Subara an Bantogan nga Magturutdo

“Busa, lakat kamo, ngan manhimo kamo hin mga tinon-an. . . . Pagtutdui hira ha pagbantay han ngatanan nga mga bagay, nga akon iginsugo ha iyo.”—MATEO 28:19, 20.

1, 2. (a) Paonan-o kita ngatanan, ha usa nga paagi, mga magturutdo? (b) Mahitungod han pagtutdo, ano an naiiba nga responsabilidad han totoo nga mga Kristiano?

 USA ka ba nga magturutdo? Ha usa nga paagi, magturutdo kita ngatanan. Ha kada panahon nga naghahatag ka hin mga giya ha nawawara nga biyahero, nagpapakita ha igkasi-trabahador kon paonan-o bubuhaton an usa nga trabaho, o nagsasaysay ha usa nga bata kon paonan-o an pagsintas han iya sapatos, nagtututdo ka. An pagbulig ha iba ha sugad nga mga paagi nagdadara hin katagbaw, diri ba?

² Mahitungod han pagtutdo, an totoo nga mga Kristiano may-ada naiiba nga responsabilidad. Ginsugo kita nga ‘manhimo hin mga tinon-an, tutdoan hira.’ (Mateo 28:19, 20) Ha sulod han kongregasyon liwat, may-ada kita mga okasyon ha pagtutdo. Ginpipili an kuwalipikado nga kalalakin-an basi mag-alagad sugad nga ‘mga magbarantay ngan mga magturutdo,’ basi parig-unon an kongregasyon. (Efeso 4:11-13) Ha ira adlaw-adlaw nga mga buruhaton sugad nga Kristiano, an hamtong nga kababayin-an sadang magin “mga magturutdo hadton mag-opay” ha batan-on nga kababayin-an. (Tito 2:3-5) Ginsasagda kita ngatanan nga dasigon an mga igkasi-tumuroo, ngan mahimo naton sundon iton nga sagdon pinaagi han paggamit han Biblia ha pagdasig ha iba. (1 Tesalonika 5:11) Daku gud nga pribilehiyo an pagin magturutdo han Pulong han Dios ngan pagpaangbit han espirituwal nga mga butang nga may-ada nagpapadayon nga mga kapulsanan!

 3. Paonan-o naton mapapauswag an aton pagkaepektibo sugad nga mga magturutdo?

³ Kondi, paonan-o naton mapapauswag an aton pagkaepektibo sugad nga mga magturutdo? Siyahan, pinaagi han pagsubad ha Bantogan nga Magturutdo, hi Jesus. ‘Kondi paonan-o naton masusubad hi Jesus?’ bangin magpakiana an iba. ‘Hingpit hiya.’ Oo, diri kita mahimo magin hingpit nga mga magturutdo. Kondi, anoman an aton mga abilidad, mahihimo naton an aton gimaopayi ha pagsubad ha paagi han pagtutdo ni Jesus. Aton paghisgotan kon paonan-o naton magagamit an upat han iya mga paagi—pagin simple, epektibo nga mga pakiana, lohikal nga pangatadongan, ngan angayan nga mga ilustrasyon.

Pagtutdo ha Simple nga Paagi

4, 5. (a) Kay ano nga an pagin simple usa ka importante nga kinaiya han kamatuoran han Biblia? (b) Basi makagtutdo pinaagi han pagin simple, kay ano nga importante an pagbantay ha aton mga pulong?

⁴ An basihan nga mga kamatuoran han Pulong han Dios diri makuri masabtan. Ha pag-ampo, hi Jesus nagsiring: “Ako nagdadayaw ha imo, O Amay, . . . kay imo gintago ini nga mga bagay ha mga makinaadmananon ngan masinabuton, ngan ipinahayag ha mga kabataan.” (Mateo 11:25) Ginpapahinabo ni Jehova nga igpahayag an iya mga katuyoan ngada hadton sinsero ngan mapainubsanon an mga kasingkasing. (1 Korinto 1:26-28) Salit, an pagin simple usa ka importante nga kinaiya han kamatuoran han Biblia.

