a) An mga tribo han mga magbarantay han kakarnerohan napakadto ha baraan nga siyudad basi maghalad han gimaopayi han ira mga panon ngadto kan Jehova. Ira pa ngani iginhahalad an ira kalugaringon ha pag-alagad ha Sion! Paonan-o kinakarawat ni Jehova ini nga mga dumuruong? An Dios mismo nabaton: “Hira makada nga makakarawat ha akon halaran; ngan akon paghihimayaon an akon balay han himaya.” (Isaias 60:7b) Malipayon nga kinakarawat ni Jehova an mga halad ngan an pag-alagad hini nga mga dumuruong. An ira presensya nagpapatahom han iya templo.
13, 14. Ano an nakikita nga nagtitiarabot tikang ha weste?
13 Lingi yana ngan kitaa an weste. Ano an imo nakikita? Ha hirayo, may-ada pariho han busag nga dampog nga nagsasarang ha bawbaw han dagat. Hi Jehova nagpapakiana han aada ha imo hunahuna: “Hin-o ini nga nanlulupad pariho hin dampog, ngan sugad hin mga sarapati ha ira mga tamboanan?” (Isaias 60:8) Hi Jehova nabaton ha iya pakiana: “An mga purô maghuhulat ha akon, ngan siyahan an mga sakayan han Tarsis, ha pagdara han imo mga anak nga kalalakin-an tikang ha kahigrayoan, an ira salapi ngan an ira bulawan dara nira tungod han ngaran ni Jehova an imo Dios, ngan tungod han Baraan nga Usa han Israel, tungod kay hiya naghimaya ha imo.”—Isaias 60:9.
14 Mahahanduraw mo ba an kiritaon? Iton mabusag nga dampog nagtitikahirani ngan makikita yana nga pariho han grupo han mga tuldok ngadto ha weste. Pariho ito han panon han katamsihan nga madagmit nga naglulupadlupad ha bawbaw han mga balod han dagat. Kondi samtang nagtitikahirani pa gud ito, makikita mo nga mga barko ito nga ginbitad an mga layag hito ha pagsagang han hangin. Damu hinduro nga mga sakayan an nagbibiyahe ngadto ha Jerusalem salit sugad ito hin panon han mga sarapati. Tikang ha hirayo nga mga pantalan, an grupo han mga barko nagbibiyahe hin madagmit, nagdadara hin mga tumuroo ngadto ha Jerusalem ha pagsingba kan Jehova.
Nag-uuswag an Organisasyon ni Jehova
15. (a) Ano nga pag-uswag an igintatagna han mga pulong han Isaias 60:4-9? (b) Ano nga espiritu an ipinapakita han totoo nga mga Kristiano?
15 Matin-aw gud an matagnaon nga paghulagway han bersikulo 4 tubtob 9 ha bug-os-kalibotan nga pag-uswag nga nahitatabo tikang han 1919! Kay ano nga ginbendisyonan ni Jehova an Sion han sugad nga pag-uswag? Tungod kay tikang han 1919, an Israel han Dios masinugtanon ngan mapinadayunon nga nagpapasanag han kalamrag ni Jehova. Kondi, natigamnan mo ba nga sumala ha bersikulo 7, an bag-o nga mga nagkakaabot ‘napakada ha halaran han Dios’? An halaran amo an ginbubutangan han mga halad, ngan ini nga bahin han tagna nagpapahinumdom ha aton nga an pag-alagad kan Jehova nag-uupod han paghalad. Hi apostol Pablo nagsurat: “Nanginginyupo ako ha iyo . . . nga ighalad niyo an iyo mga lawas sugad han buhi nga halad, maputli, karuruyagon ha Dios, nga amo an iyo espirituhanon nga pag-alagad [“upod an iyo abilidad ha pangatadongan,” NW].” (Roma 12:1) Uyon ha mga pulong ni Pablo, an totoo nga mga Kristiano diri natatagbaw ha pagtambong la ha relihiyoso nga mga seremonya hin makausa ha usa ka semana. Ginagamit nira an ira panahon, kusog, ngan mga bahandi ha pagpauswag han putli nga pagsingba. Diri ba an presensya han sugad nga maunungon nga mga magsiringba nagpapatahom han balay ni Jehova? An tagna ni Isaias nagsiring nga magpapatahom ito. Ngan makakasiguro kita nga an sugad nga madasigon nga mga magsiringba, sugad nga resulta, matahom liwat ha paniplatan ni Jehova.
