Paonan-o Naton Sadang Tagdon an Mga Pagsari?

MGA pagsari! Mga kakurian! Kinahanglan atubangon ito han ngatanan. Bangin tungod ito han ibaiba nga personalidad, mga problema ha pinansyal, maluya nga kahimsog, mga pagsulay, pag-ipit han kaupod nga magbuhat hin sayop, pagtimaraot, mga ayat ha aton gintotoohan ha neutralidad o kontra ha idolatriya, ngan damu pa nga iba nga mga butang. Anoman nga mga kakurian an aton inaatubang, agsob nga nagriresulta ito hin duro nga kabaraka. Paonan-o naton malalamposan ito? May-ada ba bisan ano nga paagi nga mapapahimulsan naton ito?

An Gimaopayi nga Bulig

An kinabuhi ni Hadi David han naglabay puno hin mga kakurian, kondi namatay hiya nga matinumanon. Paonan-o hiya naglampos? Iya gin-unabi an surok han iya kusog han hiya nagsiring: “Hi Jehova amo an akon magbarantay; diri magkukulang ha akon.” Katapos nagpadayon hiya ha pagsiring: “Bisan ako maglakat ha patag han lambong han kamatayon. Diri ako mahadlok hin bisan ano nga maraot; kay ikaw upod nakon; an imo baston ngan an imo tungkod, nakakaliaw ha akon.” (Salmo 23:1, 4) Oo, hi Jehova an surok han hura nga bulig. Iya gingiyahan hi David durante han pipira nga magkuri hinduro nga mga panahon, ngan andam hiya nga buhaton ito ha aton kon kinahanglanon.

Paonan-o naton makakarawat an bulig ni Jehova? Gin-uunabi han Biblia an paagi han ito nasiring: “Tilawi niyo ngan kitaa nga hi Jehova maopay.” (Salmo 34:8) Sinsero ito nga pagdapit, kondi ano an kahulogan hito? Nagdadasig ito ha pag-alagad kan Jehova ngan ha pagpahiuyon hin bug-os han aton kinabuhi ha iya kaburut-on. An sugad nga pagkinabuhi nangangahulogan hin pagsalikway ha pipira han aton kagawasan, ngan paghimo hin mga pagsakripisyo. Ha iba nga mga kahimtang, mahimo pa ngani ito magresulta hin mga kakurian—pagtimaraot ngan pag-antos. Kondi, adton bug-os-kasingkasing nga nakarawat han pagdapit ni Jehova diri gud kinahanglan magbasol ha pagbuhat hito. Magigin buotan gud hi Jehova ha ira. Iya gigiyahan ngan aatamanon hira ha espirituwal. Iya titipigan hira durante han mga kakurian pinaagi han iya Pulong, han iya baraan nga espiritu, ngan han Kristiano nga kongregasyon. Ngan maabot an panahon nga iya babalosan hira hin kinabuhi nga  waray kataposan.—Salmo 23:6; 25:9; Isaias 30:21; Roma 15:5.

Adton naghihimo hin nakakagbag-o han pagkinabuhi nga desisyon ha pag-alagad kan Jehova ngan nagpapabilin dida hito nga desisyon nahibabaro nga gintutuman ni Jehova an ngatanan nga iya mga saad. Ito an eksperyensya han mga Israelita nga sinunod kan Josue ngadto ha Tuna nga Iginsaad. Han tinabok na hira ha Jordan, may-ada mga kakurian nga kinahanglan malamposan, mga away nga kinahanglan pakig-awayan, ngan makuri nga mga leksyon nga kinahanglan hibaroan. Kondi ito nga katulinan napamatud-an nga mas matinumanon kay han ira mga amay, nga ginawas ha Ehipto ngan nagkamatay ha kamingawan. Salit, ginsuportahan ni Jehova an mga matinumanon, ngan may kalabotan ha ira kahimtang han namatay hi Josue, an rekord han Biblia nasiring: “Iginhatag ha ira ni Jehova an pagpahuway ha palibot, sumala han ngatanan nga iya ipinanumpa ha ira mga amay . . . Waray gud nakawang han bisan hain han mag-opay nga butang nga kan Jehova iginyakan ngadto ha panimalay ni Israel, an ngatanan natuman.” (Josue 21:44, 45) Mahimo liwat ito mahitabo ha aton kon bug-os nga nasarig kita kan Jehova durante han kakurian ngan ha ngatanan nga iba nga mga panahon.