⁵ Kon nagdudumara ka hin pag-aram ha Biblia ha balay o nabalik ha mga interesado, paonan-o ka makakagtutdo ha simple nga paagi? Bueno, ano an aton hinbaroan tikang ha Bantogan nga Magturutdo? Basi masiguro nga nasasabtan hiya han iya mga mamarati, nga damu ha ira an “waray hibabroan ngan waray sarabotan,” ginamit ni Jesus an simple nga mga pulong nga ira masasabtan. (Buhat 4:13) Salit, basi makagtutdo ha simple nga paagi, an siyahan nga kinahanglanon amo an pagbantay ha aton mga pulong. Diri naton kinahanglan an higlarom  nga mga pulong basi makombinse an iba han kamatuoran han Pulong han Dios. An sugad “magarbo nga mga pulong” mahimo makapaubos, labi na hadton limitado an edukasyon o abilidad. (1 Korinto 2:1, 2, NW) Ipinapakita han ehemplo ni Jesus nga an simple nga mga pulong nga pinili hin maopay makakagpahayag han kamatuoran nga may daku nga puwersa.

 6. Paonan-o naton malilikyan an paghatag hin damu hinduro nga impormasyon ha estudyante han Biblia?

⁶ Basi makagtutdo ha simple nga paagi, kinahanglan mag-ikmat liwat kita nga diri tagan an estudyante han Biblia hin damu hinduro nga impormasyon. Hi Jesus mapinairon ha mga limitasyon han iya mga disipulo. (Juan 16:12) Kita liwat, kinahanglan magin matinagaron ha mga limitasyon han estudyante. Pananglitan, kon nagdudumara kita hin pag-aram ha libro nga Kahibaro nga Nagtutugway Ngadto ha Kinabuhi nga Waray Kataposan, diri kinahanglan isaysay naton an ngatanan nga detalye. a Diri liwat kinahanglan magdagmit ha paghisgot han impormasyon, nga baga in pinakaimportante an paghisgot han itinanda nga kadamu han materyal. Lugod, maaramon nga an mga panginahanglan ngan mga abilidad han estudyante an magsiguro han kadagmit han pag-aram. An aton tumong amo an pagbulig ha estudyante nga magin disipulo ni Kristo ngan magsiringba ni Jehova. Kinahanglan gamiton naton an anoman nga panahon nga ginkikinahanglan basi mabuligan an interesado nga estudyante nga makasabot hin matin-aw han iya hinbabaroan. Hito nga paagi, an kamatuoran mahimo makadasig ha iya kasingkasing ngan magpagios ha iya ha pagbuhat.—Roma 12:2.

 7. Ano nga mga suhestyon an makakabulig ha aton ha pagtutdo ha simple nga paagi kon nagpapahayag kita ha kongregasyon?

⁷ Kon nagpapahayag kita ha kongregasyon, labi na kon may-ada mga bag-ohan, paonan-o kita magyayakan ha paagi nga “masayon hisabtan”? (1 Korinto 14:9) Tagda an tulo nga suhestyon nga makakabulig. Siyahan, isaysay an bisan ano nga diri-pamilyar nga mga termino nga gagamiton mo. An aton pagsabot ha Pulong han Dios naghahatag ha aton hin naiiba nga bokabularyo. Kon aton gamiton an mga termino sugad han “matinumanon ngan maaramon nga uripon,” “iba nga mga karnero,” ngan “Babilonya nga Daku,” bangin kinahanglan isaysay naton ha ira ha simple nga mga pulong nga makakahatag hin matin-aw nga kahulogan. Ikaduha, likyi an damu hinduro nga mga pulong. An damu hinduro nga mga pulong, nga sobra an pagkasaysay, mahimo makagwara han interes han mamarati. Magigin matin-aw ito kon kukuhaon an diri-kinahanglanon nga mga pulong. Ikatulo, ayaw paghisgot hin damu hinduro nga materyal. An aton pagsaliksik mahimo magresulta hin damu nga makapainteres nga mga detalye. Kondi gimaopayi an pag-organisa han materyal ngadto ha pipira nga importante nga mga punto, ginagamit an impormasyon la nga nagpapamatuod hiton nga mga punto ngan mahimo paghisgotan hin matin-aw ha iginhatag nga panahon.

