Kay Ano nga Makuri Gud an Pangaro hin Pasaylo?

HAN Hulyo 2000, an California State Legislature ha Estados Unidos nagpasa hin usa nga balauron nga dinisenyo ha pagwara han obligasyon han mga tawo kon magpakita hira hin kalooy ha indibiduwal nga nadaot ha aksidente nga hira mismo an hinungdan. Kay ano nga nagpasa hin sugad nga balauron? Naobserbahan nga kon an usa nga aksidente nagin hinungdan han pagkabaldado o kadaot, agsob nga nag-aalang an mga tawo ha pangaro hin pasaylo tungod han kahadlok nga hunahunaon ito han korte sugad nga pag-angkon han sala. Ha luyo nga bahin, bangin masina adton naabat nga sadang mangaro dayon hin pasaylo ha ira, ngan an gutiay nga aksidente mahimo magin daku nga samok.

Siyempre, diri kinahanglan mangaro hin pasaylo para han aksidente nga diri mo sayop. Ngan bangin may-ada mga panahon nga an maaramon nga buhat amo an pagin mabinantayon ha imo isisiring. An daan nga proberbio nasiring: “Ha kadam-an nga mga pulong diri kukulangon an kalapasan; kondi hiya nga magpupugong han iya mga im-im nagbubuhat ha makinaadmananon.” (Proberbios 10:19; 27:12) Ha gihapon, mahimo ka magin matinalahuron ngan mabinuligon.

Kondi, diri ba totoo nga damu nga mga tawo an inundang na ha pangaro hin pasaylo, bisan kon waray nahidadabi nga mga  kaso? Ha balay an asawa bangin magreklamo, ‘An akon bana diri gud nangangaro hin pasaylo ha bisan ano.’ Ha trabaho an usa nga kapatas bangin magreklamo, ‘Diri kinakarawat han akon mga trabahador an ira mga sayop, ngan talagsa gud la hira mangaro hin pasaylo.’ Ha eskwelahan an maestra bangin magreport, ‘An kabataan waray mabansay ha pangaro hin dispensa.’

An usa nga hinungdan kon kay ano nga an usa nga tawo nag-aalang ha pangaro hin pasaylo bangin amo an kahadlok nga diri ito karawaton. Tungod kay nababaraka nga diri tagdon an pagbati, bangin diri niya ipahayag kon ano gud an iya inaabat. Ha pagkamatuod, bangin likyan na gud han tawo nga nasakitan an nakasakit ha iya, salit nagigin makuri hinduro an pagpahiuli han relasyon.

An kawaray pagtagad ha mga pagbati han iba nga mga tawo bangin usa pa nga hinungdan kon kay ano nga nag-aalang an iba nga mangaro hin pasaylo. Bangin hira mangatadongan, ‘An pangaro hin pasaylo diri makakawara han sayop nga akon na nabuhat.’ May-ada pa ngani iba nga nag-aalang ha pangaro hin pasaylo tungod han damu nga posible nga mga resulta. Hira naghuhunahuna, ‘Babasulon ba ako ngan pababayaron han danyos?’ Kondi, an gidadakui nga ulang ha pagkarawat han sayop amo an garbo. An tawo nga mapahitas-on ha pagsiring nga “Pasayloa ako” bangin ha pagkamatuod naghuhunahuna, ‘Diri ko karuyag nga mawad-an dungog pinaagi han pagkarawat han akon sayop. Magpapaluya ito han akon katungdanan.’

Ha anoman nga hinungdan, damu an nakukurian ha pangaro hin pasaylo. Kondi importante gud ba an pangaro hin pasaylo? Ano an mga kapulsanan han pangaro hin pasaylo?

[Retrato ha pahina 3]

“An kabataan waray mabansay ha pangaro hin dispensa”

[Retrato ha pahina 3]

“An akon bana diri gud nangangaro hin pasaylo”

[Retrato ha pahina 3]

“Diri kinakarawat han akon mga trabahador an ira mga sayop”