Yoga—Ehersisyo La ba o Labaw Pa?

AN PAGKAADA manipis ngan mahimsog nga lawas amo gud an ginhihingyap han mga tawo yana nga panahon. Ini an hinungdan han damu nga kumadto ha mga gimnasyum ngan mga health club basi magpabulig. Ha pariho nga hinungdan, yinukot han katawohan ha Weste nga bahin han kalibotan an binirik ngadto ha Estehanon nga arte han yoga.

An mga tawo nga nag-aantos hin tensyon, depresyon, ngan kapakyas binirik liwat ngadto ha yoga para han kaliawan ngan mga solusyon. Labi na tikang ha dekada han 1960, an dekada han mga hippie ngan mga hippie nga nasuporta ha gugma, kahusay, ngan kamurayawan, nga interesado ha mga relihiyon ha Este ngan ha ira misteryoso nga mga buhat, nagsarang ha bug-os nga Weste. An paagi han pamalandong samtang nagyayakan hin mantra basi magin kalmado, nagtikang gud ha yoga, nga nagin popular pinaagi han mga artista ha pelikula ngan rock nga mga musikero. Tungod han nag-uuswag nga interes ha yoga, bangin magpakiana kita: ‘An yoga ba rutina la ha pag-ehersisyo nga makakahatag ha nagbubuhat hito hin mahimsog, manipis nga lawas ngan kamurayawan ha hunahuna? Makakagyoga ba nga waray bisan ano nga relihiyoso nga epekto? Angayan ba an yoga ha mga Kristiano?’

An Tinikangan han Yoga

An orihinal nga Sanskrit nga pulong para han ‘yoga’ nangangahulogan hin pag-usaha o pagbugkosa nga urosa o pagpailaroma ha usa nga yugo, pagdumara o pagkontrol. Para ha Hindu, an yoga usa nga paagi o sistema ha pagkontrol han buhat nga nagtutugway ha paghiusa ha labaw gud ha natural nga puwersa o espiritu. Iginsasaysay ito sugad nga “an pagbugkos han ngatanan nga mga gahum han lawas, hunahuna ngan kalag ngadto ha Dios.”

Diin nga bahin ha kasaysayan nagtikang an yoga? An mga dagway han tawo nga nalingkod nga may magkalainlain nga mga posisyon han yoga makikita ha mga selyo nga nabilngan ha Indus Valley, ha Pakistan yana. Ginpetsahan han mga arkeolohista an sibilisasyon han Indus Valley butnga han ikatulo ngan ikaduha ka mga milenyo A.K.P., hirani gud ha peryodo han kultura han Mesopotamia. An mga hinimo tikang ha duha nga lugar nagpapakita hin usa nga lalaki, nga nagrirepresentar ha usa  nga dios, nga ginkoronahan hin mga sungay han hayop ngan ginpalibotan hin mga hayop, nga baga hin naghuhulagway kan Nimrod, an “mabaskog nga parapanganop.” (Genesis 10:8, 9) An mga Hindu nasiring nga an mga dagway nga nalingkod ha mga posisyon han yoga amo an mga hulagway han dios nga hi Siva, an ginoo han mga hayop ngan an ginoo han yoga, nga agsob nga ginsisingba pinaagi han dinisenyo nga organo han lalaki, nga simbolo han organo ha sekso. Salit, gintatawag han libro nga Hindu World an yoga nga “usa nga sistema han mga surundon han istrikto nga mga buhat, nga kadak-an hito antes-Aryan an gintikangan, nga nagsusulod hin mga ideya han damu nga mga gintotoohan ngan mga selebrasyon ha maiha na nga naglabay.”

Ha siyahan an mga paagi han yoga iginpasa pinaagi ha mga pulong. Katapos detalyado nga iginsurat ito han maaramon ha yoga nga taga-India nga hi Patañjali sugad nga an Yoga Sutra, nga amo pa gihapon an basihan han instruksyon nga libro han yoga. Sumala kan Patañjali, an yoga amo “an sistematiko nga pangalimbasog basi madangat an kahingpitan, pinaagi han pagkontrol ha magkalainlain nga mga elemento han kahimtang han tawo, ha pisikal ngan sikolohikal.” Tikang ha tinikangan hito tubtob ha presente nga panahon, an yoga amo an importante nga bahin han mga relihiyon ha Este, labi na yana an Hinduismo, Jainismo, ngan Budhismo. An iba nga mga nagyuyoga natoo nga magtutugway ito ha ira nga makadangat ha moksha, o kagawasan, pinaagi han paghiusa ha nakakaapekto ha ngatanan nga espiritu.