Epektibo nga Paggamit hin mga Pakiana

8, 9. Paonan-o naton pipilion an usa nga pakiana nga makakadasig han interes han tagbalay? Paghatag hin mga ehemplo.

⁸ Hinumdumi nga maabtik hi Jesus ha paggamit hin mga pakiana basi madasig an iya mga disipulo nga magpahayag kon ano an aada ha ira mga hunahuna ngan basi mapagios ngan mabansay an ira panhunahuna. Pinaagi han iya mga pakiana, mapinairon nga natugkad ngan napagios ni Jesus an ira mga kasingkasing. (Mateo 16:13, 15; Juan 11:26) Pariho kan Jesus, paonan-o naton magagamit hin epektibo an mga pakiana?

⁹ Kon nagsasangyaw ha balay-balay, magagamit naton an mga pakiana ha pagdasig han interes, basi maisumat naton an mahitungod han Ginhadian han Dios. Paonan-o naton pipilion an usa nga pakiana nga makakadasig han interes han tagbalay? Pag-obserba. Kon nadaraon ha balay, kitaa an palibot. May-ada ba mga uyagan ha lagwirta, nga nagpapasabot nga may-ada kabataan ha balay? Kon amo, mahimo  kita magpakiana: ‘Naghunahuna ka na ba kon ano an magigin kahimtang han kalibotan kon dagku na an imo mga anak?’ (Salmo 37:10, 11) Damu ba an mga kandado ha purtahan, o may-ada ba elektronik nga sistema han seguridad? Mahimo kita magpakiana: ‘Ha imo hunahuna, maabot pa ba an panahon nga an mga tawo pariho ha aton magkakaada pa seguridad ha balay ngan ha kalsada?’ (Mika 4:3, 4) May-ada ba agian para han lingkoran nga de-kaliding? Mahimo kita magpakiana: ‘Maabot pa ba an panahon nga an ngatanan nga buhi magpapahimulos hin maopay nga kahimsog?’ (Isaias 33:24) Damu nga mga suhestyon an makikita ha libro nga Reasoning From the Scriptures. b

10. Paonan-o naton magagamit an mga pakiana basi ‘hibaroan’ an mga hunahuna ngan mga pagbati han kasingkasing han estudyante ha Biblia, kondi ano an sadang hinumdoman naton?

¹⁰ Paonan-o naton magagamit hin epektibo an mga pakiana kon nagdudumara hin mga pag-aram ha Biblia? Tungod kay diri pariho kan Jesus, diri naton mababasa an mga kasingkasing. Kondi, an mataktika ngan maaramon nga mga pakiana makakabulig ha aton nga ‘hibaroan’ an mga hunahuna ngan mga pagbati han kasingkasing han estudyante. (Proberbios 20:5) Pananglitan, aton gin-aadman an kapitulo nga “Kon Kay Ano nga an Diosnon nga Pagkinabuhi Nagdadara hin Kalipayan,” ha Kahibaro nga libro. Naghihisgot ito han panhunahuna han Dios mahitungod han pagkadiri-tangkod, pornikasyon, ngan iba pa nga mga butang. Mahimo batunon hin husto han estudyante an inimprinta nga mga pakiana, kondi nauyon ba hiya ha iya hinbabaroan? Mahimo kita magpakiana: ‘Makatadunganon ba ha imo an panhunahuna ni Jehova ha sugad nga mga butang?’ ‘Paonan-o mo iaaplikar ini nga mga prinsipyo ha Biblia ha imo kinabuhi?’ Kondi, hinumdumi nga kinahanglan an pagin matinalahuron ha dignidad han estudyante. Diri naton karuyag magpakiana nga bangin makainsulto o makaminos ha estudyante han Biblia.—Proberbios 12:18.

