Nadasig han “Urusahon nga mga Buhat han Dios”

“Pinanhihibatian ta hira, nga nagyayakan han aton kalugaringon nga yinaknan mahitungod han urusahon nga mga buhat han Dios.”—BUHAT 2:11.

1, 2. Ano an urusahon nga nahitabo ha Jerusalem han Pentekostes 33 K.P.?

 USA nga aga han tikatarapos na nga katsaringsing han tuig 33 K.P., urusahon an nahitabo ha usa ka grupo han kalalakin-an ngan kababayin-an, nga mga disipulo ni Jesu-Kristo nga nagkatirok ha pribado nga balay ha Jerusalem. “Ha kadagmitan inabot in usa nga aringasa nga tikang ha langit, sugad hin haganas han makusog nga hangin, ngan napuno an bug-os nga balay, nga ira ginkakalingkoran. Ngan didto napakita ha ira in mga dila nga sugad hin kalayo . . . ngan hira ngatanan napuno han espiritu santo [“baraan nga espiritu,” NW], ngan nagtikang pagyakan ha iba nga mga yinaknan.”—Buhat 2:2-4, 15.

² Damu nga mga tawo an nagkatirok ha atubangan han balay. An iba ha ira mga Judio nga natawo ha iba nga nasud, ‘talahuron nga mga tawo’ nga kinadto ha Jerusalem ha pagsaurog han piyesta han Pentekostes. Nahipausa hira tungod kay an tagsa ha ira nakabati ha mga disipulo nga nagyayakan ha iya kalugaringon nga yinaknan “mahitungod han urusahon nga mga buhat han Dios.” Paonan-o ito nahitabo kon an ngatanan hadton nagyayakan mga taga-Galilea?—Buhat 2:5-8, 11.

 3. Ano nga mensahe an iginpahayag ni apostol Pedro ha damu nga mga tawo nga nagkatirok han Pentekostes?

³ Usa hadton mga taga-Galilea amo hi apostol Pedro. Iya iginsaysay nga pipira ka semana una  pa, ginpatay hi Jesu-Kristo han diri-magtadong nga mga tawo. Kondi, ginbanhaw han Dios an iya Anak tikang ha mga minatay. Katapos hito, nagpakita hi Jesus ha damu han iya mga disipulo, upod na hi Pedro ngan iba pa nga presente hito nga panahon. Napulo la ka adlaw una pa, hi Jesus sinaka ngadto ha langit. Hiya an nagbubo han baraan nga espiritu ngada ha iya mga disipulo. May-ada ba anoman nga kahulogan ini para hadton mga nagsaurog han Pentekostes? Oo. An kamatayon ni Jesus nag-andam han dalan para ha ira basi mapasaylo an ira mga sala ngan makarawat “an hatag han espiritu santo” kon magbuhat hira hin pagtoo ha iya. (Buhat 2:22-24, 32, 33, 38) Salit paonan-o ginios adton mga nagkikita ha “urusahon nga mga buhat han Dios” nga ira hinbatian? Ngan paonan-o ini nga asoy nabulig ha aton ha pag-usisa han aton personal nga pag-alagad kan Jehova?

Nadasig ha Pagbuhat!

 4. Ano nga tagna ni Joel an natuman ha adlaw han Pentekostes 33 K.P.?

⁴ Tungod kay nakakarawat han baraan nga espiritu, an mga disipulo ha Jerusalem nagtikang dayon ha pagsangyaw han maopay nga sumat han kaluwasan ha iba, gintikangan ha mga tawo nga nagkatirok hiton nga aga han Pentekostes 33 K.P. Natuman han ira pagsangyaw an makatirigamnan nga tagna, nga iginrekord ni Joel nga anak ni Petuel, walo ka siglo una pa: “Akon iipison an akon espiritu ngada ha ngatanan nga unod; ngan an iyo mga anak nga kalalakin-an ngan an iyo mga anak nga kababayin-an mananagna, an iyo mga lagas mag-iinop hin mga inop, an iyo mga batan-on nga kalalakin-an makakakita hin mga bisyon. Ngan akon liwat iipison an akon espiritu ngada ha mga surugoon nga kalalakin-an ngan ngada ha mga surugoon nga kababayin-an hadto nga mga adlaw . . . nga diri pa maabot an daku ngan makalilisang nga adlaw ni Jehova.”—Joel 1:1; 2:28, 29, 31; Buhat 2:17, 18, 20.

