Pagliaw ha mga Panahon han Kakurian

AN MGA sumat yana nga mga panahon diri gud nakakaliaw. Usa nga tawo an nagsurat: “An mga hitabo yana nakakaguol gud salit agsob nga diri kita nakakadesisyon kon may-ada ba kita igo nga kaisog ha pagkita ha mga sumat ha ala-sais.” An kalibotan puno hin girra, magpakangingirhat nga mga buhat, pag-antos, krimen, ngan sakit—mga karaotan nga bangin ha diri maiha direkta nga makaapekto ha aton kon waray pa ito makaapekto ha aton.

Husto nga igintagna han Biblia ini nga kahimtang. Ha paghulagway han aton panahon, hi Jesus nagsiring nga magkakaada dagku nga mga girra, mga peste, mga kakulang hin pagkaon, ngan mga linog. (Lukas 21:10, 11) Ha pariho nga paagi, hi apostol Pablo nagsurat mahitungod han “magpakalilisang nga mga panahon [“nga makuri pakibagayan,” NW],” nga an mga tawo magigin mabangis, mga mahigugmaon ha salapi, ngan waray gugma ha kaopayan. Iya gintawag ito nga panahon nga “kataposan nga mga adlaw.”—2 Timoteo 3:1-5.

Salit, ha pagsaysay han mga kahimtang ha kalibotan, an mga sumat may kaparihoan ha mga tagna han Biblia. Kondi ito la an ginkaparihoan. An Biblia naghahatag hin punto nga diri iginhahatag han mga sumat. Pinaagi han inspirado nga Pulong han Dios, masasabtan naton diri la kon kay ano nga may-ada duro nga karaotan kondi kon ano liwat an magigin kahimtang han tidaraon.

 Kon Paonan-o Gintatagad han Dios an Karaotan

An Biblia nagsasaysay kon paonan-o gintatagad han Dios an nakakaguol nga mga kahimtang ha aton panahon. Bisan kon maaram na hiya nga daan han mga problema yana, diri niya uuyonan o tutugotan ito tubtob ha waray kataposan. “An Dios amo an gugma,” nagsurat hi apostol Juan. (1 Juan 4:8) Napaid gud hi Jehova ha mga tawo ngan nangangalas ha ngatanan nga karaotan. Angayan gud nga mahimo kita dumaraon ha Dios para han pagliaw, tungod kay hiya maopay ngan mapinairon ngan may-ada gahum ngan hingyap nga wad-on an karaotan ha tuna. An salmista nagsurat: “Pagluluwason [han pinili nga langitnon nga Hadi han Dios] an kablasanon nga nangangaraba, ngan an makurion nga waray gud natambulig: malolooy hiya ha mga kablasanon ngan makinurion, ngan an mga kalag han mga makinurion pagluluwason. Tutubson niya an ira mga kalag tikang ha pagtalumpigos ngan paglugos; ngan marahalon an ira dugo ha iya mga mata.”—Salmo 72:12-14.

Nalolooy ka ba hadton nag-aantos? Bangin nalolooy ka. An empatiya usa nga kalidad nga iginbutang ni Jehova ha aton, tungod kay ginlarang kita ha iya dagway. (Genesis 1:26, 27) Salit, makakasarig kita nga napaid hi Jehova ha pag-antos han tawo. Hi Jesus, nga mas duok nga nakilala kan Jehova kay ha bisan hin-o, nagtutdo nga hi Jehova interesado gud ha aton ngan puno hin maloloy-on nga pagpaid.—Mateo 10:29, 31.

An mga linarang mismo nagpapamatuod nga napaid an Dios ha katawohan. Hi Jesus nagsiring nga “ginpasirang [han Dios an] adlaw ngadto ha mga magraot ngan ha mga mag-opay, ngan pinauuranan an mga magtadong ngan diri mga magtadong.” (Mateo 5:45) Ha mga tawo ha siyudad han Listra, hi apostol Pablo nagsiring: “[An Dios] waray magbilin ha iya ngahaw hin pagtestigo, nga nagbuhat hin maopay, nga naghatag ha iyo hin uran tikang ha langit, ngan hin panahon nga mauswagon, nga ginpuno an iyo mga kasingkasing hin karan-on ngan hin kalipay.”—Buhat 14:17.

Hin-o an Responsable han Karaotan?

Makatirigamnan nga hi Pablo nagsiring liwat ha mga tawo han Listra: “Ha nag-agi na nga mga katulinan, itinugot [han Dios] ha ngatanan nga mga Hentil ha paglakat ha ira kalugaringon nga mga dalan.” Salit, an mga nasud—o an mga tawo mismo—an responsable gud ha kadak-an han ira mga kahimtang. Diri sadang basulon an Dios.—Buhat 14:16.

Kay ano nga tinutugotan han Dios nga mahitabo an karaotan? May-ada ba hiya bubuhaton mahitungod hito? An baton hini nga mga pakiana mabibilngan ha Pulong han Dios la. Tungod ito kay an baton duok nga nakakaw-ing ha usa pa nga espiritu nga persona ngan ha usa nga isyu nga iya iginbangon ha diri-nakikita nga lugar han mga espirituhanon.

[Mga Retrato ha pahina 4]

Kon may-ada empatiya an mga tawo, diri ba sadang magin mas mapinairon an Dios ha pag-antos han tawo?

 [Ginkuhaan han mga Retrato ha pahina 2]

KOBRE: Tank: UN PHOTO 158181/J. Isaac; linog: San Hong R-C Picture Company

[Ginkuhaan han Retrato ha pahina 3]

Nagugutom nga bata: UN PHOTO 146150 BY O. MONSEN