11. Ha ano nga mga paagi magagamit hin epektibo han mga mamumulong ha publiko an mga pakiana?

¹¹ An mga mamumulong ha publiko makakagamit liwat hin epektibo nga mga pakiana. An retorikal nga mga pakiana—mga pakiana nga diri naton ginlalaoman an mga mamarati nga bumaton ha daku nga tingog—makakabulig ha mamarati nga maghunahuna ngan mangatadongan. Usahay ginagamit ni Jesus an sugad nga mga pakiana. (Mateo 11:7-9) Dugang pa, katapos han introduksyon, an mamumulong mahimo magpakiana basi ipatin-aw an importante nga mga punto nga paghihisgotan. Mahimo hiya sumiring: “Ha aton paghisgot yana nga adlaw, aton tatagdon an mga baton ha masunod nga mga pakiana . . .” Katapos, ha konklusyon, mahimo niya unabihon iton nga mga pakiana ha pagrepaso han importante nga mga punto.

12. Paghatag hin ehemplo nga nagpapakita kon paonan-o magagamit han Kristiano nga mga tigurang an mga pakiana ha pagbulig ha mga igkasi-tumuroo nga maliaw han Pulong han Dios.

¹² Ha ira buruhaton nga pagbisita ha kabugtoan, magagamit han Kristiano nga mga tigurang an mga pakiana ha pagbulig ha ‘nasusubo nga kalag’ nga maliaw han Pulong ni Jehova. (1 Tesalonika 5:14, NW) Pananglitan, basi mabuligan an usa nga masurub-on, mahimo basahon han tigurang an Salmo 34:18. Ito nasiring: “Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.” Basi masiguro nga nasasabtan han masurub-on kon paonan-o personal nga naaplikar ini ha iya, an tigurang mahimo magpakiana: ‘Kan kanay hirani hi Jehova? Inaabat mo ba usahay nga ‘masurub-on an imo kasingkasing’ ngan “mabinasulon an espiritu”? Sugad han ginsisiring han Biblia, kon hirani hi Jehova ha sugad nga mga tawo, diri ba ito nangangahulogan nga hirani hiya ha imo?’ An sugad nga mapinairon nga pagpasarig makakadasig han espiritu han usa nga nasusubo.—Isaias 57:15.

Lohikal nga Pangatadongan

13, 14. (a) Paonan-o kita mangangatadongan ha usa nga nasiring nga diri hiya natoo ha Dios nga diri niya nakikita? (b) Kay ano nga diri kita sadang maglaom nga makukombinse an ngatanan?

¹³ Ha aton ministeryo, karuyag naton nga madasig an mga kasingkasing pinaagi han maopay, makakombinse nga pangatadongan. (Buhat 19:8; 28:23, 24) Nangangahulogan ba ini nga kinahanglan hibaroan naton an paggamit hin komplikado nga pangatadongan basi makombinse an iba mahitungod han kamatuoran han Pulong han Dios? Diri. An maopay nga pangatadongan diri kinahanglan magin komplikado. An lohikal nga mga pangatadongan nga iginpresentar ha simple nga paagi agsob nga pinakaepektibo. Tagda an usa nga ehemplo.

¹⁴ Paonan-o kita mabaton kon an usa nasiring nga diri hiya natoo ha Dios nga diri niya nakikita? Mahimo kita mangatadongan sumala ha natural nga balaud han hinungdan ngan epekto. Kon naoobserbahan naton an epekto, kinakarawat naton nga may-ada gud hinungdan. Mahimo kita sumiring: ‘Kon aadto ka ha hirayo nga lugar ngan nakakita ka hin marig-on nga balay nga puno hin pagkaon (epekto), kakarawaton mo dayon nga may-ada tawo (hinungdan) nga nagtukod hito nga balay ngan ginpuno an mga estante hito hin mga pagkaon. Sugad man, kon nakikita naton an disenyo ha palibot ngan an abunda nga pagkaon ha “estante” (epekto) han tuna, diri ba makatadunganon an pagkarawat nga may-ada Usa (hinungdan) nga nagbuhat hito?’ An simple nga pangatadongan han Biblia matin-aw nga nagpapahayag hini nga kamatuoran: “An tagsatagsa nga balay ginhimo hin usa; kondi an naghimo han ngatanan nga mga butang amo an Dios.” (Hebreo 3:4) Kondi, bisan pa kon maopay an aton pangatadongan, diri makukombinse an ngatanan. An Biblia nagpapahinumdom ha aton nga adto la nga “husto nga nakahilig” an magigin mga tumuroo.—Buhat 13:48, NW; 2 Tesalonika 3:2.

