“Akon Pinili, nga Ikinalilipay han Akon Kalag!”
Kapitulo Tres
“Akon Pinili, nga Ikinalilipay han Akon Kalag!”
1, 2. Kay ano nga makapainteres ha mga Kristiano yana an kapitulo 42 han Isaias?
“KAMO an akon mga saksi, nasiring hi Jehova, ngan akon surugoon nga akon ginpili.” (Isaias 43:10) Ini nga kapahayagan ni Jehova, nga iginsurat ni propeta Isaias han ikawalo ka siglo A.K.P., nagpapakita nga an may kauyonan nga katawohan ni Jehova hadto usa nga nasud han mga saksi. Hira an pinili nga mga surugoon han Dios. Paglabay hin mga 2,600 ka tuig, han 1931, dayag nga iginpahayag han dinihogan nga mga Kristiano nga ini nga mga pulong naaplikar ha ira. Kinarawat nira an ngaran nga mga Saksi ni Jehova ngan bug-os-kasingkasing nga ginkarawat an mga responsabilidad han pagin surugoon han Dios ha tuna.
2 An mga Saksi ni Jehova sinsero nga naghihingyap ha pagpalipay ha Dios. Tungod hini, makapainteres gud ha kada usa ha ira an ika-42 nga kapitulo han libro nga Isaias, tungod kay iginhuhulagway hito an usa nga surugoon nga inuuyonan ni Jehova ngan an usa pa nga surugoon nga iya iginsasalikway. An paghunahuna hini nga tagna ngan ha mga katumanan hito nahatag hin hilarom nga pagsabot ha kon ano an nagtutugway ngadto ha pag-uyon han Dios ngan ha kawara han iya pag-uyon.
“Akon Iginbutang an Akon Espiritu Dida ha Iya”
3. Ano an igintagna ni Jehova pinaagi kan Isaias mahitungod han “akon surugoon”?
3 Pinaagi kan Isaias, igintagna ni Jehova an pag-abot han usa nga surugoon nga iya mismo pipilion: “Kitaa, an akon surugoon, nga akon inalang-agang; akon pinili, nga ikinalilipay han akon kalag: akon iginbutang an akon espiritu dida ha iya; hiya magdadara han kasubayan ngadto ha mga Hentil. Diri hiya magsasangpit, o diri maalsa han iya tingog, o diri ini ipapabati dida ha kalsada. Diri hiya magbabari hin pilas nga tangbo, ngan han pabilo nga naglalaga ha masirom diri hiya magpaparong: hiya magpapahayag han kasubayan ha kamatuoran. Diri hiya maluya o diri mahuhulop, ngada nga makagpahamutang hiya han kasubayan dida ha tuna; ngan an mga purô maghulat han iya balaud.”—Isaias 42:1-4.
4. Hin-o an igintagna nga “pinili,” ngan paonan-o naton nahibaroan ini?
4 Hin-o an surugoon nga gin-unabi dinhi? Waray kita pabay-i nga diri ito mahibaroan. Nakikita naton nga ini nga mga pulong ginkotar ha Ebanghelyo ni Mateo ngan naaplikar kan Jesu-Kristo. (Mateo 12:15-21) Hi Jesus amo an hinigugma nga Surugoon, an “pinili.” Kakan-o iginbubo ni Jehova an iya espiritu dida kan Jesus? Han 29 K.P., han ginbawtismohan hi Jesus. Ito nga bawtismo iginsasaysay han giniyahan nga rekord ngan nasiring nga han pakahaw-as ni Jesus ha tubig, “an langit nabuksan. Ngan an espiritu santo linusad ngada ha iya ha lawasnon nga dagway, sugad han usa nga sarapati, ngan an usa nga tingog ginowa ha langit: Ikaw amo an akon Anak nga hinigugma, ha imo ako nalilipay.” Hini nga paagi personal nga iginpakilala ni Jehova an iya hinigugma nga Surugoon. An sumunod nga ministeryo ni Jesus ngan an mga milagro nga iya ginbuhat nagpamatuod nga an espiritu ni Jehova nakada gud ha iya.—Lukas 3:21, 22; 4:14-21; Mateo 3:16, 17.