 5. Ha ano nga paagi nagtagna an siyahan-siglo nga mga Kristiano? (Kitaa an footnote.)

⁵ Nangahulogan ba ini nga an Dios magpapabangon hin bug-os nga henerasyon han mga propeta, nga lalaki ngan babaye, pariho kan David, Joel, ngan Debora, ngan gamiton hira ha pagtagna han tidaraon nga mga hitabo? Diri. An Kristiano nga ‘mga anak nga kalalakin-an ngan kababayin-an, mga surugoon nga kalalakin-an ngan kababayin-an’ magtatagna ha paagi nga pagigiuson hira han espiritu ni Jehova ha pagpahayag han “urusahon nga mga buhat” nga ginbuhat ni Jehova ngan pagbubuhaton pa. Salit mag-aalagad hira sugad nga mga tagapagyakan han Gihitaasi. a Kondi, ano an reaksyon han mga tawo?—Hebreo 1:1, 2.

 6. Ha pakabati han pahayag ni Pedro, an damu nga mga tawo nadasig nga buhaton an ano?

⁶ Katapos hibatian han mga tawo an pagsaysay ni Pedro, damu ha ira an nadasig ha pagbuhat. Ira ‘kinarawat hin malipayon an iya pulong’ ngan “nagkababaptisan; ngan may igindugang ha ira hadto nga adlaw nga tulo ka yukot nga mga kalag.” (Buhat 2:41) Sugad nga natural nga mga Judio ngan mga Judio nga nakombirte, may-ada na hira basihan nga kahibaro han Kasuratan. Ito nga kahibaro, upod an pagtoo ha ira hinbaroan tikang kan Pedro, naghatag hin basihan para ha ira nga mabawtismohan “ha ngaran han Amay ngan han Anak ngan han baraan nga espiritu.” (Mateo 28:19, NW) Katapos han ira bawtismo “nagpadayon gihapon hira ha igintututdo han mga apostol.” Ha pariho nga panahon, nagtikang hira ha pagsumat  ha iba han ira bag-o nga hin-agian nga pagtoo. Oo, ‘ha adlaw-adlaw aadto hira ha templo, . . . nagdadayaw ha Dios, ngan naruruyagan han bug-os nga katawohan.’ Sugad nga resulta hini nga pagsangyaw nga buruhaton, “hira nga nagkaluluwas dinugangan pa han Ginoo ha adlaw-adlaw.” (Buhat 2:42, 46, 47) Madagmit nga naporma an Kristiano nga mga kongregasyon ha damu nga katunaan nga inuukyan hinin bag-o nga mga tumuroo. Sigurado nga ini nga pag-uswag, ha gutiay nga bahin, amo an resulta han ira madasigon nga mga pangalimbasog ha pagsangyaw han “maopay nga sumat” han nanguli hira.—Kolosas 1:23.

An Pulong han Dios Gamhanan

 7. (a) Ano an nakakadani ha mga tawo han ngatanan nga nasud ngada ha organisasyon ni Jehova yana nga panahon? (b) Ano nga mga posibilidad han dugang nga pag-uswag an nakikita mo ha bug-os-kalibotan ngan ha lokal nga kanataran? (Kitaa an footnote.)