15. Ano nga pangatadongan an magagamit naton ha pagpatin-aw han mga kalidad ngan mga paagi ni Jehova, ngan ano an duha nga ehemplo nga nagpapakita kon paonan-o naton mahimo gamiton an sugad nga pangatadongan?

¹⁵ Ha aton pagtutdo, ha ministeryo ha kanataran man o ha kongregasyon, magagamit naton an pangatadongan ha pagpatin-aw han mga kalidad ngan mga paagi ni Jehova. Epektibo an ‘labi pa gud’ nga pangatadongan nga usahay ginamit ni Jesus. (Lukas 11:13; 12:24) Kon iginbasar ha kaibahan, ini nga klase hin pangatadongan makakahimo hin hilarom nga epekto. Basi igbuhayhag an pagin sayop han doktrina han naglalaga nga impyerno, mahimo kita sumiring: ‘Waray mahigugmaon nga amay nga magsisirot ha iya anak pinaagi han pagkapot ha kamot han bata dida ha kalayo. Labi pa gud an ideya han naglalaga nga impyerno nga makangingirhat gud ha aton mahigugmaon nga langitnon nga Amay!’ (Jeremias 7:31) Ha pagtutdo nga hi Jehova nagmamangno ha iya mga surugoon sugad nga mga indibiduwal, mahimo kita sumiring: ‘Kon maaram hi Jehova han ngaran han kada usa han binilyon nga mga bitoon, labi pa gud nga hiya magmamangno ha mga tawo nga nahigugma ha iya ngan ginlukat pinaagi han presyoso nga dugo han iya Anak!’ (Isaias 40:26; Buhat 20:28) An sugad makakombinse nga pangatadongan makakabulig ha aton nga matugkad an mga kasingkasing han iba.

Angayan nga mga Ilustrasyon

16. Kay ano nga birilhon an mga ilustrasyon ha pagtutdo?

¹⁶ An epektibo nga mga ilustrasyon amo an panakot nga makakahimo han aton pagtutdo nga mas makaruruyag ha iba. Kay ano nga birilhon an mga ilustrasyon ha pagtutdo? Usa nga edukador an nagsiring: “An paghunahuna nga waray matin-aw nga hulagway usa han pinakamakuri nga mga nahihimo han tawo.” An mga ilustrasyon nagpapasilsil hin matin-aw nga mga hulagway ha aton hunahuna, nabulig ha aton basi mas masabtan hin bug-os an bag-o nga mga ideya. Maabtik hi Jesus ha iya paggamit hin mga ilustrasyon. (Markos 4:33, 34) Aton paghisgotan kon paonan-o naton magagamit ini nga paagi han pagtutdo.

17. Ano an upat nga butang nga nakakahimo han epektibo nga ilustrasyon?

¹⁷ Ano an nakakahimo han ilustrasyon nga epektibo? Siyahan, kinahanglan naangay ito ha aton mamarati, ginagamit an mga kahimtang nga masasabtan dayon han aton mga mamarati. Nahinunumdoman naton nga ginkuha ni Jesus an damu han iya mga ilustrasyon tikang ha adlaw-adlaw nga kinabuhi han iya mga mamarati. Ikaduha, an ilustrasyon kinahanglan naangay ha punto nga iginpapatin-aw. Kon an pagtanding diri naangay ha punto, an ilustrasyon bangin diri masabtan han aton mga mamarati. Ikatulo, an ilustrasyon diri sadang mag-upod hin diri-kinahanglanon nga mga detalye. Hinumdumi nga iginhatag ni Jesus an kinahanglanon nga mga detalye kondi ginkuha an mga diri-kinahanglanon. Ikaupat, kon ginagamit naton an ilustrasyon, sadang  siguruhon naton nga matin-aw an aplikasyon. Kon diri, bangin diri masabtan han iba an punto nga ginhihisgotan.