‘Iya Pagdadad-on an Hustisya ha mga Nasud’
5. Kay ano nga an matin-aw nga hustisya ginkinahanglan ha siyahan nga siglo K.P.?
5 An Usa nga Pinili ni Jehova amo an “magdadara,” o magpapakita han totoo nga hustisya. “Iya ipapatin-aw ha mga nasud kon ano an hustisya.” (Mateo 12:18, NW) Ginkinahanglan gud ini han siyahan nga siglo K.P.! An Judio nga mga lider han relihiyon nagtutdo hin ginbaliko nga ideya mahitungod han hustisya ngan katadongan. Nangalimbasog hira nga makab-ot an katadongan pinaagi han pagsunod hin istrikto nga kodego han mga balaud—nga an kadam-an kalugaringon nga hinimo la nira. An ira legalistiko nga hustisya waray kalooy ngan pagpaid.
6. Ha ano nga mga paagi iginpahibaro ni Jesus an totoo nga hustisya?
6 Ha kabaliktaran, iginpahayag ni Jesus an panhunahuna han Dios ha hustisya. Pinaagi han iya igintutdo ngan kon paonan-o hiya nagkinabuhi, ipinakita ni Jesus nga an totoo nga hustisya mapinairon ngan maloloy-on. Hunahunaa la an iya bantogan nga Sermon ha Bukid. (Mateo, kapitulo 5-7) Maabtik gud ito nga pagsaysay kon paonan-o sadang pagbuhaton an hustisya ngan katadongan! Kon aton binabasa an mga asoy han Ebanghelyo, diri ba kita nababantad han pagpaid ni Jesus ha mga kablas ngan nag-aantos? (Mateo 20:34; Markos 1:41; 6:34; Lukas 7:13) Iya iginsumat an iya nakakaliaw nga mensahe ha damu nga mga tawo nga pariho hin rumok nga mga tangbo, nga nabari ngan natumba. Pariho hira han nagtitikaparong nga pabilo nga lino, an ira ultimo nga idlap han kinabuhi haros asó na la. Waray gud ni Jesus utda an “pilas nga tangbo,” waray liwat paronga an “pabilo nga naglalaga ha masirom.” Lugod, an iya mahigugmaon ngan mapinairon nga mga pulong ngan mga buhat nakalipay ha kasingkasing han mga maaghop.—Mateo 11:28-30.
7. Kay ano nga an tagna nakasiring nga hi Jesus ‘diri magsasangpit o maalsa han iya tingog dida ha kalsada’?
7 Kondi, kay ano nga an tagna nasiring nga hi Jesus diri “magsasangpit, o diri maalsa han iya tingog, o diri ini ipapabati dida ha kalsada”? Tungod kay waray niya ighambog an iya kalugaringon, sugad han ginhimo han damu nga mga tawo ha iya panahon. (Mateo 6:5) Han gintambal an usa nga sanlahon, iya gintugon an natambal nga lalaki: “Magmatngon ka, nga diri ka magpanumat bisan kan kanay.” (Markos 1:40-44) Imbes nga mangalimbasog nga makilala han publiko ngan pasagdan an mga tawo nga maghimo hin mga konklusyon sumala ha hinbatian la ha iba nga mga sumat, karuyag ni Jesus nga magkaada hira kalugaringon nga pagsabot sumala ha marig-on nga ebidensya nga hiya an Kristo, an dinihogan nga Surugoon ni Jehova.
8. (a) Paonan-o gindara ni Jesus “an kasubayan ngadto ha mga Hentil”? (b) Ano an igintututdo ha aton han ilustrasyon ni Jesus mahitungod han buotan nga Samaritano may kalabotan han hustisya?
8 An Pinili nga Surugoon magdadara hin “kasubayan ngadto ha mga Hentil.” Ginbuhat ini ni Jesus. Gawas pa han pagpabug-at ha mapinairon nga kinaiya han diosnon nga hustisya, igintutdo ni Jesus nga an hustisya sadang iaplikar ha ngatanan nga mga tawo. Ha usa nga okasyon ginpahinumdom ni Jesus an usa nga lalaki nga maaram han Balaud nga sadang niya higugmaon an Dios ngan an iya amyaw. An lalaki nagpakiana kan Jesus: “Hin-o man an akon kaaramyaw?” Bangin naglaom hiya nga mabaton hi Jesus: “An imo igkasi-Judio.” Kondi igin-istorya ni Jesus an parabola mahitungod han buotan nga Samaritano. Ha parabola binuligan han Samaritano an usa ka tawo nga ginkastigo han mga tikasan, samtang waray bumulig an usa nga Lebita ngan an usa nga saserdote. Napiritan pagkarawat an nagpakiana nga hini nga kahimtang an tinamay nga Samaritano amo an iya igkasi-tawo, diri an Lebita o an saserdote. Gintapos ni Jesus an iya ilustrasyon pinaagi han sagdon nga: “Buhata in sugad nga paagi.”—Lukas 10:25-37; Lebitiko 19:18.