Salit makausa pa nga mapakiana kita: ‘Mahihimo ba magyoga sugad nga usa la ka pisikal nga ehersisyo basi magkaada hin mahimsog nga lawas ngan relaks nga panhunahuna, nga waray bisan ano nga kahidabi ha relihiyon?’ Tungod han gintikangan hito, an baton sadang magin diri.

Ngain Ka Dadad-on han Yoga?

An tumong han yoga sugad nga istrikto nga surundon amo an pagdara ha usa ka tawo ngadto ha espirituwal nga eksperyensya han pagin “kahiusa” o pagin kaupod han labaw ha tawo nga espiritu. Kondi ano nga espiritu ito?

Ha Hindu World, an awtor nga hi Benjamin Walker nasiring mahitungod han yoga: “Bangin ito an siyahan nga sistema han rituwal nga mahika, ngan an yoga nangangahulogan pa gihapon nga bahin ito han okultismo ngan pagkatamyawan.” Kinakarawat han Hindu nga mga pilosopo nga an pagyoga makakahatag hin labaw ha natural nga mga gahum, bisan kon agsob nga nasiring hira nga diri ini an nangunguna nga tumong han yoga. Pananglitan, ha libro nga Indian Philosophy, an presidente hadto han India, hi Dr. S. Radhakrishnan, nasiring mahitungod han nagyuyoga nga “an pagkontrol han lawas pinaagi han mga postura nagriresulta ha diri pag-abat ha duro nga kapaso ngan kahagkot. . . . An nagyuyoga nakakakita ngan nakakabati ha hirayo . . . An pagbalhin han panhunahuna tikang ha usa nga indibiduwal ngadto ha usa nga diri ginagamitan hin normal nga mga paagi ha pagkomunikar posible gud. . . . Nahihimo han nagyuyoga nga diri-makita an iya lawas.”

An dayag nga ehemplo han nagyuyoga nga nakaturog ha higdaan nga puro raysang o naglalakat ha mapaso nga baga bangin magin sugad hin panlimbong ha pipira ngan usa nga pataraw-an ha iba. Kondi komon ini nga mga taran-awon ha India, sugad la han pagtindog ha usa nga tiil samtang direkta nga nagbibinuslong ha adlaw ha sulod hin damu ka oras ngan han pagpugong han pagginhawa nga nahihimo han tawo nga magpalubong ha baras ha sulod hin hilawig nga panahon. Han Hunyo 1995, an The Times of India nagreport nga an tulo-ngan-tunga-ka-tuig an pangidaron nga bata nga babaye nahigda nga waray sarabotan samtang an awto nga sobra 750 ka kilo ginpaagi ha iya tiyan. Nahipausa an mga tawo, nga han nagmata hiya nga waray gud hiya madaot. An report nagdugang: “Bug-os nga gahum la adto han yoga.”

Waray ruhaduha, waray normal nga tawo an may-ada katakos ha paghimo han bisan ano hini nga mga buhat. Salit, an Kristiano kinahanglan magpakiana: Pangirilal-an ini nga mga buhat han ano? Tikang ba ito kan Jehova nga Dios, “an Gihitaasi ha bawbaw han tuna,” o tikang ba ito ha iba nga surok? (Salmo 83:18) Matin-aw an pagsaysay han Biblia hini nga punto. Han tisulod na an mga Israelita ha Tuna nga Iginsaad, nga gin-uukyan han mga Kanaanhon, hi Jehova nagsiring ha mga anak han Israel pinaagi kan Moises: “Diri ka magtuon pagbuhat han mga kangil-aran hadto nga mga nasud.” Ano nga “mga kangil-aran”? Nagpahamangno hi Moises kontra han “usa nga nagamit hin panag-an, an usa nga manirigo pinaagi  hin mga barita, o parapanganito, o parapanhimalad.” (Deuteronomio 18:9, 10) Mangil-ad ini nga mga butang ha Dios tungod kay mga buhat ini han yawa ngan han makasasala nga unod.—Galasia 5:19-21.