18. Paonan-o kita makakahunahuna hin angayan nga mga ilustrasyon?

¹⁸ Paonan-o kita makakahunahuna hin angayan nga mga ilustrasyon? Diri kinahanglan maghunahuna kita hin hilawig, magarbo nga mga istorya. Epektibo an halipot nga mga ilustrasyon. Paghunahuna la hin mga ehemplo han punto nga ginhihisgotan. Pananglitan, aton ginhihisgotan an mahitungod han pagpasaylo han Dios, ngan karuyag naton iilustrar an punto ha Buhat 3:19, diin nasiring ito nga hi Jehova ‘nagpara’ han aton mga sala. Ito mismo usa ka matin-aw nga paagi han pagkayakan, kondi ano an aktuwal nga ehemplo nga magagamit naton ha pag-ilustrar han punto—usa nga paraan? usa nga espongha? Mahimo kita sumiring: ‘Kon hi Jehova nagpapasaylo han aton mga sala, iya ginpapara ito sugad hin nagamit hin espongha (o usa nga paraan).’ Masayon gud masabtan an punto han sugad kasimple nga ilustrasyon.

19, 20. (a) Diin kita makakaagi hin maopay nga mga ilustrasyon, ngan diin kita makakaagi hin sugad hito nga mga ilustrasyon? (b) Ano an pipira nga ehemplo han epektibo nga mga ilustrasyon nga iginpublikar ha aton literatura? (Kitaa liwat an kahon.)

¹⁹ Diin ka makakaagi hin angayan nga mga ilustrasyon, upod na an totoo-ha-kinabuhi nga mga ehemplo? Kitaa ito ha imo kalugaringon nga kinabuhi o ha magkalainlain nga mga gintikangan ngan mga eksperyensya han mga igkasi-tumuroo. An mga ilustrasyon mahimo pilion tikang ha damu nga iba nga mga surok, upod na an may-kinabuhi ngan waray-kinabuhi nga mga butang, mga butang ha balay, o bag-o nga hitabo nga hinbabaroan ha komunidad. An epektibo nga paagi ha pakaagi hin maopay nga mga ilustrasyon amo an pagin alerto, “nag-oobserba hin maopay” ha adlaw-adlaw nga mga kahimtang ha aton palibot. (Buhat 17:22, 23, NW) Usa nga reperensya mahitungod han pamulong ha publiko an nagsasaysay: “An mamumulong nga nag-oobserba ha kinabuhi han tawo ngan ha magkalainlain nga mga buruhaton hito, nakikiistorya ha ngatanan nga klase hin mga tawo, nag-uusisa hin maopay han mga butang ngan nagpapakiana tubtob nga masabtan niya ito, magtitirok hin damu nga materyal sugad nga ilustrasyon nga mabulig gud ha iya kon ginkikinahanglan.”

²⁰ May-ada lain pa nga hura nga surok han epektibo nga mga ilustrasyon—An Barantayan, Awake!, ngan iba nga literatura nga iginpublikar han mga Saksi ni Jehova. Mahibabaro ka hin damu tikang ha pag-obserba kon paonan-o ginagamit hini nga mga publikasyon an mga ilustrasyon. c Tagda, pananglitan, an ilustrasyon nga ginamit ha parapo 11 han kapitulo 17 ha Kahibaro nga libro. Iginpapariho hito an magkalainlain nga mga personalidad ha kongregasyon ngada ha magkalainlain nga mga awto nga nagbibiyahe katupad mo ha kalsada. Ano an nakakahimo hito nga epektibo? Tigamni nga iginbasar ito ha adlaw-adlaw nga mga kahimtang, nga pariho gud ha punto nga iginpapahayag, ngan matin-aw an aplikasyon. Mahimo naton gamiton an iginpublikar nga mga ilustrasyon ha aton pagtutdo, bangin ginagamit ito ha mga panginahanglan han estudyante han Biblia o ipahiuyon ito basi magamit ha usa nga pahayag.