“Diri Hiya Maluya o Diri Mahuhulop”
9. Paonan-o an pakasabot ha kinaiya han totoo nga hustisya nakakaapekto ha aton?
9 Tungod kay iginpatin-aw ni Jesus an kahulogan han totoo nga hustisya, an iya mga disipulo nahibaro ha pagpakita hini nga kalidad. Sugad man kita. Siyahan ha ngatanan, kinahanglan karawaton naton an mga suruklan han Dios mahitungod han maopay ngan maraot, tungod kay hiya an may-ada katungod ha pagdesisyon kon ano an husto ngan matadong. Samtang nangangalimbasog kita ha pagbuhat han mga butang uyon ha kaburut-on ni Jehova, an aton matadong nga paggawi matin-aw nga magpapakita kon ano an totoo nga hustisya.—1 Pedro 2:12.
10. Kay ano nga an pagpakita hin hustisya nagkikinahanglan hin pakigbahin ha pagsangyaw ngan pagtutdo nga buruhaton?
10 Ipinapakita liwat naton an totoo nga hustisya kon kita mauyatom nga nakikigbahin ha pagsangyaw ngan pagtutdo nga buruhaton. Hi Jehova hura nga nagtatagana hin nagluluwas-han-kinabuhi nga kahibaro mahitungod ha iya mismo, ha iya Anak, ngan ha iya mga katuyoan. (Juan 17:3) Diri magigin husto o makatadunganon nga diri naton isumat ito nga kahibaro. “Ayaw ighawid an kaopayan ha ira nga hintutungdan hini, kon an gahum ha pagbuhat hini aada ha imo kamot,” siring ni Salomon. (Proberbios 3:27) Bug-os-kasingkasing nga isumat naton ha iba nga mga tawo an aton hinbabaroan mahitungod ha Dios, anoman an ira rasa, tribo, o nasud nga gintikangan.—Buhat 10:34, 35.
11. Ha pagsubad kan Jesus, paonan-o naton sadang tratuhon an iba?
11 Dugang pa, gintatrato han totoo nga Kristiano an iba sugad han pagtrato ni Jesus. Damu yana an naatubang hin nakakapanluya nga mga problema ngan nanginginahanglan gud hin pagpaid ngan pagdasig. Bisan an iba nga dedikado nga mga Kristiano bangin nanluluya na gud tungod han mga panhitabo salit pariho na hira hin rumok nga mga tangbo o nagtitikaparong nga mga pabilo. Diri ba nagkikinahanglan hira han aton suporta? (Lukas 22:32; Buhat 11:23) Nakakaliaw gud an pagin kaapi ha asosasyon han totoo nga mga Kristiano, nga nangangalimbasog pagsubad kan Jesus ha pagpakita han hustisya!
12. Kay ano nga makakasarig kita nga hirani na matuman an hustisya para ha ngatanan?
12 Magkakaada pa ba hustisya para ha ngatanan? Oo. An Usa nga Pinili ni Jehova ‘diri maluya o diri mahuhulop, ngada nga makagpahamutang hiya han kasubayan dida ha tuna.’ An nahitrono nga Hadi, an binanhaw nga hi Kristo Jesus, hirani na gud ‘bumulos ha mga waray kumilala ha Dios.’ (2 Tesalonika 1:6-9; Pahayag 16:14-16) An pagmando han tawo sasaliwanan han Ginhadian han Dios. Magkakaada hustisya ngan katadongan ha bisan diin. (Proberbios 2:21, 22; Isaias 11:3-5; Daniel 2:44; 2 Pedro 3:13) May-ada duro nga kaikag nga an mga surugoon ni Jehova ha bisan diin—bisan ha hirayo nga mga lugar, “an mga purô”—naghuhulat hito nga adlaw.