Ano an bangin makapaluya han aton pagsarig kan Jehova? Gin-unabi ni Jesus an usa nga hinungdan han hiya nagsiring: “Waray tawo nga makakagmangno hin duha nga agaron . . . Diri kamo makakagmangno ha Dios ngan ha manggad.” (Mateo 6:24) Kon nasarig kita kan Jehova, diri kita mamimiling hin seguridad ha materyal nga mga butang, diin namimiling an kadam-an ha kalibotan. Ginsagdonan ni Jesus an iya mga sumurunod: “Kondi pamilnga niyo siyahan an ginhadian han Dios, ngan an iya katadongan; ngan ngatanan ini [nga kinahanglanon nga materyal] nga mga butang mahidudugang ha iyo.” (Mateo 6:33) An Kristiano nga nagtitipig hin timbang nga panhunahuna ha materyal nga mga butang ngan gin-uuna an Ginhadian han Dios ha iya kinabuhi naghihimo han husto nga pagpili. (Eklesiastes 7:12) Siyempre, posible nga may-ada mawara ha iya. Bangin magsakripisyo hiya ha materyal nga paagi. Kondi makarawat hiya hin damu nga mga balos. Ngan bubuligan hiya ni Jehova.—Isaias 48:17, 18.

Kon Ano an Aton Mahibabaroan Tikang ha mga Kakurian

An pagdesisyon nga ‘tilawan ngan kitaon nga hi Jehova maopay,’ natural la nga diri nagpapanalipod ha usa ha diri-linalaoman nga mga panhitabo ha kinabuhi; diri liwat ito bug-os nga nagpapanalipod ha aton tikang ha mga pag-atake ni Satanas ngan han iya tawhanon nga mga representante. (Eklesiastes 9:11) Sugad nga resulta, an sinseridad ngan determinasyon han usa nga Kristiano mahimo masarihan. Kay ano nga gintutugotan ni Jehova an iya mga magsiringba nga maapektohan han sugad nga mga kakurian? Hi apostol Pedro naghatag hin usa nga hinungdan han hiya nagsurat: “Niyan ha gutiay la nga panahon, kon may kinahanglan, pagsub-on kamo ha magkadirodilain nga mga pagsulay, nga an proyba han iyo pagtoo, nga amo an labi pa ka hamili kay ha bulawan nga nawawara bisan kon ito ginproybahan ha kalayo, hiagian unta ha pagdayeg ngan kahimayaan ngan kadungganan kon magpahayag na hi Jesu-Kristo.” (1 Pedro 1:6, 7) Oo, an mga pagsari nagtutugot ha aton nga ipakita an kalidad han aton pagtoo ngan han aton gugma kan Jehova. Ngan nakakabulig ito ha pagbaton ha mga pagtamay ngan mga akusasyon ni Satanas nga Yawa.—Proberbios 27:11; Pahayag 12:10.

An mga pagsari nakakabulig liwat ha aton nga mapatubo an iba pa nga Kristiano nga mga kalidad. Pananglitan, tagda an mga pulong han salmista: “Natan-aw [hi Jehova] hin hirani ha makalolooy; kondi hirayo niya kilalahon an palabilabihon.” (Salmo 138:6) Diri kinaiya han damu ha aton an pagin mapainubsanon, kondi an mga kakurian makakabulig ha aton nga magkaada hiton importante nga kalidad. Hinumdumi an panhitabo ha panahon ni Moises han nasumhan na an pipira ha Israel ha pagkaon han mana kada semana, kada bulan. Matin-aw, usa adto nga pagsari ha ira, bisan kon an mana usa nga milagroso nga tagana. Ano an katuyoan hito nga pagsari? Hi Moises nagsumat ha ira: “[Hi Jehova] nagpakaon ha imo ha kamingawan hin mana . . . basi mahimo ka niya nga mapaubsanon, ngan basi masarihan ka niya.”—Deuteronomio 8:16.