16. Hin-o an binulig ha pagtukod utro nga buruhaton ha kadaan nga mga panahon, ngan hin-o an nagbubuhat hito ha moderno nga mga panahon?
16 An bag-o nga mga nagkakaabot karuyag magbuhat. An tagna padayon nga nasiring: “An mga dumuruong magtutukod han imo mga kuta, ngan an ira kahadian mag-aalagad ha imo.” (Isaias 60:10) Ha siyahan nga katumanan hini nga mga pulong hadto ha panahon han pagbalik tikang ha pagkabihag ha Babilonya, an kahadian ngan an iba tikang ha mga nasud tinuod nga binulig ha pagtukod utro han templo ngan han siyudad han Jerusalem. (Esra 3:7; Nehemia 3:26) Ha moderno nga katumanan, an daku nga panon nasuporta ha dinihogan nga nanhibilin ha pagparig-on han totoo nga pagsingba. Nabulig hira ha pagtukod han Kristiano nga mga kongregasyon ngan salit nagpaparig-on han sugad-siyudad nga “mga kuta” han organisasyon ni Jehova. Nabulig liwat hira ha literal nga pagtukod nga buruhaton—ha pagtukod hin mga Kingdom Hall, mga Assembly Hall, ngan mga pasilidad han Bethel. Hini ngatanan nga mga paagi, nasuporta hira ha ira dinihogan nga kabugtoan ha pagmangno han mga panginahanglan han nag-uuswag nga organisasyon ni Jehova!
17. Ano an usa nga paagi nga ginpapatahom ni Jehova an iya katawohan?
17 Makapadasig gud an kataposan nga mga pulong han Isaias 60:10! Hi Jehova nasiring: “Ha akon kapungot akon ka hinampak, kondi ha akon pagdapig ako nalooy ha imo.” Oo, hadton 1918/19, gindisiplina gud man ni Jehova an iya katawohan. Kondi hadto ito ha naglabay. Yana an panahon ha pagpahayag ni Jehova hin kalooy ha iya dinihogan nga mga surugoon ngan ha ira mga kaupod nga iba nga mga karnero. An ebidensya nga ini an nahitatabo amo an makatirigamnan nga pag-uswag nga iginbendisyon niya ha ira, ‘ginpapatahom hira,’ siring pa.
18, 19. (a) Ano an iginsasaad ni Jehova may kalabotan ha mga bag-ohan nga nagkakaabot ngada ha iya organisasyon? (b) Ano an iginsusumat ha aton han nahibibilin pa nga mga bersikulo han Isaias kapitulo 60?
18 Kada tuig, ginatos ka yukot han dugang nga “mga dumuruong” an nakikig-upod ha organisasyon ni Jehova, ngan magpapabilin nga abrido an dalan para ha damu pa nga masunod ha ira. Hi Jehova nasiring ha Sion: “An imo mga ganghaan liwat aabrihan ha dayoday; diri hira sasadhan ha adlaw o ha gab-i; nga an mga tawo makagdara ngada ha imo han manggad han mga nasud, ngan han ira kahadian.” (Isaias 60:11) An iba nga mga parakontra nangangalimbasog ha pagsada hito nga “mga ganghaan,” kondi maaram kita nga diri hira maglalampos. Hi Jehova mismo nasiring nga ha anoman nga paagi, an mga ganghaan magpapabilin nga abrido. Magpapadayon an pag-uswag.
19 May-ada iba pa nga mga paagi nga ginbibendisyonan ni Jehova an iya katawohan, ginpapatahom hira, hinin kataposan nga mga adlaw. An nahibibilin nga mga bersikulo han Isaias 60 matagnaon nga nagpapahayag kon ano iton nga mga paagi.
Maisasaysay Mo Ba?
• Hin-o an simboliko nga “babaye” han Dios, ngan hin-o an nagrirepresentar ha iya dinhi ha tuna?
• Kakan-o hinuyang an mga anak han Sion, ngan kakan-o ngan paonan-o hira ‘binangon’?
• Ginagamit an magkalainlain nga mga simbolo, paonan-o igintagna ni Jehova an pagdamu yana nga panahon han mga magwarali han Ginhadian?
• Ha ano nga mga paagi ginpapahinabo ni Jehova nga sumanag an iya kalamrag ha iya katawohan?
[Mga Pakiana]
[Retrato ha pahina 10]
An simboliko nga “babaye” ni Jehova ginsusugo nga bumangon
[Retrato ha pahina 12]
An grupo han mga barko pariho han mga sarapati ha hirayo