‘Ihahatag Ko Hiya Sugad nga Kapawa han mga Nasud’
13. Ano an igintagna ni Jehova mahitungod han iya Pinili nga Surugoon?
13 Hi Isaias nagpadayon: “Ha sugad hini nasiring an Dios nga hi Jehova, hiya nga nagbuhat han mga langit, ngan nag-unat ha ira; hiya nga nagbitad han kahaluagan han tuna ngan hadton nagawas tikang hini; hiya nga naghatag han pagginhawa han katawohan dida, ngan han espiritu ha ira nga naglalakat dida.” (Isaias 42:5) Mapuwersa gud nga paghulagway kan Jehova, an Maglalarang! Ini nga pahinumdom mahitungod han gahum ni Jehova nagpapabug-at gud ha iya ginsiring. Hi Jehova nagsiring: “Ako, hi Jehova, nagtawag ha imo ha pagkamatadong, ngan makapot ha imo kamot, ngan magbabantay ha imo, ngan mahatag ha imo para ha kauyonan han katawohan, para han kapawa han mga Hentil; ha pagpukrat han mga mata han mga buta, ha pagdara ha gawas han mga binilanggo tikang ha langub, ngan ha ira nga nalingkod ha kasisidman tikang ha balay nga bilanggoan.”—Isaias 42:6, 7.
14. (a) Ano an kahulogan han pagkapot ni Jehova ha kamot han iya inuyonan nga Surugoon? (b) Ano an toka nga pagbubuhaton han Pinili nga Surugoon?
14 An Gihitaasi nga Maglalarang han uniberso, an Humaratag ngan Nagsusustini han kinabuhi, nakapot ha kamot han iya Pinili nga Surugoon ngan nagsasaad hin bug-os ngan padayon nga suporta. Daku gud ito nga pasarig! Dugang pa, gintitipigan hiya ni Jehova nga talwas basi ihatag hiya sugad nga “kauyonan han katawohan.” An kauyonan usa nga kontrata, usa nga ginkasabotan, usa ka seryoso nga saad. Usa ito ka masasarigan nga balaud. Oo, ginhimo ni Jehova an iya Surugoon sugad nga “usa nga ginsaaran ha mga tawo.”—An American Translation.
15, 16. Ha ano nga paagi hi Jesus nagin ‘kapawa han mga nasud’?
15 Sugad nga ‘kapawa han mga nasud,’ an iginsaad nga Surugoon mag-aabri “han mga mata han mga buta” ngan magpapagawas “ha ira nga nalingkod ha kasisidman.” Ginbuhat ini ni Jesus. Pinaagi ha pagtestigo han kamatuoran, ginhimaya ni Jesus an ngaran han iya Amay ha langit. (Juan 17:4, 6) Iya iginbuhayhag an mga buwa han relihiyon, iginsangyaw an maopay nga sumat han Ginhadian, ngan gin-abrihan an purtahan ngadto ha espirituwal nga kagawasan para hadton gin-uuripon han relihiyon. (Mateo 15:3-9; Lukas 4:43; Juan 18:37) Nagpahamangno hiya kontra han mga buhat nga kanan kasisidman ngan iginbuhayhag hi Satanas sugad nga ‘amay han buwa’ ngan “an prinsipe hini nga kalibotan.”—Juan 3:19-21; 8:44; 16:11.
16 Hi Jesus nagsiring: “Ako amo an kalamrag han kalibotan.” (Juan 8:12) Pinamatud-an niya ito ha waray-kapariho nga paagi han iya iginhalad an iya hingpit nga kinabuhi sugad nga lukat. Hito nga paagi inabrihan niya an dalan para hadton nagpapakita hin pagtoo basi magkaada kapasayloan han mga sala, inuyonan nga relasyon ha Dios, ngan paglaom nga kinabuhi nga waray kataposan. (Mateo 20:28; Juan 3:16) Pinaagi han pagtipig hin hingpit nga diosnon nga debosyon ha iya bug-os nga kinabuhi, ginpahitaas ni Jesus an pagkasoberano ni Jehova ngan iya pinamatud-an nga buwaon an Yawa. Tinuod nga hi Jesus humaratag hin pagkita ha mga buta ngan parahatag hin kagawasan ha mga priso ha espirituwal nga kasisidman.