21. Ano an mga balos han pagin epektibo nga magturutdo han Pulong han Dios?

²¹ Daku an mga balos han pagin epektibo nga magturutdo. Kon kita nagtututdo, nagpapaangbit kita ha iba; naghahatag kita ha pagbulig ha ira. An sugad nga paghatag nagdadara hin kalipay, kay an Biblia nasiring: “Mas daku an kalipay ha paghatag kay ha pagkarawat.” (Buhat 20:35, NW) Para ha mga magturutdo han Pulong han Dios, iton nga kalipay amo an kalipay ha paghibaro nga iginhahatag naton an usa ka butang nga totoo ngan may-ada nagpapabilin nga bili—an kamatuoran mahitungod kan Jehova. Magkakaada liwat kita katagbaw tungod ha paghibaro nga aton ginsusubad an Bantogan nga Magturutdo, hi Jesu-Kristo.

[Mga footnote]

Nahinunumdoman Mo Ba?

• Paonan-o kita makakagtutdo ha simple nga paagi kon nagdudumara hin pag-aram ha Biblia ha balay? kon nagpapahayag ha kongregasyon?

• Paonan-o naton magagamit hin epektibo an mga pakiana kon nagsasangyaw ha kada balay?

• Paonan-o naton magagamit an lohikal nga pangatadongan ha pagpatin-aw han mga kalidad ngan mga paagi ni Jehova?

• Diin kita makakaagi hin angayan nga mga ilustrasyon?

[Mga Pakiana]

 [Kahon/Retrato ha pahina 23]

Nahinunumdoman Mo ba Ini nga mga Ilustrasyon?

An masunod amo an pipira la han epektibo nga mga ilustrasyon. Kay ano nga diri kitaon an reperensya ngan tigamni kon paonan-o nakabulig an ilustrasyon basi pabug-atan an punto nga ginhihisgotan?

• Pariho han mga sirkero ha trapeze o magpadis ha skating, adton nangangalimbasog ha pagkaada hin malampuson nga pag-asawa nadepende gud ha pagin magkaangay nga magpadis.—An Barantayan, Mayo 15, 2001, pahina 16.

• An pagpahayag han imo mga pagbati pariho han pag-itsa hin bola. Maipapasa mo ito hin mahinay o maipapasa mo ito hin makusog salit makakadaot ito.—Awake!, Enero 8, 2001, pahina 10.

• An paghibaro ha pagpahayag hin gugma pariho han pag-aram hin bag-o nga yinaknan.—An Barantayan, Pebrero 15, 1999, pahina 18, 22-3.

• An napanunod nga sala maipapariho ha nahitatabo kon an mga rekord han kompyuter nahuhugawan han virus.—Is There a Creator Who Cares About You?, pahina 156.

• An nahihimo han espiritismo para ha mga demonyo pariho han nahihimo han paon han mga parapanganop. An espiritismo nakakadani hin biktima.—Kahibaro nga Nagtutugway Ngadto ha Kinabuhi nga Waray Kataposan, pahina 111.

• An paagi han pagluwas ni Jesus ha mga anak ni Adan maipapariho ha paagi han bahandianon nga mabinuligon nga tawo nga nagbayad han utang han kompanya (nga ginasto han malimbong nga manidyer) ngan iya inabrihan utro an pabrika, salit nabuligan an damu nga mga empleyado hito.—The Watchtower, Pebrero 15, 1991, pahina 13.

• Sugad la hadton naapresyar han arte nga mangangalimbasog gud hinduro nga ipahiuli an nadaot gud nga obra maestra nga dibuho, mahimo pasayloon ni Jehova an aton pagkadiri-hingpit, kitaon an maopay ha aton, ngan ha kataposan ipahiuli kita ha hingpit nga kahimtang nga nawara ni Adan.—The Watchtower, Pebrero 15, 1990, pahina 22.

[Mga Retrato ha pahina 20]

An totoo nga mga Kristiano mga magturutdo han Pulong han Dios

Retrato ha pahina 21]

Magagamit han mga tigurang an mga pakiana ha pagbulig ha mga igkasi-tumuroo nga maliaw han Pulong han Dios