⁷ Kumusta man adton naruruyag magin mga surugoon han Dios yana nga panahon? Hira liwat kinahanglan mag-aram hin maopay ha Pulong han Dios. Samtang ginbubuhat nira ito, makikilala nira hi Jehova sugad nga Dios nga “maloloy-on ngan mapinairon, mahinay ha kasina, ngan hura hin mahigugmaon-nga-pagkabuotan ngan kamatuoran.” (Eksodo 34:6, NW; Buhat 13:48) Nahibabaro hira han mahigugmaon nga tagana ni Jehova han lukat pinaagi kan Jesu-Kristo, nga an iginbubo nga dugo makakaglimpyo ha ira tikang ha ngatanan nga sala. (1 Juan 1:7) Mapasalamaton liwat hira nga mahibaroan an katuyoan han Dios nga may-ada “pagkabanhaw han mga minatay han mga magtadong ngan diri man magtadong.” (Buhat 24:15) An gugma ha Surok hinin “urusahon nga mga buhat” nagpupuno han ira mga kasingkasing, ngan nadadasig hira nga isangyaw inin presyoso nga mga kamatuoran. Katapos hito hira nagigin dedikado, bawtismado nga mga surugoon han Dios ngan nagpapadayon ha “pagtubo ha husto nga kahibaro han Dios.” b—Kolosas 1:10b, NW; 2 Korinto 5:14.

8-10. (a) Paonan-o pinamatud-an han eksperyensya han usa nga Kristiano nga babaye nga “gamhanan” an Pulong han Dios? (b) Ano an igintututdo ha imo hini nga eksperyensya mahitungod kan Jehova ngan ha paagi han iya pagtrato ha iya mga surugoon? (Eksodo 4:12)

⁸ An kahibaro nga nakakarawat han mga surugoon han Dios tikang ha ira pag-aram ha Biblia diri parayaw la. An sugad nga kahibaro nakakabantad han ira kasingkasing, nakakagbag-o han ira panhunahuna, ngan nagpapabilin ha ira. (Hebreo 4:12) Pananglitan, an babaye nga hi Camille nagtrabaho sugad nga paramangno ha mga lagas. Usa han iya ginmamangnoan hi Marta, usa han mga Saksi ni Jehova. Tungod kay apektado hinduro an panhunahuna ni Marta, nagkikinahanglan hiya hin permanente nga pagmangno. Kinahanglan pahinumdumon hiya nga kumaon—bisan pagtulon han iya pagkaon. Kondi, usa ka butang an permanente nga nahisilsil ha hunahuna ni Marta, sugad han aton mahibabaroan.

⁹ Usa ka adlaw, nakita ni Marta hi Camille nga nagtatangis ha kasubo tungod han personal nga mga problema. Ginhangkopan ni Marta hi Camille ngan ginhangyo hiya nga mag-aram ha Biblia upod ha iya. Kondi mahihimo ba han usa ka tawo nga an kahimtang pariho kan Marta nga magdumara hin pag-aram ha Biblia? Oo, mahihimo niya! Bisan kon nawara an daku nga bahin han iya memorya, waray hingalimti ni Marta an iya urusahon nga Dios; waray liwat niya hingalimti an presyoso nga mga kamatuoran nga iya hinbaroan tikang ha Biblia. Durante han pag-aram, ginpabasa ni Marta kan Camille an kada parapo, ginpabasa an gin-unabi nga mga Kasuratan ngan an mga pakiana ha ubos han pahina, ngan katapos ginpabaton hiya. Nagpadayon ini ha pipira ka panahon, ngan bisan pa han mga limitasyon ni Marta, nag-uswag hi Camille ha kahibaro ha Biblia. Maaram hi Marta nga kinahanglan makig-upod hi Camille ha iba nga mga interesado ha pag-alagad ha Dios. Tungod hito, iya gintagan an iya estudyante hin bado ngan sapatos, basi may-ada angayan nga bado hi Camille ha siyahan nga pagtambong niya ha katirok ha Kingdom Hall.

¹⁰ Nadasig hi Camille ha mahigugmaon nga interes, susbaranan, ngan pagtoo ni Marta. Naghunahuna hiya nga importante gud an igintututdo ni Marta ha iya tikang ha Biblia, tungod kay hinngalimtan ni Marta haros an ngatanan gawas han  iya hinbaroan tikang ha Kasuratan. Ha urhi, han iginbalhin hi Camille ha lain nga pasilidad, nasantop niya nga kinahanglan gumios na hiya. Ha siyahan nga higayon, kinadto hiya ha Kingdom Hall, nga sul-ot an bado ngan sapatos nga iginhatag ha iya ni Marta, ngan naghangyo hin pag-aram ha Biblia. Nag-uswag hin maopay hi Camille ngan nabawtismohan.