17. Ha ano nga mga paagi kita nag-aalagad sugad nga mga paradara han kalamrag?
17 Ha Sermon ha Bukid, hi Jesus nagsiring ha iya mga disipulo: “Kamo amo an kalamrag han kalibotan.” (Mateo 5:14) Diri ba kita liwat mga paradara han kalamrag? Pinaagi han aton pagkinabuhi ngan han aton pagsangyaw nga buruhaton, may-ada kita pribilehiyo nga giyahan an iba ngada kan Jehova, an Surok han totoo nga kalamrag. Ha pagsubad kan Jesus, aton iginpapahibaro an ngaran ni Jehova, ginpapahitaas an Iya pagkasoberano, ngan iginpapasamwak an Iya Ginhadian sugad nga an amo la nga paglaom han katawohan. Dugang pa, sugad nga mga paradara han kalamrag iginbubuhayhag naton an mga buwa han relihiyon, nagpapahamangno kontra han mahugaw nga mga buhat nga kanan kasisidman, ngan iginbubuhayhag hi Satanas, an usa nga maraot.—Buhat 1:8; 1 Juan 5:19.
“Pagkanta kan Jehova hin Bag-o nga Kanta”
18. Ano an ginpapahinabo ni Jehova nga mahibaroan han iya katawohan?
18 Iginbirik yana ni Jehova an iya atensyon ngada ha iya katawohan, nasiring: “Ako hi Jehova, amo ito an akon ngaran; ngan an akon himaya diri ko ihahatag ha iba, diri man an akon pagdayaw ngada ha mga ladawan nga ginuhitan. Kitaa, an daan nga mga butang nahinabo, ngan an bag-o nga mga butang akon igpapahayag; ha waray pa hira pagkakaulpot akon hira iginsumat ha iyo.” (Isaias 42:8, 9) An tagna mahitungod han “akon surugoon” iginyakan, diri han usa han waray-pulos nga mga dios, kondi han amo la nga buhi ngan totoo nga Dios. Sigurado nga matutuman ito, ngan natuman gud man ito. Hi Jehova nga Dios amo gud an Parahimo han bag-o nga mga butang, ngan iya ginpapahinabo nga an iya katawohan mahibaro hito antes ito mahitabo. Paonan-o kita sadang bumalos?
19, 20. (a) Ano nga kanta an sadang kantahon? (b) Hin-o yana an nagkakanta hin kanta ha pagdayaw kan Jehova?
19 Hi Isaias nagsurat: “Pagkanta kan Jehova hin bag-o nga kanta, ngan pagdayaw ha iya tikang ha kataposan han tuna; kamo nga nalugsong ngadto ha dagat, ngan an ngatanan nga aada dida, an mga purô ngan an mga umurukoy dida. Ipaalsa han kamingawan ngan han mga bungto dida an ira tingog, an mga baryo nga kanan Kedar inuukyan; papagkantaha an mga umurukoy han Sela, paguliata hira tikang ha igbaw han kabukiran. Papaghataga hira hin himaya kan Jehova, ngan papag-asoya han pagdayaw ha iya dida ha mga purô.”—Isaias 42:10-12.
20 An mga umurukoy ha mga siyudad, ha mga baryo ha kamingawan, ha mga purô, bisan ha “Kedar,” o mga kampo ha disyerto—an mga tawo ha bisan diin—gin-aagda nga magkanta hin kanta ha pagdayaw kan Jehova. Makalilipay gud nga ha aton panahon minilyon an nagios uyon hinin matagnaon nga hangyo! Kinarawat nira an kamatuoran han Pulong han Dios ngan kinilala hi Jehova nga ira Dios. An katawohan ni Jehova nagkakanta hinin bag-o nga kanta—naghihimaya kan Jehova—ha sobra 230 nga katunaan. Makalilipay gud an pagkanta kaupod hini nga koro nga magkalainlain an kultura, yinaknan, ngan rasa!
21. Kay ano nga an mga kaaway han katawohan han Dios diri naglalampos ha pagpaundang han kanta ha pagdayaw kan Jehova?
21 An mga parakontra ba makakaato ha Dios ngan makakapaundang hinin kanta ha pagdayaw? Imposible! “Hi Jehova magawas sugad hin usa ka tawo nga makusganon; iya pagkukugayon an iya kainit sugad hin usa ka tawo ha pakig-away: hiya masinggit, oo, hiya maguliat hin daku; hiya magbubuhat ha makusganon patok ha iya mga kaaway.” (Isaias 42:13) Ano nga gahum an makakaato kan Jehova? Ha naglabay nga mga 3,500 ka tuig, hi propeta Moises ngan an mga anak ni Israel nagkanta: “Hi Jehova amo an tawo ha pakig-away; hi Jehova amo an iya ngaran. An kan Paraon mga karomata ha pakig-away ngan an iya kasundalohan iya ipinamilak ngadto ha dagat; ngan an iya pinili nga mga pangulo nagkalulumos ha Mapula nga Dagat.” (Eksodo 15:3, 4) Nagdaog hi Jehova kontra ha pinakagamhanan nga puwersa militar hito nga panahon. Waray maglalampos nga kaaway han katawohan han Dios kon hi Jehova nagios sugad nga gamhanan nga girriro.