Diri Para ha mga Kristiano

Diri man umuyon an mga instruktor ha kahimsog ha impormasyon nga gin-unabi na, an yoga diri la pisikal nga mga pag-ehersisyo. An libro nga Hindu Manners, Customs and Ceremonies nagsasaysay han mga eksperyensya han duha nga nagtitikang pa la ha pagyoga nga ilarom ha pagdumara han usa nga magturutdo. An usa ginkotar ha pagsiring: “Nahimo ko an labaw ha tawo nga pagpugong hin maiha han akon pagginhawa, ngan gininhawa la han madidismayo na ako. . . . Usa ka adlaw, ha kaudtuhon, kahuna ko nga nakakita ako hin mahayag nga bulan, nga baga hin nakiwa tikang ha usa nga ligid ngadto ha luyo. Ha lain pa nga panahon nahanduraw ko an akon kalugaringon nga napapalibotan hin madakmol nga kasisidman ha kaudtuhon. An akon magturutdo . . . nalipay gud han gin-istorya ko ha iya ini nga mga bisyon. . . . Diri na maiha, ginpasarig niya ako, nga makakaeksperyensya ako hin mas urusahon nga mga resulta tikang ha akon pagpinitensya.” An ikaduha nga lalaki nagsumat: “Gin-obligar niya ako nga bumuslong ha kawanangan kada adlaw nga diri napirok o diri nakiwa. . . . Usahay naghunahuna ako nga nakita ko an mga idlap han kalayo ha kawanangan; ha iba nga panahon baga hin nakakita ako hin nasusunog nga sugad hin mga bola ngan an iba sugad hin mga meteor. An akon magturutdo nalipay hinduro ha kalamposan han akon mga pangalimbasog.”

An urusahon nga mga kiritaon matin-aw nga amo an inaabat han mga magturutdo nga husto nga mga resulta nga magtutugway ngadto ha totoo nga katuyoan han mga ehersisyo han yoga. Oo, an ultimo nga tumong han yoga amo an moksha, iginsaysay sugad nga an pakighiusa ha diri-persona nga bantogan nga espiritu. Iginhulagway ito sugad nga “an (tinuyo) nga pag-undang han natural nga proseso han paghunahuna.” Matin-aw nga kabaliktaran ini ha tumong para ha mga Kristiano, nga ginsagdonan: “Ighalad niyo an iyo mga lawas sugad han buhi nga halad, maputli, karuruyagon ha Dios, nga amo an iyo espirituhanon nga pag-alagad. Ngan diri kamo angay umuyon hini nga panahon: Kondi magbalhin kamo tungod ha pagbag-o ha iyo mga hunahuna, basi niyo kasayoran kon ano an maopay ngan karuruyagon ngan hingpit nga kaburut-on han Dios.”—Roma 12:1, 2.

Personal nga desisyon an pagpili kon ano nga pisikal nga ehersisyo an hihimoon. Kondi, diri tutugotan han mga Kristiano an bisan ano—pagbansay man ito ha lawas, pagkaon, pag-inom, pamado, kaliawan, o iba pa—nga makadaot ha ira relasyon kan Jehova nga Dios. (1 Korinto 10:31) Ha nag-iehersisyo para la ha ira kahimsog, damu an mga paagi nga diri nagdadara hin mga peligro han espiritismo ngan okultismo. Pinaagi han paglikay ha mga buhat ngan mga gintotoohan nga nakagamot ha palso nga relihiyon, mahimo kita maghulat ha bendisyon han Dios nga usa ka matadong nga bag-o nga sistema han mga butang diin makakapahimulos kita hin hingpit nga kahimsog ha lawas ngan hunahuna ha waray kataposan.—2 Pedro 3:13; Pahayag 21:3, 4.

[Mga Retrato ha pahina 22]

Damu an nagpapahimulos hin mga buruhaton nga nakakaopay ha kahimsog nga diri nahidadabi ha espiritismo