Nadasig ha Pagpakita han mga Suruklan ni Jehova

11. Dugang pa ha pagin madasigon ha pagsangyaw nga buruhaton, paonan-o naton maipapakita nga nadadasig kita han mensahe han Ginhadian?

¹¹ Yana nga panahon, sobra unom ka milyon nga Saksi ni Jehova nga pariho kan Marta ngan yana kan Camille, an nagsasangyaw han “maopay nga sumat han ginhadian” ha bug-os nga kalibotan. (Mateo 24:14; 28:19, 20) Pariho han siyahan-siglo nga mga Kristiano, nadadasig gud hira han “urusahon nga mga buhat han Dios.” Inaapresyar nira nga nakapribilehiyo hira ha pagdara han ngaran ni Jehova ngan iginbububo niya an iya espiritu ngada ha ira. Tungod hito, nangangalimbasog gud hira ha “paglakat nga takos kan Jehova basi lipayon hiya hin bug-os,” inaaplikar an iya mga suruklan ha ngatanan nga bahin han ira kinabuhi. Kaupod hini nga mga butang, amo an may kalabotan ha mga suruklan han Dios ha pamado ngan pag-ayos.—Kolosas 1:10a; Tito 2:10.

12. Ano nga espisipiko nga sagdon ha pamado ngan pag-ayos an makikita naton ha 1 Timoteo 2:9, 10?

¹² Oo, hi Jehova naghahatag hin mga suruklan may kalabotan ha aton personal nga hitsura. Ipinakita ni apostol Pablo an pipira han mga kinahanglanon han Dios hini nga bahin. “An mga babaye magpakaopay ha ira ha mga kaangayan nga panapton, mahadong ngan maligdong; diri nga may tinalonay nga buhok, ngan bulawan, o mutya, o mahal nga panapton; kondi, pinaagi han mga maopay nga buhat sugad ha nahiaangay ha mga babaye nga nagsusunod ngan nagtatahod ha Dios.” c  Ano an mahibabaroan naton tikang hini nga mga pulong?—1 Timoteo 2:9, 10.

13. (a) Ano an kahulogan han “kaangayan nga panapton”? (b) Kay ano nga makakasiring kita nga an mga suruklan ni Jehova diri makuri hinduro sundon?

¹³ Ipinapakita han mga pulong ni Pablo nga an mga Kristiano sadang “magpakaopay ha ira ha mga kaangayan nga panapton.” Kinahanglan diri hira magin malamiri, o mahugaw ha ira hitsura. An kada usa, bisan adton mga kablas, makakasunod ha sugad praktikal nga mga suruklan pinaagi han pagsiguro nga an ira pamado mahamis, limpyo, ngan desente. Pananglitan, kada tuig an mga Saksi ha usa nga nasud ha Amerika del Sur nagbabaktas hin damu ka kilometro ha kagurangan ngan katapos nagbibiyahe hin damu ka oras ha mga baluto basi makatambong ha ira distrito nga kombensyon. Kasagaran nga nahuhulog an usa ngada ha salog o nasangot ngan nagigisi an iya bado ha kabaknitan samtang nagbibiyahe. Salit pag-abot han mga kombensyonista ha lugar han kombensyon, an ira hitsura agsob nga baga in diri-desente. Salit nagasto hira hin panahon ha pagtaod han mga butones, pag-ayad han mga siper, ngan paglaba ngan pagplantsa han mga bado nga isusul-ot nira ha kombensyon. Pinabibilhan nira an pagdapit ha ira nga kumaon ha lamesa ni Jehova, ngan karuyag nira nga angayan an ira bado.