“Naghilom Ako ha Maiha nga mga Panahon”
22, 23. Kay ano nga hi Jehova ‘naghilom ha maiha nga panahon’?
22 Hi Jehova waray-ginpapasulabi ngan may-hustisya, bisan ha pagpadapat hin paghukom ha iya mga kaaway. Hiya nagsiring: “Naghilom ako ha maiha nga mga panahon; hinilom ako ngan nagpugong ha akon ngahaw: yana ako masinggit sugad hin babaye nga nagbabati; ako maghihingahinga ngan maghihinduka. Ako mamumungkag han mga bukid ngan han mga bungtod, ngan pamamad-on ko an ngatanan nira nga banwa; ngan akon panhihimoon an mga salog nga mga purô, ngan pamamad-on an mga libaong.”—Isaias 42:14, 15.
23 Antes ipadapat an paghukom, gintutugotan ni Jehova nga lumabay an panahon basi hatagan hin higayon an mga makasasala nga magbag-o han ira maraot nga mga buhat. (Jeremias 18:7-10; 2 Pedro 3:9) Tagda an kahimtang han mga Babilonyahanon, nga sugad nga nangunguna nga gahum ha kalibotan, nagbungkag han Jerusalem han tuig 607 A.K.P. Gintugotan ini ni Jehova basi disiplinahon an mga Israelita tungod han ira pagkadiri-matinumanon. Kondi, napakyas an mga Babilonyahanon ha pagkilala han ira bahin. Gintrato nira an katawohan han Dios hin mas mapintas kay ha ginkinahanglan ha paghukom han Dios. (Isaias 47:6, 7; Sakarias 1:15) Sigurado nga nabido gud an totoo nga Dios nga makita an iya katawohan nga nag-aantos! Kondi nagpugong hiya ha paggios tubtob ha iya itinanda nga panahon. Katapos, nangalimbasog hiya—pariho hin usa nga babaye nga nanganganak—ha pagpagawas han iya katawohan nga may-kauyonan ngan igindeklara hira sugad nga independente nga nasud. Basi matuman ini, han 539 A.K.P., iya ginpamara ngan ginbungkag an Babilonya ngan an mga depensa hito.
24. Ano nga paglaom an inabrihan ni Jehova para ha iya katawohan, an Israel?
24 Sigurado nga nalipay gud an katawohan han Dios han ha kataposan naabrihan an dalan tipauli para ha ira, katapos hin damu ka tuig nga pagkabihag! (2 Kronikas 36:22, 23) Sigurado nga nalipay hira nga maeksperyensyahan an katumanan han saad ni Jehova: “Akon pagdadad-on an mga buta ha dalan nga diri nira hinbabaroan; ha mga agianan nga diri nira hinbabaroan akon hira mamandoan; akon hihimoon an kasisidman nga kapawa ha ira atubangan, ngan nga matadong an baliko nga mga lugar. Ini nga mga butang akon bubuhaton, ngan diri ko hira babayaan.”—Isaias 42:16.
25. (a) Ha ano makakasiguro an katawohan ni Jehova yana nga panahon? (b) Ano an sadang magin determinasyon naton?
25 Paonan-o ini nga mga pulong natutuman yana nga panahon? Bueno, maiha na nga panahon yana—sulod hin mga siglo na—nga gintutugotan ni Jehova an mga nasud nga magbuhat han ira karuyag. Kondi, hirani na an iya itinanda nga panahon ha paghusay han mga butang. Ha moderno nga mga panahon nagbangon hiya hin katawohan basi magtestigo ha iya ngaran. Pinaagi han pagpatag, siring pa, ha bisan ano nga pagkontra ha ira, iya na ginhahamis an dalan basi hira magsingba ha iya “ha espiritu ngan ha kamatuoran.” (Juan 4:24) Hiya nagsaad: “Diri ko hira babayaan,” ngan iya gintuman an iya pulong. Kumusta man adton padayon nga nagsisingba ha palso nga mga dios? Hi Jehova nagsiring: “Hira nga nasarig ha mga ladawan nga ginuhitan, nga nasiring ha mga ladawan nga mga hinurma: Kamo an amon mga dios, papapamalikon, hira pagpapakaalohan hin tinuod.” (Isaias 42:17) Importante gud nga magpabilin kita nga matinumanon kan Jehova, sugad han ginbuhat han iya Pinili!
