Ginkikinahanglan Naton Ngatanan an Kumendasyon

MAKARURUYAG ito nga adlaw para ha gutiay nga bata nga babaye. Bisan kon kinahanglan sawayon hiya ha iba nga mga panahon, hini nga adlaw, buotan gud hiya. Kondi, hiton nga gab-i, katapos pahigdaon an bata, hinbatian han iya iroy nga nagtatangis hiya. Han ginpakianhan kon kay ano nga nagtatangis hiya, nagluluha hiya nga nagsiring: “Diri ba ako maopay nga bata yana nga adlaw?”

Iton nga pakiana nakasakit gud han iroy. Madagmit hiya pirme ha pagsaway ha iya anak. Kondi hini nga adlaw, bisan kon nakita niya nga nangalimbasog gud an iya anak nga gumawi hin maopay, an iroy waray magyakan hin bisan usa nga pulong hin apresasyon.

Diri la gudtiay nga kabataan an nagkikinahanglan hin kumendasyon ngan pagpasarig. Ginkikinahanglan ito naton ngatanan—sugad la han pagkinahanglan naton hin sagdon ngan pagsaway.

Ano an inaabat naton kon nakakarawat kita hin kinasingkasing nga kumendasyon? Diri ba ito nagpapalipay han aton kasingkasing ngan nagdadasig ha aton? Sigurado nga inaabat naton nga may-ada usa nga nakaobserba, usa nga nagtatagad. Nagpapasarig ito ha aton nga an aton ginbuhat takos han pangalimbasog, ngan nagpapagios ito ha aton nga mangalimbasog pa gud ha tidaraon. Diri urusahon nga an sinsero nga kumendasyon agsob nga nakakadani ha aton ngada ha tawo nga nahatag hin panahon ha pagyakan hin makapadasig.—Proberbios 15:23.

Nasabtan ni Jesu-Kristo nga ginkikinahanglan an paghatag hin kumendasyon. Ha parabola han mga talento, an agaron (nga naghuhulagway kan Jesus mismo) malipayon nga naghatag hin kumendasyon ha kada usa han duha nga matinumanon nga uripon, nasiring: ‘Maopay nga buhat, maopay ngan matinumanon nga uripon!’ Makalilipay gud ito! Bisan kon magkaiba gud an ira mga abilidad ngan mga nahimo, nakakarawat hira hin pariho nga kumendasyon.—Mateo 25:19-23.

Salit hinumdoman naton an iroy hiton nga gutiay nga bata. Diri kinahanglan maghulat kita nga magtangis an iba antes naton ihatag ha ira an kumendasyon. Lugod, siguruhon naton nga magbiling hin mga higayon ha paghatag hin kumendasyon. Oo, may-ada kita maopay nga hinungdan ha paghatag hin sinsero nga kumendasyon ha ngatanan nga higayon.