14. (a) Ano an kahulogan han pamado hin “mahadong ngan maligdong”? (b) Ano an nahiuupod ha aton pamado ‘sugad nga mga tawo nga nagpapakita hin pagtahod ha Dios’?

¹⁴ Dugang nga ipinakita ni Pablo nga sadang mamado kita ha “mahadong ngan maligdong.” Nangangahulogan ini nga an aton hitsura diri sadang magin magarbo, sobra ha estilo, malaw-ay, nagpapakita han mga bahin han lawas, o sobra ha uso. Dugang pa, sadang mamado kita ha paagi nga nagpapakita hin ‘pagtahod ha Dios.’ Sadang makapahunahuna ito ha aton, diri ba? Diri la ito kay pamado hin angayan kon natambong ha mga katirok ha kongregasyon ngan katapos diri na ito gintatagad ha iba nga mga panahon. An aton personal nga hitsura sadang magpakita pirme hin matinalahuron, dungganon nga disposisyon tungod kay mga Kristiano ngan mga ministro kita ha sulod hin 24 ka oras ha usa ka adlaw. Matin-aw nga an aton bado ha pagtrabaho ngan ha pag-eskwela sadang magin angayan sumala ha klase han mga trabaho nga aton bubuhaton. Kondi, sadang mamado kita hin desente ngan may dignidad. Kon an aton pamado pirme nagpapakita han aton pagtoo ha Dios, diri gud kita mag-aalang ha impormal nga pagsangyaw tungod ha kaawod ha aton hitsura.—1 Pedro 3:15.

‘Ayaw Higugmaa an Kalibotan’

15, 16. (a) Kay ano nga importante nga likyan naton an pagsubad ha kalibotan may kalabotan ha pamado ngan pag-ayos? (1 Juan 5:19) (b) Ano an praktikal nga hinungdan nga sadang likyan naton an mga uso ha pamado ngan pag-ayos?

¹⁵ An sagdon nga nahirekord ha 1 Juan 2:15, 16 naghahatag liwat hin giya ha aton pagpili ha pamado ngan pag-ayos. Aton mababasa: “Ayaw niyo higugmaa an kalibotan, bisan an mga bagay ha kalibotan. Kon may tawo nga maghigugma ha kalibotan, an gugma han Amay waray dida ha iya. Kay an ngatanan nga aada ha kalibotan, an kairiphon han unod ngan an kairiphon han mga mata, ngan an paghambog han kinabuhi, diri kanan Amay, kondi kanan kalibotan.”

¹⁶ Napapanahon gud ito nga sagdon! Ha panahon  nga nagigin mas duro an pag-ipit han mga kaupod, kinahanglan diri naton tugotan an kalibotan nga makaimpluwensya ha aton pamado. An mga estilo han pamado ngan pag-ayos nagtikaraot ha bag-o la nga mga tuig. Bisan an iginpapasunod nga paagi han pamado han aada ha komersyo ngan ha mga propesyonal diri pirme naghahatag hin masasarigan nga suruklan kon ano an angayan para ha mga Kristiano. Ini an dugang nga hinungdan kon kay ano nga sadang kita magin mahunahunaon pirme han panginahanglan nga ‘diri angay umuyon hini nga sistema han mga butang’ kon karuyag naton magkinabuhi sumala ha mga suruklan han Dios ngan salit ‘adornohan an katutdoan han aton Manluluwas, an Dios, ha ngatanan nga mga butang.’—Roma 12:2; Tito 2:10.

17. (a) Ano nga mga pakiana an sadang tagdon naton kon namamalit hin bado o nagpipili hin estilo? (b) Kay ano nga sadang manginano an mga ulo han pamilya ha personal nga hitsura han mga membro han pamilya?