‘An Surugoon nga Bungol Ngan Buta’
26, 27. Paonan-o an Israel napamatud-an nga ‘surugoon nga bungol ngan buta,’ ngan ano an mga resulta?
26 An Pinili nga Surugoon han Dios, hi Jesu-Kristo, nagpabilin nga matinumanon tubtob ha kamatayon. Kondi, an Israel nga katawohan ni Jehova napamatud-an nga diri-matinumanon nga surugoon, bungol ngan buta ha espirituwal nga kahulogan. Ha pakiistorya ha ira, hi Jehova nagsiring: “Pamati, kamo mga bungol; ngan tan-aw, kamo mga buta, nga kamo makakita. Hin-o an buta, kondi an akon la surugoon? o an bungol, sugad han akon sinugo nga akon pinakadto? Hin-o an buta sugad ha iya nga nakikigdait ha akon, ngan buta sugad han kan Jehova surugoon? Ikaw nakita han damu nga butang, kondi diri ka nagmamatngon: an iya mga talinga inabrihan kondi diri hiya nabati. Nakalipay kan Jehova, tungod han iya pagkamatadong, an pagpadaku han balaud, ngan an paghimo hini nga dungganan.”—Isaias 42:18-21.
27 Makasurubo gud an kapakyasan han Israel! An iya katawohan pauroutro nga nagsingba ha demonyo nga mga dios han mga nasud. Pauroutro nga ginsugo ni Jehova an iya mga mensahero, kondi an iya katawohan waray pamati. (2 Kronikas 36:14-16) Igintagna ni Isaias an mga resulta: “Ini amo an katawohan nga gin-agawan ngan gintikasan; hira ngatanan hira nagkadadakop dida ha mga luong, ngan hira gintago dida ha mga balay nga bilanggoan: hira para hin usa nga dinakpan, ngan waray nagluwas; para hin usa nga dinag-an, ngan waray nagsiring: Iuli. Hin-o dida ha iyo an mahatag hin talinga hini? Nga mamati ngan makakabati para ha panahon nga umarabot? Hin-o an naghatag kan Jakob sugad nga dinag-an, ngan kan Israel ngadto ha mga tikasan? Diri ba hi Jehova? Hiya ngain kita pakasala, ngan kanay mga dalan diri hira maglalakat, diri man hira magmamasinugtanon ha iya balaud. Busa iginbubo niya ha iya an kabangis han iya kasina, ngan an kusog han away; ngan ini nagsunog ha iya ha palibot, kondi waray hiya mahibaro; ngan ini nagsunog ha iya, bisan pa waray ini niya igpahamutang ha iya kasingkasing.”—Isaias 42:22-25.
28. (a) Ano an mahibabaroan naton tikang ha nahitabo ha mga umurukoy han Juda? (b) Paonan-o naton pangangalimbasogan nga magkaada han pag-uyon ni Jehova?
28 Tungod han pagkadiri-matinumanon han mga umurukoy hito, gintugotan ni Jehova nga an Juda matikasan ngan agawan han 607 A.K.P. Ginsunog han mga Babilonyahanon an templo ni Jehova, ginbungkag an Jerusalem, ngan ginbihag an mga Judio. (2 Kronikas 36:17-21) Hinaot kinasingkasing nga tagdon naton inin nagpapahamangno nga hitabo ngan diri gud igbalewaray an mga instruksyon ni Jehova o an iya sinurat nga Pulong. Lugod, hinaot pangalimbasogan naton nga magkaada han pag-uyon ni Jehova pinaagi han pagsubad kan Kristo Jesus, an Surugoon nga inuyonan mismo ni Jehova. Pariho kan Jesus, hinaot ipahibaro naton an totoo nga hustisya pinaagi han aton ginsisiring ngan ginbubuhat. Hini nga paagi, magpapabilin kita nga kaupod han katawohan ni Jehova, nagigin mga paradara han kalamrag nga nagdadayaw ha totoo nga Dios ngan naghihimaya ha iya.
[Mga Pakiana]