 An aton pagin mapainubsanon masasarihan liwat. Paonan-o? Pananglitan, paonan-o naton kinakarawat an mga pagbag-o ha organisasyon? (Isaias 60:17) Bug-os-kasingkasing nga nasuporta ba kita ha pagsangyaw ngan pagtutdo nga buruhaton? (Mateo 24:14; 28:19, 20) Disidido ba kita kumarawat han mga pagsaysay han kamatuoran ha Biblia nga igintatagana han “matinumanon ngan maaramon nga uripon”? (Mateo 24:45-47, NW; Proberbios 4:18) Ginpupugngan ba naton an pag-ipit nga magkaada han gibabag-ohi nga garamiton, gibabag-ohi nga uso han pamado, o gibabag-ohi nga modelo han awto? An mapainubsanon nga tawo makakabaton hin oo hito nga mga pakiana.—1 Pedro 1:14-16; 2 Pedro 3:11.

Mabubuligan kita han mga pagsari nga magkaada usa pa nga importante nga kalidad—pag-ilob. Hi disipulo Jakobo nagsiring: “Mga kabugtoan ko, isipon niyo sugad hin bug-os nga kalipay, kon mahulog kamo ha mga magkadirodilain nga panulay; kay hinbaroan niyo nga an pagproyba ha iyo pagtoo nabunga hin pag-ilob.” (Jakobo 1:2, 3) An malampuson nga pag-ilob ha damu nga mga pagsari nga bug-os nga nasarig kan Jehova nagpapatubo hin karig-on, pagkamapinadayunon, ngan integridad. Nagpaparig-on ito ha aton nga malamposan an tidaraon nga mga pag-atake ni Satanas, an nasisina nga dios hini nga kalibotan.—1 Pedro 5:8-10; 1 Juan 5:19; Pahayag 12:12.

Magkaada Husto nga Panlantaw ha mga Kakurian

An hingpit nga Anak han Dios, hi Jesu-Kristo, inatubang hin damu nga mga kakurian han nakanhi pa ha tuna ngan kinarawat hin daku nga mga kapulsanan ha paglampos hito. Hi Pablo nagsurat nga hi Jesus “nahibaro . . . ha pagkamasinugtanon tungod ha mga bagay nga iya gin-antos.” (Hebreo 5:8) An iya pagin maunungon tubtob ha kamatayon nagdara hin kadayawan ha ngaran ni Jehova ngan tungod hito nagin posible para kan Jesus nga ihalad an bili han iya hingpit nga tawhanon nga kinabuhi sugad nga lukat para han katawohan. Nag-abri ito han dalan para hadton nagpapakita hin pagtoo kan Jesus nga magkaada hin paglaom nga kinabuhi nga waray kataposan. (Juan 3:16) Tungod kay nagpabilin hi Jesus nga matinumanon durante han kakurian, hiya yana an aton Hitaas nga Saserdote ngan nahitrono nga Hadi.—Hebreo 7:26-28; 12:2.

Kumusta man kita? An aton pagin maunungon durante han mga kakurian nagdadara liwat hin hura nga mga bendisyon. Mahitungod hadton may-ada langitnon nga paglaom, an Biblia nasiring: “Bulahan an tawo nga makag-antos ha panulay; kay kon human na hiya pagproyba, kakarawaton niya an pudong-pudong han kinabuhi, nga iginsaad han Ginoo ha mga naghigugma ha iya.” (Jakobo 1:12) Adton may-ada tunan-on nga paglaom nasarig nga kon magpailob hira nga matinumanon, makakapanunod hira han kinabuhi nga waray kataposan ha paraiso ha tuna. (Pahayag 21:3-6) Ngan mas importante, an ira matinumanon nga pag-ilob nagdadara hin kadayawan ha ngaran ni Jehova.

Samtang aton ginsusunod an mga pitad ni Jesus, makakasarig kita nga malalamposan naton an ngatanan nga mga pagsari nga inaatubang naton hini nga sistema han mga butang. (1 Korinto 10:13; 1 Pedro 2:21) Paonan-o? Pinaagi han aton pagsarig kan Jehova, nga naghahatag han “kapin kaopay nga gahum” ngada hadton nasarig ha iya. (2 Korinto 4:7) Hinaot an aton pagtoo magin pariho han kan Job, nga bisan kon nag-antos hiya hin mabangis nga mga kakurian, may pagsarig nga nagsiring: “Kon iya ako sarihan, magawas ako sugad hin bulawan.”—Job 23:10.

[Retrato ha pahina 31]

An pagin maunungon ni Jesus durante han pagsari nagdara hin kadayawan ha ngaran ni Jehova. Sugad man an aton pagin maunungon