¹⁷ Antes magdesisyon ha pagpalit hin bado, maaramon an pagpakiana ha imo kalugaringon: ‘Kay ano nga karuyag ko ini nga estilo? Ito ba an iginsusul-ot han sikat nga artista—nga akon gindadayaw? Ito ba an estilo han barkada ha kalye o han usa nga grupo nga nag-aaghat han independente, rebelyoso nga disposisyon?’ Sadang kitaon liwat naton hin maopay an bado. Kon bestida ito o saya, kumusta man an kahilaba? An tabas? Ito ba nga bado desente o angayan, ngan may dignidad ba, o pitis, malaw-ay, o mahugaw? Pakianhi an imo kalugaringon, ‘Makakapakdol ba an pagsul-ot ko hini nga bado?’ (2 Korinto 6:3, 4) Kay ano nga sadang tagdon naton ito? Tungod kay an Biblia nasiring: “Bisan an Kristo waray magpalipay ha iya kalugaringon.” (Roma 15:3, NW) An Kristiano nga mga ulo han pamilya kinahanglan manginano ha hitsura han mga membro han pamilya. Tungod ha pagtahod ha mahimayaon nga Dios nga ira ginsisingba, an mga ulo han pamilya diri sadang mag-alang ha paghatag hin marig-on, mahigugmaon nga sagdon kon ginkikinahanglan ito.—Jakobo 3:13.

18. Ano an nagpapagios ha imo nga tagdon hin maopay an imo pamado ngan pag-ayos?

¹⁸ An mensahe nga gindadara naton nagtitikang kan Jehova, nga amo an susbaranan han dignidad ngan pagkabaraan. (Isaias 6:3) An Biblia nagsasagda ha aton nga subaron hiya ‘sugad ha hinigugma nga mga anak.’ (Efeso 5:1) An aton pamado ngan pag-ayos mahimo magkaada maopay o maraot nga epekto ha aton langitnon nga Amay. Sigurado nga karuyag naton lipayon an iya kasingkasing!—Proberbios 27:11.

19. Ano an mga kapulsanan han pagpahayag han “urusahon nga mga buhat han Dios” ngadto ha iba?

¹⁹ Ano an inaabat mo mahitungod han “urusahon nga mga buhat han Dios” nga imo hinbaroan? Tinuod, sadang kita magpasalamat nga hinbaroan naton an kamatuoran! Tungod kay nagbubuhat kita hin pagtoo ha iginbubo nga dugo ni Jesu-Kristo, ginpapasaylo an aton mga sala. (Buhat 2:38) Sugad nga resulta, may-ada kita kagawasan ha pagyakan ha atubangan han Dios. Diri kita nahahadlok ha kamatayon sugad hadton waray paglaom. Lugod, may-ada kita han pasarig ni Jesus nga ha maabot nga panahon ‘an ngatanan hadton aadto ha mga lubnganan makakabati han iya tingog ngan manggogowa.’ (Juan 5:28, 29) Hi Jehova hura nga nagpapahayag hini ngatanan nga mga butang ha aton. Dugang pa, iya iginbububo an iya espiritu ha aton. Salit, an pagpasalamat para hinin mag-opay nga mga regalo sadang magpagios ha aton nga tahuron an iya hitaas nga mga suruklan ngan dayawon hiya nga may kadasig, iginpapahayag inin “urusahon nga mga buhat” ngadto ha iba.

[Mga footnote]

Paonan-o Mo Babatunon?

• Ano nga “urusahon nga mga buhat” an hinbatian han katawohan han Pentekostes 33 K.P., ngan ano an ira reaksyon?

• Paonan-o an usa nagigin disipulo ni Jesu-Kristo, ngan ano an nahiuupod ha pagin disipulo?

• Kay ano nga importante nga aton tagdon an aton pamado ngan pag-ayos?

• Ano nga mga butang an sadang tagdon ha pagdesisyon kon angayan ba an bado o estilo?

[Mga Pakiana]

[Retrato ha pahina 15]

Iginpasamwak ni Pedro nga hi Jesus ginbanhaw tikang ha mga minatay

[Mga Retrato ha pahina 17]

An imo ba personal nga hitsura may-ada maopay nga epekto ha Dios nga imo ginsisingba?

[Mga Retrato ha pahina 18]

An Kristiano nga mga ginikanan kinahanglan manginano ha hitsura han mga membro han pamilya